Яңалыклар

«ШАЯН ТВ» YouTube каналында тәүлек әйләнәсе татарча мультфильмнар
Канал яңалыклары

«ШАЯН ТВ» YouTube каналында тәүлек әйләнәсе татарча мультфильмнар

Балаларның яраткан мультфильмнары татар телендә - тәүлек әйләнәсе «ШАЯН ТВ»ның YouTube каналында! «Лёва исемле йөк машинасы», «Мокас машиналары», «Смарта һәм могҗизалы букча», «Акыллы машиналар», «Ябалак баласы ХопХоп», «Машиналар табибы», «Юл күзәтчеләре» мультсериалларын хәзер үзегезгә уңайлы вакытта карарга мөмкин! Аларның барысын да сылтама буенча узып карый аласыз.  

31.07.2024
Җәйге премьера
Канал яңалыклары

Җәйге премьера

«ШАЯН ТВ» каналында премьера! Бүгеннән «Батыр йөрәкле Аюлар» мультсериалы эфирга чыга! Абыйлы-энеле аюлар Бриар һәм Брамбл дуслары белән бергә бәлагә юлыккан һәркемгә ярдәм итәргә әзер! Сихерче Нева һәм утын кисүче Вик белән бергә бертуганнар авыр минутта урман халкына һәм кунакларына һәрвакыт терәк. Бу күңелле аюлар компаниясенә күп кенә сынаулар белән көрәшергә һәм мавыктыргыч маҗараларда катнашырга туры киләчәк. Сөйкемле геройлар белән танышу өчен, эш көннәрендә 11:00 һәм 19:00 сәгатьләрдә «Батыр йөрәкле Аюлар» мультсериалын карагыз.

30.07.2024
Төнлә юлбарыслар начар күрә
Кызыклы фактлар

Төнлә юлбарыслар начар күрә

Бүген Халыкара юлбарыслар көне билгеләп үтелә икән! Шул уңайдан, бу җәнлек белән күбрәк танышып китик! * Юлбарыс тәнендәге кара сырлар йонында гына түгел, ә тиресендә дә бар. Әгәр юлбарысның йонын кырсан, вакытлар узу белән, ул тагын шундый ук булып үсәчәк. * Юлбарысның кара сырлары уникаль булып тора, ул аларның һәрберсенә үзенә генә хас. * Юлбарысларның иң актив вакыты – иртә һәм кич белән. Көндез алар күбрәк ял итә. * Юлбарыслар судан курыкмый һәм бик яхшы йөзә. * Төнлә юлбарыслар начар күрә, гәрчә аларның күзләре кешенекенә караганда алты тапкыр яхшырак булса да. * Юлбарыс 6 метрга кадәр озынлыкка сикерә ала, ә биеклеккә сикерүе 5 метрга җитә. * Юлбарыслар үз корбаннарына арттан һөҗүм итүне өстен күрәләр, чөнки болай иткәндә алар кача алмыйлар. * Иттән кала юлбарыс үсемлек һәм җиләк-җимеш белән дә туклана. * Юлбарысның гомер озынлыгы уртача 26 ел.  

29.07.2024
«Союзмультфильм»ның иң текә мультсериаллары эфирда
Канал яңалыклары

«Союзмультфильм»ның иң текә мультсериаллары эфирда

«ШАЯН ТВ» каналында «Союзмультфильм»ның иң текә мультсериаллары эфирга бара! «Аһ, куян, эләксәңме?! Каникуллар», «Простоквашино», «Янутлар» - барысы да сезнең өчен! Яраткан мульфильмнарыгызны дүшәмбедән алып, җомгага кадәр 7:30 һәм 15:30 сәгатьләрдә карагыз. Җәйге каникулларны бергә үткәрик!

