Яңалыклар

Зөлфәт Зиннуров кызы Зәлия белән «Парта»да кунакта!

Дуслар, сөенечле яңалык! Безнең «ВКонтакте» төркемебездә күпләр яратып өлгергән «Парта» тапшыруының алтынчы чыгарылышы дөнья күрде! Бу юлы сезне аеруча кызыклы кунаклар көтә: татар эстрадасы йолдызы, танылган алып баручы Зөлфәт Зиннуров һәм аның кызы Залия мәктәп программасы һәм зирәклек буенча үз көчләрен сынап карыйлар. Ә аларны сынау бурычы – даими алып баручыларыбыз Гөлназ Сафарова һәм аның улы Айдан өстендә. Кем остарак булыр? Мәктәп фәннәрен яхшырак кем хәтерли – ата-аналармы, әллә балалармы? Кызыклы, күңелле һәм файдалы тамаша вәгъдә итәбез! Яңа чыгарылышны карау өчен «ВКонтакте» төркемебезгә рәхим итегез! Дусларыгыз белән дә бүлешергә онытмагыз – кемнең белемлерәк икәнен тикшерик!

29.04.2025

Бию көне белән, дуслар!

Һәр елны 29 апрельдә без Бөтендөнья бию көнен билгеләп үтәбез. Бу гади генә биергә сәбәп түгел – бу чын хәрәкәт, иреклек һәм иҗат бәйрәме! Бию кешеләрне, аларның яшенә, милләтенә һәм кызыксынуларына карамастан, берләштерә. Ул бигрәк тә балаларга һәм үсмерләргә якын, чөнки хәрәкәт –алар тормышының аерылгысыз өлеше. Бию – ул гүзәллек кенә түгел. Ул үзеңне күрсәтергә, сүзсез генә тарих сөйләргә, көйне бөтен тәнең белән тоярга ярдәм итә. Бу – аралашу ысулы, хәтта син башкалар белән бер телдә сөйләшмәсәң дә. Без биегәндә нәрсә тоябыз, нәрсә ошый – барысын да күрсәтеп була. Балалар һәм үсмерләр өчен бию – үсеш мөмкинлеге дә. Ул координацияне, сыгылмалылыкны яхшырта, сәламәтлекне ныгыта, командада эшләргә, игътибарлы булырга һәм дисциплинага өйрәтә. Өстәвенә, үз-үзеңә ышанычны арттыра. Сәхнәгә чыккан яки берәр социаль мәйданчыкта бию видеосы төшергән һәркем моны белә! Бүген бию – ул гел классик балет кенә түгел. Хәзер хип-хоп, джаз-фанк, контемп, k-pop, брейк-данс һәм тагын бик күп юнәлешләр бар. Һәр кеше күңеленә якын стиль таба ала. Музыка яратсаң, хәрәкәт итәргә теләсәң, үзеңне күрсәтәсең килсә – бию нәкъ менә синең өчен. 29 апрель көнне яраткан җырыңны кабызып, күңелең теләгәнчә биергә генә кирәк. Бие – ничек тоясың, шулай. Чөнки бию – ул шатлык, ә шатлыкның чиге юк! Теләсәң – ялгызың бие, теләсәң – дусларың белән. Иң мөһиме – моны күңел биреп эшлә! Шулай ук «ШАЯН ТВ» каналында яраткан «Шома бас» тапшыруын да карарга онытма!

29.04.2025

Казанга кыш килә?

Бүген, 28 апрельдә, Казанда кышка охшаган һава торышы хөкем сөрә. Шәһәрдә температура +4 градус тирәсендә генә саклана, ләкин бик көчле җил исә — тизлеге сәгатенә 14 метрга кадәр җитә. Күпчелек казанлыларга яңадан кышкы киемнәрен шкафтан чыгарырга туры килде. Синоптиклар билгеләп үткәнчә, мондый салкыннар май бәйрәмнәре вакытында соңгы 150 елда күзәтелмәгән. Суыклар Россиянең Төньяк-Көнбатыш өлешенә һәм Себергә дә таралачак. Шулай ук, Идел буе төбәге, шул исәптән Казан да, гадәттәгедән күпкә түбән температуралар белән очраша. Казанда язның соңгы көннәрендә кышкы табигать кабат үзенең үзгәрүчән холкын күрсәтте.

28.04.2025

«Тукай оныклары» бәйгесендә тавыш бирергә ашык!

Бөек шагыйребез Габдулла Тукайның туган көне уңаеннан «ШАЯН ТВ» каналы оештырган «Тукай оныклары» дип исемләнгән шигырь бәйгесенең тавыш бирү этабының нибары ике генә көне калды. 30 апрельгә кадәр үзеңә ошаган шигырьләр өчен «ШАЯН ТВ» каналының Вконтакте төркемендә һәм Телеграм каналында тавыш бирергә ашык! 30 апрель көнне тавыш бирү буенча җиңүчеләрне билгелибез! Иң күп тавыш җыйган катнашучыны «Тукай оныклары» тапшыруына чакырабыз.

