Яңалыклар

Мунча терапиясе кәефне күтәрә

Мунча терапиясе кәефне күтәрә

Ял көннәрендә мунча керү - элек-электән килгән гадәт. Мунча - иң яхшы тынычландыру чарасы. Чынлап та, анда юынгач тән генә чистарып калмый, күңел дә сафлана, тынычлана, кәеф тә күтәрелә, ару-талулар да юкка чыга. Борынгылар аны “халык табибы” дип юкка гына әйтмәгәннәр. Өстәвенә, нәкъ менә бүген Мунча керү көне билгеләп үтелә. Япон галимнәре мунча терапиясенең кеше психикасына ничек йогынты ясавын ныклап тикшергән. * Даими рәвештә эссе парга керү, тәннең температурасы кыска вакытка күтәрелеп алу нәтиҗәсендә организм микростресс кичерә. Нәтиҗәдә, баш миенең нерв системасы стимуллаша һәм серотонин бүлеп чыгара. Шуңа да мунчачыларның кәефләре һәрчак күтәренке була. * Мунчадан соң организм ныгый, аның эшкә сәләте арта. * Мунча йөрәк һәм кан тамырлары эшчәнлегенә яхшы тәэсир итә, аеруча йөрәк эшчәнлегенең активлыгын сакларга ярдәм итә. * Даими мунча керүнең тагын бер яхшы ягы бар, ул - тын юллары системасы авыруларыннан саклау өчен файдалы чара. Мунчага барыр алдыннан 1-2 аш кашыгы сарымсак суы кабарга киңәш ителә. Ул тирләгәндә организмнан агулы һәм зыянлы матдәләрне чыгарырга ярдәм итә. Шулай ук мунчада тәнне ышку, рәхәтләнеп чабыну массажның иң яхшы төрләре булып тора. Мунчадан соң кайнар чәй, гөлҗимеш һәм кура җиләге төнәтмәсе эчү сәламәтлеккә уңай йогынты ясый.  

14.06.2024
«ШАЯН ТВ» каналы балалар белән Россия көнен бәйрәм итте

«ШАЯН ТВ» каналы балалар белән Россия көнен бәйрәм итте

«ШАЯН ТВ» каналы «Казан» гаилә үзәге янында Россия көне уңаеннан узган бәйрәм чарасында катнашты. Беренче татар балалар каналы «Алдынгылар» хәрәкәте белән берлектә тамашачыларны үз мәйданчыгына җыйды һәм бәйрәм кәефе бүләк итте! Яшь тамашачылар өчен күңелле интерактивлар, шәп уеннар, аквагрим һәм кызыклы остаханәләр оештырылды. Каналның төп геройлары да нәни дусларыбызның күңелләрен күрде! Алар балалар белән шаярдылар-көлделәр, рәхәтләнеп күңел ачтылар. Иң җитезләргә «ШАЯН ТВ» каналы бүләкләр өләште!

13.06.2024
ХИТЛАР БИЛГЕЛЕ! «Балачак җыры» бәйгесенең бүләкләү тантанасы узды

ХИТЛАР БИЛГЕЛЕ! «Балачак җыры» бәйгесенең бүләкләү тантанасы узды

Бүген «ШАЯН ТВ» каналы студиясендә Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «ШАЯН ТВ» каналы оештырган «Балачак җыры» бәйгесенең бишенче ЮБИЛЕЙ СЕЗОНЫНДА җиңүчеләрне бүләкләү тантанасы узды. Бәйгенең максаты – татар телендә балалар өчен җырлар иҗат итүче шагыйрь һәм композиторларны барлау, шул җырларны таныту, балалар репертуарын татар җырлары белән баетудан гыйбарәт. Быел «Балачак җыры 2024» бәйгесенә 100гә якын җыр килде. Авторлар арасында профессиональ композиторлар белән бергә үзешчәннәр дә катнашты. Алар арасында төрле һөнәр ияләре бар. Икенче турга профессиональ жюри тарафыннан 20 җыр сайлап алынды. Әлеге тур исә 2024 елның 13 маеннан 20 маена кадәр интернет аша shayantv.ru сайтында тавыш бирү белән тәмамланды. Иң күп тавыш җыйган 10 җыр өченче турга үтте. Мәртәбәле жюри нәтиҗәләре буенча 5 җиңүче билгеләнде. Менә ул җиңүче җырлар исемлеге: 1. «Гөлләрем» Зөфәр Бохаров сүзләре, Илфат Шәехов көе. 2. «Милләтем – татар минем» Гүзәл Таһирова сүзләре һәм көе. 3. «Печән өсте» Айрат Галиуллин сүзләре, Эльвира Сәлахова көе. 4. «Сәлам җыры» Гөлчәчәк Хаҗиева (Садретдинова) сүзләре, Гөлназ Җиһаншина көе. 5. «Шугалак» Ленар Шәехов сүзләре, Миләүшә Хәйруллина көе. Шулай ук әлеге җырларга Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәмендә «ШАЯН ТВ» каналы тарафыннан заманча аранжировкалар ясалачак, сыйфатлы видеоклиплар төшереләчәк. Бәйгедә җиңгән җырларны «Сәйлән» балалар телевизион татар җыры фестивале катнашучылары башкарачак. Моннан тыш, барлык җырлар да «Балачак җыры» җыентыгына кертелә. Җиңүчеләргә бүләкләрне Татарстан Дәүләт Советы рәисе урынбасары, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Готыф улы Әхмәтов үзе тапшырды. Шулай ук мәртәбәле кунаклар арасында ТР Дәүләт Советының Мәгариф, мәдәният, фән һәм милли мәсьәләләр комитеты рәисе Айрат Ринат улы Зарипов, ТР Дәүләт Советының Бюджет, салымнар һәм финанс комитеты рәисе урынбасары Камил Әсгать улы Ногаев, Казан шәһәре Башкарма комитеты җитәкчесе урынбасары Гүзәл Рәмзил кызы Сәгыйтова һәм «Яңа Гасыр» телерадиокомпаниясенең генераль директоры Илшат Юныс улы Әминев та бар иде. Җиңүчеләрне котларга танылган язучылар, композиторлар һәм бәйгенең жюри әгъзаләре дә җыелды. Чараның кунакларын республиканың иң уңган һәм иң үрнәк гаиләләре - «ТАТАР СҮЗЕ» Халыкара нәфис сүз телевизион бәйгесе җиңүчеләре һәм «ШАЯН ТВ» каналы алып баручылары гаиләләре каршы алды һәм үз осталыкларын күрсәтте. Алар арасында Галиуллиннар, Нуруллиннар, Шаһиевлар, Яркәевлар, Зиннуровлар, Камаловлар һәм Хәбибрахмановлар гаиләләре урын алды. Моннан тыш, «ШАЯН ТВ» каналы алып баручыларыннан кызыклы остаханәләр һәм шәп сюрпризлар оештырылды. Җиңүчеләрнең һәрберсен ихлас күңелдән котлыйбыз! Иҗат чишмәгез саекмасын, алга таба да яңа үрләргә ирешергә язсын! Хәзер әлеге җырларның безнең нәни дусларыбызга барып ирешәсе генә калды! Һәр күңелдә яңгырасын Балачак җыры!        

