Яңалыклар

Августның иң романтик бәйрәме

Кечкенә вакытта күпләр йолдыз атылганда теләк теләсәң, аның кабул булачагына ышанып яши. Сезнең дә иң зур хыялыгызны уйлап, төнге күккә карап, йолдыз атылганын көтеп утырганыгыз бардыр. Йолдыз атылуга, теләкне әйтеп өлгерергә кирәклеген дә, аның чынга ашуын теләсәң, беркемгә бу турыда әйтмәскә кирәклеген дә белә идек. Йолдызлыклар белән танышу, чүмечкә охшаган Җидегән йолдызны табарга өйрәнү, ихластан сөенү – бу истәлекләр һәрберебезнең балачак хатирәләре. Ә йолдыз җыю көне турында ишеткәнегез бар идеме? Әлеге бәйрәм ел саен 7 августта билгеләп үтелә. Һәр елны август аенда йолдызлар яңгырын күзәтергә мөмкин. Бу җәйнең соңгы аена иң зур метеорит агымы Персеиданың активлык чоры туры килүе белән бәйле. Персеидалар – Свифта – Таттла дип аталучы кометаның кисәкчекләре ул. Свифта – Таттла кометасы безнең планетага 135 елга 1 тапкыр гына якынлаша. Соңгы тапкыр бу хәл 1992 нче елның декабрендә булган. Ә менә Җир шары үзе әлеге кометаның гаҗәеп койрыгына ел саен якыная. Комета койрыгыннан аерылган метеоритлар һәм ком кисәкчекләре Җир атмосферасына эләккәч, янып бетә. Үзләреннән соң алар дуга сыман эз калдыралар. Нәкъ шул эзне без йолдыз атылу дип әйтәбез. Җәйнең соңгы аеның ямен һәм тәмен белеп калу өчен күктәге йолдызларны күзәтү – менә дигән шөгыль. Төнегезне йоклап уздырмагыз! Дусларыгыз белән йолдыз җыярга ашыгыгыз!

07.08.2024

Популяр яңалыклар

Танылган алып баручы белән популяр җырчы көч сынаша

«Төймә» тапшыруында – танылган алып баручы Айваз Садыров һәм популяр җырчы Илназ Гарипов! Һәр пәнҗешәмбе 07:35 һәм 18:30 сәгатьтә «ШАЯН ТВ» каналында! Шулай ук үзегезгә уңайлы вакытта безнең YouTube каналда!

07.08.2024

Канал яңалыклары

«ШАЯН ТВ» каналының яңалыклары белән уртаклаштылар

Дуслар, «ШАЯН ТВ» каналы эфирында һәм YouTube каналда тамашачылар өчен бик күп яңа мультфильмнар урын алды! Шул уңайдан 7 август, чәршәмбе көнне «ШАЯН ТВ» каналының PR-бүлеге хезмәткәре Руслан Хафизов «Татарстан-Яңа Гасыр» каналында, «Манзара» тапшыруында кунакта булачак. Әңгәмә «ШАЯН ТВ» киңлекләрендә баручы өр-яңа мультсериаллар һәм премьералар хакында булачак. Тапшыруны иртәнге 6:00 сәгатьтә «ТНВ» каналында карамый калмагыз.

06.08.2024

Популяр яңалыклар

Көлкеле җәй

Җәйге график: Чебеннәр - 06:00 — 18:00 Черкиләр- 18:00 — 06:00 *** “Мин ничек җәйне үткәрдем” дигән темага инша яза башларга вакыт. *** Тропикларга барасым килә, әмма мөмкинлегем юк иде. Тропиклар үзләре килде... *** Августка планнар – җәй эчендә эшләп өлгермәгән эшләрне эшләп бетерергә. *** Хәзер “Ярар, киләсе җәйгә ябыгырмын” дигән сүзләр янә актуаль. *** Җәйгә планнар бар иде дә ул... Ул планнарга акча юк. Һәр җәй шундый хәл... *** Сезнең яшьлегегез үтеп бара, ә сез җәй өчен борчыласыз! *** Кыскача Русия җәйләре хакында: янмасак, йөзәбез. *** Бер елда ике кыш һәм нибары бер җәй икән, бу тормышта нинди гаделлек турында сөйләргә була инде? *** -Җәйгә акча җыя алмадым шул... -Нәрсә, хәзер җәй түләүлемени? *** Ел икегә бүленә: беренчесендә без җәйне көтәбез, икенчесендә кышкы каникулларны.