28.04.2025

«Иман Әлифбасы»н карамый калма!

«ШАЯН ТВ» каналында «Иман Әлифбасы»ның 4 нче чыгарылышы дөнья күрде! Балалар өчен ислам дөньясына ачкыч булган бу тапшыру — кызыклы аралашу һәм тормыштан алынган мисаллар аша дини гыйлемне аңлаешлы итеп җиткерә. Яңа чыгарылыш аеруча мавыктыргыч! Бу файдалы һәм күңелле программаны «ШАЯН ТВ»ның ВКонтакте төркемендә карарга онытма!

27.04.2025

Габдулла Тукайның тууына 139 ел!

Бүген — халкыбызның мәңге яшәр шагыйре Габдулла Тукай туган көн! Быел аңа 139 ел тулды. Кыска гына гомере эчендә ул татар әдәбиятында гаять тирән эз калдырды. Бар җан-тәнен халыкка, телгә, милли рухка багышлаган Тукай — безнең күңелләрнең якты маягы. Аның иҗаты — шигъри осталык, милли үзаң һәм күңел сафлыгы үрнәге. Аның шигырьләре бүген дә мәктәпләрдә укытыла, театр сәхнәләрендә яңгырый, җыр-моңга әверелеп, күңелләрдә яши. Балалар «Шүрәле», «Кызыклы шәкерт», «Пар ат» кебек әсәрләрен яратып укый, ә өлкәннәр «И туган тел», «Туган авыл» кебек шигырьләрендә үзләренең күңел халәтен таба. Кызыклы фактлар: Габдулла Тукай Казан артының Кырлай авылында дөньяга килә. Хәзер анда аңа багышланган музей эшли. Тукай 13 яшендә үк беренче шигырьләрен яза башлый, 20 яшендә инде киң җәмәгатьчелеккә танылган шагыйрь була. Аның хөрмәтенә 1996 елдан башлап 26 апрель — Туган тел көне буларак билгеләп үтелә. «Тукай» исемен йөрткән урамнар, китапханәләр, парклар — бөтен татар дөньясы буйлап бар. Тукай — татар халкының йөрәгендә мәңге яшәр исем! Бөек шагыйребезне онытмыйк, аның иҗатын саклыйк, туган телебезне яратып, киләчәк буыннарга тапшырыйк! Дуслар! Бүген 13:00 сәгатьтә Г.Камал исемендәге Татар дәүләт академия театрының яңа бинасы каршындагы мәйданда зур гала-концерт узачак! «Мин татарча сөйләшәм!» акциясенең финалы да шунда булачак. Килегез, бәйрәм рухын бергә уртаклашыйк!

26.04.2025

Туган тел бәйрәме!

Бүген Казаныбызда Габдулла Тукайның туган көне һәм Туган тел көне уңаеннан оештырылган күркәм чара узды. Г.Камал исемендәге Яңа театр бинасында Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе белән берлектә тормышка ашырылган проектлар Рәисебез Рөстәм Нургали улы Миңнехановка, Марат Готов улы Әхмәтовка һәм килгән мөхтәрәм кунакларга тәкъдим ителде. Чара кысаларында «ШАЯН ТВ» телеканалы балалары катнашында рэп-перформанс тәкъдим ителде. Шулай ук кунаклар өчен татар теленә өйрәтүче гамәлгә ашырылган проектларның кыскача мультимедияле презентациясе күрсәтелде. Кунаклар проектларның төп нәтиҗәләре белән дә таныша алды. Безнең балаларның чыгышы һәркемгә күңелле хисләр һәм дәрт өстәде! Туган тел көне уңаеннан шулкадәр күп кеше җыелды. Чара һәркемдә онытылмас тәэсир калдырды!

26.04.2025

187 нче күппрофильле лицейда кунакта

«ШАЯН ТВ» Казан шәһәренең 187 нче күппрофильле лицеенда кунакта булды! «Тәмле тел» иҗади түгәрәгенә йөрүче 1 нче сыйныф укучылары безгә танылган «Шалкан» әкиятен сәхнәләштереп күрсәттеләр. Балаларның чыгышы бик җанлы, кызыклы һәм ихлас булды! Спектакльне карарга Дәү әни белән Мияу да килгән иде - аларга бигрәк тә ошады! Кечкенә артистларга зур рәхмәт, ә укытучыларына - иҗади уңышлар телибез!

25.04.2025

1 ... 19 20 21 22 23 ... 375

Яңа сайт!