Яңалыклар

«ШАЯН ТВ» каналы Халыкара балаларны яклау көнен бергә үткәрергә чакыра!

1 июнь – Халыкара балаларны яклау көне уңаеннан, «ШАЯН ТВ» каналы нәни дусларына бик күп сюрпризлар әзерли һәм әлеге көнне бергә үткәрергә чакыра! Көн дәвамында онытылмаслык балачак мизгелләре һәм яхшы кәеф дулкынында безнең белән бул! Эфирда Өйдә утырырга яратучы тамашачыларны «ШАЯН ТВ» каналыннан үзенчәлекле бәйрәм тапшырулары программасы көтә. Сезне бик күп премьералар, өр-яңа мавыктыргыч мультсериаллар, кызыклы тапшырулар, бәйрәм концертлары көтә! Бары тик бәйрәм көнендә генә 09:40 сәгатьтә «ШАЯН балачак – 2022» концерты, 13:10да «ШАЯН»да «МИЛЛИ МУЛЬТFEST», 14:15тә «Апушның тылсымлы төшләре» спектакле, 10:55 сәгатьтә «Маша әкиятләре», 19:45 - «Маша җырлары», 21:10да «Юл күзәтчеләре» һ.б бик күп мультсериалларны карарга телевизор экраннары каршына җыелыгыз! Безне кайсы мәйданчыкларда табарга? Саф һавада күңелле ял итәргә теләүчеләр өчен 13:00 сәгатьтә без сезне Казан Кремле янында көтәбез! Бездән шәп программа: җанлы аралашу, кызыклы остаханәләр, аниматорлар, мавыктыргыч уеннар, истәлекле бүләкләр көтелә. «ШАЯН ТВ» геройлары белән фотосессия да узачак. Килегез! Күңелле булачак! Бүләкләр Шулай ук бәйрәм уңаеннан, «ШАЯН ТВ»ның Вконтакте төркемендә бик күп кызыклы бәйгеләр оештырылды, җиңүчеләр исә шәп бүләкләргә ия булдылар! Нәкъ менә 1 июнь көнне шундый бәйгеләрнең җиңүчесе «Вартазия» рестораны белән берлектә уздырылачак кичке ашка барачак. Кыскасы, бар яклап та бәйрәм булачак! Шулай итеп, ШАЯН ТВ» каналы барыгызны да бәйрәм белән котлый һәм 1 июнь көнен күңелле итеп уздырырга дәшә! «ШАЯН ТВ» белән бергә бул, телне саклау – менә безнең юл!

31.05.2023

«Бәллүр каләм» – «Хрустальное перо» XXVI

Бүген Казанның «Сәйдәш» мәдәният үзәгендә «Бәллүр каләм» – «Хрустальное перо» XXVI журналистика һәм массмедиа өлкәсендәге Республика бәйгесе лауреатларын бүләкләү тантанасы узды! Бирегә иң тәҗрибәле, профессиональ һәм танылган каләм осталары җыелды. «ШАЯН ТВ»ның бу чарада катнашуы очраклы гына түгел. Каналыбыз яшь буын журналистларны үстерү, белем бирү һәм тәрбияләү мәйданы булып тора. Быел каналга 5 ел тулу уңаеннан «ШАЯН ТВ» мәйданында бигрәк тә кызу булды! Каналның алып баручылары һәм төп геройлары мәртәбәле кунаклар белән бергә челлендж эшләде! Чарада «Сәйлән» телевизион музыкаль фестивале җиңүчеләре дә катнашты. Алар бәйрәм программасына ямь өстәде! Татарстанның халык артистлары белән бергә бер сәхнәдә чыгыш ясау безнең яшь йолдызларыбыз өчен зур дәрәҗә! Тантана кунаклары балаларны бик җылы кабул итте!

30.05.2023

«Бобр Добр» мультсериалы маҗараларга дәшә!

«Бобр Добр» мультсериалы сезне маҗараларга дәшә! Балаларга һәм аларның әти-әниләренә серле урман иленә сәяхәт итәргә һәм анда яшәүче дус, тату җәнлекләр белән танышырга тәкъдим итәбез! Тамашачыларны яхшы күңелле, бар эштә дә өлгер Бобр, кыю Бака, баллы яратучы Ябалак, хыялый Тукран, шат күңелле бертуган Куяннар һәм Бурсык белән очрашу көтә. Бурсык исә - урмандагы барлык борчуларның төп чыганагы. Бу герой бер минут та тик утыра алмый, төрле гадәти булмаган хәлләр булдырырга ярата. Шуңа күрә даими рәвештә күңелсез ситуацияләргә эләгә, алардан мөстәкыйль генә чыга алмый. Ярый әле Бобр һәрвакыт ярдәмгә килергә әзер. Һәрчак ул үзенең күршесен коткара, шулай ук урманда яшәүчеләргә ярдәм итә. Мультсериалны эш көннәрендә 13:35 һәм 21:35 сәгатьләрдә «ШАЯН ТВ» каналында карагыз!

29.05.2023

Премьера: «Безнең әлифба»!

Бүген «ШАЯН ТВ» каналында премьера! «Безнең әлифба» танып белү мультсериалы нәни тамашачыларны хәрефләр дөньясы белән таныштыра. Һәр хәрефне төсле анимацион рәсемнәр ярдәмендә үзләштерүе дә җиңел! Бүген 13:35 һәм 21:35 сәгатьләрдә «ШАЯН ТВ» каналында әлифба белән танышырга ашыгыгыз!

