Яңалыклар

«Балачак җыры»на гаризалар кабул ителә

«Балачак җыры»на гаризалар кабул ителә

«Балачак җыры» бәйгесенең бишенче сезонына гаризалар кабул ителә! Авторлар һәм композиторлардан өр-яңа шигырьләр һәм көйләр көтәбез! Тизрәк гариза юлларга ашыгыгыз! Бүләкләр зурдан: акчалата приз, җырның профессиональ аранжировкасы һәм клибы! Эшләрегезне shayanmuzik@mail.ru адресына җибәрегез. Гаризалар 30 апрельгә кадәр кабул ителә! Тулырак мәгълүмат сылтама буенча.

01.03.2024
Туган көнегез белән, хөрмәтле Рөстәм Нургали улы!

Туган көнегез белән, хөрмәтле Рөстәм Нургали улы!

Бүген Татарстан Республикасы Рәисе Рөстәм Нургали улы Миңнехановның туган көне! Хөрмәтле Рөстәм Нургали улы! Туган көнегез белән Сезне! Сез ачкан «ШАЯН ТВ» каналына - 5 ел! Милләтебезгә хезмәт итүче канал ачканыгыз өчен, безнең теләк-омтылышларны һәрвакыт хуплап, ярдәм кулы сузганыгыз өчен зур рәхмәт Сезгә! Сәламәтлек, сөенеч, шатлыклар, эшегездә уңышлар телибез!

01.03.2024
Кышның соңгы көне!

Кышның соңгы көне!

Бүген - кышның соңгы көне! Ул үзенең салкыннары, ачы җилле бураннары һәм катлы-катлы кар өемнәре белән үзенчәлекле булды. Ә иртәгәдән инде яз! Кыш никадәр озын булса да, сизелмичә дә узып китте. Ә инде яз үзенең матур, кояшлы көннәре белән шатландырып, кешеләргә яхшы кәеф һәм өмет өстәр, дип ышанабыз! Кышның соңгы көнен матур һәм истә калырлык итеп уздырыйк, дуслар!

29.02.2024
«ШАЯН ТВ» каналы яңа музыкаль-анимацион программа тәкъдим итә

«ШАЯН ТВ» каналы яңа музыкаль-анимацион программа тәкъдим итә

«ШАЯН ТВ» каналында премьера! Мәктәпкәчә яшьтәге балалар өчен «ДоМиСоль» музыкаль-анимацион программасы эфирга чыга! Ноталар аша бергәләп дөньяны танырга өйрәнәбез! Тапшыруның һәр чыгарылышы билгеле бер тематик принцип буенча төзелгән: ел фасыллары, хайваннар һәм үсемлекләр дөньясы, табигать күренешләре һ.б. Проект нәниләрне сөйләм формалаштырырга, сүзнең дөрес әйтелешенә, уен эшчәнлеге аша татар телендә фикерләргә өйрәтә. Тапшыруны бүген 14:30 һәм 22:30 сәгатьләрдә «ШАЯН ТВ» каналында һәм YouTube каналда карагыз!

29.02.2024
ШАЯНнарның кышы нәрсәсе белән истә калган?

ШАЯНнарның кышы нәрсәсе белән истә калган?

