Яңалыклар

Беренче кар яуганнан соң 40 көн үтүгә җирдә кар ятар

Бик күпләребез түземсезлек белән көтеп ала торган мизгел. Кар яуды бит, дуслар! Беренче карга күңел сабыйларча сөенә, үзенә күрә бер саф, ихлас хисләр кичерә. Тиздән бар җиһанның аклыкка чумасын, ап-ак карны шыгырдатып урамнан үтәсен, яшел чырышларны бизәп Яңа елны каршылыйсын искәртә ул беренче кар. Озын, кара көздән соң җир өсте сафланып, чистарынып, пакьләнеп калган кебек тоела. Җылы көннәрне, шулай итеп, сагынып сөйләргә генә кала. Кыш бабай күбрәк карны ноябрь ахырларында яудыра башлар дип көтәбез. Халык сынамышларына ышансаң, беренче кар яуганнан соң 40 көн үтүгә җирдә кар ятачак, чын кыш киләчәк. Шуңа да игътибар итәргә кирәк, әгәр кар бөртекләре вак булса һәм бер-берсеннән ерак төшсә, салкыннар көтәргә кирәк. Юктан да бәхет табып, кечкенә генә шатлыклы мизгелләрне дә могҗизага тиңләп, сөенеп яшик, дуслар! Җылырак киенеп йөрергә тырышыйк, сәламәтлегебезне кайгыртыйк, якыннарыбыз белән булыйк. Фото: Яндекс

07.11.2024

Җирдә яңа мини Ай барлыкка килде

Сентябрь ахырында Җирнең тагын бер иярчене барлыкка килде. Астрономнар “2024 РТ5” астероидын “мини Ай” дип атады. Ул безнең планета орбитасында озак тормаячак. 25 ноябрьгә кадәр Җир тирәли бер тапкыр әйләнеп чыгачак һәм Кояш системасы буенча сәяхәтен дәвам итәчәк. Мини Ай чыны кебек якты түгел, аны телескош аша гына күрергә мөмкин. Җирнең моңа кадәр дә ике Айлы чаклары булды. “2020 CD3” астероиды берничә ел Җирне озатып йөрде, 2020 елда гына безнең планета орбитасыннан юкка чыкты. “2022 NX1” астероиды 1981-2022 елларда “мини Ай” исемен йөртте, аны 2051 елда кабат кунакка көтәбез. Хәзерге астероид та 2055 елда кабат әйләнеп килергә тиеш. Фото: Яндекс

05.11.2024

«Сәйлән»: ИКЕНЧЕ ЯРЫМФИНАЛ

3 ноябрь көнне 12:00 һәм 17:00 сәгатьләрдә «ШАЯН ТВ» каналында «Сәйлән» телевизион җыр фестиваленең икенче ярымфиналы эфирга чыга! Финалга якынлашып киләбез! Яшь башкаручыларны Татарстанның халык артистлары Зәйнәб Фәрхетдинов, Рөстәм Асаев һәм Татарстанның атказанган сәнгать эшлеклесе Эльмир Низамов бәяли. Якшәмбе кичен яраткан җырчыларыгыз белән бергә җырлап үткәрергә чакырабыз!

02.11.2024

«Кояшлы дөнья» фестивале йөрәкләрне берләштерде

Татарстан башкаласы бөтен Россиядән яшь талантларны җәлеп итү үзәгенә әверелде. «Полимер» мәдәният сарае «Кояшлы дөнья» Бөтенроссия фестивалендә катнашучылар һәм кунаклар өчен үз ишекләрен ачты, аның кульминациясе зур гала-концерт белән төгәлләнде. «Кояшлы дөнья» Бөтенроссия фестивале чираттагы тапкыр балалар иҗатының чикләрне белмәвен һәм бөтен ил буйлап йөрәкләрне берләштерергә сәләтле булуын раслады. Казан бу әһәмиятле чараны уздыру эстафетасын лаеклы рәвештә кабул итте, барлык катнашучыларга да сәхнәдә онытылмаслык хис-кичерешләр бүләк итте. «ШАЯН ТВ» каналы да чарадан читтә калмады. «Кояшлы балалар»га үзенең истәлекле бүләкләрен тапшырды.

