Яңалыклар

9 Май көненә программа

Казанда 9 Май – Җиңү көне уңаеннан зур бәйрәм чаралары узачак. Шәһәр халкы һәм кунаклар өчен парад, «Үлемсез полк» йөреше, концертлар, остаханәләр һәм төнге салют кебек күптөрле чаралар әзерләнгән. Бәйрәм программасы шәһәрнең төрле мәйданчыкларында узачак – Җиңү паркыннан алып Казан Кремленә кадәр. Иртәнге чаралар: Җиңү паркында һәм Меңьеллык мәйданда Бәйрәм 9:00 сәгатьтә Җиңү паркында чәчәкләр салу тантанасы белән башлана. 10:00 сәгатьтә Меңьеллык мәйданында тантаналы Җиңү парады үтәчәк. Аның артыннан ук, 11:00 сәгатьтә, Җиңү паркында өлкән сыйныф укучылары парады һәм «Җиңү фанфарлары» балалар фестиваленең гала-концерты булачак. «Үлемсез полк» йөреше 12:00 сәгатьтә Карл Маркс һәм Толстой урамнары киселешендә «Үлемсез полк» колоннасы туплана башлый. Йөреш 15:00 сәгатьтә старт ала һәм шәһәр үзәге буйлап үтә. Интерактив чаралар һәм концертлар 14:00 сәгатьтә Бауман урамында «Без тылда Җиңү өчен көрәштек» дигән ачык һавада интерактив программа башлана. 19:00 сәгатьтә Меңьеллык мәйданында Казан сәнгать осталары, яшьләр коллективлары һәм берләштерелгән хор катнашында зур концерт булачак. Казан Кремлендә бәйрәм чаралары 10:00 сәгатьтә «Кул Шәриф» мәчете янында «Хәтер дивары» акциясе узачак. Шул ук вакытта Спас манарасы янында «Җиңү хатлары» акциясе кысаларында хәрби вакытта югалганнарны эзләү пункты эшләячәк. Присутственный урыннар ишегалдында 10:00-12:00 аралыгында авиамодельләштерү буенча остаханәләр, ә 13:00-15:00 аралыгында һөнәрчелек үзәге осталары дәресләре оештырылачак. 11:00 сәгатьтә Пушечный ишегалдында беренче медицина ярдәме күрсәтү буенча остаханә, ә Сөембикә манарасы янында «Хәрби еллар җырлары һәм биюләре» концерты узачак. 12:00-13:30 сәгатьләрдә «Кул Шәриф» мәчете янында кыр кухнясы эшләячәк – кунаклар солдат боткасынан авыз итә алачак. Присутственный урыннар ишегалдындагы мәдәни программа 15:00 сәгатьтә – «Зинһар, яз» дип аталган фронттагы хатлар турында спектакль; 16:00 сәгатьтә – Юниор-оркестр башкаруында «Җиңү музыкасы» концерты; 17:00 сәгатьтә – Пушечный ишегалдында 1930–1940 еллар биюләренә багышланган «Җиңү вальсы» остаханәсе; 18:00 сәгатьтә – Татарстанның Дәүләт җыр һәм бию ансамбле катнашында «Сугыш булды...» спектакле; 20:00 сәгатьтә – «Без – 41 нче ел балалары» фильмы күрсәтеләчәк. Мэппинг-шоу һәм салют 9-11 май көннәрендә 20:00-23:00 аралыгында Казан Кремле диварларында мэппинг-шоу күрсәтеләчәк. Спас манарасы фасадында Бөек Җиңүгә һәм тарихи вакыйгаларга багышланган видеографика трансляцияләнәчәк. 22:00 сәгатьтә бәйрәм салюты башланачак. Аны иң уңайлы карау урыны – Казансу елгасы яр буе һәм акваториясе. 9 Майны Казанда якты, мәгънәле һәм күңелгә керерлек итеп уздырыгыз!

08.05.2025

Канал яңалыклары

Рәсем бәйгесе дәвам итә

Исегезгә төшерәбез, «ШАЯН ТВ» каналы Бөек Җиңүнең 80 еллыгы уңаеннан рәсемнәр бәйгесе игълан итте! Катнашучыларны истәлекле бүләкләр көтә! Әгәр син әле катнашырга өлгермәгән булсаң – ашык! Бәйге шартлары бик гади. Безнең Телеграм каналында һәм ВКонтакте төркемендә кагыйдәләр белән таныша аласың. Җиңүчеләрне «ШАЯН ТВ» каналыннан истәлекле бүләкләр көтә! Иҗат белән бергә бул – һәм җиңү сине табар! Уңышлар телибез!

08.05.2025

Кызыклы фактлар

Радио көне белән!

