L’One концерты һәм дистәләгән активлыклар: Казанда Яшьләр көне узачак

Кунакларны лекцияләр, мастер-класслар, яшьләр проектлары һәм шәһәр берләшмәләре белән очрашулар, һөнәри үсеш буенча консультацияләр, интерактив зоналар, спорт активлыклары һәм җирле брендлар маркеты көтә. Катнашучылар үзләрен кызыксындырган юнәлешләрдә яңа мөмкинлекләр белән таныша алачак.

Бәйрәмнең төп вакыйгаларының берсе – кичке концерт программасы булачак. Аның хедлайнеры – танылган рэп-башкаручы L’One. Артистның чыгышы 21:00 сәгатьтә башланачак.

Оештыручылар билгеләп үткәнчә, фестиваль студентларны, яшь белгечләрне, волонтёрларны, иҗтимагый актив яшьләрне һәм үсеш мөмкинлекләре белән кызыксынучыларны бер мәйданга җыячак.

Чарага керү алдан теркәлү буенча башкарыла.

Яшьләр көне Яшьләр эшләре буенча Федераль агентлык, Татарстан Республикасы Хөкүмәте, Татарстан Республикасы Яшьләр эшләре министрлыгы һәм вакыйга партнерлары ярдәмендә үткәрелә.