Яңалыклар

«Балачак җыры» бәйгесе яңа авторларны барлый!

«Балачак җыры» бәйгесе яңа авторларны барлый!

Исегезгә төшерәбез, «Балачак җыры»  бәйгесенең дүртенче сезонына гаризалар кабул итү дәвам итә! Авторлар һәм композиторлардан өр-яңа шигырьләр һәм көйләр көтәбез! Тизрәк гариза юлларга ашыгыгыз! Бүләкләр зурдан: акчалата приз, җырның профессиональ аранжировкасы һәм клибы! Эшләрегезне [email protected] адресына җибәрегез. Гаризалар 1 мартка кадәр кабул ителә! Тулырак мәгълүмат сылтама буенча.  

07.02.2023
«Балачак җыры» концерты Казанның 181 нче күппрофильле мәктәбендә гөрләп узды!

«Балачак җыры» концерты Казанның 181 нче күппрофильле мәктәбендә гөрләп узды!

«ШАЯН ТВ» каналы үзенең сәләтле балалары белән берлектә нәни дусларының күңелен яулавын дәвам итә һәм балалар өчен өр-яңа җырлар белән сөендерә! Бүген исә чираттагы «Балачак җыры» концерты Казанның 181 нче күппрофильле мәктәбендә узды. Гадәттәгечә, тамашачыларыбыз бик җылы итеп каршы алдылар һәм кайнар алкышларга күмделәр. Концертны карарга башкаланың мәктәп-гимназия укучылары җыелды. «Сәйлән» фестивале йолдызлары исә «Балачак җыры» бәйгесенең популяр хитларын башкарып, тамашачыларның күңелен күрделәр. Залда хөрмәтле кунаклар да үз урыннарын алдылар. Алар арасында Бөтендөнья татар конгрессы каршындагы «Ак калфак» татар хатын-кызлары иҗтимагый оешмасы рәисе, РФ атказанган укытучысы Кадрия Рәес кызы Идрисовада бар иде. «ШАЯН ТВ» каналының төп геройлары да тамашачыларыбызны сөендерде: шаярдылар, көлделәр, фотога төштеләр, иң активларга бүләкләр өләштеләр. Әлеге чара Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә үткәрелде. Онытылмаслык, бик күңелле булды әлеге бәйрәм! Күтәренке кәеф, шаяру-көлүләр белән югары масштабта үтте! Тамашачыларыбыз да канәгать калды!          

06.02.2023
Данир Сабиров катнашында «Калеб» тапшыруы - YouTube каналда!

Данир Сабиров катнашында «Калеб» тапшыруы - YouTube каналда!

Бүген «ШАЯН ТВ» каналының YouTube каналында Данир Сабиров катнашында «Калеб» тапшыруы чыгачак! Татарстанның атказанган артисты, җырчы, биюче, юморист һәм пародистның бик күп яңа һөнәрләрен беләсегез килсә, тапшыруны карамый калмагыз! Сылтаманы калдырабыз! YouTube каналга рәхим итегез! Шулай ук бүген кич, 19:10 сәгатьтә җырчы белән булган кызыклы вакыйгаларны «ШАЯН ТВ» каналында, «Калеб» тапшыруында карагыз!

05.02.2023
«Брэд абый чәчтарашханәсе» хәзер безнең сайтта!

«Брэд абый чәчтарашханәсе» хәзер безнең сайтта!

Гадәти булмаган чәчтарашханә һәм аның талантлы чәчтарашы Брэд абый турындагы мультсериалны карап барасызмы? Үзенчәлекле икмәк чәчтарашханәсе матурлык студиясен хәтерләтә, чөнки Брэд абый десертларны матур һәм зәвык белән бизи белә. Мультсериалны дүшәмбедән-җомгага кадәр 14:35 һәм 22:35 сәгатьләрдә «ШАЯН ТВ» каналында карагыз! Әле алай гына та түгел, «Брэд абый чәчтарашханәсе»нең барлык серияләре дә хәзер безнең сайтта да бар! Аларны үзегезгә уңайлы вакытта сылтама буенча карарга мөмкин!

03.02.2023
Игътибар, БӘЙГЕ!

Игътибар, БӘЙГЕ!

Дуслар, «ШАЯН ТВ» каналының ВКонтакте төркемендә шәп бәйге башланды! Бәйгедә катнаш һәм «ШАЯН ТВ»дан яраткан героеңны – ШАЯН курчагын от! Кагыйдәләре бик гади. Бәлки, нәкъ менә син җиңүче булырсың! Тизрәк сылтама буенча уз һәм катнаш! Җиңүче 17 февраль көнне махсус кушымта ярдәмендә билгеле булачак! Уңышлар, дустым!

