Яңалыклар

Казанда узачак VK Festка бар билетлар да сатылып бетте

Фестиваль башланырга ике көн кала, барлык билетлар да сатылып бетте Россиянең иң зур open-air фестивале — VK Fest — быел 29 июньдә беренче тапкыр Казан шәһәрендә узачак. Чара 14:00 сәгатьтә «Казан» гаилә үзәге янында старт алачак. Төп сәхнәдә Юлия Савичева, Элвин Грей, ХЛЕБ, ZOLOTO, «Комната культуры», «Три дня дождя» һәм Баста чыгыш ясаячак. Быел VK Fest татар артистлары өчен дә тәүге тапкыр аерым сәхнә ача. Анда үз җырларын Нурминский, GAUGA, «Хижина Музыканта», Марат Яруллин, ОММАЖ, Ilgiz & Malsi Music, Al Su һәм Elina тәкъдим итәчәк. Фестиваль кысаларында инфлюенсерлар белән очрашулар, иҗади мастер-класслар, паблик-токлар, спорт һәм күңел ачу программалары узачак — бөтен гаилә өчен мавыктыргыч чаралар көтелә. Татар милли ризыкларын да фестивальнең фудкорт зонасында татып карарга мөмкин булачак. Тулырак мәгълүмат — VK Festның Казан буенча гидында. Киләсе атнада, 5 һәм 6 июль көннәрендә VK Fest Санкт-Петербургта, 300 еллык паркта үтәчәк. 19 һәм 20 июльдә фестиваль Мәскәүдә тәмамланачак. Билетларны vkfest.ru сайтында табарга мөмкин.

27.06.2025

Популяр яңалыклар

Беренче җәйге йолдызлар яңгыры!

27 июньнән 28енә каршы төнлә беренче җәйге йолдызлар яңгыры булачак. Бу – күз белән күреп була торган иң матур табигый күренешләрнең берсе! Йолдызларны шәһәрдән читтә карау уңайлырак – утлар комачауламый. Күзәтү өчен иң яхшы вакыт – кичке 11дән алып иртәнге 3кә кадәр. Бу – табигать кочагында төн уздыру, күккә карап хыяллану һәм теләк теләү өчен менә дигән мөмкинлек. Кем белә, бәлки, теләк чынга да ашар!

27.06.2025

Кызыклы фактлар

Елмай – тешләрең чиста булсын

Тешләрне ни өчен чистартырга кирәк? Теш чистарту – көн саен кабатлана торган гадәти эш кебек. Әмма нәкъ менә шул гадәт безнең сәламәтлек, елмаюыбыз һәм хәтта үз-үзебезгә ышаныч өчен бик мөһим! Ниг өчен дисезме? Хәзер барысын да аңлатабыз! 1. Кариес булдырмас өчен. Ашаганнан соң тешләрдә ризык калдыклары кала. Ә аларны чистартмасаң, бактерияләр эшкә керешә: кислоталар барлыкка китереп, теш эмален боза, нәтиҗәдә кариес пәйда була. 2. Теш урты (десна) сәламәт булсын өчен. Теш тирәсендәге уртлар ялкынсынырга мөмкин. Бу – теш төшүгә кадәр җиткерә торган җитди проблема. Аны да профилактикалау – теш щёткасы эше. 3. Авызыңнан яман ис килмәсен өчен. Начар ис – еш кына чистартылмаган тешләр нәтиҗәсе. Ешрак чистарту бу мәсьәләне чишәргә ярдәм итә. 4. Елмаюың матур булсын өчен. Саф, чиста тешләр – матур елмаюның сере. Ә матур елмаю – аралашу өчен ачкыч! Белә идеңме? 26 июнь – Бөтендөнья теш щёткасы көне! Бу гадәти тоелган предметсыз тешләрне чиста тотып булмас иде. Теш щёткалары XV гасырда Кытайда барлыкка килгән дип санала. Алар элек кыргый дуңгызның кыллары һәм бамбук ярдәмендә ясалган. Бүген исә бездә – уңайлы, төрле формалы, хәтта таймерлы теш щёткалары бар. Бүген – иске щётканы яңасына алыштыру өчен яхшы сәбәп! Тешләрне дөрес чистарту өчен киңәшләр: Көнгә ике тапкыр чистарт – иртәнге аштан соң һәм йоклар алдыннан Ике минут дәвамында чистарт Үзеңә туры килгән щётка сайла – яшькә карап һәм тешләрнең сизгерлеген истә тотып Телне дә чистартырга онытма – күп кенә бактерияләр нәкъ шунда Щётканы һәр 2–3 ай саен алыштыр – шулай ук авырып терелгәч тә алыштыру кирәк Стоматологка елга 1–2 тапкыр күрен – авыртмаса да! Теш чистарту – гап-гади эш кебек күренсә дә, ул чынлыкта сәламәтлек нигезе. Бүген, Теш щёткасы көне уңаеннан, щёткаңны тикшерергә онытма: ул һаман кулланырга яраклымы? Ә бәлки, яңасына вакыт җиткәндер? Сәламәт бул һәм матур елмаюың турында кайгырт!

