Яңалыклар

«Томандагы керпе» акчалы булды

Россиянең Үзәк банкы «Томандагы керпе» («Ежик в тумане») мультфильмына багышланган истәлек тәңкәләр чыгарды. Алар барлыгы өч төрле: көмеш өслекле – 3 сум, никель – 25 сум, бакыр-никель – 25 сум номиналларда. Бу акча әйләнештә йөриячәк, әмма ул, гадәттә, коллекционерлардан артмый. Гомуми тиражы – 7 000 данә. «Ежик в тумане» мультфильмы 1975 елда, Сергей Козлов әкиятенә нигезләнеп, «Союзмультфильм» студиясендә төшерелгән. Тиздән аңа 50 ел була. Әлеге мультфильм 35 Халыкара бүләккә ия, 2003 елда исә Токиода узган мультипликация фестивалендә тарихта иң яхшы мультфильм исеменә лаек була. Фото: Яндекс

16.10.2024

Керпегә кул белән тимәгез

Керпеләр бакчада, өй тирәсендә еш күренә. Аларны ашатырга, кулга ияләштерергә тырышучылар да бар. Бу җәнлекнең бакчага, үсемлекләргә зыяны юк, ул кимерүчеләрне күпләп тотуы белән ярдәм дә итә. Әмма керпегә якын килмәсәгез, яхшырак. Кул белән тимәгез, аны өйгә алып кермәгез, ул бик күп чир таратырга мөмкин. Алар арасында иң җитдие - котыру чире. Авыру тешләү генә түгел, энәсенә тырналу аша да йога ала. Инкубация чоры - 12-100 көн. Талпан энцефалиты, боррелиоз, эрлихиоз йоктыру куркынычы бар. Керпе үлән арасында йөри, аңа талпан еш кадала. Лишайны хәтта энәсе белән тырналудан да ияртергә мөмкин. Геморрагик бизгәк тизәк аша йога, җирдә эшләгәннән соң, пычрак кул белән ашарга ярамый. Кулда тырналган урыннар булса, куркыныч тагын да арта. Керпедән эләгә ала торган лептоспироз чире күзгә, бөерләргә зыян сала. Аның тизәге җиргә, суга эләгергә мөмкин. Бакчада перчаткасыз эшләмәгез. 4-14 нче көнне калтырата, баш авырта башлый, күзләр кызарырга мөмкин. Керпе тешләсә, җәрәхәтне антибактериаль сабын яисә кер сабыны белән юарга яки антисептик белән эшкәртергә һәм табибка күренергә кирәк.

16.10.2024

Телевизор караучылар игътибарына

Чәршәмбе, 16 октябрь көнне «ШАЯН ТВ» каналында профилактика чаралары үткәрелә. 02:00дән 10:00 сәгатъкә кадәр тапшырулар трансляцияләнми. Тик бу һич кенә дә борчылырга сәбәп түгел! Сез үзегезнең яраткан мультсериалларыгызны һәм тапшыруларыгызны безнең сайтта һәм YouTube каналда карый аласыз!

15.10.2024

Табадан гына төшкән Башкортстанның атказанган артисты белән эксклюзив әңгәмә

«Килде-Китте ШОУ» кунагы – Башкортстанның атказанган артисты Ризат Рамазанов. Популяр җырчы Зинира белән гаилә тормышы хакында сөйли һәм бүләк өчен рәхмәтен белдерә.

14.10.2024

«Милтон» ураганы килергә мөмкин

АКШ территориясендә котырынучы «Милтон» ураганы, Атлантик океан аша үтеп, Россиягә килеп җитәргә мөмкин. Ул Атлантик циклон-трансформерга әверелер. Һәм Атлантик океанны үтеп, Россиягә килеп җитәчәк, дип фаразлый белгечләр. Мондый циклон явым-төшемнәр һәм көчле җил алып килергә мөмкин икән. Давыл Флориданың көнбатыш яр буена 11 октябрьгә каршы төндә килеп җитә. Табигать стихиясе аркасында Америка Флоридасының 3 миллионга якын кешесе электрсыз калган. Элегрәк Флоридада «Милтон» ураганы аркасында 125 йортның җимерелүе билгеле. Фото: Яндекс

14.10.2024

«ШАЯН ТВ» яңа фильм тәкъдим итә

«ШАЯН ТВ»да премьера! Тамашачыларга «Кызыл крабларның серле күченеше» дип исемләнгән өр-яңа документаль фильм тәкъдим ителә! Раштуа утравы яр буйлары елына бер тапкыр ачык кура җиләге төсенә керә. Кызыл кыслалар миграциясе табигатьнең иң гаҗәеп серенә әйләнде. Раштуа вакытында җир өсте урманнардан океан ярларына күчкән йөз миллионнан артык кызыл кыслалардан торган кура җиләге келәме белән каплана. Ачык суда калу өчен алар үз гомерләрен шушы унике сәгатьлек сәяхәттә куркыныч астына куялар. Әлеге фильмда аларның ничек массакүләм миграцияләнүе, уылдык чәчүләре һәм бу искиткеч җан ияләренең тормышларын дәвам итү өчен кечкенә кыслалар булып яшәгән урыннарына әйләнеп кайтулары тасвирлана. Фильмны һәр шимбә 09:45 һәм 21:00 сәгатьләрдә «ШАЯН ТВ» каналында карагыз. Фото: Яндекс

14.10.2024

Тамашачыларга чираттагы концерт тәкъдим ителде

Бүген Казанның 127 нче мәктәбендә «ШАЯН ТВ» каналының «Балачак җыры» концерты узды. «Сәйлән» телевизион фестивале җиңүчеләре тамашачылар күңелен яуларга өлгергән, балалар өчен уникаль җырларны яңгыраттылар. Иң актив балаларга исә «ШАЯН ТВ» шәп бүләкләр өләште! Тамашачылар «ШАЯН ТВ» балалар каналының яраткан персонажлары белән фотога да төшә алды. Шаян белән Мияу балаларны каршы алдылар, сәламләделәр, уйнадылар, күңелләрен күтәрделәр! Исегезгә төшерәбез, әлеге чара Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә үткәрелә. Концерт барышында залда бәйрәм хисе хөкем сөрде! Ул барлык тамашачыларга да аралашу шатлыгы һәм яхшы кәеф бүләк итте! Концертта катнашучылар тамашачылардан бик күп рәхмәт сүзләрен кабул иттеләр!

11.10.2024

«Сәйлән» проектының яңа чыгарылышын карарга чакырабыз

13 ОКТЯБРЬ көнне «ШАЯН ТВ» каналында «Сәйлән» проектының яңа чыгарылышын карарга чакырабыз. Җиңүчеләр арасыннан җиңүчене сайлап алу җиңел булырмы? Тиздән барлык серләр дә ачыла! Яшь йолдызларны Татарстанның атказанган артистлары Элвин Грей, Эльмира Кәлимуллина һәм яраткан җырчыбыз Илгиз Шәйхразиев бәяләячәк. Һәр якшәмбе 12:00 һәм 17:00 сәгатьләрдә зәңгәр экраннарда грандиоз «Сәйлән» проектының яңа чыгарылышларын карагыз һәм кушылып җырлагыз! Ялларны җырлап уздырыйк!

11.10.2024

1 ... 54 55 56 57 58 ... 376

Яңа сайт!