«Балачак җыры» бәйгесенең бүләкләү тантанасы узды
Бүген «ШАЯН ТВ» каналы студиясендә Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «ШАЯН ТВ» каналы оештырган «Балачак җыры» бәйгесенең алтынчы сезонында җиңүчеләрне бүләкләү тантанасы узды. Бәйгенең максаты – татар телендә балалар өчен җырлар иҗат итүче шагыйрь һәм композиторларны барлау, шул җырларны таныту, балалар репертуарын татар җырлары белән баетудан гыйбарәт.
Быел «Балачак җыры 2025» бәйгесенә Россиянең төрле төбәкләреннән 80гә якын гариза килде Икенче турга профессиональ жюри тарафыннан 20 җыр сайлап алынды. Әлеге тур исә 2025 елның 24 июленнән 31 июленә кадәр shayantv.ru сайтында тавыш бирү белән тәмамланды. Иң күп тавыш җыйган 10 җыр өченче турга үтте. Мәртәбәле жюри нәтиҗәләре буенча 5 җиңүче билгеләнде
Менә ул җиңүче җырлар исемлеге:
1. «Рәхмәт сиңа, мәктәбем»
Эльвира Әхмәтова сүзләре,
Дилүс Шәйхеразиев
2. « Әби-бабаема»
Гөлзилә Фәхретдинова сүзләре,
Таһир Яруллин көе.
3. «Әнием»
Алинә Сиразова сүзләре һәм көе.
4. «Атлар»
Зөләйха Камалова сүзләре,
Наилә Славина көе.
5. «Яңа елда»
Гөлназ-Дениз Гарипова сүзләре,
Ләйсән Арсентьева көе.
Шулай ук әлеге җырларга Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәмендә «ШАЯН ТВ» каналы тарафыннан заманча аранжировкалар ясалачак, сыйфатлы видеоклиплар төшереләчәк.
Җиңүчеләргә бүләкләрне Татарстан Дәүләт Советы рәисе урынбасары, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Готыф улы Әхмәтов үзе тапшырды. Шулай ук мәртәбәле кунаклар арасында ТР Дәүләт Советының Мәгариф, мәдәният, фән һәм милли мәсьәләләр комитеты рәисе Айрат Ринат улы Зарипов, ТР Дәүләт Советының Бюджет, салымнар һәм финанс комитеты рәисе урынбасары Камил Әсгать улы Ногаев һәм «Яңа Гасыр» телерадиокомпаниясенең генераль директоры Илшат Юныс улы Әминев та бар иде. Җиңүчеләрне котларга бәйгенең жюри әгъзаләре дә җыелды.
Шулай ук тантанада матур җырлы-биюле чыгышлар да булды.
Җиңүчеләрнең һәрберсен ихлас күңелдән котлыйбыз! Иҗат чишмәгез саекмасын, алга таба да яңа үрләргә ирешергә язсын! Хәзер әлеге җырларның безнең нәни дусларыбызга барып ирешәсе генә калды! Һәр күңелдә яңгырасын Балачак җыры!
13.08.2025
Тат 
Рус 
Eng 
Главная 
Программа 
Видео 
Шортс 
Поиск