Яңалыклар

Нәүрүз: көн белән төн тигезләште

Бүген язгы көн белән төн тигезлеге көне! Димәк, Нәүрүз бәйрәме! Бу табигатьтә чын-чынлап яз башланган көн! Көн-төн тигезлеге көннәрендә урта киңлекләрдә көн белән төн озынлыгы тигезләшә. Бу вакытта Кояш төгәл көнчыгышта чыгып, төгәл көнбатышта бата һәм Җир планетасында көн белән төн төгәл уникешәр сәгать дәвам итә. Язгы көн-төн тигезлеге Төньяк ярымшарда астрономик язның башы булып санала. Идел буе татарлары Нәүрүзне чәчүгә чыгар алдыннан бәйрәм иткәннәр. Нәүрүз көннәрендә йорттан-йортка кереп “нәүрүз әйтеп” йөрү гадәте булган. Нәүрүз көнне кешеләр күңелендә гел игелек кенә булырга тиеш саналган. Ул изгелек булып аның үзенә үк кайтачак. Яңа елны ничек каршыласаң, елың шулай үтәр дип уйлау күбрәк шатлану, башкаларга куаныч өләшү теләген уяткан. Кеше үз өстендәге бурычлардан да котылырга тырышкан.

21.03.2024

«BC Academy» Халыкара мәктәбендә «Балачак җыры» концерты узды

Бүген «BC Academy» Халыкара мәктәбендә «ШАЯН ТВ» каналының «Балачак җыры» концерты үтте. Тамашачыларга бер көндә ике концерт тәкъдим ителде. Концертта «Сәйлән» телевизион музыкаль фестивале җиңүчеләре «Балачак җыры» бәйгесендә җиңгән җырлар белән тамашачыларның күңелен күтәрделәр. Шулай ук килгән кунаклар өчен «ШАЯН ТВ» балалар каналының яраткан геройлары – Шаян һәм Мияу белән фотога төшү дә оештырылды. Алар, гадәттәгечә, нәниләргә яхшы кәеф һәм күтәренке рух бүләк иттеләр! Концерт бик эчтәлекле булды, онытылмаслык тәэсирләр калдырды! Берсеннән-берсе матур клиплар, гаҗәеп эчтәлекле җырлар яңгырады, җанлы атмосфера хөкем сөрде! Искәртеп узабыз, әлеге чаралар Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә оештырыла.

21.03.2024

Бәхетле булу серләре

Бәхетнең үз көне бар икәнен белә идегезме? 20 март – Халыкара бәхет көне билгеләп үтелә! * Галимнәр фикеренчә, бәхетнең 50 проценты геннардан, 10 проценты тормыш шартларыннан (гаилә, эш, уку), ә 40 проценты уйлардан тора. * Бәхетнең үз төсе бар. Ул – сары төс. * Эндорфин, дофамин һәм серотонин - бәхет формуласын төзүче гормоннар. Эндорфиннар кыска вакытка, ә дофамин озын вакытка бәхет фоны булдыра һәм канәгатьлек хисе бирә. Серотонин исә – яхшы кәеф чыганагы. * Иң «бәхетле» илләр рейтингында беренче урынны Дания, аннан соң Швейцария, Исландия, Норвегия һәм Финляндия ала. * Үзеңне бәхетле итеп хис итәр өчен, тиешенчә йокларга, спорт белән шөгыльләнергә, әйбәт кешеләр белән аралашырга, сәяхәт итәргә һәм елмаерга куша психологлар. Якыннарны яратырга һәм барлык үпкәләрне онытырга кирәк. Үзебез бәхет чыганагы булыйк. Дөнья - ул зур көзге һәм анда безнең кәефебез чагыла.

20.03.2024

«ШАЯН ТВ» каналы «Cәйлән» фестиваленең 6 сезонын игълан итә

«ШАЯН ТВ» каналы «Cәйлән» телевизион музыкаль фестиваленең 6 сезонына старт бирә! Проектның төп максаты - татар халык, классик, эстрада җырларын башкаручы балаларны барлау; алар өчен иҗади үсеш мөмкинлеге булдыру. Әлеге фестиваль каналыбызның иң шәп проектына әверелде! Ул катнашучыларга киң мөмкинлекләр бирә, зур сәхнәгә юл ача! Узган сезон җиңүчеләре инде, чын мәгънәсендә, йолдыз булып балкыйлар! Алар танылган артистлар белән бергә чыгыш ясый, клипларда төшә, зәңгәр экраннарда балкый! Бер генә мөһим чара да алар катнашыннан башка узмый. Быел исә гади генә сезон түгел! Ә сезоннар ярышы! Узган еллар җиңүчеләре үзара ярышачаклар! Көрәш бик кызу булачак! Тамашачыларны күп сюрпризлар, талантлы башкаручылар һәм шәп җырлар көтә! Яңалыклар артыннан күзәтеп барыгыз!

