Яңалыклар

Без хәтерлибез сезне, Батырларыбыз!

Бүген хәтер һәм кайгы көне - Бөек Ватан сугышы башланган көн. Без хәтерлибез сезне, Батырларыбыз! Бөек Җиңүнең 80 еллыгына һәм Ватанны саклаучылар елына багышланган «Батырларыбыз»дип аталган җырга клип тәкъдим итәбез! Клипта Россия Федерациясе Герое Рәсим Рәшит улы Баксиков катнаша. Җырны 27 нче гимназия укучысы Асилә Кашапова башкара. Җыр сүзләре авторы – Эльвира Сафина, композитор – Әминә Галимова, аранжировка – Илмир Әзһәмов. Клипны әлеге сылтама аша кереп карарга мөмкин.

22.06.2025

«Яраткан шигырь» ВКонтакте төркемендә

«Яраткан шигырь» проектының яңа чыгарылышы чыкты! Икенче чыгарылыш – «Җиңү ул...», шигырь авторы – Рүзәл Әхмәдиев Проект Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «ШАЯН ТВ» – тәүлек әйләнәсе татар телендә эшләүче беренче балалар каналы тарафыннан тормышка ашырыла. «Яраткан шигырь» татар шигърияте аша туган җиргә мәхәббәт уяту, әхлак тәрбиясе бирүдә зур әһәмияткә ия. Ул нәфис сүз аша балаларда татар мәдәниятенә хөрмәт тәрбияли, татар язучыларының иҗаты белән таныштыра. Яңа сезонның икенче чыгарылышын сылтама аша кереп карарга мөмкин.

22.06.2025

Йога гомерне озайта

20 июнь – Халыкара йога көне. Бу рәсми булмаган, ләкин мөһим бәйрәм – үзенең сәламәтлегенә, күңел тынычлыгына һәм гармониягә омтылучы кешеләр өчен. Йога – ул гап-гади күнегүләр генә түгел, ә тормышка караш, күңел халәтен җайга салу ысулы. Йога – меңләгән еллар элек Һиндстанда барлыкка килгән практика. «Йога» сүзе санскрит теленнән тәрҗемә иткәндә «бердәмлек», «тоташу» дигәнне аңлата – кеше үз-үзе белән, табигать белән, дөнья белән тоташа. Йогага һәркем өйрәнә ала – яшь тә, физик хәле дә мөһим түгел. Ул тәнне ныгыта, сулышны җайга сала, уйларны тәртипкә китерә. Йога аша кеше үзен яхшырак тоя башлый, тынгылык таба, үз эчендә көч таба. Бу көн – кешегә үз-үзенә игътибар итәргә, сәламәтлек турында уйларга, тынычлыкны табарга ярдәм итү көне. Йога стресслардан арынырга, хәлне яхшыртырга, кәефне күтәрергә ярдәм итә. Йога көнендә төрле шәһәрләрдә ачык дәресләр, мастер-класслар, таныштыру чаралары үткәрелә. Бүген Горький паркында Халыкара йога көне билгеләп үтеләчәк. 16:00 дән 20:00 гә кадәр йога дәресләре, релаксация һәм башка кызыклы чаралар көтелә. Катнашу бушлай.

21.06.2025

Җәй көне нишләргә?

Җәй көне нишләргә? Без сезгә исемлек әзерләдек! 1. Таң атуны каршыларга 2. Дуслар белән пикникка чыгарга 3. Кием шкафын барларга 4. Күп итеп карбыз, кавын ашарга 5. Авылга кайтырга 6. Җәйге фотосессия ясарга 7. Аткан йолдызга теләк теләргә 8. Саф һавада йога белән шөгылләнергә 9. Казанда уза торган #VKFEST2025 барырга 10. Скейбордта йөрергә 11. Дуслар белән төне буе чын күңелдән сөйләшергә 12. Татлы мамык ашарга 13. Кыр чәчәкләре бәйләмен җыярга 14. Көймәдә яки катамаранда йөрергә 15. Җиләк-җимешләрдән салат ясарга 16. Яңгырдан соң салават күперен фотога төшерергә 17. Балык тотарга 18. Холстта рәсем ясарга 19. Концертка барырга 20. Һава еланын җибәрергә 21. Урманда җиләкләр җыярга 22. Өч көнгә интернеттан баш тартырга 23. Үләндә яланаяк йөрергә 24. Яңа пешкән җиләкләр белән өй туңдырмасын ясарга 25. Дусларыгыз белән яраткан өстәл уеннарын уйнарга 26. 30 нчы август көнен безнең белән үткәрергә 27. Роликларда йөрергә 28. Кояш баеганны карарга 29. Җылы яңгыр астында йөрергә 30. Су коенырга 31. Һәр көнне бер сүз белән тасвирлагыз - җәй ахырында исемлекне күреп шаккатырсыз Барыгызга да матур җәйләр теләп калабыз!

