Яңалыклар

Җиләк җимешләр белән тулы «Грузик кибете»

Сагындыгызмы? «Грузик кибете» мультсериалы «ШАЯН ТВ» каналы киңлекләренә әйләнеп кайта! Уеннардан белем алуга күчү өчен яраткан уенчыкларыңнан аерылу һич кенә дә мәҗбүри түгел. «Грузик кибете» мультсериалдагы җанлы машиналар көн саен яшь тамашачылар белән бергә яңа белемнәрне үзләштерәләр. Төп герое Грузик әле бик кечкенә, ләкин инде ул үзенең уенчык кибетен ачарга өлгергән. Аның ишегалдында шарлар белән тылсымлы бассейн урнашкан, әлеге бассейн төрле товарлар белән тулы. Грузик карбыз, банан, виноград, киви кебек җиләк-җимешләрнең төрле төрләре белән таныша. Әгәр аларны дөрес чистартып, киссәң, аппетитлы җиләк-җимеш салаты барлыкка киләчәк. Хәзер бу салат кибет витринасын бизи. Җиләк-җимешләрне тулысынча сатарга мөмкин, ләкин башта аларны үлчәргә өйрәнергә кирәк. Кечкенә кибетче Грузик механик үлчәүләрдән ничек файдаланырга һәм аларның укларының нәрсә күрсәтүен аңларга өйрәнә. Ул беренче сатып алучыны, кекслар өчен чия алырга килгән машина-экскаватор Капаны каршы алырга әзер! Мультсериалны эш көннәрендә 14:15 һәм 22:15 сәгатьләрдә карагыз.

06.06.2024

ФАЙДАЛЫ ЛАЙФХАКЛАР

КАРАҢГЫДА ЙОКЛАГЫЗ Белгечләр йокы бүлмәсе тәрәзәсенә калын пәрдә эләргә куша. Чөнки йокы гормоны булган мелатонин караңгыда бүленеп чыга. Караңгыда йоклау иммунитетны күтәрә, чирләргә бирешүдән саклый. Ясалма яктылык чыганаклары барлыкка килгәнче, кешенең көнкүрешендә бары ике генә яктырткыч: көндез – Кояш, кич – Ай һәм йолдызлар гына булган. Замана кешесенең тыныч йоклый алмавына тормыштагы ыгы-зыгы сәбәпче. ИРТӘН НӘРСӘ АШАРГА? Күп кенә иртәнге ашка солы боткасы әзерли. Әмма бу зыянлы, ди белгечләр. Солы боткасында фитин кислотасы күп, ул организмның уянуын тоткарлый. Шуңа күрә солы боткасын төшке ашка ашарга киңәш ителә. Ул ашказаны-эчәк тракты эшчәнлеген яхшырта торган клетчаткага бай. Иртәнге ашка йомырка, яшел тәмләткечләр һәм тавык ите файдалы. КЫЗЫНУ КАРТАЙТА Кояш файдалы, әмма чамадан артса ул зыян да салырга мөмкин. Җәйге яллар башланырга ерак калмады, кемдер җылы якларга җыенадыр, кемдер елга буенда кызыныр, бакчада да кояш сугарга мөмкин. Табиблар кояшта кызынуның тән тиресен картайтуы хакында әйтә. Май бизләре эшчәнлеге кимү сәбәпле, тән тиресе корылана, сыгылмалылыгын югалта.