29.07.2024
Парашютистлар бәйрәм итә
Кызыклы фактлар

Парашютистлар бәйрәм итә

26 июль - парашютистлар көне. Бу көнне парашют белән сикерүгә мөнәсәбәте булган һәркем бәйрәм итте: спортчылар, десантчылар, коткаручылар, янгын сүндерүчеләр, пилотлар һәм космонавтлар. Әлбәттә, аларга якыннары, дуслары һәм туганнары кушылды. Кызыклы мәгълүматлар * Иң өлкән ир-егет парашютчы булып 97 яшендә өч чакрымлы биеклектән сикергән Джордж Мойз санала. Ә хатын-кызлардан 102 яшендә Дороти Кластер сикергән. * Парашют белән сикерү спортның иң куркыныч төре булып санала. Статистика буенча, һәр 4000 сикерешнең берсе уңышсыз тәмамлана. * Парашют ачылганчы кешенең төшү тизлеге сәгатенә 180 километр тәшкил итә. Парашют ачылганчы бер минутта кеше 3 километр ара үтәргә мөмкин. * Парашютчы Уилл де Сильва гел үзенең Отис кушаматлы эте белән сикерә. 10 ел эчендә алар берлектә 64 сикереш ясаган. * 1931 елның 14 июлендә СССРда хатын-кызлардан беренче тапкыр Любовь Кулешова сикерә.  

26.07.2024
Пандалар таудан шуарга ярата
Кызыклы фактлар

Пандалар таудан шуарга ярата

Панда - дөньядагы иң сөйкемле аюларның берсе. Без алар турында ниләр беләбез? Әлеге аклы-каралы пандалар барысы да бамбук белән генә тукланалармы икән? * Панданың күзе янындагы кара таплар башта түгәрәк формасында була, үсә барган саен, алар тамчы формасын ала. * Зур пандалар бик яхшы йөзәләр. * Кыргый табигатьтә зур панданың уртача гомер озынлыгы 15-20 ел тәшкил итә. Тоткынлыкта исә зур пандалар 30 яшькә кадәр яши ала. * Пандалар таудан шуарга яраталар. Күңелле вакыт уздырудан тыш, алар шул рәвешле йоннарына ябышкан ботаклардан котылырга тырышалар. * Пандалар туры басып тора алалар, ләкин аларның кыска арт аяклары гәүдәне тотып тору өчен җитәрлек дәрәҗәдә көчле түгел. Панданың сөякләре шул ук зурлыктагы башка хайваннарның сөякләренә караганда ике тапкырга авыррак. Фото: Яндекс * Пандалар чалыш аяклы, алар алгы тәпиләрен эчкә борып йөриләр. * Әлеге җан ияләре тиз йөгерә алмыйлар. * Зур панданың авырлыгы 90-135 кгны тәшкил итә. * Пандалар барлыгы 11 төрле тавыш чыгара беләләр. * Зур панданың 42 теше бар. * Панда көненә 14-16 сәгать чамасы вакытын бамбук белән тукланып үткәрә. * Бу хайванның ашкайнату системасы бик уникаль, ул аңа бамбукның каты җепселләрен дә эшкәртергә мөмкинлек бирә. * Пандалар көненә 30 килограммга кадәр бамбук ашарга мөмкин. * Панданың балалары сукыр булып туа, алар 90нан алып 130 граммга кадәр авырлыкта булалар. * Панда мехындагы ак төстәге рәсем аларга әйләнә-тирә белән кушылып, дошманнардан сакланырга ярдәм итә.                  

25.07.2024
Катнашырга ашык!
Канал яңалыклары

Катнашырга ашык!

«ТАТАР СҮЗЕ» бишенче Халыкара нәфис сүз телевизион бәйгесенә гаризалар кабул ителә! Катнашырга ашыгыгыз! Премиаль фонд 2 000 000 сум. Быел «ТАТАР СҮЗЕ» берничә категория буенча үткәрелә: 7 яшькә кадәр булган катнашучылар, 8-13 яшькә кадәр, 14 яшьтән 17 яшькә кадәр, 18 һәм аннан өлкәнрәкләр өчен. Бәйгедә шулай ук профессионаллар, үз шигырен, әсәрен сөйләүчеләр, иҗади гаиләләр дә катнаша ала. Чыгышлар проза, шигърият һәм махсус номинациядә бәяләнәчәк. Мөмкинлекне кулыгыздан ычкындырмагыз! Үзегезгә туры килгән номинацияне сайлагыз һәм чыгышыгызны видеога төшереп, анкета белән бергә tatarsuze2025@yandex.ru рәсми почтасына юллагыз.  Гаризалар 2024 елның 30 ноябренә кадәр кабул ителә. Тулырак мәгълүмат shayantv.ru һәм tnv.ru сайтларында.

24.07.2024
Prev. 1 ... 79 80 81 82 83 ... 387 Next
Главная Программа Видео Шортс Поиск