Яңалыклар

«Алтын каләм – Золотое перо» фестивале җиңүчесе билгеле булды

Казанда ел саен уздырылучы республикакүләм «Алтын каләм – Золотое перо» яшьләр һәм үсмерләр матбугаты фестиваленең нәтиҗәләре ясалды. Әлеге абруйлы конкурс медиа өлкәсе белән кызыксынучы сәләтле яшь каләм тибрәтүчеләрне берләштерә. 2025 елда фестивальнең төп җиңүчесе – Нижнекамск шәһәреннән Альмира Хәйброва. Ул үзенең креатив эшләре, фикер тирәнлеге һәм иҗади карашы белән аерылып торды. Җиңү нәтиҗәсендә Альмирага медиа юнәлеше буенча югары уку йортына бюджет урынга укырга керү мөмкинлеге бирелде. Шулай ук фестиваль кысаларында республикадагы дүрт уку йорты медиаүзәгенә 1 миллион сум күләмендә техника җиһазлары алу өчен сертификатлар тапшырылды. Бу хакта Татарстан Республикасы яшьләр эшләре министры Ринат Садыйков хәбәр итте. Фестиваль эшләрен бәяләүдә профессиональ жюри зур роль уйнады. Алар арасында танылган медиабелгечләр дә бар иде. Жюри әгъзаларының берсе – Сәхабетдинова Рамилә Әхмәтзакир кызы, «ШАЯН ТВ» телеканалының башкарма директоры һәм баш мөхәррире. Ул Татарстанда балалар һәм яшьләр журналистикасын үстерүгә зур өлеш кертә. Җиңүчеләрне ихлас котлыйбыз! Каләмегез үткен, фикерегез тирән булсын!

19.06.2025

Популяр яңалыклар

Балалар футболы көне!

Дуслар, ә сез белә идегезме, 19 июнь – гади генә җәй көне түгел, ә чын бәйрәм! Һәм ул Балалар футболы көне! Футбол – ул туп артыннан чабу, «пас бир!» дип кычкыру, егылу, тору, көлү, янә чабу һәм... ГОООЛ! Кайвакыт – үз капкаңа да... Ни өчен футболны барысы да ярата? Чабарга, сикерергә, кычкырырга була – һәм бу гадәти хәл! Үзеңне чемпион итеп тоясың. Бу бик күңелле! Хәтта тубың куакка кереп китсә дә. Футбол – ул дуслык турында. «Мин синең командада!», «Афәрин!» һәм «Иң мөһиме – катнашу!» дигән сүзләр турында. Син дә бүген ишегалдында мини-турнир оештырып кара. Үз командаңны тупларга һәм аңа исем, логотип ясарга кирәк булачак. Кем гол кертергә әзер? Чемпионнар, алга!

19.06.2025

Канал яңалыклары

«ШАЯН ТВ» яшь хәбәрчеләр эзли!

БЕЗДӘ ЯҢА КАСТИНГ! Сиңа 10-16 яшь һәм үзеңне телевидениедә күрәсең киләме? Димәк, бу мөмкинлек нәкъ менә синең өчен! «ШАЯН ТВ» яшь, сәләтле, кызыксынучан хәбәрчеләр эзли. Максат – тамашачыга яңалыкларны кызыклы, җанлы һәм аңлаешлы итеп җиткерә белүче яшь йолдызны табу. Кастинг ике этапта үтәчәк: Беренче тур – 2025 елның 1 августына кадәр. Синнән 1 минуттан артмаган видеоязма кирәк. Анда нинди дә булса яңалыкны креатив һәм үзенчәлекле итеп сөйләп күрсәт. Видеоны әзерләгәч, анкетаны тутыр һәм гаризаны махсус сылтама аша җибәр. Икенче тур – 11-15 август көннәрендә, Казанда, «ШАЯН ТВ» студиясендә узачак. Бу этапта инде син үз сәләтеңне профессионаллар алдында күрсәтәчәксең. Җиңүче «ШАЯН ТВ» командасына кушылып, яңалыклар тапшыруында корреспондент буларак катнашу мөмкинлеген алачак! Проект яшь журналистларны үстерү, талантларны табу һәм аларны зур экранга чыгаруга юнәлтелгән. Шуңа күрә, озакка сузма– видеоңны яздыр, анкетаны тутыр һәм үзеңне сынап кара! Сораулар булса, шалтырат: 8 (843) 570-50-33 Әйдә, үз көчеңне күрсәт – бәлки, нәкъ менә син «ШАЯН ТВ»ның яңа йөзе булырсың!

