Яңалыклар

«Крокус Сити Холл»да кешеләрне коткарган 15 яшьлек Ислам Хәлиловны бүләкләячәкләр

Россия мөселманнарының Диния нәзарәте лидеры Мөфти Шәех Равил Гайнетдин яшь герой - Ислам Хәлиловны мөселманнарның югары бүләгенә тәкъдим итте. 15 яшьлек егет теракт вакытында «Крокус Сити Холл» бинасыннан 100дән артык кешене алып чыккан. Равил Гайнетдин Хәлиловларга шәхси чакыру хаты тапшырды. Ислам изге Рамазан аеның җомга көнендә Мәскәү Җәмигъ мәчетендә бүләкләнәчәк. Аңа кыюлыгы һәм кешеләрне коткарганы өчен Россия мөселманнарының «Хезмәтләре өчен» медале тапшырылачак. Егет әлеге концерт залының гардеробында хезмәт куйган. Ислам сүзләренчә, эшкә урнашыр алдыннан барлык хезмәткәрләргә инструктаж үткәргәннәр. Теракт вакытында ул инструкция буенча эш иткән. Бинадагыларны хезмәткәрләр йөри торган ишектән урамга алып чыккан.

24.03.2024

Язгы авитаминоздан котылу буенча лайфхаклар

Яз – организмда витаминнар җитешмәгән вакыт. Без бу чорда еш кына хәлсезлек, томау төшү, тамак авырту, баш әйләнүдән интегәбез. Шуңа күрә туклануга аеруча игътибарлы булырга кирәк. Авитаминозны булдырмау өчен өстәлдә нинди витаминнар һәм ризыклар булырга тиеш соң? * Көндәлек меню витаминнарга, минералларга, аминокислоталарга, клетчаткага бай булырга тиеш. Күбрәк яшелчә-җимеш, чикләвекләр ашарга табиблар юкка гына кушмый. * А витамины запасын тулыландырырга кишер, абрикос, балык мае булыша. * Ит, майлы балык, бавыр, карабодай ярмасы, кузаклылар В витаминына бай. * Цитруслылар, кара карлыган, гөлҗимеш, кивида С витамины күп. * D витамины диңгез ризыкларында, солы ярмасында, атланмайда, эремчектә шактый. Моннан тыш, кеше организмы кояш нурлары тәэсирендә D витамины эшләп чыгарырга сәләтле. Аеруча иртәнге һәм кичке кояш файдалы. * Витаминнарга иң бай ризык булып чикләвек һәм йомырка санала. * Авитаминоздан котылуның иң үтемле юлы - витаминлы комплекс кабул итү. Аларның кайсын эчәсен табиб белән киңәшеп хәл итәргә кирәк.

22.03.2024

Илгиз Шәйхразиев серләре белән уртаклашты

«ШАЯН ТВ»ның YouTube каналында «Килде-Китте ШОУ» проектының яңа чыгарылышы чыкты! Студия кунагы – автор-башкаручы Илгиз Шәйхразиев. Популяр җырчы «Сәләт», шәхси тормышындагы яңа мөнәсәбәтләре, Yummy Music лейблыннан китүе һәм башка яңалыклары белән уртаклашты. Сылтама буенча уз һәм карамый калма!

22.03.2024

Сәламәт булыйм дисәң, су эч

22 март - Бөтендөнья су көне. Су - яшәү нигезе. Сәламәт булу өчен тәүлегенә кимендә 2 литр су эчәргә кирәк. * Суның 1500гә якын төрдәге формасы бар – кар суы, туфрак суы, яңгыр суы һ.б. * Галимнәр билгеләвенчә, 2035 елга дөньяда эчәр суга кытлык кичерүчеләр саны 3,5 миллиард кешегә җитәргә мөмкин. * Кеше су эчмичә 5 көннән дә артык яши алмый. * Кеше елына уртача 60 тонна су куллана. * Кайнар су салкынына караганда тизрәк туңа. * Әлеге вакытта планетада яшәүче бер миллиардка якын кеше чиста су эчүдән мәхрүм. * Барлык йогышлы авыруларның 80 проценты чамасы кешегә су аша күчә. * Яңа туган сабый организмы 80 процент судан торса, картайган кешедә ул 50 проценттан артмый. * Җир мантиясендә, аның өслегендәге белән чагыштырганда, су запасы дистәләрчә тапкыр күбрәк. * Ел саен уртача бер триллион тонна су парга әйләнә. Ул унике нольле сан белән билгеләнә. * Планетадагы суның 46 проценты Тын океанда тупланган. Атлантик океанда аның - 23, Һинд океанында - 20, Төньяк боз океанында 4 проценты. * ЮНЕСКО бәяләмәсе буенча, дөньядагы иң саф су Финляндиядә.