02.11.2024

«ШАЯН ТВ» алып баручылары «Татар кызы, татар егете - 2024» исеменә лаек булды

Кичә «Татар кызы, татар егете - 2024» бәйгесенең район этабы булып узды. Әлеге миллилек бәйрәме Казанда ел саен үткәрелә. «ШАЯН ТВ» каналы алып баручылары Зәйнәп Хөснуллина белән Аяз Әгълиуллин бәйгедә катнашып, Гран-при алды, Алисә Әдиятуллина исә беренче урынга ия булды! Алар лаеклы чыгыш ясадылар һәм җиңү яуладылар! Яшь алып баручыларыбызны җиңүләре белән тәбрик итәбез һәм шәһәр этабында зур уңышлар телибез!

01.11.2024

Яңа документаль фильм эфирга чыга

«ШАЯН ТВ» каналы ял көннәренә яңа документаль фильм әзерләде. Иртәгә тамашачылар өчен «Бөҗәкләр – стратегия даһилары» премьерасы тәкьдим ителәчәк. Бөҗәкләрнең иксез-чиксез тормышы нинди мавыктыргыч вакыйгалар белән тулган? Аларны әйләндереп алган хорафатлар күп кенә аңлашылмаучылыкларның чыганагы булган. Тикшеренүләр күрсәткәнчә, җирне баетучы бөҗәкләр саны 40 ел эчендә 25%ка кимегән. Бөҗәкләр чыннан да кешеләр тарафыннан бәяләнмәүгә лаекмы икән? Бу документаль фильмда серле бөҗәкләр дөньясы турында сөйләнелә, аларның яшәү рәвешләре тасвирлана. Шулай ук беренче тапкыр таракан шөпшәсе, суфи чикерткә һәм көя күбәләгенең серле яшәү урыннары ачыклана. Премьераны һәр шимбә 09:45 һәм 21:00 сәгатьләрдә «ШАЯН ТВ» каналында карагыз. Фото: Яндекс

01.11.2024

«Дөнья» студиясендә кунакта

«ТАТАР СҮЗЕ» бишенче Халыкара нәфис сүз телевизион бәйгесенә гаризалар кабул итү тәмамлануга бик аз вакыт калып бара! Гаризагызны юлларга ашыгыгыз! Бәйгенең оештыру комитеты әгъзасы, «ШАЯН ТВ» каналының башкарма директоры-баш мөхәррир урынбасары Роза Әдиятуллина Бөтендөнья татар конгрессының «Дөнья» студиясендә кунакта булып кайтты. Ул тамашачыларны бәйгедә катнашырга чакырды һәм аның кагыйдәләре белән тулырак таныштырып китте. Тапшыруны Бөтендөнья татар конгрессы сайтында карарга мөмкин. Халкыбызның иң мөһим мәдәни ел вакыйгасыннан сез дә читтә калмагыз! Әдәбият сөючеләрдән видеолар көтәбез! Сылтама буенча узыгыз һәм бәйгенең кагыйдәләре белән танышыгыз!

01.11.2024

«Зәңгәр күлләр» тыюлыгына керү бәясе билгеле булды

Казанда «Зәңгәр күлләр» тыюлыгына керүне түләүле итәргә планлаштыралар. Бәясе дә билгеле. Түләү 100 сум булачак. Бу махсус саклануда булган табигый территорияләрне карау һәм саклау өчен гражданнардан взнос буларак кабул ителә. Түләү бөтен кешедән дә алынмаячак. Балалар, инвалидлар, пенсионерлар һәм махсус хәрби операциядә катнашучылар тыюлыкка бушлай керә ала.

31.10.2024

1 ... 50 51 52 53 54 ... 376

Яңа сайт!