Дуслар, ШАЯНнарның кышы нәрсәсе белән истә калганын беләсегез киләме? «ШАЯН ТВ» каналы алып баручылары кышның ничек узуы һәм истәлекле вакыйгалары белән уртаклаштылар! Азалия Шәрипова: «Быелгы кыш шундый матур хатирәләргә бай булды! Сеңлем һәм энем белән тау шудык, кар атышып уйнадык, гаиләбез белән авылга кайтып килдек, хоккей карадык. Күңел ачудан тыш, быелгы кыш яңа җиңүләр, уңышлар белән дә истә калды, Аллага шөкер! Кыскасы, бик күңелле һәм файдалы булып узды карлы, матур кышыбыз». Аяз Әгълиуллин: «Бу елгы кыш үзенең зәмһәрир суыклары, карлары-бураннары белән истә калыр. Минем күптәннән мондый кар көртләре күргәнем юк иде. Дуслар белән рәхәтләнеп окоп казып уйнадык, кар атыштык, сикердек, тәгәрәштек. «Имәнлек» урманында чаңгы шудым, «Черек күл»дә тимераякта йөрдем. Балалар бакчасына Кыш Бабай булып килүем үзе бер истәлекле мизгел. Гаҗәеп матур кыш булды бу». Зәйнәп Хөснуллина: «Кышым бик продуктив узды. Имтиханнар, «ШАЯН ТВ» каналында съемкалар, репетицияләр белән сизелми дә узып китте ул. Бу кышкы сихри атмосфера кәефне бик күтәреп торды. Кышның иң истә калган вакыйгасы – ул ШАЯН матч». Кәрим Галиев: «Минем кышым бик кызыклы узды, чөнки быел ул безне күпкырлы булуы белән сөендерде! Минемчә, кыш - концертлар, чыгышлар һәм яңа мөмкинлекләр сезоны. Чыннан да, бу кыш миңа яңа мөмкинлекләр бирде. Ак Барс «ШАЯН ТВ» каналы белән берлектә ШАЯН матч үткәрде. Мин дә читтә калмадым, әлеге чарада катнаштым. Быелгы кыш Казанда киләчәк уеннары узуы белән дә аерылып тора! Мин бу уеннарга медиа вәкиле буларак йөрдем, «ШАЯН ТВ» өчен тамашачыларга обзорлар төшердек. Буш вакытларымда исә дусларым белән шугалакта хоккей уйнадык, урманда әтием белән чаңгыда йөрдем».  

29.02.2024
Бишек җырларыннан торган «Әлли-бәлли, былбылым» җыентыгы дөнья күрде

Бишек җырларыннан торган «Әлли-бәлли, былбылым» җыентыгы дөнья күрде

Нәни дусларыбыз һәм аларның әти-әниләре өчен шәп яңалык! Бишек җырларыннан торган «Әлли-бәлли, былбылым» дип аталган китап дөнья күрде! Җыентык Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән нәшер ителде. Сез әлеге бишек җырларын тыңлап, гаҗәеп тылсым иленә сәяхәт итә аласыз! Алар һәркем өчен файдалы! Китаптагы махсус QR-код аша җырларның аудиоязмаларын да тыңларга мөмкин. Сылтама аша узыгыз һәм рәхәтләнеп тыңлагыз! Төшләрегез «тәмле» булсын!

28.02.2024
Иң эссе җәй көтелә

Иң эссе җәй көтелә

2024 елның җәе тарихта иң эссе җәй булырга мөмкин, ди белгечләр. Фаразлар буенча, июньнән августка кадәр һаваның уртача температурасы +25, +27 градус тәшкил итәчәк (норма +22). Ә уртача максималь температура 35 градустан да югарырак булырга мөмкин. Бу нормадан 5 градуска күбрәк. Моннан тыш, синоптиклар кисәткәнчә, җәйге чорда һава массаларының хәрәкәте киң җылылык циклоннары барлыкка килүгә ярдәм итәчәк, бу үз чиратында югары дымлылыкка китерәчәк һәм көчле яңгырлар, яшен һәм давыллар ихтималлыгын арттырачак. Метеорологлар аңлатуынча, 2024 елның җәендә рекордлы югары температура фоны Эль-Ниньо кебек табигый күренеш нәтиҗәсе булачак. Эль-Ниньо яки Көньяк осцилляция - Тын океанның экваториаль өлешендә су температурасының үзгәрүе, бу климатка тәэсир итә ала. Бу күренеш бөтен планетада эсселек һәм корылык кебек җитди һава торышы аномалияләрен китереп чыгара. Шул ук вакытта Эль-Ниньо чоры 8 елга кадәр дәвам итәргә мөмкин, әмма галимнәр аның күпме дәвам итүен һәм көчен әлегә  төгәл әйтә алмый.

27.02.2024
Prev. 1 ... 97 98 99 100 101 ... 378 Next
Главная Программа Видео Шортс Поиск