Яңалыклар

«Татнефть Арена»да зур концерт!
Популяр яңалыклар

«Татнефть Арена»да зур концерт!

7 май – күңелле, дәртле, онытылмас мизгелләр көне булачак! Бу көнне «Татнефть Арена» сәхнәсендә «Болгар радиосы»ның масштаблы концерты узачак. Татарстанның иң танылган җырчылары бер сәхнәгә җыелып, тамашачыларга чын мәгънәсендә музыкаль бәйрәм бүләк итәчәкләр. Илсөя Бәдретдинова, Элвин Грей, Ришат Төхвәтуллин, Фирдус Тямаев, Әнвәр Нургалиев, Марат Яруллин, Илмира Нәгыймова, Рифат Зарипов, Илнат Фәрхуллин, Зинира һәм Ризат Рамазановлар, Алмаз һәм Зөлфирә Мирзаяновлар, Илшат Сафин, Алсу һәм Азат Фазлыевлар – болар барысы да сәхнәдә сезне көтә! Бу кичтә тамашачыларны җанлы башкару, яңа дуэтлар, көтелмәгән чыгышлар һәм бик күп сюрпризлар көтә. Татар эстрадасының иң якты йолдызлары катнашындагы концерт – моны сагынып сөйләрлек вакыйга булачак! Син дә бу көнне безнең белән үткәр! Иң зур концертка санаулы көннәр калды! Билетларны 500 сумнан алып табып була – ашыгыгыз!

05.05.2025
«Бишек җырлары»: яңа чыгарылыш!
Канал яңалыклары

«Бишек җырлары»: яңа чыгарылыш!

«ШАЯН ТВ» каналы тәкъдим иткән «Бишек җырлары» проекты үзенең мавыктыргыч һәм күңелләргә үтеп керердәй яңа чыгарылышлары белән сөендерә! Тамашачылар бүген бу проектның премьерасын күрә алачак. Проектның төп максаты – ана белән бала арасында рухи якынлык тудыру, ата-аналар белән балалар арасында җылы һәм ышанычлы мөнәсәбәтне ныгыту. Борынгыдан килгән милли традицияләрне саклап, халык иҗаты аша сабый күңеленә юл табу – «Бишек җырлары» тапшыруының асылы. Яңа сериядә сезне бик үзенчәлекле, моңлы, тирән мәгънәле җыр көтә – «Бәллү» бишек җыры. Бу әсәрне Татарстанның һәм Россиянең халык артисты, күренекле җырчы Винера Ганиева башкара. Җырның сүзләрен бөек татар шагыйре Дәрдемәнд язган, көй авторы – күренекле композитор Резеда Ахиярова, ә җырга заманча яңгырашны – аранжировканы – талантлы музыкант Вадим Усманов эшләде. Бу тапшыру – милли җырлар аша балаларга туган телнең моңын, милли традицияләрне җиткерү, гаилә җылысын саклап калу юнәлешендә зур адым. Яңа чыгарлышларны сылтама аша кереп, безнең ВКонтакте төркемендә карый аласыз.

03.05.2025
«ДилиНали» белән яшелчәләр өйрәнәбез
Канал яңалыклары

«ДилиНали» белән яшелчәләр өйрәнәбез

«ДилиНали» тапшыруының яңа чыгарылышы дөнья күрде! Бу юлы без сезнең белән яшелчәләр дөньясына күңелле һәм мавыктыргыч сәяхәт кылачакбыз. Яшелчәләрнең исемнәрен, тышкы кыяфәтләрен һәм кайда үсүләрен өйрәнәбез, ә күңелле көйләр бу барысын тагын да кызыклырак итәчәк. Музыкаль формада яшелчәләр белән танышу мөмкинлеген кулдан ычкындырмагыз – яңа чыгарылышны карап калыгыз! Безнең ВКонтакте төркемендә карарга мөмкин.

30.04.2025
Безнекеләр булдыра!
Популяр яңалыклар

Безнекеләр булдыра!

Быел 25 нче тапкыр уздырылган «Созвездие – Йолдызлык» республикакүләм фестиваль-конкурсы тантаналы рәвештә тәмамланды! Йомгаклау концерты 30 нчы апрель көнне Казан шәһәренең КСК «Пирамида» сәхнәсендә узды. Без зур горурлык белән «ШАЯН ТВ» телеканалының сәләтле малайларын котлыйбыз! Алар бу фестивальдә лаеклы чыгыш ясап, тамашачыларның да, жюри әгъзаларының да йөрәген яуладылар. ГРАН-ПРИ иясе булып Камиль Валеев танылды! Камиль – «Сәйлән»проектының беренче сезоны һәм «Сезоннар ярышы» җиңүчесе. Ул үзенең көчле тавышы, сәхнә осталыгы һәм тырышлыгы белән һәркемне сокландырды. Быел фестивальдә тагын бер мөһим яңалык – Илфат Ибраһим улы Абдрахманов исемендәге махсус премия беренче тапкыр тапшырылды. Бу дәрәҗәле бүләккә безнең тагын бер йолдызыбыз – Әмир Исрафилов лаек булды! Шулай ук Әмир «Конферанс» номинациясендә 1 нче урынга лаек булды. Аңа киләчәктә дә иҗади уңышлар, яңа үрләр телибез! Без барлык катнашучылар белән горурланабыз! Фестивальдә катнашкан һәр бала – үзенчәлекле, сәләтле һәм иҗатка гашыйк! Аларның һәркайсы – безнең киләчәгебез, татар мәдәниятенең өметле йолдызлары. «ШАЯН ТВ» сәхнәдә балкыган барлык йолдызларын котлый һәм тагын да зуррак уңышлар тели!

