Яңалыклар

«Бишек җырлары» тапшыруын ВКонтакте төркемендә карагыз

«Бишек җырлары» тапшыруын ВКонтакте төркемендә карагыз

«Бишек җырлары» тапшыруының яңа чыгарылышы ВКонтакте төркемендә  Проектның иң зур кыйммәте – баланы татар телендә язылган бишек җырлары аша туган телнең, милли мәдәниятнең нурлы дөньясына алып керү. Әлеге җырлар ана белән бала арасында җылылык, аңлашу, мәхәббәт уяна. Видеоматериаллар заманча технологияләр – ясалма интеллект ярдәмендә эшләнә, җырларны исә Татарстанның күренекле артистлары башкара. Яңа чыгарылышта гаҗәеп тавышлы Айсылу Габдинова башкаруында бишек җырын тыңларга мөмкин булачак. Әлеге җырның сүзләре – таныклы язучыбыз Туфан Миңнуллин сүзләренә язылган,музыка –  Рәшит Абдуллин көе. Әлеге чыгарылышны безнең ВКонтакте төркемендә карагыз!

21.07.2025
Бүген торт пешерәбез!

Бүген торт пешерәбез!

Торт – ул гади генә тәм-том түгел, ә чын бәйрәм символы. Ел саен 20 июльдә күп илләрдә Халыкара Торт көнебилгеләп үтелә.  Торт һәрвакыт шатлыклы мизгелләр белән бәйле: туган көннәрдә, бәйрәмнәрдә, туйларда табын түрендә ул гел була. Торт кешеләрне бергә җыя, күңелләрне күтәрә һәм чараны тагын да истәлеклерәк итә. Тортлар төрле була: шоколадлы, баллы, җиләкле, каймаклы, катлы-катлы, хәтта бозлысы да бар! Аларны төрле төстәге кремнар, җимешләр, чәчәкләр, бәллүрләр белән бизиләр. Һәркем үзенә ошаганын сайлый ала. Торт көне кайдан килгән? Бу бәйрәм әле күптән түгел генә барлыкка килгән. Аның төп максаты – кешеләргә дуслык, җылылык һәм яхшы кәеф бүләк итүнең мөһимлеген искә төшерү. Төп шигаре – «I cake you», ягъни «Мин сине торт белән сыйлыйм» дигән сүзләрне аңлата. Бу көнне концертлар, остаханәләр, торт күргәзмәләре, уртак чәй эчүләр уздырыла. Торт көнен ничек бәйрәм итәргә? Менә кайбер кызыклы фикерләр: Гаилә белән бергә торт пешереп карагыз. Үзегезнең уникаль рецептыгызны уйлап чыгарыгыз «Хыялдагы торт»ны рәсем итеп ясагыз – ул бөтенләй гадәти булмаска да мөмкин Торт темасына уеннар, викториналар, кызыклы сораулар әзерләгез Уенчык дусларыгыз белән чәй табыны оештырыгыз. Кызыклы факт Дөньяда иң зур торт АКШта пешерелгән. Аның авырлыгы 50 тоннага якын булган, һәм ул бер шәһәр халкына җиткән! Бу матур көндә дусларыңны, туганнарыңны сөендер һәм берәр тәмле торт пешереп аша!

20.07.2025
Җәйнең яртысы үтте: тагын ниләр эшләп өлгерергә була?

Җәйнең яртысы үтте: тагын ниләр эшләп өлгерергә була?