18.06.2025

Популяр яңалыклар

Эх, җиләкле җәйләре...

Җиләк көне белән! 18 июнь – бөтен дөньяда җәйнең иң тәмле, хуш исле һәм матур җимеше – ҖИЛӘК көне билгеләп үтелә. Кызыл, сусыл, баллы – ул кояш җылысын һәм каникуллар шатлыгын үзенә җыйган кебек. Беләсеңме, җиләк – ул гади генә десерт түгел. Аның составында күп кенә витаминнар бар, алар сәламәт булып үсәргә ярдәм итә. Элеккеләр клубника кәефне күтәрә һәм теләкләрне чынга ашырырга булыша дип ышанган. Бу көнне чын җиләкле бәйрәм итеп үткәрергә була! Мәсәлән, клубника үскән кыр рәсеме ясарга, әти-әни белән җиләктән пирог пешерергә, яки уен уйнап алырга: кем җиләк турында күбрәк сүз әйтә ала? Әгәр өегездә чын җиләк бар икән – авыз итеп кара! Ул иң тәмле кәнфиттән дә яхшырак. Җиләк көне җәй кебек күңелле һәм тәмле булсын!

18.06.2025

Популяр яңалыклар

Казанда Сабантуйга автобуслар йөриячәк

Казанда милли бәйрәмнәрнең иң зурысы – Сабантуй якынлаша. Ул 21 июнь көнне булчак. Быел бәйрәм берничә мәйданчыкта уза, һәм анда барып җитү өчен махсус транспорт маршрутлары билгеләнде. Сезгә уңайлы булсын өчен, барлык мәгълүматны бергә тупладык. Березовая роща (Мирный бистәсе) Мирный бистәсендәге Березовая рощага шәһәрнең төрле нокталарыннан автобуслар йөри. Юл бәясе – гадәти шәһәр эченнән йөрү бәясе кебек. Түбәндәге тукталышлардан автобуслар хәрәкәт итәчәк: «Җиңү проспекты» метро станциясе 10-нчы микрорайон Филармония концерт залы (Павлюхин урамы) Глазунов урамы (Теплоконтроль тукталышы) Моннан тыш, «Казан-1» вокзалыннан электропоезд да йөриячәк. «Лебяжье» урман паркы Сабантуй «Лебяжье» урман паркында узачак очракта, анда бушлай автобуслар (шаттллар) йөриячәк. Алар «Ремплер торак массивы» тукталышыннан кузгалачак. Ориентир – Залесная урамындагы «Татнефть» ягулык салу станциясе. Дәрвишләр бистәсендәге Сабантуй Дәрвишләр бистәсенә барып җитү өчен дә махсус бушлай автобуслар каралган. Алар түбәндәге урыннардан кузгала: В. Б. Шнепп исемендәге Турбокомпрессор фәнни-тикшеренү институты янындагы парковка (Себер тракты, 40) «Мега» сәүдә үзәге парковкасы (Җиңү проспекты, 141) Юл хәрәкәтендәге вакытлыча үзгәрешләр 20 июньнән башлап, 21 июнь 17:00 сәгатькә кадәр «Урман шәһәрчеге» торак комплексы белән Фермское шоссе аралыгында беръяклы хәрәкәт оештырылачак. Шулай ук, Оренбург трактына таба Баталовлар туганнары урамында ике яклы хәрәкәт сакланачак. Барлык автобуслар һәм шаттллар иртәнге 8:00 сәгатьтән башлап бәйрәм тәмамланганчы һәм кунакларны чыгарып бетергәнче йөриячәк. Сабантуй – ул милли горурлык, традицияләрне саклау һәм бердәмлек бәйрәме. Юлга иртәрәк чыгыгыз, маршрутларны алдан планлаштырыгыз һәм бу матур бәйрәм рухын тулысынча тоярга язсын!