30.04.2025
Зөлфәт Зиннуров кызы Зәлия белән «Парта»да кунакта!
Канал яңалыклары

Зөлфәт Зиннуров кызы Зәлия белән «Парта»да кунакта!

Дуслар, сөенечле яңалык! Безнең «ВКонтакте» төркемебездә күпләр яратып өлгергән «Парта» тапшыруының алтынчы чыгарылышы дөнья күрде!   Бу юлы сезне аеруча кызыклы кунаклар көтә: татар эстрадасы йолдызы, танылган алып баручы Зөлфәт Зиннуров һәм аның кызы Залия мәктәп программасы һәм зирәклек буенча үз көчләрен сынап карыйлар.   Ә аларны сынау бурычы – даими алып баручыларыбыз Гөлназ Сафарова һәм аның улы Айдан өстендә.   Кем остарак булыр? Мәктәп фәннәрен яхшырак кем хәтерли – ата-аналармы, әллә балалармы?   Кызыклы, күңелле һәм файдалы тамаша вәгъдә итәбез!   Яңа чыгарылышны карау өчен «ВКонтакте» төркемебезгә рәхим итегез!   Дусларыгыз белән дә бүлешергә онытмагыз – кемнең белемлерәк икәнен тикшерик!

29.04.2025
Бию көне белән, дуслар!
Кызыклы фактлар

Бию көне белән, дуслар!

Һәр елны 29 апрельдә без Бөтендөнья бию көнен билгеләп үтәбез. Бу гади генә биергә сәбәп түгел –  бу чын хәрәкәт, иреклек һәм иҗат бәйрәме! Бию кешеләрне, аларның яшенә, милләтенә һәм кызыксынуларына карамастан, берләштерә. Ул бигрәк тә балаларга һәм үсмерләргә якын, чөнки хәрәкәт –алар тормышының аерылгысыз өлеше. Бию –  ул гүзәллек кенә түгел. Ул үзеңне күрсәтергә, сүзсез генә тарих сөйләргә, көйне бөтен тәнең белән тоярга ярдәм итә. Бу –  аралашу ысулы, хәтта син башкалар белән бер телдә сөйләшмәсәң дә. Без биегәндә нәрсә тоябыз, нәрсә ошый –  барысын да күрсәтеп була. Балалар һәм үсмерләр өчен бию – үсеш мөмкинлеге дә. Ул координацияне, сыгылмалылыкны яхшырта, сәламәтлекне ныгыта, командада эшләргә, игътибарлы булырга һәм дисциплинага өйрәтә. Өстәвенә, үз-үзеңә ышанычны арттыра. Сәхнәгә чыккан яки берәр социаль мәйданчыкта бию видеосы төшергән һәркем моны белә! Бүген бию – ул гел классик балет кенә түгел. Хәзер хип-хоп, джаз-фанк, контемп, k-pop, брейк-данс һәм тагын бик күп юнәлешләр бар. Һәр кеше күңеленә якын стиль таба ала. Музыка яратсаң, хәрәкәт итәргә теләсәң, үзеңне күрсәтәсең килсә –  бию нәкъ менә синең өчен. 29 апрель көнне яраткан җырыңны кабызып, күңелең теләгәнчә биергә генә кирәк. Бие – ничек тоясың, шулай. Чөнки бию – ул шатлык, ә шатлыкның чиге юк! Теләсәң –  ялгызың бие, теләсәң –  дусларың белән. Иң мөһиме –  моны күңел биреп эшлә! Шулай ук «ШАЯН ТВ» каналында яраткан «Шома бас» тапшыруын да карарга онытма!

29.04.2025
Казанга кыш килә?
Популяр яңалыклар

Казанга кыш килә?

Бүген, 28 апрельдә, Казанда кышка охшаган һава торышы хөкем сөрә. Шәһәрдә температура +4 градус тирәсендә генә саклана, ләкин бик көчле җил исә — тизлеге сәгатенә 14 метрга кадәр җитә. Күпчелек казанлыларга яңадан кышкы киемнәрен шкафтан чыгарырга туры килде. Синоптиклар билгеләп үткәнчә, мондый салкыннар май бәйрәмнәре вакытында соңгы 150 елда күзәтелмәгән. Суыклар Россиянең Төньяк-Көнбатыш өлешенә һәм Себергә дә таралачак. Шулай ук, Идел буе төбәге, шул исәптән Казан да, гадәттәгедән күпкә түбән температуралар белән очраша. Казанда язның соңгы көннәрендә кышкы табигать кабат үзенең үзгәрүчән холкын күрсәтте.

28.04.2025
Prev. 1 ... 24 25 26 27 28 ... 378 Next
Главная Программа Видео Шортс Поиск