Яңалыклар

«Ак Барс» ШАЯН матч үткәрде

Әле мондый вакыйганың булганы юк иде! Бүген «Ак Барс» «ШАЯН ТВ» беренче татар балалар телеканалы белән берлектә матч үткәрде. «Нефтехимик» командасы белән очрашу яшь тамашачыларга багышланды. Бу Республика тарихындагы беренче ШАЯН матч! Матчның сценарие һәм активлык мәйданчыклары «Барсик тут» төркеме балаларының һәм язылучыларның теләкләре нигезендә эшләнде. Беренче тапкыр КХЛ уены «ШАЯН ТВ» балалар телеканалында туры эфирда күрсәтелде. «Татнефть Арена» фойесында җанатарлар өчен тематик күңел ачу программасы оештырылды. Уен алдыннан фойеда һәм тәнәфесләрдә «Сәйлән» телевизион җыр фестивале финалистлары һәм Яхиннар Prima студиясенең «Лайки» беренче татар балалар рок-төркеме чыгыш ясады, яшүсмерләр коллективлары исә интерактив бәйгеләр үткәрде. Шулай ук җанатарлар «ШАЯН ТВ» фотозонасында фотога төшә алды, ә балалар зонасында яшь тамашачылар махсус аниматорлар белән күңел ачты. Арена үзәгендә алып баручылар, дикторлар, матч комментаторлары, флеш-интервьюдагы корреспондентлар һәм «Ак Барс Шоу» алып баручылары ролендә «ШАЯН ТВ» телеканалы алып баручылары чыгыш ясады. Уен башланыр алдыннан яңгырый торган гимнны «Батыр егетләр» балалар ансамбле башкарды. Бәйрәм атмосферасын Барсик белән бергә Шаян һәм Крут персонажлары тулыландырды. «Ак Барс» хоккей командасын җиңүләре белән котлыйбыз! Ә «ШАЯН ТВ» каналының мондый зур масштабка чыгуы белән горурланабыз! Әлеге чара канал өчен якты вакыйга булып истә калачак!

13.02.2024

«ШАЯН ТВ» каналы очрашуда булып кайтты

Бик тиздән, 15 февраль көнне герой шагыйрь Муса Җәлилнең тууына 118 ел тула. Шул уңайдан бүген «ШАЯН ТВ» каналы, Муса Җәлил исемендәге Республика премиясе лауреаты буларак, Балтач районының Карадуган авылында урнашкан бөек шагыйрьнең музеенда кунакта булып кайтты. Биредә һәр елның февралендә «Муса Җәлил көннәре»н уздыру күркәм традициягә әверелгән. Әлеге чарада «ШАЯН ТВ» каналы мәктәп укучылары белән очрашты һәм балаларны канал эшчәнлеге белән таныштырды. Шулай ук яшь тамашачылар өчен кызыклы викториналар, уеннар үткәрелде. Алар «ШАЯН ТВ»дан истәлекле бүләкләргә ия булдылар. Тамашачылар белән мондый җылы очрашуга чакырулары өчен зур рәхмәтебезне белдерәбез!

13.02.2024

Гомер бәйрәмегез белән, хөрмәтле Рамилә Әхмәтзакировна!

Бүген «ШАЯН ТВ» каналының башкарма директоры - баш мөхәррире, педагогика фәннәре кандидаты, Татарстан Республикасының атказанган мәдәният хезмәткәре Рамилә Әхмәтзакир кызы Сәхабетдинованың туган көне, күркәм юбилее! Хөрмәтле Рамилә Әхмәтзакир кызы! Сез кайгыртучан, киң күңелле, гадел җитәкче! Сак карашыгыз, хезмәт сөючәнлегегез зур хөрмәткә лаек. Сезнең тырышлыгыгыз белән «ШАЯН ТВ» каналы көннән-көн чәчәк ата һәм балаларның чиксез рәхмәт сүзләре яңгырый! Чын күңелдән гомер бәйрәмегез белән тәбрик итәбез! Киләчәк тормышыгызда ныклы сәламәтлек, күңел көрлеге, яңадан-яңа куанычлар, бәрәкәтле, мул тормыш, эшегездә уңышлар юлдаш булсын! Хезмәттәшләреңнең ихтирамын тоеп, бәхетле озын гомер кичерүегезне телибез!

12.02.2024

ШАЯН матчны турыдан-туры трансляциядә карарга мөмкин

13 февральдә «Ак Барс» «ШАЯН ТВ» беренче татар балалар каналы белән берлектә матч үткәрә. «Нефтехимик» командасы белән очрашу 19:30да башлана һәм ул яшь тамашачыларга багышланачак. Алып баручылар, дикторлар, «Ак Барс Шоу» алып баручылары ролендә «ШАЯН ТВ» телеканалы алып баручылары чыгыш ясаячак. Турыдан-туры трансляцияне «ШАЯН ТВ» каналында 19:15 сәгатьтә карарга мөмкин булачак.

