Яңалыклар

Айгөл Габдрахманова «Сәләт»ле яшьләр турында

Айгөл Габдрахманова «Сәләт»ле яшьләр турында

«МАРШРУТка»ның яңа чыгарылышында кунакта – «Сәләт» яшьләр үзәге директоры Айгөл Габдрахманова! Ул нефть тармагындагы һөнәрен калдырып, балалар белән эшләргә ни өчен карар кылуы, сәләтле яшьләр турында һәм үзенең яраткан мавыгулары хакында сөйләде. Тулы чыгарылышны безнең ВКонтакте төркемендә  карый аласыз.

06.05.2025
Бөек Җиңү турында шигырьләр

Бөек Җиңү турында шигырьләр

Тынычлыкның туган көне (Р.Миңнуллин) Минем бабай орденнарын, Медальләрен такты бүген. Ялт-йолт итеп тора алар – Шуңа күрә якты бүген! Бүген бигрәк егетләрчә, Солдатларча атлый бабам. Бабам белән, җитәкләшеп, Мин парадка бүген барам. Җиңүчеләр кебек итеп Атлыйм мин дә, атлый ул да. «Син – батыр!» – дим мин бабама, «Син – батыр!» – дип мактый ул да. Ул иң батыр солдат булган, Мин дә солдат булачакмын. Бабам тыныч ял итсен дип, Ил чигендә торачакмын! Борчылмагыз! Үсеп килә Батырларның оныклары. Бабайларның батырлыгын Бер малай да онытмады. Иртә тусам, мин үзем дә Бабам кебек булыр идем… Тынычлыкның туган көнен Бәйрәм итә бүген илем! Безгә тынычлык кирәк (Әхмәт Ерикәй) Шаулый урман, гөрли болын, Яфрак яра тал тирәк, Яшел бакча төзү өчен, Безгә тынычлык кирәк. Тормышны, җирне ярату- Безнең беренче теләк, Зур заводлар салу өчен, Безгә тынычлык кирәк. Минем бабай (Э.Шәрифуллина) Минем бабам – капитан, Сугышта булып кайткан. Күкрәк тулы орденнар, Медальләр алып кайткан.   Безнең илдә һәр бала Уйнап-көлеп йөрсен дип, Хәвеф-хәтәр күрмәсен, Тыныч булып үссен дип, Көрәшкән чакта бабам, Әни нәкъ минем яшьтә булган, Рәсем ясап, хат язып, Бабама салып торган. Бик күп сугышкан бабам, Дошманны җиңеп кайткан. Үзе белән ул безгә Тынычлык алып кайткан! Мәңгелек ут (Шәүкәт Галиев) Миллионнар Җирне саклап Җанын биргән — Ил яшәсен, Үзем яныйм Мәңге дигән!.. Мәңгелек ут Бәргәләнә, Дөрләп яна, Уяу яна —  Күз йому юк Бер дә аңа! Мылтык тотып  Бастым бүген Мин дә сакка, — Мәңгелек ут, Синең белән Без бер сафта! Бу тынлыкны —  Яшәү шавын Бүлдермәсен — Изге утны Сугыш җиле Сүндермәсен! Җиңү көне ( Гөлнур АЙЗАТ) Батыр солдат булып таш һәйкәлләр Баскан бүген мәйдан түренә. Җиңү көне килеп җиткән саен, Күпме күз яшьләре түгелә. Җиңү көне җиңел килмәде ул, Ятып калды илнең уллары. Алар хөрмәтенә байракларны Күтәрәбез бүген югары. Йөзләр, меңнәр, миллионнар булып, Утка кергән Ватан солдаты. Исемнәре җырга әйләнгән бит Җиңү алып кайткан солдатның. Ветераннар сафын барлый яшьләр, Алмаш килә илне яратып. Җиңү көнен каршы алабыз без, Җиңү маршын горур яңгыратып Тынычлык кошлары (Рәхимә Арсланова) Гелдер, гелдер, Гөлдер-гөлдер, Күгәрченнәр гөрләшә, Көннәр буе гөр-гөр килеп, Алар нидер серләшә. Гөлдер-гөлдер, Гелдер-гелдер... Ни әйтергә телиләр? Алар шулай илебезгә Тыныч тормыш телиләр.

06.05.2025
Җиңү көненә – бәйге!

Җиңү көненә – бәйге!

Дуслар! «ШАЯН ТВ» каналы янәдән бүләкләр уйната! Бөек Җиңүгә 80 ел уңаеннан, без рәсемнәр бәйгесе оештырабыз! Тизрәк безнең Телеграм каналыбызга һәм ВКонтакте төркемебезгә кереп, кагыйдәләр белән таныш. Алар бик гади!  Җиңүчеләр «ШАЯН ТВ» каналыннан истәлекле бүләкләргә лаек булачак. Яраткан каналың белән бергә бул! Уңышлар!

05.05.2025
«Татнефть Арена»да зур концерт!

«Татнефть Арена»да зур концерт!