06.06.2024

Парашют үзенең 239 еллыгын билгеләп үтә

3 июнь – парашютның туган көне билгеләп үтелде. Бу көнне парашют белән сикерүгә мөнәсәбәте булган һәркем бәйрәм итте: спортчылар, десантчылар, коткаручылар, янгын сүндерүчеләр, пилотлар һәм космонавтлар. Әлбәттә, аларга якыннары, дуслары һәм туганнары кушылды. Кызыклы мәгълүматлар * Иң өлкән ир-егет парашютчы булып 97 яшендә өч чакрымлы биеклектән сикергән Джордж Мойз санала. Ә хатын-кызлардан 102 яшендә Дороти Кластер сикергән. * Парашют белән сикерү спортның иң куркыныч төре булып санала. Статистика буенча, һәр 4000 сикерешнең берсе уңышсыз тәмамлана. * Парашют ачылганчы кешенең төшү тизлеге сәгатенә 180 километр тәшкил итә. Парашют ачылганчы бер минутта кеше 3 километр ара үтәргә мөмкин. * Парашютчы Уилл де Сильва гел үзенең Отис кушаматлы эте белән сикерә. 10 ел эчендә алар берлектә 64 сикереш ясаган. * 1931 елның 14 июлендә СССРда хатын-кызлардан беренче тапкыр Любовь Кулешова сикерә.

05.06.2024

Кояштан сакланыгыз

Ниһаять без көтеп алган чын эссе җәй хакимлек итә! Эсселәр сагындырган булса да, аның мәкерле икәнен дә онытмаска кирәк. Җәйге кояш рәхәт һәм шул ук вакытта бик куркыныч та. Үзебезне кояш нурларыннан, эссе сугудан ничек сакларга? Кайбер кагыйдәләр белән танышып китик! * Төш вакытында, аеруча сәгать 11:00дән 16:00га кадәр аралыкта кояш нурлары астында, урамда йөрмәү яхшы, чөнки бу кояшнын иң актив вакыты. * Урамда йөргәндә баш киемнәрен кияргә онытмагыз. Кепка, эшләпәләрегезне һәрвакыт үзегез белән йөртегез. * Өс киемнәрен сайлаганда ачык төсләргә һәм «сулый торган» тукымаларага өстенлек бирсәгез, яхшы булыр. * Кояш астында йокламагыз, күләгәле урын эзләгез. * Ачык кояш астында утырмаска, күләгәдә, я зонт астында утыру хәерлерәк. * Туклану рационында күбрәк җиңел ризыклар - салатлар, җиләк-җимешләр булдырыгыз. * Су күп эчегез. Кызу һава торышында ул көненә 2-3 литр сыеклыкны тәшкил итәргә тиеш. * Пешү куркынычы булганда, тәнегезгә кичекмәстән су сибеп, маңгаегызга юеш тастымал салырга ашыгыгыз.

05.06.2024

Көтеп алган җәй җитте

Көтеп алган җәй дә җитте! Уку елы тәмамланды, балалар каникулларга китте. Иң озын көннәр һәм иң кыска төннәр... Беренче җиләкләр өлгерә, урманда гөмбәләр барлыкка килә. Боларны әле бик күп санарга була! Нәрсә дисәң дә, табигатьнең иң матур, чәчкә чагы! Җәй ниләр вәгъдә итә? Бергәләп танышыйк! * Июнь аеның беренче көннәрендә яңгыр ява икән, калган ай буе коры булачак. * Июньдә иртән су буйлап томан агыла икән, кояшлы яхшы һава булачак. * Әгәр сандугач төне буе сайрый икән, икенче көнне көчле җил булачак. * Июнь ае җылы булса, уңыш яхшы булачак. * Июнь аенда яңгырдан соң Салават күпере пәйда булса, һава торышы бик озак вакыт җылы булачак. * Төнлә яшен еш булса, уңыш мул булачак. * Әгәр тургай үз оясын җирдә кора икән, җәй бик коры булачак, ә агачта корса, яңгырлы була. * Әгәр миләш соң чәчәк ата икән, көз озын булачак. * Июньдә томан еш булса, гөмбәләр күп булачак. * Карлыгач җәй башлый, сандугачтан җәй тәмамлана. * Июнь аенда чәчәкләр чәчәк ата, сандугачлар җырлый, июнь аенда күңелле, ә ризык аз. * Чәчәк атучы миләшкә бал кортлары күп җыелса, икенче көнне һава торышы яхшы булачак. * Чыкның күплеге – уңдырышлылыкка, еш томан төшү – гөмбә күплеккә. * Июнь башы яңгырлар белән башланса, ахырында корылык көтегез.

