Яңалыклар

«Белем җәүһәрләре» бәйгесендә - ГРАН-ПРИ!

«Белем җәүһәрләре» бәйгесендә - ГРАН-ПРИ!

«ШАЯН ТВ» балалар каналы «Белем җәүһәрләре» XIII Дөньякүләм интернет проектлар бәйгесендә җиңү яулады! Каналның рәсми сайты ГРАН-ПРИга лаек булды! Мәдәният, мәгариф өлкәләрендә иң файдалы интернет-проектларны исә «Пирамида» сараенда бүләкләделәр. Яраткан каналыбызны чираттагы җиңүе белән ихлас котлыйбыз! Киләчәктә дә бөек үрләр һәм уңышлар телибез! Без сезне  алга таба да мавыктыргыч проектларыбыз белән сөендерүебезне дәвам итәрбез!

18.12.2022
«Сиңа миннән сәлам» тапшыруын кара!

«Сиңа миннән сәлам» тапшыруын кара!

Иртәгә, 17 декабрь көнне «ШАЯН ТВ» каналының башкарма директоры - баш мөхәррире Рамилә Әхмәтзакир кызы Сәхабетдинова «Татарстан-Яңа Гасыр» каналында «Сиңа миннән сәлам» тапшыруында кунакта булачак. Ул «ШАЯН ТВ»ның эшчәнлеге, уңышлары, берсеннән-берсе зур проектлары, «Балачак җыры» бәйгесе хакында тулырак сөйләячәк. Иртәнге 7:00 сәгатьтә әңгәмәне карамый калмагыз.

16.12.2022
«Бадиклар дөньясы»!

«Бадиклар дөньясы»!

Яңа төсләр ясау өчен буяуларны ничек дөрес катнаштырырга, корабны нәрсә белән төзергә, тортны ничек пешерергә, ни рәвешле походларга йөрергә һәм башка бик күп нәрсәләргә сез «Бадиклар дөньясы» мультсериалын карап, өйрәнә аласыз! Бадиклар дип аталган сөйкемле затлар тыштан бөтенләй кешеләргә охшамаганнар. Төрле төстәге динозаврикларны хәтерләтсәләр дә, аларның тылсымлы дөньясы безнекен хәтерләтә. Бадиклар яшәгән фантастик шәһәрчектә пешекче дә, янгын сүндерүче дә, полиция дә, фермер да бар - барысы да нәкъ бездәге кебек. Ләкин, башка яшәүчеләр белән беррәттән, монда чын русалкалар, пиратлар, принцессалар һәм супергеройлар да яши. Мультсериалның төп геройлары Дружок һәм Булочка - бергә уйныйлар, шәһәрнең башка кешеләре белән дус яшиләр һәм көн саен ниндидер яңалыкларга өйрәнәләр! «Бадиклар дөньясы» мультсериалын дүшәмбедән алып, җомгага кадәр 08:10 һәм 16:10 сәгатьтә «ШАЯН ТВ» каналында карагыз!

16.12.2022
Әкият илендә: «Аю Әппәс»!

Әкият илендә: «Аю Әппәс»!

Урманда аю баласы яшәгән.Бәләкәй генә булса да, бу аю баласы бик эшчән булган, ди. Бу аю баласының исеме Әппәс булган. Әппәс яз көне бакча казыган. Бер түтәлгә кишер чәчкән. Кәбестә дә утырткан. Бер түтәлдә чөгендер үстермәкче булган Әппәс. Кыяр да утырткан. Помидор белән шалкан да үстергән ул. Көз җиткән. Яшелчәләр өлгергән. Бәләкәй аю кишерне дә алган, кәбестәне дә, чөгендерне дә алган, кыярны да җыйган, шалканны да йолыккан. Йолкып алган да чишмә суында юып ашый да башлаган. — Мәм-мәм-мәм, баллы, тәмле, татлы мәми! — дип сөйләнә икән үзе. Шулчак Куян узып бара икән. Куянның шулкадәр ашыйсы килә икән. — Аю Әппәс, бир әле миңа да тәмле әйбер! — дигән Куян. — Мә! — дигән аю баласы. Куянга бер кишер, бер кәбестә, бер чөгендер, бер кыяр, бер помидор, бер шалкан биргән. — Мәм-мәм, баллы икән болар! — дигән Куян. — Рәхмәт, сиңа, Әппәс, рәхмәт. Шулчак Керпе килеп чыккан. — Мә! Син дә авыз ит! — дип, Әппәс Керпегә дә яшелчә биргән. — Мәм-мәм, татлы икән болар! — дигән Керпе. — Рәхмәт сиңа, Әппәс! Шулчак Тиен килеп чыккан. — Тиен, син дә аша баллы яшелчә! — дигән аю баласы. Аю урмандагы барлык киек-җәнлекләрне сыйлаган. Барысы да Әппәскә рәхмәт укыганнар. Рабит Батулла  

15.12.2022
Кышкы уеннарны бергәләп уйныйбыз!

