Яңалыклар

Яңа уку елыннан мәктәпләрдә яңа предметлар кертелә?!

Яңа уку елыннан мәктәпләрдә яңа предметлар кертелә?!

Казан мәктәпләрендә киләсе уку елыннан «Хезмәт», «Куркынычсызлык һәм Ватанны саклау нигезләре» дип аталган предметлар укытыла башлаячак. Шулай ук математика буенча курска яңа тема да кертеләчәк. «Куркынычсызлык һәм Ватанны саклау нигезләре» урта һәм өлкән сыйныфлар өчен мәҗбүри дәресләр буларак карала. Курска тормыш эшчәнлеге иминлеге нигезләре программасы, башлангыч хәрби әзерлек буенча киңәйтелгән программа, моннан тыш, беренче ярдәм күрсәтү, сәламәт яшәү рәвеше нигезләре һәм гадәттән тыш хәлләрдә үз-үзеңне тоту кагыйдәләре керергә тиеш. 1 сентябрьдән «Технология» дәресе «Хезмәт» дип үзгәртелә, чөнки предметның яңа юнәлеше барлыкка киләчәк. «Математика» фәненә исә «Ихтималлык һәм статистика» курсы өстәлү көтелә. Ул «Алгебра»ны һәм «Геометрия»не тулыландырачак.

23.05.2024
Бердәм дәүләт имтиханнары башланды

Бердәм дәүләт имтиханнары башланды

Мәктәпне тәмамлаучы укучылар өчен иң җаваплы чор - бердәм дәүләт имтиханнары башланды. Бүген исә алар туган телдән имтихан тапшыра. Татарстанда быел аны 11 сыйныфны тәмамлаучы 7 укучы тапшыра. Казаннан дүрт, Түбән Кама, Әтнә, Мөслим районнарыннан бер чыгарылыш укучысы туган телдән имтихан бирә. Узган ел туган телдән имтиханны 8 кеше тапшырган, өченче ел бу күрсәткеч 1 укучыны гына тәшкил иткән. 9 сыйныфта исә туган телне сайлау буенча 4 046 бала тапшырачак. Бу күрсәткеч узган ел белән чагыштырганда 2 685 укучыга күбрәк. БДИ тапшыру 23 майдан 11 июньгә кадәр дәвам итә. Имтихан нәтиҗәләре 6 июньнән 26 июньгә кадәр билгеле булачак. Бүген, беренче имтихан көнендә химия, география, әдәбият һәм туган телдән имтиханнар уза. Укчыларга камил акыл, тел ачкычлары һәм уңышлар телибез!

23.05.2024
Татарстанга җәй кайчан килер?

Татарстанга җәй кайчан килер?

Көннәр җылытты, тик эссе көннәр озак сакланырмы? Җәй кайчан килер һәм нинди булыр? Татарстанда климат буенча җәй 26-27 майда башланыр дип көтелә. Бу көннәрдә уртача тәүлеклек температура 15 градуска җитәчәк. Кыраулар төшмәс, кыска вакытлы яңгырлар явып үтүе ихтимал дип, фаразлыйлар. Тик температура төнлә 4 градуска кадәр төшәргә мөмкин, әмма кырау көтелми. Синоптиклар мәгълүматларына караганда, июнь аенда кояшы да, яңгыры да – барысы да үз урынында булачак. Июльдә эссе һәм коры һава торышы көтелә.

22.05.2024
«Дулкын» медиа-мәктәбе балалары «ШАЯН ТВ»да кунакта

«Дулкын» медиа-мәктәбе балалары «ШАЯН ТВ»да кунакта

Бүген «ШАЯН ТВ» каналында КФУның Филология һәм мәдәниятара багланышлар институтының «Дулкын» медиа-мәктәбе балалары кунакта булдылар. Без, гадәттәгечә, аларны бик сөенеп кабул иттек һәм яшь тамашачыларга студиябез буйлап экскурсия ясадык. Балаларны каналның шәп тапшырулары белән таныштырдык һәм аларның алып баручылары белән әңгәмә кордык. Укучыларга үзләрен кызыксындырган сорауларга җаваплар табу, мультсериалларның тавышландыру серләренә төшенү, яраткан каналларыннан истәлекле шәп бүләкләр алу бигрәк тә хуш килде. Очрашу бик җанлы үтте! Тамашачыларга да ошагандыр дип ышанабыз!

22.05.2024
«ТАТАР СҮЗЕ» җиңүчеләре белән таныштыру дәвам итә

«ТАТАР СҮЗЕ» җиңүчеләре белән таныштыру дәвам итә

Күптән түгел халкыбызның иң мөһим мәдәни ел вакыйгасы - «ТАТАР СҮЗЕ» дүртенче Халыкара нәфис сүз телевизион бәйгесенең Гала-концерты булып узды һәм тантаналы төстә иң яхшы нәфис сүз осталарының исемнәре билгеле булды! Шул уңайдан, 14-17 яшьлекләр арасында «Поэзия» номинациясенең җиңүче Камилла Зәкиева «Татарстан-Яңа Гасыр» каналында «Здравствуйте» тапшыруында кунакта булып кайтты. Ул үзенең хис-кичерешләре белән уртаклашты һәм бәйгедә укыган әсәреннән өзек тә сөйләп үтте.

21.05.2024
«ШАЯН ТВ» «ММЧ урамы» фестивалендә катнашты

«ШАЯН ТВ» «ММЧ урамы» фестивалендә катнашты

Бүген «Татмедиа» бинасы янындагы мәйданда тормыш кайнады. Журналистлар арасындагы иң абруйлы конкурсларның берсе булган «Бәллүр каләм» бәйгесенә йомгак ясалды, лауреатлар бүләкләнде. Аның кысаларында «ММЧ урамы» («СМИшная улица») дип аталган фестиваль эшләде. Татарстан Республикасы Матбугаты көненә багышланган әлеге киң колачлы акция күркәм традициягә әверелде. Монда газета-журналлар, телевидение, радио - мәгълүмат белән ММЧлар урын алды, журналистлар өчен төрле мастер-класслар үткәрелде. Чарада «ШАЯН ТВ» каналы да кунакларны үз мәйданчыгына җыйды. Каналның «Матбугат урамы»нда катнашуга креатив якын килүен дә билгеләп үтәргә кирәк. Кунаклар өчен анимацион программа, алып баручылардан күңелле интерактивлар, шәп уеннар, кызыклы остаханәләр оештырылды, «Сәйлән» телевизион җыр фестивале җиңүчеләреннән матур җырлар яңгырады. Иң җитез кунакларга истәлекле бүләкләр өләштеләр. Шулай ук каналның төп геройлары - Шаян һәм Мияу да бар иде. Алар балалар белән рәхәтләнеп уйнадылар, көлделәр, шаярдылар, фотога төштеләр, бәйрәм атмосферасы ясадылар.

21.05.2024
Prev. 1 ... 77 78 79 80 81 ... 376 Next
Главная Программа Видео Шортс Поиск