05.08.2024

Популяр яңалыклар

Һәркем белергә тиеш!

Шәһәр урамнарын светофордан башка күз алдына китерү дә кыен. Алар, беренче чиратта, безнең куркынычсызлыгыбыз өчен кирәк. Бүген - 5 августта Халыкара светофор көне билгеләп үтелә. Каникулларыгыз ничек уза? Җәйге ялларда куркынычсызлык кагыйдәләрен үтәү өчен, әйдәгез әле, юл йөрү кагыйдәләрен искә төшереп китик! *Светофорның яшел уты кабынганчы көтеп тор! *Светофор булмаса, урам аркылы җәяүлеләр юлы аша чыгарга кирәк! *Якын-тирәдә машиналар булмаса да, юлны йөгереп чыкма, светофорның кызыл яки сары төсендә кузгалма! *Син чыгасы юлда машиналарның туктаган булуына инан! *Якында синең юлыңа борылучы машина булу-булмавын игътибар белән кара! *Җәяүлеләргә тротуар буенча, уң яктан гына йөрергә ярый! *Әгәр синең яшең ундүрттән ким икән, велосипедта ишегалдында яисә махсус площадкаларда гына йөрергә рөхсәт ителә! *Трамвайга утыру өчен юлны трамвай туктап беткәч кенә чыгарга кирәк! *Тукталышта автобус һәм троллейбусны арттан, ә трамвайны алдан урап узарга кирәк!

05.08.2024

Популяр яңалыклар

Туйганчы карбыз ашарга ярый

Җәйнең иң тәмле чоры – карбыз өлгергән чор, дуслар. Иртәгә карбыз көне дә билгеләп үтелә икән! Бүгенге көндә дөньяның 96 илендә карбызның 1200дән артык төре үстерелә. Галимнәр фикеренчә, карбызның туган ягы булып Көньяк Африка санала. Х гасырда ул кытайлар арасында да тарала һәм бик кадерле сыйга әйләнә. Бүгенге көндә дә Кытай карбыз үстерү буенча беренче урында тора. Аннан зур аерма белән Төркия, Иран, Египет, Америка илләре, Россия һәм Үзбәкстан бара. Карбызда 90% артык су бар. Ул А, В һәм С витаминнарының чыганагы булып тора.Сусауны басуы өстенә, карбыз калориясез ризык та. Бу көнне туйганчы карбыз ашый торган көн дип кабул итәргә кирәк. Хәзер инде карбыз белән берәүне дә шаккатырып булмый. Күп кеше аны үз бакчасында да үстерә. Әлеге көнне, әлбәттә, табигать кочагында ял итеп һәм бик күп карбыз ашап үткәрик әле, дуслар! Файдалы да, тәмле дә әлеге ризыкны ашап, җәебезне тагын да ямьлерәк итик!

02.08.2024

Канал яңалыклары

«ШАЯН ТВ» яңа проект тәкъдим итә

«ШАЯН ТВ»ның YouTube каналында премьера! Телеканал нәниләр өчен өр-яңа «ШАЯН Төсләр» проектын тәкъдим итә! Тапшыру балаларга төсләрне анимацион форматта мавыктыргыч итеп татар телендә өйрәнергә ярдәм итә. Беренче чыгарылыш кызыл төс белән таныштыра. Балалар кызыл төснең дөрес әйтелешен истә калдыра һәм аны танырга өйрәнә ала, шулай ук программада кызыл төстәге әйберләрнең мисалларын да күрергә мөмкин. Проект яшь тамашачыларны уен формасында төсләргә өйрәтү өчен бик уңайлы, бу исә, үз чиратында, уку процессын күңелле һәм кызыклы итә. Сылтама буенча узып, безгә кушылыгыз һәм балаларыгыз белән бергә төсләрне өйрәнегез!

02.08.2024

Канал яңалыклары

Халкыбызның мөһим мәдәни ел вакыйгасыннан читтә калмагыз

Халкыбызның иң мөһим мәдәни ел вакыйгасыннан читтә калмагыз! «ТАТАР СҮЗЕ» бишенче Халыкара нәфис сүз телевизион бәйгесенә гаризалар җибәрегез! Шигърият соючеләрдән видеолар көтәбез! Сылтама буенча узыгыз һәм бәйгенең кагыйдәләре белән танышыгыз!

01.08.2024

1 ... 78 79 80 81 82 ... 387

Яңа сайт!