Яңалыклар

«Балачак җыры – 2025» бәйгесенә гаризалар кабул итү дәвам итә!

ЯХШЫ ХӘБӘР! Сезнең күп санлы сораулар буенча без «Балачак җыры» бәйгесенә гаризалар кабул итүне 19 июльгә кадәр озайтабыз! Әле өлгермәгән булсагыз – ашыгыгыз, үз җырыгызны җибәрергә менә дигән мөмкинлек! Биш җыр, биш җиңүче һәм акчалата бүләкләр! Бик тиздән нәкъ сезнең җырыгыз хит булачак! Без сездән өр-яңа шигырьләр, оригиналь көйләр көтәбез! «Балачак җыры» бәйгесе 3 турда үткәрелә. Һәр җиңгән автор һәм композитор 50 000 сум күләмендә акча белән бүләкләнә! Шулай ук бу җырларны профессиональ аранжировка һәм клип көтә! Бәйгедә катнашу бушлай. Җырның текстын һәм көен [email protected] адресына юллагыз.

07.07.2025

«Әдәби хәзинә» тапшыруын карамый калма!

«Әдәби хәзинә» тапшыруының ЯҢА ЧЫГАРЫЛЫШЫ! Әлеге проект яшь буынны татар әдәбияты, мәдәнияты, татар халкының классик язучылары, танылган шагыйрьләре һәм бүгенге көндә иҗат итүче каләм ияләре белән таныштыра. Икенче чыгарылыш Татарстанның халык язучысы Рабит Батулла белән Халык авыз иҗаты турында сөйләшәбез Проект «2023-2030 елларга Татарстан Республикасы дәүләт телләрен һәм Татарстан Республикасында башка телләрне саклау, өйрәнү һәм үстерү» дәүләт программасы кысаларында әзерләнә. Чыгарылышны сылтама аша кереп карый аласыз.

06.07.2025

«Иман Әлифбасы» – яңа чыгарылыш!

Безнең ВКонтакте төркемендә «Иман Әлифбасы» тапшыруының 8 нче чыгарылышы дөнья күрде! Әлеге яңа чыгаралышыта без әхлакый кыйммәтләр һәм бер-береңә хөрмәт күрсәтү кебек мөһим төшенчәләр турында сөйләшербез. Сылтама аша кереп, карарга мөмкин.

05.07.2025

Җимеш салаты – чын җәй тәме!

Җимеш салаты – җиңел һәм бик татлы ризык. Ул бик тәмле була, чөнки җимешләр үзләре табигатьтән бик баллы. Аны әзерләү өчен төрле өлгергән җимешләр кирәк. Менә бер мисал: Банан Алма Груша Әфлисун Киви Виноград Җиләкләр (карлыган, кура җиләге) Җимешләрне яхшылап юарга, кирәк булса – кабыгын әрчергә, аннары вак кына кисәкләргә турарга. Барсын да бер савытка салып, йомшак кына болгатырга кирәк. Теләсәгез, өстенә әз генә табигый йогурт яки бер кашык бал да өстәргә мөмкин – алай тагын да тәмлерәк була! Җимеш салаты иртәнге ашка да, төшке аштан соң десерт итеп тә ашасак була. Ул организмга көч, файдалы витаминнар бирә һәм кәефне күтәрә. Үзегез яраткан җимешләрдән салат ясап карагыз – һәрвакыт төрле һәм бик тәмле килеп чыгачак!

04.07.2025

Милана Хаметова һәм «Не одна дома 2» фильмы премьерасы

Без Милана Хаметова катнашындагы «Не одна дома 2» фильмы премьерасында булдык! Әле Милананың үзе белән аралашып та өлгердек! Блогер, җырчы, актриса – кайсысы Миланага якынрак? Фильм төшергәндә нинди кыенлыклар булган? Һәм Казан аңа ошыймы? Бу һәм башка кызыклы сорауларга җаваплар – LIKEEдагы аккаунтыбызда булыр! Кызыклы обзорны Телеграм-каналыбызда да карый аласыз! Шулай ук «Не одна дома 2» фильмының бүген барлык кинотеатрларда премьерасы булды! Билетлар алырга ашык!