17.06.2025

Канал яңалыклары

ПРЕМЬЕРА – «Балалар һәм очучы җәнлекләр»

«ШАЯН ТВ»да яңа мультсериал «Балалар һәм очучы җәнлекләр»! Игезәкләр Оля һәм Коляга 5 яшь, ә бу яшьтәге балаларга дөньядагы бөтен нәрсә кызык! Алар тәҗрибәле остазлар – оча торган җәнлекләр ярдәмендә – әйләнә-тирә дөньяны өйрәнәләр. Төп геройларның иң катлаулы сорауларына да бик акыллы җавап бирәләр. Алар өлкәннәргә ярдәм итә һәм көндәлек күңелсез эшләрне мавыктыргыч маҗараларга әверелдерәләр! Дүшәмбе - җомга көннәре сәгать 8:10 / 16:10 «ШАЯН ТВ»да карамый калма!

16.06.2025

Популяр яңалыклар

Казан Сабан туе – 2025

Казанда чын җәй Сабан туеннан башлана! Быел милли бәйрәм 21 июньдә өч мәйданчыкта үтәчәк: Мирный бистәсендә, Дербышкыларда һәм Лебяжье күле янында. Нәрсәләр көтә: көрәш, концертлар, мастер-класслар, милли ризыклар, фотозоналар, бәйгеләр, балалар мәйданчыклары һәм гаилә программалары, районнардан милли йортлар, халык уеннары һәм һөнәрләр Мирный 11 район үзәге, Салават һәм Филүс Каһиров чыгышы, балалар Сабан туе һәм татар киемнәре маркеты Лебяжье «Татарстан Батырлары» театраль тамашасы, эстрада йолдызлары (Ришат Тухватуллин, Гөлназ Асева, Илмира Нагимова һ.б.), «Сибур-Казаньоргсинтез» оештырган гаилә мәйданчыгы Дербышки «Яшьләр Сабан туе», Комсомол күлендә «Су Сабан туе», матурлык бәйгесе һәм сап-бордлар тамашасы, күренекле җырчылар (Венера Ганеева, Марат Яруллин һәм башкалар) Керү бушлай. Аш-суы, милли сувенирлар, осталар эшләнмәләре – барысы да булачак! Милли киемнәр киеп килегез – бәйрәм рухын көчәйтә! Сабан туе – бу гади бәйрәм генә түгел. Килегез – онытылмас хис-кичерешләр көтә!

16.06.2025

Кызыклы фактлар

Әтиләр көне белән!

15 июнь – әтиләргә иң җылы, ихлас рәхмәт сүзләрен җиткерә торган бәйрәм! Әти – һәрвакыт янәшә, авыр чакта таяныч, уңышларга илтүче көч, тормышка өйрәтә торган зур терәк. Әтиләр – безнең горурлыгыбыз, акыллы киңәшчеләребез, балалар өчен иң зур үрнәк. Аларның мәхәббәте һәрвакыт йөрәгебездә, аларга булган хөрмәт – чиксез. Бәйрәм белән, кадерле әтиләр! Сезгә сәламәтлек, гаилә җылысы, балалар бәхете һәм күңел күтәренкелеге телибез! Шулай ук «Әти һәм мин» тапшыруының яңа чыгарылышын безнең ВКонтакте төркемендә карарга онытмагыз!

15.06.2025

1 ... 49 50 51 52 53 ... 411

Тавыш бирү башланды!

Бәйге!

Яңа сайт!