03.02.2023
Әкият илендә: «Алтын бөртекләр»!

Әкият илендә: «Алтын бөртекләр»!

Борын-борын заманда бер Ир белән бер Хатын яшәгәннәр. Аларның биш уллары булган. Бердәнбер көнне боларның әтиләре Туган илне яклап яуга киткән. Ул кире әйләнеп кайтмаган, сугыш кырында үлеп калган. Ялгыз Ана биш малайны үзе генә тәрбияләп үстергән. — Улларым,— дигән Ана, Егетләрне үз янына чакырып алган да. —Мин сезне үстердем, хәзер үз көнегезне үзегез күрегез,— дигән. — Без,—дигәннәр Егетләр,—үз көнебезне үзебез күрер идек, акчабыз юк бит. Син, Әни, безгә берәр генә бөртек булса да алтын бир. — Алтын бирәм,— дигән Ана.— Бер бөртек түгел, мең бөртек. Тик ул алтыннарны әтиегез җыеп куйган иде. Аны үзегез эзләп табыгыз! — Табабыз, табабыз! — дигәннәр Егетләр. — Ә-әнә,— дигән Ана,— Ташлытау белән Карлытауны күрәсезме? Шул ике тау арасындагы киң басуны күрәсезме? Шул басуга әтиегез алтын бөртекләре күмгән иде. Эзләп табыгыз шуны. Басуның җирен казыгыз. Җиң сызганып, тир сыпырып эшләгез. Биш Егет биш сабан белән күз күреме кадәр җирне сөреп чыкканнар. Аннары кәсләрне ваклап, тырма белән тырмалаганнар. Ә алтын бөртекләрен тапмаганнар. Шуннан Егетләр, бик күңелсезләнеп, Әниләре янына кайтканнар. — Бер генә бөртек тә алтын тапмадык, әни! — дигәннәр. — Борчылмагыз, улларым! — дигән Ана.— Табарсыз алтыннарны! — Әнә бурадагы бодайны илтеп чәчегез шул җиргә, көз көне бодайны ургач, камылын йолкырсыз, бодай тамырына алтын бөртекләре эләгеп чыгар. Егетләр Әниләре әйткәнчә эшләгәннәр. Бодай мул уңган, аны урганнар, сукканнар. — Китерегез миңа үзегез иккән игенне! — дигән Ана. Егетләр Әниләре алдына капчык-капчык игенне китереп өйгәннәр. Ана кызгылт-сары бөртекләрне учына алып караган да улларына әйткән: —Әтиегезнең җиргә күмгән алтын бөртекләре менә шулар инде, улларым. Сез менә аларны эзләп таптыгыз. Инде хәзер үзегез көн итә алырсыз! — дигән. Егетләр бер-берсенә караганнар да бәхетле елмайганнар. Татар халык әкияте                                          

02.02.2023
Февраль нәрсә юрый?

Февраль нәрсә юрый?

Кышның соңгы аена да аяк бастык. Нинди булыр ул? Гыйнвар шикелле зәмһәрир суыклары белән куркытырмы? Әллә күп итеп кар өләшерме? Февраль киләсе ел фасылларына нәрсә юрый? Без дә сынап карыйк әле. Юраганнары туры килерме икән? * Февральнең беренче атнасында тотрыклы һава торышы сакланса, җәй озын яңгырлы булыр. * Февральдә каен ботагында карлар алка - алка булып асылынып торса, ул елда иген уңар. * Февраль карга бай, апрель суга бай. * Февраль суык икән - җәй яхшы килә. * Февраль суык һәм коры - август эссе. * Февраль җылы булса - яз салкын килә. * Февральдә бәс күп булса - җәен чык күп төшәр, бал мул булыр. * Февраль азагында боз сөңгеләре озын үссә - яз озакка сузыла. * Февральнең соңгы атнасы суыграк булган саен, март җылырак килә. * Февраль аенда кар күп булса, иртә җәйгә ишарә. * Тау башларында кар күп булса, җиләк күп булыр. * Февраль ае ахырында кар күп яуса, борчак белән чикләвек уңар. * Яз суык буласы булса, февральдә төлке эт кебек өрер, улар. * Әгәр кышның бу ае буранлы икән, августта яңгыр көт, уҗым игене уңачак. * Кар күп ятса, үлән калын булачак. * Юлда кар калын, кырда юка булса, иген уңар.              

01.02.2023
Prev. 1 ... 158 159 160 161 162 ... 376 Next
Главная Программа Видео Шортс Поиск