Кышкы уеннарны бергәләп уйныйбыз!

Дуслар, кышның беренче аеның да яртысы узып бара! Димәк, кышның салкын саф һавасыннан, ап-ак карлы бураннарыннан файдаланып калырга кирәк дигән сүз! Әйдәгез, уйнап, чаңгыда шуып, кыш рәхәтен татып калырга ашыгыйк.   «Чаңгыда әбәк уены» Әлеге мәйдан өчен тигез мәйдан алына. Мәйданның кырыйлары юк икән, аларны билгеләргә кирәк була. уен кагыйдәләре буенча, барлык катнашучылар да чаңгыда, әмма таяксыз булырга тиеш. Әгәр дә уенчыклар күп икән, уенны башлаучылар да берничә булырга мөмкин. Сигнал бирелгәч, башлаучы уенчыларны куып китә. Алар билгеләнгән мәйданнан чыкмаска тиеш. Уенны башлаучы куып тоткан уенчының чаңгысына үзенең чаңгысын тидерә. Тотылган уенчы: «Мин башлыйм! » – дип кычкырып, башкаларны куып китә.   «Ак аю» Карга диаметры 4–5 метр булган әйләнә сызып, уйнаучылар шунда кереп баса. Ике бала «ак аю» итеп билгеләнә һәм әйләнәнең тышкы ягында кала. Алар, кулга-кул тотынып, әйләнә эчендә йөрүче балаларны «ятьмәгә эләктереп» йөриләр. Һәр эләккән бала уеннан чыга барып, соңыннан аюларга тоттырмаган берсе генә кала, һәм ул җиңүче була.   «Шар сугу» Кыш көне ир балалар уйный торган уен. Башта тигез җирдә бер кечерәк чокыр казыла. Уенчыларның һәрберсендә кәкре таяклар (кәшәкәләр) була. Ике командага бүленгәннән соң, бер команда чокыр саклый, икенчеләре шарны чокырга төшерергә тырыша. Кайсы команда шарны чокырга күбрәк төшерә ала, шул команда җиңүче була.    

13.12.2022
13 декабрь – Аюлар көне!

13 декабрь – Аюлар көне!

13 декабрь – Аюлар көне. Без бик күп әкиятләрдә «аю» образы белән очрашабыз. Моннан тыш, аның шәхси бәйрәме дә бар икән. Дөньяда аюларның барлыгы 7 төре генә калган, һәм алар барысы да дәүләт тарафыннан саклана. Россиядә көрән һәм ак аю яши. Ел саен 13 декабрьдә планетабызның күп кенә почмакларында Аю көне билгеләп үтелә. Бу көнне алар кышкы йокыга китә дип санала. Яз, җәй һәм көз айлары буе бу хайваннар, кышка май запасы әзерләп, актив рәвештә тукланалар. Ә хәзер, салкыннар башлангач, кышны чыгар өчен үзләренә ышык урын эзлиләр. Җылы урын эзләп тапканнан соң, аю йокыга тала, чөнки әлеге җәнлекләрнең рационының нигезен үсемлекләр тәшкил итә. Салкын кыш җитү белән аны табу шактый кыенлаша. Кызыклы фактлар: 1. Аюның кышкы йокысы 200 көнгә бара. 2. Хайванның авырлыгы 800 килограммга җитәргә мөмкин . 3. Иң кечкенә аю - Малайя аюы санала. Аның авырлыгы – бары 30- 60 кг, ә озынлыгы-якынча 1,5 м. 4. Аю уртача 25-40 ел яши. 5. «Урман хуҗасы» - беркайчан да сәбәпсез кешегә беренче булып һөҗүм итми. Кешеләрнең торакларын ул узып китәргә тырыша, әгәр дә аны борчымасалар, ул зыян китермәячәк.

13.12.2022
Prev. 1 ... 165 166 167 168 169 ... 375 Next
Главная Программа Видео Шортс Поиск