Ихлас күңелдән һөнәри бәйрәм – Радио көне белән котлыйбыз! Хөрмәтле коллегалар, «Болгар Радиосы»! Сезгә иҗади уңышлар, илһам, күңел күтәренкелеге һәм һәрчак яхшы хәбәрләр генә телибез! Тавышыгыз әле тагын бик күп еллар тыңлаучыларыгызны шатландырсын, илһам бирсен! Ә әлеге бәйрәмне безнең белән бергә үткәрергә теләсәгез – «Болгар радиосы»ның радио көненә багышланган грандиоз концертына килегез! Билет алып өлгермәгән булсагыз, әле җитешәсез: https://kzn.kassir.ru/koncert/den-radio-1#2734014

07.05.2025

Кызыклы фактлар

Бәйрәм уңаеннан кул эшләре

Җиңү көне – парадлар гына түгел, ул – хәтер, рәхмәт һәм горурлык көне. Бу көннең әһәмиятен балалар да аңларга тиеш. Моңа ирешүнең бер гади, әмма бик җылы юлы – темага багышланган кул эшләрен бергә ясау. Бу иҗатны гына түгел, ә тарихка хөрмәт хисен дә үстерә. 1. Кәгазьдән кызыл гвоздика – хәтер символы Гвоздика чәчәге Бөек Ватан сугышында һәлак булганнарны искә төшерә. Аны ясау җиңел: кызыл креп-кәгазьдән таҗлар, яшел кәгазьдән сабагын кисеп, аларны берләштерәбез. Мондый чәчәкне тәрәзәгә куярга яки ветераннарга бүләк итәргә була. 2. Георгий тасмасы белән открыткалар Георгий тасмасы – Җиңү көне символы. Балалар тыгыз кәгазьгә танк, салют, яки мәңгелек ут рәсеме ясый ала. Шуның өстенә кечкенә тасма ябыштырсаң, бик матур открытка килеп чыга. Бабайларга, әбиләргә бүләк итеп бирергә була. 3. Ак кәгазьдән тынычлык күгәре Күгәрчен – тынычлык символы. Балалар белән бергә ак кәгазьдән күгәрчен ясап, аны буярга яки аппликация рәвешендә эшләргә мөмкин. Мондый күгәрченнәрне тәрәзәгә элеп куярга була – шәһәрдә тынычлыкның әһәмиятен күрсәтә. 4. Картоннан мәңгелек ут Картоннан кызыл йолдыз кисеп алыгыз, буяп куегыз. Уртага сары, кызыл, әфлисун төсле кәгазьдән «ут» ясап куегыз. Балалар белән шул рәвешле Мәңгелек ут һәйкәлләренең мәгънәсе турында сөйләшү бик әһәмиятле. 5. Фольгадан медальләр Балалар картоннан түгәрәкләр кисеп, аларны алтын төсле кәгазь яки фольга белән тышлый ала. Өстенә «Җиңү өчен», «Бабама рәхмәт», «9 Май» кебек язу язсалар, бик матур һәм мәгънәле «орден» килеп чыга. Иң мөһиме – эшнең нәтиҗәсе түгел, ә бергә вакыт уздыру һәм аралашу. Һәр күгәрчен, һәр тасма – ул хәтер һәм дөньяда тынычлык өчен кечкенә, ләкин мөһим адым.

07.05.2025

Канал яңалыклары

Айгөл Габдрахманова «Сәләт»ле яшьләр турында

«МАРШРУТка»ның яңа чыгарылышында кунакта – «Сәләт» яшьләр үзәге директоры Айгөл Габдрахманова! Ул нефть тармагындагы һөнәрен калдырып, балалар белән эшләргә ни өчен карар кылуы, сәләтле яшьләр турында һәм үзенең яраткан мавыгулары хакында сөйләде. Тулы чыгарылышны безнең ВКонтакте төркемендә карый аласыз.