03.07.2025

БДИ: Татарстанда 277 укучы 100 балл җыйды

2025 елда Татарстанда профильле математика, физика, химия һәм биология фәннәрен сайлаучы укучылар саны сизелерлек артты. Күпчелек егет-кызлар үз киләчәкләрен нәкъ менә бу юнәлешләрдә күрә һәм имтиханнарын да шулар буенча бирә. Бу үсешнең төп сәбәбе – вузлар инженерлык һәм фән өлкәсендә кирәкле белгечлекләргә керү өчен нәкъ менә әлеге фәннәрдән ЕГЭ нәтиҗәләрен кабул итүләре. Мәктәпләрдә дә профильле һәм алдан әзерләү курслары булдырылды, укучыларга үзләренә туры килгән юнәлешне сайлау мөмкинлеге тудырылды. Профильле дәрәҗәдә укыган укучылар югары баллар ала. Татарстан мәктәпләрендә профильле математикага ихтыяҗ зур – берничә мәктәптә укучыларның яртысыннан артыгы бу предметны сайласа, табигый фәннәрне – кимендә өчтән бер өлеше бирә. Шулай ук 277 укучы 100 балл җыйды, кайберләре бер үк вакытта ике фәннән дә югары нәтиҗәләргә иреште. Казан, Бөгелмә, Түбән Кама, Яр Чаллы кебек шәһәрләрдәге лицейлар, гимназияләр, махсус фәнни мәктәпләр бу юнәлештә алдынгылар рәтендә. Алар – тырыш һәм максатчан яшьләр өчен белем бирү үзәкләре. Төп максат – укучыларны илгә кирәкле белгечлекләргә юнәлтү һәм аларга шушы юнәлештә ныклы белем бирү. Татарстан моның өчен барлык шартларны тудыра.

02.07.2025

Эт – кешенең дусты

2 июль – Этләр көне! Бүген бөтен дөньяда Этләр көне билгеләп үтелә – кешенең иң тугры, ягымлы һәм шаян дусларына багышланган бәйрәм. Этләр электән кешеләр янында яши. Алар өйне саклый, кешеләргә ярдәм итә, адашканнарны таба, күрмәүчеләрне озата, хәтта хастаханәләрдә авыруларның күңелен дә күтәрә ала. Әмма иң мөһиме – этләр чын күңелдән ярата һәм шатлык бүләк итә белә! Алар кайчан күңелсез икәнне сизә, янга килеп сырпалана, күзләренә карасаң – күңел җылынып китә... Дөньяда бик күп төрле этләр яши: бәләкәй генә чихуахуадан алып зур һәм йомшак сенбернарга кадәр. Әмма токымына карамыйча, һәр эт дус була ала. Алар төрле холыклы – берсе шаян, икенчесе тыныч, кайсыдыр бик уйнарга ярата, ә кайсыдыр кочаклашырга. Һәркайсы – кабатланмас, һәркайсы – кадерле. Әгәр синең этең бар икән – бүген аны кочаклап ал, тәмле әйбер белән сыйла һәм «рәхмәт, дустым» дип әйт. Ә әлегә этең юк икән – аның рәсемен яса, этләр турында безнең каналдан кызыклы мультфильм кара, яисә эте булган дуска кунакка бар! Әти-әниең белән бергә этләр өчен приютка булышу да яхшы гамәл булыр. Барлык койрыклы дусларыбызны чын күңелдән котлыйбыз!

02.07.2025

Татарстанда нинди һава торышы көтелә

Татарстанда алдагы көннәрдә һава торышы җылы булмас – моңа чираттагы циклонның атмосфера фронты сәбәпче. Бу хакта республиканың Гидрометцентры хәбәр итте. 3 июльдә күпчелек районнарда яңгырлар көтелә. Кайбер урыннарда яшенле яңгыр явып, җил тизлеге секундына 15-20 метрга кадәр җитәргә мөмкин. Шулай ук боз яву ихтималы да бар. Төнлә температура +9…+14 градус, ә көндез +17…+22 градус тирәсе булачак. Бу гадәттәгедән 3-4 градуска салкынрак. 4 һәм 5 июльдә дә һава торышы шулай ук болытлы, кыска вакытлы яңгырлар сакланачак. Көндез +18…+23 градуска кадәр җылы булачак. Ә менә 8 июльдән һава торышы җылытачак: көндез +25 градуска кадәр күтәрелү көтелә. Шулай да вак яңгырлар булырга мөмкин. Кызу кояшлы җәй, без сине бик сагындык!

01.07.2025

1 ... 6 7 8 9 10 ... 375

Яңа сайт!