04.06.2024

Велосипедта йөрегез

Бүген – Бөтендөнья Велосипед көне! Җәйге чорда иң файдалы транспорт – ул велосипед. Велосипедта йөрү күңелле генә түгел, ул сәламәтлек өчен дә бик файдалы. * Әлеге транспорт төре мускулларны күнектерә, ныгыта, иммунитетны күтәрә, йөрәк-кан тамырлары системасы, сулыш юлларына файдалы. Шулай ук кәефне күтәрә һәм йокыны яхшырта. * Бөекбритания галимнәре велосипедның җәяү йөрүдән файдалырак икәнен ачыклаган. Велосипедта барганда барлык мускуллар хәрәкәткә килә. Велоспорт балага тигезлек сакларга, координациясен яхшыртырга булыша, аякларын ныгыта. * Велосипедта йөрү ябыктыра, матдәләр алмашын яхшырта, стресстан саклый, ерактан начар күрүне, варикозны кисәтә. Велосипедта тизлекне сәгатенә 15-20 километрдан арттырмаска кирәк. Әгәр велосипедта йөрү мөмкинлеге юк икән, өйдә мондый кунегү ясарга була. Каты, тигез өслеккә ятарга һәм аякларны велосипед педален әйләндергән кебек 15 секунд алга таба әйләндерергә, 10 секунд ял итәргә һәм артка таба әйләндерергә кирәк. Әлеге күнегүне көнгә 2-3 тапкыр даими эшләсәгез, файдасын күрерсез. Ул мускулларны күнектерә һәм ябыгырга булыша. Җәй җитте! Җылы көннәрне саф һавада, файдалы итеп үткәрергә ашыгыйк!

03.06.2024

Зоопарктан лемурлар качкан

Кичә Казанның «Замбези елгасы» зоопаркында вольерлардан лемурлар качкан. Җәнлекләрне карарга килүчеләр эксклюзив шоуга эләккән – биредәге хезмәткәрләр зоопарк территориясе буйлап йөгереп йөргән дүрт җәнлекне тоту белән мәшгуль булган. Хайваннар вольер түбәсе буйлап йөргәннәр. Зоопарк хезмәткәрләренә, бу җитез койрыклыларны тоту өчен, баскычтан файдаланырга туры килгән. Хәзерге вакытта барлык лемуралар да үз вольерларына кайтарылган.

03.06.2024

«ШАЯН ТВ» каналы балаларны зур бәйрәмгә җыйды

Бүгенге көн бәйрәм чараларына бик бай булды! Казан Кремлендә «ШАЯН ТВ» зонасында да бик кызу булды! Беренче татар балалар каналы тамашачыларны бер мәйданга җыйды һәм шәп бәйрәм кәефе бүләк итте! Чараны Татарстан Республикасы Рәисе Рөстәм Нургали улы Миңнеханов та тамаша кылды. Бирегә төрле җирдән бик күп балалар җыелды. Алып баручылардан күңелле интерактивлар, шәп уеннар, кызыклы остаханәләр, флешмоблар, аниматорлар, «Сәйлән» телевизион җыр фестивале җиңүчеләреннән матур җырлар – барысы да бер мәйданда иде! Иң җитез кунакларга истәлекле бүләкләр өләштеләр! Шулай ук бәйрәмдә каналның төп геройлары - Шаян һәм Мияу да бар иде! Алар балалар белән рәхәтләнеп уйнадылар, көлделәр, шаярдылар, фотога төштеләр, бәйрәм атмосферасы ясадылар! Балалар өчен, чын мәгънәсендә, рәхәт бәйрәм булды! Безнең белән булганыгыз өчен зур рәхмәт сезгә!

01.06.2024

1 ... 73 74 75 76 77 ... 375

Яңа сайт!