26.05.2023

Ял көннәренә «ШАЯН ТВ» каналы тамашачыларына кызыклы мультсериал әзерләде!

Ял көннәренә «ШАЯН ТВ» каналы тамашачыларына кызыклы премьера әзерләде! Шимбә һәм якшәмбе көннәрендә өр-яңа «Куяннар мәктәбе» мультсериалы эфирга чыгачак. Бу гади генә мәктәп түгел, ә куяннар мәктәбе! Борынгы гаилә традициясе буенча, һәр Пасха бәйрәмендә балалар бакчада куяннар тарафыннан яшерелгән бәйрәм йомыркаларын эзлиләр. Куяннар барысын да дөрес итеп эшләсен өчен, алар өчен махсус мәктәп бар. Ул нәкъ тә менә Куяннар мәктәбе дип атала. Куяннар анда пасха бүләкләрен тарату осталыгына өйрәнәләр, аларның бары тик иң яхшыларына гына балаларның бакчаларына керергә рөхсәт ителә. Мультсериалны 14:00 һәм 22:00 сәгатьләрдә «ШАЯН ТВ» каналында карагыз.

26.05.2023

«Төймә»дә легендар җырчылар!

«Төймә» тапшыруында легендар җырчылар – Резидә Шәрәфиева һәм Фердинанд Сәлахов! Һәр пәнҗешәмбе 07:35 һәм 18:30 сәгатьтә «ШАЯН ТВ» каналында! Шулай ук үзегезгә уңайлы вакытта безнең YouTube каналда карый аласыз!

26.05.2023

Казан укучылары IT-паркта уку елы тәмамлануын бәйрәм итте!

Бүген Казанның Бәшир Рәмиев исемендәге «ИТ-парк» ишегалдында башлангыч сыйныф укучылары өчен уку елы тәмамлану уңаеннан «Ура, каникуллар!» бәйрәме узды. Яшь кунаклар алдында Казан циркы артистлары чыгыш ясады. Шулай ук укучыларга «Шкодники» юмористик балалар киножурналының берничә сериясен күрсәттеләр, сабын куыгы һәм крио-шоу тамашасы үткәрделәр. «ШАЯН ТВ» каналы да әлеге чарада булып кайтты. Тамашачылар арасында бүләкләр уйнатты. Каналның төп герое Шаян исә кунаклар белән бергә күңел ачты!

25.05.2023

Әкият илендә: «Өч кыз туган»!

Борын-борын заманда булган икән, ди, бер Хатын. Аның булган, ди, өч кызы. Бу Хатын, кызларымның өсте бөтен, тамаклары тук булсын, ди-ди, көне-төне эшләгән, ди. Менә кызлар үсеп буйга да җиткәннәр. Алар берсеннән-берсе матур, ди, бер битләре ай, бер битләре кояш, буй-сыннары карлыгачтай сылу, ди. Өч кыз, бер-бер артлы кияүгә чыгып, берсе артыннан берсе китеп тә барганнар. Менә бер ел үткән, ике ел, өч ел үткән. Шулай матур гына яшәгәндә, әниләре авырып киткән. Күрше урамда Тиен дусты бар икән, шуны дәшеп әйткән: — Тиен дустым, барсана, кызларыма әйтсәнә, хәлемне белергә килсеннәрче,— дигән. Тиен шунда ук чыгып чапкан. Тиен барып тәрәзә какканда, Олы кыз җиз ләгәннәр чистартып торадыр иде, ди. — Һай,— дип әйткән, ди, Олы кыз,— бик барыр идем дә бит, аңарчы менә шушы ләгәннәрне чистартып бетерәсем бар иде шул,— дигән, ди. Тиен моңар бик ачуланган да әйткән: — Алайса, син шушы ләгәннәреңнән мәңгегә аерылма! — дигән. Тиеннең шулай дип әйтүе булган, ике ләгән Кызны ике яктан китереп тә кысканнар. Олы кыз егылган да шунда ук гөберле бакага әверелгән. Тиен Уртанчы кызга чапкан. Уртанчы кыз, бу кайгылы хәбәрне ишеткәндә, киндер суга икән. Тиенгә әйткән: — Һай,— дигән,— әнием янына хәзер үк чыгып йөгерер идем дә бит, менә ярминкәгә киндер сугып өлгертәсем бар иде шул,— дигән. Тиен бик ачуланган да әйткән: — Алайса, син гомерең буе киндер сугып кына тор! — дигән. Уртанчы кыз шунда ук үрмәкүчкә әверелгән. Тиен тәрәзәсен какканда, Кече кызның камыр баскан чагы икән. Ул бер сүз дә әйтмәгән, камырлы кулларын да сөртеп тормаган, чыккан да әнисе янына йөгергән. Тиен Кече кызга әйткән: — И сөекле бала, гомер буе игелек күр, кешеләрне бәхетле ит, аларга куаныч та, юаныч та бул. Кешеләр дә сине сөярләр, синең яхшылыгыңны мәңге онытмаслар,— дигән. Кече кыз чыннан да бик рәхәт гомер кичергән, халык аны бик яраткан, ди. Татар халык әкияте

24.05.2023

1 ... 150 151 152 153 154 ... 387

Яңа сайт!