20.03.2024

ЯЗГЫ БАГУ: эзләр ни сөйли?

Кояш чыгып, көннәр җылыта башлагач, иртән чиста кар яткан урынга барып, аяк эзе тигез калырлык итеп басарга һәм пышылдап кына теләк теләргә кирәк. Иң мөһиме, кеше йөри торган җир булмаска тиеш. Шуннан сак кына чыгып, эзләр яныннан китәргә, кирегә борылып карарга ярамый. Шул ук көнне кичен эзләр янына барып, аларның нинди икәнлеген карагыз. Әлеге язгы багу сезгә теләкләрегезне чынга ашырырга ярдәм итәр! 1. Эзләр белән берни үзгәрмәгән, ничек калдырып киткән, шулай торса – бернинди дә үзгәрешләр көтелми. Башка теләк теләп карарга кирәк. Бу теләгең сиңа бөтенләй кирәк түгел бугай. 2. Әгәр эзләрне кар капласа – әлегә теләк кабул була алмый, вакыты җитмәгән. 3. Эзләргә эрегән кар суы тулса – теләгең тиздән үтәлә башлаячак. 4. Башта су тулып, аннары боз белән капланса – теләк үтәлүгә ниндидер каршылыклар бар. 5. Эзләр яныннан кешеләр узып киткән, эзең тапталган булса – теләгеңне үтәргә кемдер комачаулый. 6. Янәшәдә песи, эт яисә кош эзләре бар икән – сиңа яшертен генә ярдәм итүчеләр бар дигән сүз. Тикшереп карагыз әле! Күңел түрендә йөрткән теләкләрегез кабул булырмы?

19.03.2024

«ДоМиСоль»: ЯҢА ЧЫГАРЫЛЫШ

Бүген «ШАЯН ТВ»ның YouTube каналында «ДоМиСоль» музыкаль-анимацион программасының икенче чыгарылышы дөнья күрде. Ноталар аша бергәләп дөньяны танырга өйрәнәбез! Ел фасыллары, хайваннар һәм үсемлекләр дөньясы, табигать күренешләрен җырлап өйрәнергә чакырабыз! Тапшыруны сылтама буенча узып карагыз!

19.03.2024

ЯҢА ПРОЕКТ: «Җавап тап»

«ШАЯН ТВ» каналы тамашачыларын яңа проектлар белән сөендерүен дәвам итә! «Җавап тап» танып белү программасы бүген YouTube каналга чыга! Проектның максаты - җырлар аша татар телен өйрәнү, әйләнә-тирә дөнья турында белемнәрне ныгыту. Программа җырлы форматта балаларны хайваннар, үсемлекләр, табигать күренешләре, техника, һөнәр дөньясы белән таныштыра. Әлеге проект балаларга безне чолгап алган күренешләр турында белемнәр формалаштырырга, Җир планетасы тормышының үзенчәлеген һәм серен күрергә, табигать дөньясына, тереклек ияләренә карата дустанә мөнәсәбәт формалаштырырга ярдәм итә. Тапшыру балалар өчен генә түгел, музыка җитәкчеләре, тәрбиячеләр һәм башлангыч сыйныф укытучылары өчен дә файдалы. Яңгыраган музыкаль материал һәм шигырьләрне педагоглар дәресләрдә өстәмә материал буларак куллана ала. «Җавап тап» проектын бүген 15:00 сәгатьтә «ШАЯН ТВ»ның YouTube каналында, 23 март көнне 17:50дә исә зәңгәр экраннарда күрергә мөмкин булачак!

18.03.2024

«Балачак җыры» автор һәм композиторларны барлый

Дуслар, «Балачак җыры» бәйгесенең бишенче сезонына гаризалар кабул ителә! Авторлар һәм композиторлардан өр-яңа иҗат җимешләре көтәбез! Гаризагызны юллагыз һәм акчалата призга, җырның профессиональ аранжировкасы һәм клибына ия булыгыз! Эшләрегезне [email protected] адресына җибәрегез. Гаризалар 30 апрельгә кадәр кабул ителә! Тулырак мәгълүмат сылтама буенча.

18.03.2024

1 ... 88 89 90 91 92 ... 375

Яңа сайт!