Кичә генә каникуллар башланган кебек иде, ә бүген инде – җәйнең уртасы. Тик моңа борчылырга кирәкми: алда тагын бер ай тулы кояшлы көннәр, күңелле маҗаралар һәм яңа ачышлар көтә. Димәк, тагын бик күп нәрсә эшләп өлгереп була! 1. Бер кызыклы китап укы Җәй – сәяхәтләр вакыты. Ә китап –  иң зур маҗараларга илтүче юл. Урамда яңгыр яуса да, китап сине джунглиларга, диңгез буена яки серле замокка алып бара ала. Нинди китап укырга белмәсәң – әти-әнидән, апа-абыйлардан яисә китапханәдәге ападан сора. 2. Үз кулларың белән нәрсә дә булса эшләп кара Рәсем яса, табигатьтән җыелган әйберләрдән панно эшлә, пластилиннан бакча төзе, конструктордан шәһәр җый – җәй ул иҗат өчен иң шәп вакыт! Хәтта гади бер тартма да зур корабкага әйләнергә мөмкин. 3. Күбрәк хәрәкәт ит Җылы көннәрне өйдә утырып уздырма. Урамга чык, велосипедта, самокатта йөр, туп уйна, сикер, йөгер, хәрәкәтле уеннарда катнаш. Бу сине көчле, сәламәт һәм шат итә. 4. Яңа нәрсәләргә өйрән Әлегә кадәр лимонад ясап караганың юкмы? Яисә үз кулың белән бутерброд әзерләгәнең юкмы? Кораб ясап, аны суга җибәрергә теләк бармы? Кич белән йолдызларга карап утыру да күңелле шөгыль! 5. Игелекле эшләр башкар Җәй – яхшылык кылу вакыты. Бабайга бакча сугарырга булыш, ишегалдында тәртип урнаштыр, кошларга җим салып кара, кечкенә эне-сеңлеңә әкият укып бир. Кечкенә генә булса да, һәр яхшы гамәл күңелне җылыта. 6. Җәйне истә калдырырга тырыш Фотога төшер, дәфтәргә истәлекләр яз, рәсем яса, кызыклы хәлләрне теркәп бар. Җәй ахырында: «Мин бу җәйне онытмам!» – дип әйтерсең. Һәр көнең җәй төсле булсын – тәмле, кызыклы һәм яңа тәэсирләргә бай. Җәйнең яртысы артта дип түгел, яртысы әле алда дип карыйк. Син ниләр эшләп өлгердең, ә ниләрне әле эшләп карарга телисең? Вакыт бар – җәй дәвам итә!

18.07.2025
«АНЮТА» хәйрия фонды бездә кунакта булды!

«АНЮТА» хәйрия фонды бездә кунакта булды!

Бүген «ШАЯН ТВ» телеканалында бик күңелле һәм җылы очрашу узды – кунакка «АНЮТА» хәйрия фонды вәкилләре, балалар һәм аларның әти-әниләре килде. Балалар һәм ата-аналар студиянең кызыклы атмосферасына чумып, әңгәмәдә катнаштылар, бүләкләр алдылар һәм онытылмас хис-кичерешләргә бай очрашу килеп чыкты!

18.07.2025
КАСТИНГ – катнашмый калма!

КАСТИНГ – катнашмый калма!