12.02.2024

Тиздән иң яхшы нәфис сүз осталары билгеле булачак

Бик тиздән «ТАТАР СҮЗЕ» дүртенче Халыкара нәфис сүз телевизион бәйгесенең иң яхшы нәфис сүз осталары билгеле булачак! Шул уңайдан, бүген әлеге бәйгенең оештыру комитеты әгъзасы, «ШАЯН ТВ» каналының башкарма директоры-баш мөхәррире урынбасары Роза Әдиятуллина «Татарстан-Яңа Гасыр» каналында «Здравствуйте» тапшыруында кунакта булып кайтты. Шулай ук иртәгә, 13 февраль көнне Роза Әдиятуллина белән «ТАТАР СҮЗЕ» бәйгесенең жюри әгъзасы, Татарстанның атказанган сәнгать эшлеклесе, Татарстанның халык артисткасы Луара Шакирҗан «ТНВ» каналында «Манзара» тапшыруында кунакта булачаклар. Әңгәмә яңа сезонның җиңүчеләре, аларның ничек сайлап алынулары һәм тиздән булачак Гала-концерт хакында булачак. Тапшыруны иртәнге 6:00 сәгатьтә карагыз!

12.02.2024

Илнат Фархуллин әлегә кадәр сөйләмәгән серләре хакында уртаклашты

Махсус YouTube өчен эшләнгән проект - «Килде-Китте ШОУ»ның яңа чыгарылышы «ШАЯН ТВ»ның YouTube каналында! Студия кунагы – татар эстрадасының популяр артисты Илнат Фархуллин. Җырчының әлегә кадәр сөйләмәгән серләре, сөйгән яры, «Күбәләк» җыры, тормышындагы көтелмәгән вакыйга хакында – барысы да яңа чыгарылышта. Сылтама буенча узыгыз һәм рәхәтләнеп карагыз!

09.02.2024

Җирне көчле магнит давылы каплаячак

Бүген планетабызга яңа көчле магнит давылы килә. Җирне 4 баллга кадәр көчле георадарлар каплаячак. Ул кояштагы шартлаулар аркасында барлыкка килә. Начар геомагнит шартлары берничә көн дәвам итәчәк. Кояшта соңгы көчле ялкынлану 8 февраль көнне көндез М3.49 күрсәткечендә теркәлгән. Мондый дәрәҗә магнит давылларының көчен 5 баллга кадәр арттыра. Төн уртасыннан иртәнге 9га кадәр давылның көче минималь булып калачак. Ул 2 балл белән билгеләнә. Иртәнге 9дан көндезге 12гә кадәр, шулай ук 18 сәгатьтән төн уртасына кадәр геоударлар һөҗүме 3 баллга кадәр артачак. Көндезге сәгать 12дән - 18 сәгатькә кадәр геомагнит чуалышларының иң югары ноктасы көтелә, ул 4 баллга җитәчәк. Сәламәт яшәү рәвеше алып барырга, күбрәк ял итү һәм саф һавада йөрергә һәм стресстан сакланырга киңәш ителә. Сәламәтлегегезгә игътибарлы булыгыз!

09.02.2024

Ни өчен кышкы саф һавада йөрү бик файдалы?

Саф һавада йөрү - сәламәтлекне ныгыту өчен иң мөһим чараларның берсе. Ул организмны чыныктыра, бигрәк тә салкын вакытларда авыруларга чыдамлыкны арттырырга ярдәм итә. Ә кышын урамда йөрү - табигать матурлыгын күзәтү өчен генә түгел, ачык һавада күңел ачу өчен дә менә дигән вакыт! 1. Кышын саф һавада йөрү җәйгә караганда сәламәтлеккә уңай йогынты ясый. Аның сере һава температурасының салкын булуында. Җылы һәм эссе көннәргә караганда, салкында кислород күләме югарырак. 2. Салкын көннәрдә һава тузаннан һәм зарарлы матдәләрдән чистара. 3. Саф һавада йөрү организмның гомуми тонусын күтәрә, йөрәк һәм үпкә эшчәнлеген арттыра, матдәләр алмашуын яхшырта, кан басымын нормага китерә, иммунитетны арттыра. 4. Баш мие эшчәнлеге яхшыра, яхшы фикерләр туа. 5. Табигатькә соклану начар уйларны оныттыра, нерв системасын тынычландыра, кәефне күтәрә. 6. Парк яки урманда йөргән вакытта, һава күзәнәкләрне кислород белән баета, организмның тулаем эшчәнлеген яхшырта. 7. Күтәренке кәеф яхшы йокыга сәбәп була һәм бөтен организм ял итә. 8. Җәяү даими йөргән кешеләрнең йөрәкләре яхшы эшли. 9. Ак төс – яхшы психолог та. Ул агрессияне киметергә сәләтле. Салкында бәхет гормоннары бүленеп чыга. Сәламәтлегегез нык булсын дисәгез, саф һавада күбрәк йөрегез!

08.02.2024

1 ... 97 98 99 100 101 ... 376

Яңа сайт!