26.06.2025

Популяр яңалыклар

Равил Закиров блогерлык турында сөйләде

«Килде-Китте ШОУ» программасының яңа чыгарылышы чыкты! Бу юлы студия кунагы – популяр яшь блогер Равил Закиров! Ул шәхси тормышында булган күп кенә яңалыклар һәм сөйгән кызы турында сөйләде. Шулай ук Равил блогерлар тормышы җиңелме дигән сорауга ихластан җавап бирде. Кызу булачак – тизрәк карагыз! Сылтама буенча узарга мөмкин.

26.06.2025

Канал яңалыклары

«Яраткан шигырь» проектын эфирда карагыз!

«Яраткан шигырь» проектының ЯҢА сезоны! Татар шигърияте аша туган җиргә мәхәббәт уяту, әхлак тәрбиясе бирүдә зур әһәмияткә ия. Ул нәфис сүз аша балаларда татар мәдәниятенә хөрмәт тәрбияли, татар язучыларының иҗаты белән таныштыра. Проект Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясеярдәме белән «ШАЯН ТВ» – тәүлек әйләнәсе татар телендә эшләүче беренче балалар каналы тарафыннан тормышка ашырыла. «Яраткан шигырь» проектын шимбә көнне сәгать 7:20 / 15:20 «ШАЯН ТВ» каналында карагыз!

25.06.2025

Кызыклы фактлар

Җәйнең иң популяр эчемлеге

25 июнь – Лимонад көне! Җәйнең иң тәмле һәм күңелле бәйрәме! Кем лимонад яратмый икән? Ул – балалар да, олылар да ярата торган иң популяр җәйге эчемлек. Һәм ел саен 25 июнь көнне бөтен дөнья Лимонад көнен билгеләп үтә! Лимонад – лимон согы, су һәм шикәрдән торган салкынча эчемлек. Ул төрле була: – газлы (пышылдап тора) – гадәти, табигый (гади су белән) – бөтнек, җиләк-җимеш, апельсин яки хәтта кыяр белән дә ясыйлар! Лимонадны кибеттән сатып алырга да, өйдә әти-әни белән бергә ясарга да була! Лимонад беренче тапкыр Италиядә якынча 800 ел элек ясалган, диләр. Соңрак ул Франция һәм Англиягә таралган. Америкада исә лимонад – җәй билгесе кебек: хәтта балалар урамга чыгып, лимонад сатыла торган өстәлләр куялар! Лимонад көнен ничек бәйрәм итәргә? Менә берничә кызыклы фикер: Үз лимонадыңны яса һәм дусларыңны сыйла Стакандагы лимонадның рәсемен яса һәм үз тәмеңне уйлап тап «ШАЯН ТВ»дан җәй турында мультфильм кара Иң мөһиме – елмай, ял ит һәм җәйне татып кал!

25.06.2025

Канал яңалыклары

Блогерлардан яңа контент!

Блогерларыбыз җәйге каникулларны бер дә бушка үткәрмиләр, ә кызыклы трендлар төшерәләр! Димәк, без алардан яңа контент көтәбез! Яңа видеолар һәм постлар бик тиздән чыгачак. Яңалыкларны күзәтеп барыгыз – кызык булачак! Тизрәк сылтамалар буенча кереп, безнең ВКонтакте һәм Телеграм-каналыбызга языл!

24.06.2025

Канал яңалыклары

«Балачак җыры» бәйгесенә гариза җибәрергә ашык!

«Балачак җыры» конкурсы ЯҢА СЕЗОНГА гаризалар кабул итә! Җиңүчеләрне акчалата бүләкләр, профессиональ җыр яздыру һәм клип төшерү көтә! Эшләрегезне безнең рәсми почтага shayanmuzik@mail.ru адресы буенча җибәрә аласыз. Гаризалар 7 июльгә кадәр кабул ителә. Бик әз көн калып бара! Тулырак мәгълүматны сылтама буенча табарга була. Узган елны «Балачак җыры» бәйгесендә җиңү яулаган җырга төшерелгән клипны карап китик: Ассэль Сәлахова - «Гөлләрем»

24.06.2025

1 ... 13 14 15 16 17 ... 378

Яңа сайт!