«ШАЯН ТВ» яшь хәбәрчеләр эзли! Экранга эләгү турында хыялланасыңмы? Бу – синең мөмкинлегең! Әгәр син актив, кызыксынучан һәм камерадан курыкмыйсың икән – бездә синең өчен шатлыклы хәбәр бар! «ШАЯН ТВ» телеканалы 10дан алып 16 яшькә кадәрге егет-кызлар өчен кастинг игълан итә! Әгәр син алып баручы булырга, чын студиядә эшләргә һәм бөтен Татарстанга (һәм аннан да читкәрәк!) кызыклы яңалыклар сөйләргә хыялланасың икән – катнашмый калма! Кемнәрне көтәбез? Без үз-үзенә ышанган, иҗади карашлы һәм кызыклы итеп сөйләп бирә белүче яшь хәбәрчене эзлибез. Игътибар үзәгендә булырга яратасыңмы? Яңалыкларны күзәтеп барасыңмы? Кешеләр белән уртак телне тиз табасыңмы? Димәк, бәлки нәкъ менә син – «ШАЯН ТВ» телеканалының яңа йөзе! Кастинг ничек үтә? 1 нче этап – дистанцион (2025 елның 1 августына кадәр): 1 минуттан артмаган видеоязма төшер – теләсә кайсы кызыклы яңалыкны креатив итеп сөйләп бир. Курыкма, үзең бул, үзенчәлекләреңне күрсәт! Видеоны төшергәч: катнашучы анкетасын тутыр, махсус сылтама аша гаризаны җибәр  2 нче этап – йөзмә очрашу (2025 елның 11–15 августында): 1 нче этапта сайлап алынган иң яхшы катнашучылар Казан шәһәрендәге «ШАЯН ТВ» студиясенә чакырылачак. Алар профессиональ жюри каршында чыгыш ясап, үзләрен күрсәтә алачак. Җиңүчене нәрсә көтә?  Кастингта җиңүче: «ШАЯН ТВ» хәбәрчесе булачак, чын сюжетлар өстендә эшләячәк һәм эфирга чыгачак, телевидение һәм журналистика өлкәсендә үсеш өчен уникаль мөмкинлек алачак. Бу – киләчәктәге медиа йолдызлары өчен зур башлангыч! Татарстанга һәм дөньяга үзеңне таныту мөмкинлеге! Барлык сораулар буенча шалтыратыгыз: 8 (843) 570-50-33 Мөмкинлегеңне кулдан ычкындырма – видеоязма төшер, анкетаны тутыр һәм үз көчеңне сынап кара! Бәлки, нәкъ менә син «ШАЯН ТВ»ның яңа йөзе булырсың!

17.07.2025
«Килде-Китте ШОУ» – Алсу Фазлыева

«Килде-Китте ШОУ» – Алсу Фазлыева

«ШАЯН ТВ»ның «Килде-Китте ШОУ» тапшыруының ВКонтакте төркемендә яңа чыгарылышы чыкты! Бу юлы студия кунагы – талантлы һәм дәртле эстрадасы җырчысы Алсу Фазлыева! Ул үзенең куркулары, гастрольләрдә булган кызыклы хәлләр турында сөйләде. Алсу ире Аяз Фазлыевка җырлар багышлыймы? Тизрәк карагыз! Сылтама буенча узарга мөмкин.

17.07.2025
Роботлар да бәйрәм итә

Роботлар да бәйрәм итә

Бүген – Ясалма Интеллект Көне Бу бәйрәмне 16 июльдә билгеләп үтәләр, быел ул инде дүртенче тапкыр уздырыла. Ясалма интеллект, яки кыскача итеп әйткәндә, ЯИ – ул компьютерның кеше кебек уйлый, өйрәнә, хәтерли һәм иҗат итә белүе. Ясалма интеллект болай эшли ала: сорауларга җавап бирә, шигырьләр, әкиятләр уйлап таба, фотоларда кешеләрне таный, табибларга, укытучыларга, рәссамнарга һәм, әлбәттә, балаларга да ярдәм итә. ЯИ кешеләрне алыштырмый, киресенчә – ярдәм итә. Мәсәлән, син рәсем ясыйсың, ә ЯИ аны тагын да матуррак итәргә киңәш бирә. Яки сиңа кич белән әкият тыңлыйсы килә – ЯИ нәкъ синең өчен әкият уйлап чыгара! Кызыклы факт: Бүген күп кенә балалар ЯИ белән дус кебек аралаша – табышмак соратырга, кызыклы тарих сөйләтергә, хәтта өй эшен эшләргә дә ярдәм сорый.  Ә безнең телеканалда ЯИ кулланылган махсус тапшыру да бар – «Бишек җырлары»! Бу тапшыру өчен видеоларны без нейрон челтәрләр ярдәмендә ясыйбыз – ягъни рәсемнәр, анимацияләр акыллы программалар белән тудырыла. Шуңа күрә «Бишек җырлары»чыгарылышлары бик матур, җылы һәм әкияти. Сылтама аша кереп карарга мөмкин. Ә син ЯИ ярдәмендә нәрсә уйлап чыгарыр идең?

16.07.2025
Prev. 1 ... 4 5 6 7 8 ... 375 Next
Главная Программа Видео Шортс Поиск