22.03.2024

Нәүрүз: көн белән төн тигезләште

Бүген язгы көн белән төн тигезлеге көне! Димәк, Нәүрүз бәйрәме! Бу табигатьтә чын-чынлап яз башланган көн! Көн-төн тигезлеге көннәрендә урта киңлекләрдә көн белән төн озынлыгы тигезләшә. Бу вакытта Кояш төгәл көнчыгышта чыгып, төгәл көнбатышта бата һәм Җир планетасында көн белән төн төгәл уникешәр сәгать дәвам итә. Язгы көн-төн тигезлеге Төньяк ярымшарда астрономик язның башы булып санала. Идел буе татарлары Нәүрүзне чәчүгә чыгар алдыннан бәйрәм иткәннәр. Нәүрүз көннәрендә йорттан-йортка кереп “нәүрүз әйтеп” йөрү гадәте булган. Нәүрүз көнне кешеләр күңелендә гел игелек кенә булырга тиеш саналган. Ул изгелек булып аның үзенә үк кайтачак. Яңа елны ничек каршыласаң, елың шулай үтәр дип уйлау күбрәк шатлану, башкаларга куаныч өләшү теләген уяткан. Кеше үз өстендәге бурычлардан да котылырга тырышкан.

21.03.2024

«BC Academy» Халыкара мәктәбендә «Балачак җыры» концерты узды

Бүген «BC Academy» Халыкара мәктәбендә «ШАЯН ТВ» каналының «Балачак җыры» концерты үтте. Тамашачыларга бер көндә ике концерт тәкъдим ителде. Концертта «Сәйлән» телевизион музыкаль фестивале җиңүчеләре «Балачак җыры» бәйгесендә җиңгән җырлар белән тамашачыларның күңелен күтәрделәр. Шулай ук килгән кунаклар өчен «ШАЯН ТВ» балалар каналының яраткан геройлары – Шаян һәм Мияу белән фотога төшү дә оештырылды. Алар, гадәттәгечә, нәниләргә яхшы кәеф һәм күтәренке рух бүләк иттеләр! Концерт бик эчтәлекле булды, онытылмаслык тәэсирләр калдырды! Берсеннән-берсе матур клиплар, гаҗәеп эчтәлекле җырлар яңгырады, җанлы атмосфера хөкем сөрде! Искәртеп узабыз, әлеге чаралар Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә оештырыла.

21.03.2024

Бәхетле булу серләре

Бәхетнең үз көне бар икәнен белә идегезме? 20 март – Халыкара бәхет көне билгеләп үтелә! * Галимнәр фикеренчә, бәхетнең 50 проценты геннардан, 10 проценты тормыш шартларыннан (гаилә, эш, уку), ә 40 проценты уйлардан тора. * Бәхетнең үз төсе бар. Ул – сары төс. * Эндорфин, дофамин һәм серотонин - бәхет формуласын төзүче гормоннар. Эндорфиннар кыска вакытка, ә дофамин озын вакытка бәхет фоны булдыра һәм канәгатьлек хисе бирә. Серотонин исә – яхшы кәеф чыганагы. * Иң «бәхетле» илләр рейтингында беренче урынны Дания, аннан соң Швейцария, Исландия, Норвегия һәм Финляндия ала. * Үзеңне бәхетле итеп хис итәр өчен, тиешенчә йокларга, спорт белән шөгыльләнергә, әйбәт кешеләр белән аралашырга, сәяхәт итәргә һәм елмаерга куша психологлар. Якыннарны яратырга һәм барлык үпкәләрне онытырга кирәк. Үзебез бәхет чыганагы булыйк. Дөнья - ул зур көзге һәм анда безнең кәефебез чагыла.

20.03.2024

«ШАЯН ТВ» каналы «Cәйлән» фестиваленең 6 сезонын игълан итә

«ШАЯН ТВ» каналы «Cәйлән» телевизион музыкаль фестиваленең 6 сезонына старт бирә! Проектның төп максаты - татар халык, классик, эстрада җырларын башкаручы балаларны барлау; алар өчен иҗади үсеш мөмкинлеге булдыру. Әлеге фестиваль каналыбызның иң шәп проектына әверелде! Ул катнашучыларга киң мөмкинлекләр бирә, зур сәхнәгә юл ача! Узган сезон җиңүчеләре инде, чын мәгънәсендә, йолдыз булып балкыйлар! Алар танылган артистлар белән бергә чыгыш ясый, клипларда төшә, зәңгәр экраннарда балкый! Бер генә мөһим чара да алар катнашыннан башка узмый. Быел исә гади генә сезон түгел! Ә сезоннар ярышы! Узган еллар җиңүчеләре үзара ярышачаклар! Көрәш бик кызу булачак! Тамашачыларны күп сюрпризлар, талантлы башкаручылар һәм шәп җырлар көтә! Яңалыклар артыннан күзәтеп барыгыз!

20.03.2024

1 ... 89 90 91 92 93 ... 376

Яңа сайт!