Яңалыклар

Бүгеннән яңа фильм!

Бүгеннән яңа фильм!

«ШАЯН ТВ» каналында өр-яңа документаль фильм. Үсемлекләр һәм хайваннар безгә алдынгы технологияләрне үстерүдә, яңа материаллар эшләүдә ярдәм итә һәм хәтта дизайн өчен идеяләр дә күрсәтә ала. Табигать кешеләрне ничек яңа казанышларга илһамландыра? «Зирәк һәм оста табигать» документаль фильмын карап белерсез. Бүгеннән һәр эш көнендә 09:45 һәм 17:45 сәгатьләрдә «ШАЯН ТВ» каналында карагыз.

15.08.2023
Тапшыруларда катнашасың киләме?

Тапшыруларда катнашасың киләме?

Дуслар, тапшыруларда катнашасыгыз киләме? «Тукай оныклары» тапшыруы синең өчен! Тапшыруда катнашырга теләсәң, [email protected] почтасына катнашучының шигырь сөйләгәнен видеога яздырып, исем, фамилиясен, туган көнен һәм кыскача мәгълүмат язып җибәрегез. Шулай ук телефон номерын да билгеләргә онытмагыз. Төрле авторларның шигырьләре дә ярый. Без сезне үзебездә көтәбез!  

15.08.2023
Бал - табигать могҗизасы!

Бал - табигать могҗизасы!

Якты, җылы кояшы, хуш исле чәчкәләре, җиләкләре, сайрар кошлары белән без көтеп алган җәйнең нибары ике атнасы гына калып бара! Август – җиләк-җимешкә, ризыкка бай елның иң мул ае. Бүген августның бер могҗизасы булган бал көне билгеләп үтелә. Уйлап карагыз әле, кечкенә генә җан ияләре чәчәктән чәчәккә кунып нинди затлы ризык жыя! Мең дә бер дәвалау үзлегенә ия булган балны миллион еллар өйрәнсәләр дә, ул әле дә серле булып кала бирә. Замана алга бара, бертуктаусыз фәнни ачышлар ясала, ә балны алыштырыр, аңа тиңләшер ризык дөньяда юк. Борынгы фикер ияләре балны озак яшәү мөмкинлеге бирүче һәм сәламәтлек эликсиры дип атаганнар. * Табигатьтә микроэлементларга балдан да бай продукт юк. * Балда кеше организмына кирәкле 30га якын матдә - глюкоза, минераль тозлар, ферментлар, витаминнар, антибиотиклар һ.б. матдәләр бар. * Иртән 1 стакан суга 1 кашык бал салып эчсәң, ул ашказаны эшчәнлеген яхшырта. * Тирән, яхшы итеп йоклау өчен, гадәттә, ятыр алдыннан 1 стакан суга 1 аш кашыгы бал салып эчәләр. * Сәламәт булу өчен олы яшьтәге кеше көнгә 100 г, балалар 30-50 г бал ашарга тиеш.  

14.08.2023
Сәлкешләр өчен «Балачак җыры» концерты!

Сәлкешләр өчен «Балачак җыры» концерты!

Бүген «Сәләт шәһес» аланындагы сәлкеш һәм әйдәманнар өчен «ШАЯН ТВ» каналының «Балачак җыры» концерты гөрләп узды. Иң кызу җәйге концертларның берсе булды бу! Сәлкешләр беренче татар балалар каналын бик яратып кабул иттеләр. Бүген «Сәләт шәһес» аланындагы сәлкеш һәм әйдәманнар өчен «ШАЯН ТВ» каналының «Балачак җыры» концерты гөрләп узды. Сәхнәдә «Сәйлән» телевизион фестивале җиңүчеләре ут уйнаттылар, үзләренең искиткеч чыгышлары белән тамашачыларга бәйрәм ясадылар. Алар «Балачак җыры» бәйгесенең танылып өлгергән, балалар өчен җырларын башкардылар. Шулай ук бирегә «ШАЯН ТВ» балалар каналының яраткан геройлары – Шаян һәм Маэмай да килде. Алар лагерьда ял итүчеләргә позитив рух бүләк иттеләр. Концерт барлык кунакларга да онытылмаслык хисләр, шәп музыкаль номерлар һәм яхшы кәеф бүләк итте! Сәлкешләр белән бергәләшеп вакытны бик күңелле үткәрдек! Искәртеп узабыз, чара Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә үткәрелә.    

12.08.2023
«ШАЯН ТВ» каналы Volga Fashion Show чарасында

«ШАЯН ТВ» каналы Volga Fashion Show чарасында

12 августта «Ak Bars Retro Cars» бинасында Volga Fashion Show чарасы узды. Бу мода дөньясындагы иң мөһим вакыйгаларның берсе. Биредә Рәсәй дизайнерлары үз коллекцияләрен подиумда күрсәттеләр. Шунысын билгеләп үтәргә кирәк, катнашучыларның географиясе елдан-ел киңәя бара. Даими катнашучыларга бөтен Россиядән дизайнерлар кушылды: Хакасия һәм Новосибирск, Мәскәү һәм Петербург, Сочи һәм Краснодар һәм илнең башка төбәкләреннән. Утызга якын катнашучы яңа кием коллекцияләрен тәкдим иттеләр. Биредә «ШАЯН ТВ» каналы да булып кайтты. Каналның төп персонажы Мияу мода сөючеләрне каршы алды, яхшы кәеф бүләк итте һәм шәп бүләкләр өләште!

12.08.2023
«ТАТАР СҮЗЕ» Халыкара нәфис сүз телевизион бәйгесенә гаризалар кабул ителә!

«ТАТАР СҮЗЕ» Халыкара нәфис сүз телевизион бәйгесенә гаризалар кабул ителә!

Дуслар, исегезгә төшерәбез, «ТАТАР СҮЗЕ» дүртенче Халыкара нәфис сүз телевизион бәйгесенә гаризалар кабул ителә! Эшләрегезне җибәрегез! Премиаль фонд саллы - 1500 000 сум. Үзегезгә туры килгән номинацияне сайлагыз һәм чыгышыгызны видеога төшереп, анкета белән бергә [email protected] рәсми почтасына юллагыз. Шулай ук сылтама буенча онлайн акета тутыру мөмкинлеге дә каралган. Гаризалар 2023 елның 30 ноябренә кадәр кабул ителә. Тулырак мәгълүмат shayantv.ru һәм tnv.ru сайтларында.  

11.08.2023
Prev. 1 ... 128 129 130 131 132 ... 376 Next
Главная Программа Видео Шортс Поиск