Яңалыклар

«ШАЯН ТВ» каналы алып баручылары радио журналистлары белән очрашты

«ШАЯН ТВ» каналы алып баручылары радио журналистлары белән очрашты

Бүген Журналистлар берлегендә радио журналистлары белән очрашу узды. Чарада «ШАЯН ТВ» каналы алып баручылары һәм блогерлары да булып кайтты. Түгәрәк өстәл артында радионың үткәне, бүгенгесе һәм киләчәге, профессиональ үсеш мәсьәләләре хакында сөйләштеләр. Балалар журналистларның төпле фикерләрен тыңладылар, радио тормышы белән кызыксындылар һәм үзләренең сорауларын бирделәр. Очрашу файдалы киңәшләр һәм җылы хатирәләргә бай булды.

14.05.2024
Миллионлаган аудиторияле блогер Рөстәм Нәбиев белән эксклюзив әңгәмә

Миллионлаган аудиторияле блогер Рөстәм Нәбиев белән эксклюзив әңгәмә

«МАРШРУТка» тапшыруының яңа чыгарылышы безнең YouTube каналда! Яңа чыгарылышның кунагы - казарма җимерелгәндә исән калган, аякларын югалткан, ләкин үзен югалтмаган шәхес, Эльбрус һәм Манаслу тауларына дөньяда беренче булып кулларында менгән кеше, миллионлаган аудиторияле блогер, ике кыз әтисе, Россия Федерациясе Иҗтимагый палатасы әгъзасы Рөстәм Нәбиев. Көчле рухлы шәхес белән әңгәмәне сылтама буенча карарга мөмкин.

14.05.2024
Бүген «Балачак җыры»ның чираттагы концерты куелды

Бүген «Балачак җыры»ның чираттагы концерты куелды

«ШАЯН ТВ» каналы үзенең сәләтле балалары белән берлектә нәни дусларының күңелен яулавын дәвам итә һәм балалар өчен өр-яңа җырлар белән сөендерә! Бүген исә чираттагы «Балачак җыры» концерты Казанның 27 гимназиясендә узды. Бер көндә 2 концерт! Гадәттәгечә, тамашачыларыбыз бик җылы итеп каршы алдылар һәм кайнар алкышларга күмделәр. Бәйрәм шаяру-көлүләр, җанлы аралашу, күңелле уен һәм викториналар һәм, әлбәттә, «ШАЯН ТВ» беренче татар балалар каналыннан истәлекле бүләкләр белән үрелеп барды. Сәхнәне «Сәйлән» музыкаль фестиваленең сәләтле артистларының чыгышлары бизәде. Гадәттәгечә, укучылар белән очрашудан курчакларыбыз - Биби белән Мияу да калмады! Алар кунакларны каршы алды, фотога төште һәм үзләренең шәп кәефләре белән уртаклашты. Тамашачылар талантлы балаларның күңелле музыкаль чыгышларыннан күтәренке рух алдылар һәм үзләренең рәхмәт сүзләрен җиткерделәр! Исегезгә төшерәбез, әлеге чаралар Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә оештырыла.

13.05.2024
«Балачак җыры» бәйгесенең тавыш бирү этабы старт ала

«Балачак җыры» бәйгесенең тавыш бирү этабы старт ала

Дуслар, көттегезме? «Балачак җыры» бишенче балалар җыры бәйгесенең тавыш бирү этабы старт ала! 13 майдан – 20 майга кадәр, интернет аша shayantv.ru сайтында тавыш бирергә мөмкин. Иң күп тавыш җыйган катнашучылар өченче турга үтәчәк! Моны бары сез хәл итәсез! Сылтама буенча узыгыз һәм үз тавышыгызны калдырыгыз!

13.05.2024
Бәйрәмнәрдә премьералар

Бәйрәмнәрдә премьералар

Без барыбыз да зарыгып көткән яллар җитте! Сез аларны, һичшиксез, «ШАЯН ТВ» каналы белән бергә күңелле итеп үткәрергә тиешсез! Май бәйрәмнәрендә «ШАЯН ТВ» каналы тамашачыларны премьералары белән сөендерүен дәвам итә! 1. «Үзбәкстан» фильмы белән сез борынгы Сәмәрканд шәһәре буйлап сәяхәт итәрсез, аның төп мәйданы булган Регистанны күрә алырсыз, 500 ел элек дөньяда иң төгәл астрономик исәпләүләр барлыкка килүен, 2000 елдан артык элек иң озын гомерле кәгазь ясауларын белерсез; дөньядагы иң көчле Кояш мичен күрерсез. Шимбә көнне 09:45 һәм 21:00 сәгатьләрдә карагыз. 2. «Җир планетасы. Иртәгә күрешербез» документаль фильмы, фәнни белемнәргә нигезләнеп, медицина, ясалма интеллект, шәһәр төзелеше, транспорт, экология, энергетика кебек тармакларда фикер һәм технологияләр үсеше белән дөньяның ничек үзгәрүе турында сөйли. Нинди һөнәрләр барлыкка киләчәк һәм кешелек дөньясына нинди сынаулар белән көрәшергә туры киләчәк? Премьераны якшәмбе көнне 17:30 сәгатьтә карагыз. 3. «Даг Гарднер фотосәяхәте» фильмында профессиональ фотограф Даг Гарднер планетаның иң гадәти булмаган почмаклары буйлап сәяхәт итә, искиткеч сурәтләр ясый, фототехника һәм яхшы кадрлар ясау серләре белән уртаклаша. Аның белән бергә тамашачылар шарлавыклар һәм каньоннарны күзәтә; аюлар артыннан Аляскага, агулы еланнар янына Амазонкага; гаҗәеп чәчкәләрне күрү өчен Грейт-Смоки-Маунтинс тауларына, Төньяк Каролинаның ерак пляжларына юл тота алачак. Фильмны якшәмбе көнне 10:15 һәм 18:10 сәгатьләрдә карагыз. Ялларны күңелле итеп, бергә уздырыйк!    

10.05.2024
Prev. 1 ... 79 80 81 82 83 ... 376 Next
Главная Программа Видео Шортс Поиск