Яңалыклар

Сәяхәтче Випо кабат илләр гизә!

Сәяхәтче Випо кабат илләр гизә!

Үзенчәлекле көчек Випоның хыялы - очарга өйрәнү! Ләкин бу мөмкинме соң? Этнең канатлары юк бит! Очу өчен канатлар бөтенләй дә мәҗбүри түгел икән, чөнки Випо ләкләк Генриның файдалы киңәшләре аркасында очып китә ала! Очарга өйрәнеп, эт һәм аның дуслары - ләкләк Генри һәм уенчык мәче Бетти - дөнья тирәли сәяхәткә китәләр. Алар төрле илләрне гизәләр, башка милләтләр һәм мәдәниятләр турында күп кенә яңа фактлар беләләр. Мультсериал персонажлары белән бергә сез Париж, Вена, Лондон һәм башка шәһәрләргә барачаксыз, ә заманча анимация сезнең сәяхәтегезне күңелле һәм кабатланмас итәчәк! Випо һәм аның дусларының маҗаралары турындагы тарих - чит илләрнең мәдәниятләре һәм традицияләре турында хыял һәм юмор, белем бирү мәгълүматлары белән тулы. Әлеге мультсериал - хыяллар белән тулы сезнең тылсымлы дөньягыз турында! «Сәяхәтче Випо» мультсериалы «ШАЯН ТВ» каналы экраннарына кабат әйләнеп кайтты! Дүшәмбедән-җомгага кадәр 13:45 һәм 21:45 сәгатьләрдә карагыз!

08.02.2023
«ШАЯН ТВ»ның Telegram каналында бәйге бара!

«ШАЯН ТВ»ның Telegram каналында бәйге бара!

Дуслар, «ШАЯН ТВ» каналының Telegram каналында бәйге бара! Өч бүләк һәм өч җиңүче! Супер истәлекле бүләк – җиңүчегә «ШАЯН ТВ» каналынан истәлекле кружка! Бәйгенең кагыйдәләре бик гади! Катнашырга ашык! Җиңүче 15 февраль көнне билгеле булачак. Бәйгенең кагыйдәләре турында тулырак мәгълүмат сылтама буенча!

08.02.2023
Кышкы спорт уеннары көне!

Кышкы спорт уеннары көне!

7 нче февраль - Бөтенроссия кышкы спорт уеннары көне буларак билгеләнә. Бу бәйрәм беренче мәртәбә 2015 нче елның февраль башында Сочи шәһәрендә узган XXII кышкы Олимпия уеннарына багышланып барлыкка килгән. Кышкы уеннарны кемнәр генә яратмый икән?! Чаңгы, чана, сноуборд, тимераякта шуу дисеңме, хоккей уйнау – боларның барысын да кыш үтеп киткәнче эшләп калырга тырышабыз. Язга да озак калмады. Әле кышкы матур көннәрдән файдаланып калырга өлгерәсез, дуслар! Өйдә ятмагыз, урамга чыгыгыз, урманга барыгыз! Салкын кышның рәхәтен тоеп, кышкы уеннарны уйнап калырга ашыгыгыз! Кыш көне күпләр чаңгыда, Тимераякта шуа, Өч ай гына була бит кыш, Кирәк шуып калырга. Кышның кадерен белегез, Чанада да шуыгыз, Һава чиста, дөнья ап-ак, Кадерен белеп калыгыз. Боз өстендә әле тагын Хоккей уйнарга була, Спорт белән дус булсагыз, Сәламәтлек нык була. Кышкы һава файдалы бит Хәтта җәяү йөрсәң дә, Саф һавада акрын гына Була бит йөгерсәң дә. Таза-сәламәт кешегә Яшәве дә күңелле, Кәефе дә күтәренке, Шат була, көләч йөзле. Сәламәтлекне саклагыз, Суыктан курыкмагыз, Табигать биргән зур байлык – Сәламәтлек, аңлагыз! Фәймә Зәйнуллина

07.02.2023
«Балачак җыры» бәйгесе яңа авторларны барлый!

«Балачак җыры» бәйгесе яңа авторларны барлый!

Исегезгә төшерәбез, «Балачак җыры»  бәйгесенең дүртенче сезонына гаризалар кабул итү дәвам итә! Авторлар һәм композиторлардан өр-яңа шигырьләр һәм көйләр көтәбез! Тизрәк гариза юлларга ашыгыгыз! Бүләкләр зурдан: акчалата приз, җырның профессиональ аранжировкасы һәм клибы! Эшләрегезне [email protected] адресына җибәрегез. Гаризалар 1 мартка кадәр кабул ителә! Тулырак мәгълүмат сылтама буенча.  

07.02.2023
«Балачак җыры» концерты Казанның 181 нче күппрофильле мәктәбендә гөрләп узды!

«Балачак җыры» концерты Казанның 181 нче күппрофильле мәктәбендә гөрләп узды!

«ШАЯН ТВ» каналы үзенең сәләтле балалары белән берлектә нәни дусларының күңелен яулавын дәвам итә һәм балалар өчен өр-яңа җырлар белән сөендерә! Бүген исә чираттагы «Балачак җыры» концерты Казанның 181 нче күппрофильле мәктәбендә узды. Гадәттәгечә, тамашачыларыбыз бик җылы итеп каршы алдылар һәм кайнар алкышларга күмделәр. Концертны карарга башкаланың мәктәп-гимназия укучылары җыелды. «Сәйлән» фестивале йолдызлары исә «Балачак җыры» бәйгесенең популяр хитларын башкарып, тамашачыларның күңелен күрделәр. Залда хөрмәтле кунаклар да үз урыннарын алдылар. Алар арасында Бөтендөнья татар конгрессы каршындагы «Ак калфак» татар хатын-кызлары иҗтимагый оешмасы рәисе, РФ атказанган укытучысы Кадрия Рәес кызы Идрисовада бар иде. «ШАЯН ТВ» каналының төп геройлары да тамашачыларыбызны сөендерде: шаярдылар, көлделәр, фотога төштеләр, иң активларга бүләкләр өләштеләр. Әлеге чара Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә үткәрелде. Онытылмаслык, бик күңелле булды әлеге бәйрәм! Күтәренке кәеф, шаяру-көлүләр белән югары масштабта үтте! Тамашачыларыбыз да канәгать калды!          

06.02.2023
Данир Сабиров катнашында «Калеб» тапшыруы - YouTube каналда!

Данир Сабиров катнашында «Калеб» тапшыруы - YouTube каналда!

Бүген «ШАЯН ТВ» каналының YouTube каналында Данир Сабиров катнашында «Калеб» тапшыруы чыгачак! Татарстанның атказанган артисты, җырчы, биюче, юморист һәм пародистның бик күп яңа һөнәрләрен беләсегез килсә, тапшыруны карамый калмагыз! Сылтаманы калдырабыз! YouTube каналга рәхим итегез! Шулай ук бүген кич, 19:10 сәгатьтә җырчы белән булган кызыклы вакыйгаларны «ШАЯН ТВ» каналында, «Калеб» тапшыруында карагыз!

05.02.2023
Prev. 1 ... 156 157 158 159 160 ... 375 Next
Главная Программа Видео Шортс Поиск