11.06.2024
Казан Сабан туеның кайда булачагы билгеле

Казан Сабан туеның кайда булачагы билгеле

Казанда Сабан туе 23 июньдә өч мәйданда – Тынычлык бистәсенең каенлыгында, Дәрвишләр бистәсенең торак массивында һәм Аккош күлендә узачак. Бәйрәм чаралары 9:30да башланачак. Сабантуйның өч мәйданында да кунаклар өчен концерт программасы әзерләнә. Анда республика артистлары, шулай ук фольклор ансамбльләр һәм коллективлар чыгыш ясаячак. Спорт мәйданчыкларында милли бәйгеләр һәм ярышлар уза, балалар өчен күңел ачу программалары белән аерым мәйданчыклар оештырылуы көтелә. Быел Сабан туен БРИКС Уеннарының (ярышлар 12 июньнән 23 июньгә кадәр узачак) һәм Бөтенроссия балалар фольклориадасының ябылу тантаналарын берләштерәчәк. 21 июньдә исә Кремль, Пушкин, Бауман, Островский, Мәрҗани һәм Г. Камал театры янында Сабантуйга традицион бүләкләр җыю планлаштырылган.

11.06.2024
«ТАТАР СҮЗЕ» бишенче Халыкара нәфис сүз телевизион бәйгесе. ЯҢА СЕЗОН

«ТАТАР СҮЗЕ» бишенче Халыкара нәфис сүз телевизион бәйгесе. ЯҢА СЕЗОН

Халкыбызның иң мөһим  мәдәни ел вакыйгасы - «ТАТАР СҮЗЕ» бишенче Халыкара нәфис сүз телевизион бәйгесе якынлаша! Быел бәйгенең грандиоз юбилей сезоны тагын да күбрәк премиаль фонд белән сөендерә! Бәйге Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «Татарстан - Яңа Гасыр» телерадиокомпаниясе тарафыннан оештырыла. Премиаль фонд 2 000 000 сум. Бәйгенең максаты - туган телне, әдәби мирасны пропагандалау, үстерү һәм саклау, классикларның әсәрләрен популярлаштыру, милли әдәбият һәм мәдәнияткә кызыксыну уяту. Конкурс нәфис сөйләм күнекмәләрен үзләштерү, Татарстан Республикасында, шулай ук Россия Федерациясе регионнарында һәм чит илләрдә яшәүче милләттәшләребездә нәфис сүз аша туган телгә карата кызыксыну уяту, талантлы башкаручыларның профессиональ сәхнәгә чыгуына ярдәм итү һәм телевизион кадрлар әзерләү юнәлешендә зур әһәмияткә ия. Быел «ТАТАР СҮЗЕ» берничә категория буенча үткәрелә: 7 яшькә кадәр булган катнашучылар, 8-13 яшькә кадәр, 14 яшьтән 17 яшькә кадәр, 18 һәм аннан өлкәнрәкләр өчен. Бәйгедә шулай ук профессионаллар, үз шигырен, әсәрен сөйләүчеләр, иҗади гаиләләр дә катнаша ала. Чыгышлар проза, шигърият һәм махсус номинациядә бәяләнәчәк. Махсус «Туган тел» номинациясендә исә чуваш, мари, мордва, удмурт халыклары вәкилләре катнаша ала. Катнашучылар үз туган телләрендә дә классик һәм хәзерге заман язучылары әсәрләрен һәм үзләре язган әсәрләрне башкара ала. Мөмкинлекне кулыгыздан ычкындырмагыз! Үзегезгә туры килгән номинацияне сайлагыз һәм чыгышыгызны видеога төшереп, анкета белән бергә [email protected] рәсми почтасына юллагыз. Шулай ук сылтама буенча онлайн анкета тутыру мөмкинлеге дә каралган.  Гаризалар 2024 елның 30 ноябренә кадәр кабул ителә. Милләтебезне үстерүгә ярдәм итүче, туган тел сагында торучы мондый чарадан читтә калмагыз!  Нигезләмә

10.06.2024
Prev. 1 ... 73 74 75 76 77 ... 376 Next
Главная Программа Видео Шортс Поиск