06.05.2025

Кызыклы фактлар

Бөек Җиңү турында шигырьләр

Тынычлыкның туган көне (Р.Миңнуллин) Минем бабай орденнарын, Медальләрен такты бүген. Ялт-йолт итеп тора алар – Шуңа күрә якты бүген! Бүген бигрәк егетләрчә, Солдатларча атлый бабам. Бабам белән, җитәкләшеп, Мин парадка бүген барам. Җиңүчеләр кебек итеп Атлыйм мин дә, атлый ул да. «Син – батыр!» – дим мин бабама, «Син – батыр!» – дип мактый ул да. Ул иң батыр солдат булган, Мин дә солдат булачакмын. Бабам тыныч ял итсен дип, Ил чигендә торачакмын! Борчылмагыз! Үсеп килә Батырларның оныклары. Бабайларның батырлыгын Бер малай да онытмады. Иртә тусам, мин үзем дә Бабам кебек булыр идем… Тынычлыкның туган көнен Бәйрәм итә бүген илем! Безгә тынычлык кирәк (Әхмәт Ерикәй) Шаулый урман, гөрли болын, Яфрак яра тал тирәк, Яшел бакча төзү өчен, Безгә тынычлык кирәк. Тормышны, җирне ярату- Безнең беренче теләк, Зур заводлар салу өчен, Безгә тынычлык кирәк. Минем бабай (Э.Шәрифуллина) Минем бабам – капитан, Сугышта булып кайткан. Күкрәк тулы орденнар, Медальләр алып кайткан. Безнең илдә һәр бала Уйнап-көлеп йөрсен дип, Хәвеф-хәтәр күрмәсен, Тыныч булып үссен дип, Көрәшкән чакта бабам, Әни нәкъ минем яшьтә булган, Рәсем ясап, хат язып, Бабама салып торган. Бик күп сугышкан бабам, Дошманны җиңеп кайткан. Үзе белән ул безгә Тынычлык алып кайткан! Мәңгелек ут (Шәүкәт Галиев) Миллионнар Җирне саклап Җанын биргән — Ил яшәсен, Үзем яныйм Мәңге дигән!.. Мәңгелек ут Бәргәләнә, Дөрләп яна, Уяу яна — Күз йому юк Бер дә аңа! Мылтык тотып Бастым бүген Мин дә сакка, — Мәңгелек ут, Синең белән Без бер сафта! Бу тынлыкны — Яшәү шавын Бүлдермәсен — Изге утны Сугыш җиле Сүндермәсен! Җиңү көне ( Гөлнур АЙЗАТ) Батыр солдат булып таш һәйкәлләр Баскан бүген мәйдан түренә. Җиңү көне килеп җиткән саен, Күпме күз яшьләре түгелә. Җиңү көне җиңел килмәде ул, Ятып калды илнең уллары. Алар хөрмәтенә байракларны Күтәрәбез бүген югары. Йөзләр, меңнәр, миллионнар булып, Утка кергән Ватан солдаты. Исемнәре җырга әйләнгән бит Җиңү алып кайткан солдатның. Ветераннар сафын барлый яшьләр, Алмаш килә илне яратып. Җиңү көнен каршы алабыз без, Җиңү маршын горур яңгыратып Тынычлык кошлары (Рәхимә Арсланова) Гелдер, гелдер, Гөлдер-гөлдер, Күгәрченнәр гөрләшә, Көннәр буе гөр-гөр килеп, Алар нидер серләшә. Гөлдер-гөлдер, Гелдер-гелдер... Ни әйтергә телиләр? Алар шулай илебезгә Тыныч тормыш телиләр.

06.05.2025

Канал яңалыклары

Җиңү көненә – бәйге!

Дуслар! «ШАЯН ТВ» каналы янәдән бүләкләр уйната! Бөек Җиңүгә 80 ел уңаеннан, без рәсемнәр бәйгесе оештырабыз! Тизрәк безнең Телеграм каналыбызга һәм ВКонтакте төркемебезгә кереп, кагыйдәләр белән таныш. Алар бик гади! Җиңүчеләр «ШАЯН ТВ» каналыннан истәлекле бүләкләргә лаек булачак. Яраткан каналың белән бергә бул! Уңышлар!

05.05.2025

Популяр яңалыклар

«Татнефть Арена»да зур концерт!

7 май – күңелле, дәртле, онытылмас мизгелләр көне булачак! Бу көнне «Татнефть Арена» сәхнәсендә «Болгар радиосы»ның масштаблы концерты узачак. Татарстанның иң танылган җырчылары бер сәхнәгә җыелып, тамашачыларга чын мәгънәсендә музыкаль бәйрәм бүләк итәчәкләр. Илсөя Бәдретдинова, Элвин Грей, Ришат Төхвәтуллин, Фирдус Тямаев, Әнвәр Нургалиев, Марат Яруллин, Илмира Нәгыймова, Рифат Зарипов, Илнат Фәрхуллин, Зинира һәм Ризат Рамазановлар, Алмаз һәм Зөлфирә Мирзаяновлар, Илшат Сафин, Алсу һәм Азат Фазлыевлар – болар барысы да сәхнәдә сезне көтә! Бу кичтә тамашачыларны җанлы башкару, яңа дуэтлар, көтелмәгән чыгышлар һәм бик күп сюрпризлар көтә. Татар эстрадасының иң якты йолдызлары катнашындагы концерт – моны сагынып сөйләрлек вакыйга булачак! Син дә бу көнне безнең белән үткәр! Иң зур концертка санаулы көннәр калды! Билетларны 500 сумнан алып табып була – ашыгыгыз!

05.05.2025

1 ... 23 24 25 26 27 ... 378

Яңа сайт!