20.06.2025

Сабын куыклары кәефне күтәрә

Бүген – Сабын куыклары көне! Бу – бик күңелле һәм матур бәйрәм. Бүген бөтен кеше сабын куыклары очыра – зур, кечкенә, түгәрәк, ялтыравыклы. Сабын куыклары – сабынлы сулы кечкенә шарчыклар. Алар һавада очалар, төрле төсләрдә балкыйлар һәм тиз генә шартлап югалалар. Ләкин һәр куык – шатлык бүләк итә! Бүген дуслар белән уйнарга була: кемнең куыгы югарырак очыр? Яки кем иң зур куык ясар? Сабын куыгын өйдә дә ясап була: су, сабын һәм бераз гына шикәр кирәк. Сабын куыклары көне – шатлык бәйрәме. Кәефләрегез яхшы булсын! Барыгызга да матур яллар телибез!

20.06.2025

«Алтын каләм – Золотое перо» фестивале җиңүчесе билгеле булды

Казанда ел саен уздырылучы республикакүләм «Алтын каләм – Золотое перо» яшьләр һәм үсмерләр матбугаты фестиваленең нәтиҗәләре ясалды. Әлеге абруйлы конкурс медиа өлкәсе белән кызыксынучы сәләтле яшь каләм тибрәтүчеләрне берләштерә. 2025 елда фестивальнең төп җиңүчесе – Нижнекамск шәһәреннән Альмира Хәйброва. Ул үзенең креатив эшләре, фикер тирәнлеге һәм иҗади карашы белән аерылып торды. Җиңү нәтиҗәсендә Альмирага медиа юнәлеше буенча югары уку йортына бюджет урынга укырга керү мөмкинлеге бирелде. Шулай ук фестиваль кысаларында республикадагы дүрт уку йорты медиаүзәгенә 1 миллион сум күләмендә техника җиһазлары алу өчен сертификатлар тапшырылды. Бу хакта Татарстан Республикасы яшьләр эшләре министры Ринат Садыйков хәбәр итте. Фестиваль эшләрен бәяләүдә профессиональ жюри зур роль уйнады. Алар арасында танылган медиабелгечләр дә бар иде. Жюри әгъзаларының берсе – Сәхабетдинова Рамилә Әхмәтзакир кызы, «ШАЯН ТВ» телеканалының башкарма директоры һәм баш мөхәррире. Ул Татарстанда балалар һәм яшьләр журналистикасын үстерүгә зур өлеш кертә. Җиңүчеләрне ихлас котлыйбыз! Каләмегез үткен, фикерегез тирән булсын!

19.06.2025

Балалар футболы көне!

Дуслар, ә сез белә идегезме, 19 июнь – гади генә җәй көне түгел, ә чын бәйрәм! Һәм ул Балалар футболы көне! Футбол – ул туп артыннан чабу, «пас бир!» дип кычкыру, егылу, тору, көлү, янә чабу һәм... ГОООЛ! Кайвакыт – үз капкаңа да... Ни өчен футболны барысы да ярата? Чабарга, сикерергә, кычкырырга була – һәм бу гадәти хәл! Үзеңне чемпион итеп тоясың. Бу бик күңелле! Хәтта тубың куакка кереп китсә дә. Футбол – ул дуслык турында. «Мин синең командада!», «Афәрин!» һәм «Иң мөһиме – катнашу!» дигән сүзләр турында. Син дә бүген ишегалдында мини-турнир оештырып кара. Үз командаңны тупларга һәм аңа исем, логотип ясарга кирәк булачак. Кем гол кертергә әзер? Чемпионнар, алга!

19.06.2025

«ШАЯН ТВ» яшь хәбәрчеләр эзли!

БЕЗДӘ ЯҢА КАСТИНГ! Сиңа 10-16 яшь һәм үзеңне телевидениедә күрәсең киләме? Димәк, бу мөмкинлек нәкъ менә синең өчен! «ШАЯН ТВ» яшь, сәләтле, кызыксынучан хәбәрчеләр эзли. Максат – тамашачыга яңалыкларны кызыклы, җанлы һәм аңлаешлы итеп җиткерә белүче яшь йолдызны табу. Кастинг ике этапта үтәчәк: Беренче тур – 2025 елның 1 августына кадәр. Синнән 1 минуттан артмаган видеоязма кирәк. Анда нинди дә булса яңалыкны креатив һәм үзенчәлекле итеп сөйләп күрсәт. Видеоны әзерләгәч, анкетаны тутыр һәм гаризаны махсус сылтама аша җибәр. Икенче тур – 11-15 август көннәрендә, Казанда, «ШАЯН ТВ» студиясендә узачак. Бу этапта инде син үз сәләтеңне профессионаллар алдында күрсәтәчәксең. Җиңүче «ШАЯН ТВ» командасына кушылып, яңалыклар тапшыруында корреспондент буларак катнашу мөмкинлеген алачак! Проект яшь журналистларны үстерү, талантларны табу һәм аларны зур экранга чыгаруга юнәлтелгән. Шуңа күрә, озакка сузма– видеоңны яздыр, анкетаны тутыр һәм үзеңне сынап кара! Сораулар булса, шалтырат: 8 (843) 570-50-33 Әйдә, үз көчеңне күрсәт – бәлки, нәкъ менә син «ШАЯН ТВ»ның яңа йөзе булырсың!

18.06.2025

1 ... 10 11 12 13 14 ... 376

Яңа сайт!