7 май – күңелле, дәртле, онытылмас мизгелләр көне булачак! Бу көнне «Татнефть Арена» сәхнәсендә «Болгар радиосы»ның масштаблы концерты узачак. Татарстанның иң танылган җырчылары бер сәхнәгә җыелып, тамашачыларга чын мәгънәсендә музыкаль бәйрәм бүләк итәчәкләр. Илсөя Бәдретдинова, Элвин Грей, Ришат Төхвәтуллин, Фирдус Тямаев, Әнвәр Нургалиев, Марат Яруллин, Илмира Нәгыймова, Рифат Зарипов, Илнат Фәрхуллин, Зинира һәм Ризат Рамазановлар, Алмаз һәм Зөлфирә Мирзаяновлар, Илшат Сафин, Алсу һәм Азат Фазлыевлар – болар барысы да сәхнәдә сезне көтә! Бу кичтә тамашачыларны җанлы башкару, яңа дуэтлар, көтелмәгән чыгышлар һәм бик күп сюрпризлар көтә. Татар эстрадасының иң якты йолдызлары катнашындагы концерт – моны сагынып сөйләрлек вакыйга булачак! Син дә бу көнне безнең белән үткәр! Иң зур концертка санаулы көннәр калды! Билетларны 500 сумнан алып табып була – ашыгыгыз!

05.05.2025
«Бишек җырлары»: яңа чыгарылыш!

«Бишек җырлары»: яңа чыгарылыш!

«ШАЯН ТВ» каналы тәкъдим иткән «Бишек җырлары» проекты үзенең мавыктыргыч һәм күңелләргә үтеп керердәй яңа чыгарылышлары белән сөендерә! Тамашачылар бүген бу проектның премьерасын күрә алачак. Проектның төп максаты – ана белән бала арасында рухи якынлык тудыру, ата-аналар белән балалар арасында җылы һәм ышанычлы мөнәсәбәтне ныгыту. Борынгыдан килгән милли традицияләрне саклап, халык иҗаты аша сабый күңеленә юл табу – «Бишек җырлары» тапшыруының асылы. Яңа сериядә сезне бик үзенчәлекле, моңлы, тирән мәгънәле җыр көтә – «Бәллү» бишек җыры. Бу әсәрне Татарстанның һәм Россиянең халык артисты, күренекле җырчы Винера Ганиева башкара. Җырның сүзләрен бөек татар шагыйре Дәрдемәнд язган, көй авторы – күренекле композитор Резеда Ахиярова, ә җырга заманча яңгырашны – аранжировканы – талантлы музыкант Вадим Усманов эшләде. Бу тапшыру – милли җырлар аша балаларга туган телнең моңын, милли традицияләрне җиткерү, гаилә җылысын саклап калу юнәлешендә зур адым. Яңа чыгарлышларны сылтама аша кереп, безнең ВКонтакте төркемендә карый аласыз.

03.05.2025
«ДилиНали» белән яшелчәләр өйрәнәбез

«ДилиНали» белән яшелчәләр өйрәнәбез

«ДилиНали» тапшыруының яңа чыгарылышы дөнья күрде! Бу юлы без сезнең белән яшелчәләр дөньясына күңелле һәм мавыктыргыч сәяхәт кылачакбыз. Яшелчәләрнең исемнәрен, тышкы кыяфәтләрен һәм кайда үсүләрен өйрәнәбез, ә күңелле көйләр бу барысын тагын да кызыклырак итәчәк. Музыкаль формада яшелчәләр белән танышу мөмкинлеген кулдан ычкындырмагыз – яңа чыгарылышны карап калыгыз! Безнең ВКонтакте төркемендә карарга мөмкин.

30.04.2025
Безнекеләр булдыра!

Безнекеләр булдыра!

Быел 25 нче тапкыр уздырылган «Созвездие – Йолдызлык» республикакүләм фестиваль-конкурсы тантаналы рәвештә тәмамланды! Йомгаклау концерты 30 нчы апрель көнне Казан шәһәренең КСК «Пирамида» сәхнәсендә узды. Без зур горурлык белән «ШАЯН ТВ» телеканалының сәләтле малайларын котлыйбыз! Алар бу фестивальдә лаеклы чыгыш ясап, тамашачыларның да, жюри әгъзаларының да йөрәген яуладылар. ГРАН-ПРИ иясе булып Камиль Валеев танылды! Камиль – «Сәйлән»проектының беренче сезоны һәм «Сезоннар ярышы» җиңүчесе. Ул үзенең көчле тавышы, сәхнә осталыгы һәм тырышлыгы белән һәркемне сокландырды. Быел фестивальдә тагын бер мөһим яңалык – Илфат Ибраһим улы Абдрахманов исемендәге махсус премия беренче тапкыр тапшырылды. Бу дәрәҗәле бүләккә безнең тагын бер йолдызыбыз – Әмир Исрафилов лаек булды! Шулай ук Әмир «Конферанс» номинациясендә 1 нче урынга лаек булды. Аңа киләчәктә дә иҗади уңышлар, яңа үрләр телибез! Без барлык катнашучылар белән горурланабыз! Фестивальдә катнашкан һәр бала – үзенчәлекле, сәләтле һәм иҗатка гашыйк! Аларның һәркайсы – безнең киләчәгебез, татар мәдәниятенең өметле йолдызлары. «ШАЯН ТВ» сәхнәдә балкыган барлык йолдызларын котлый һәм тагын да зуррак уңышлар тели!

30.04.2025
Prev. 1 ... 18 19 20 21 22 ... 375 Next
Главная Программа Видео Шортс Поиск