Яңалыклар

«Сәйлән» фестиваленең беренче финал чыгарылышын карарга чакырабыз

Бүген 12:00 һәм 17:00 сәгатьләрдә «ШАЯН ТВ» каналында «Сәйлән» проектының беренче ФИНАЛ ЧЫГАРЫЛЫШЫ дөнья күрәчәк! Ниһаять, финалга якынлаштык! «Сәйлән» статуэткасына кемнәр лаек булыр? Иң грандиоз балалар фестиваленең чираттагы тапшыруын карамый калмагыз! Яшь йолдызларга үз бәяләрен Татарстанның халык артистлары Винера Ганиева, Эльмира Кәлимуллина һәм популяр җырчы Илгиз Шәйхразиев бирәчәк. Ялларны җырлап уздырыйк!

10.11.2024

Казанның 180 нче гимназиясендә «Балачак җыры» концерты узды

Бүген «ШАЯН ТВ» каналының «Балачак җыры» концерты Казанның «180 нче күп профильле полилингваль гимназиясе»ндә узды! Килгән кунакларны һәм гимназия укучыларын «ШАЯН ТВ» беренче балалар каналының яраткан геройлары каршы алды һәм яхшы кәеф бүләк итте. Концерт программасында «Сәйлән» телевизион фестивале җиңүчеләре үзләренең искиткеч чыгышлары белән нәни тамашачыларыбызны таң калдырдылар. Алар «Балачак җыры» бәйгесенең танылып өлгергән, балалар өчен җырларын башкардылар. Бәйрәм буена залда яхшы кәеф хөкем сөрде! Тамашачылар җылы бәйрәм атмосферасы өчен концертта катнашучыларга һәм оештыручыларга үзләренең рәхмәт сүзләрен җиткерделәр! Искәртеп узабыз, әлеге чаралар Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә үткәрелә.

08.11.2024

«ШАЯН ТВ» каналы «Фән көне»ндә булып кайтты

Бүген Казан федераль университетында «Фән көне» билгеләп үтелде. Чарада «ШАЯН ТВ» каналы да булып кайтты. Каналның алып баручысы, «ТЭФИ-KIDS» 2024 телевизион милли премиясе җиңүчесе Ислам Хәбибуллин кунаклар өчен интерактив бәйгеләр үткәрде һәм истәлекле бүләкләр өләште. «ШАЯН ТВ»ның төп геройлары Шаян, Биби һәм Мияу исә бәйрәмгә килүчеләргә күтәренке рух бүләк итте.

08.11.2024

Раяз Фасыйхов клипларының бәясен әйтте

«Килде-Китте ШОУ»ның яңа чыгарылышының кунагы – Татарстанның атказанган артисты Раяз Фасыйхов. Популяр җырчы клипларының бәяләре, Салават белән дуслыгы, кызы белән мөнәсәбәтләре һ.б. хакында сөйли. Эксклюзив әңгәмәне сылтама буенча узып, «ШАЯН ТВ»ның YouTube каналында карагыз!

08.11.2024

Сайтта яңа мультсериаллар

Дуслар, «ШАЯН ТВ» каналы сайтында яңа мультсериаллар! «Супер Дино», «Тайо маҗаралары», «Титипо - шаян паровоз», «Гордон – мәктәп автобусы» мультфильмнарын барысын да үзегезгә уңайлы вакытта сылтама буенча карарга мөмкин!

07.11.2024

Беренче кар яуганнан соң 40 көн үтүгә җирдә кар ятар

Бик күпләребез түземсезлек белән көтеп ала торган мизгел. Кар яуды бит, дуслар! Беренче карга күңел сабыйларча сөенә, үзенә күрә бер саф, ихлас хисләр кичерә. Тиздән бар җиһанның аклыкка чумасын, ап-ак карны шыгырдатып урамнан үтәсен, яшел чырышларны бизәп Яңа елны каршылыйсын искәртә ул беренче кар. Озын, кара көздән соң җир өсте сафланып, чистарынып, пакьләнеп калган кебек тоела. Җылы көннәрне, шулай итеп, сагынып сөйләргә генә кала. Кыш бабай күбрәк карны ноябрь ахырларында яудыра башлар дип көтәбез. Халык сынамышларына ышансаң, беренче кар яуганнан соң 40 көн үтүгә җирдә кар ятачак, чын кыш киләчәк. Шуңа да игътибар итәргә кирәк, әгәр кар бөртекләре вак булса һәм бер-берсеннән ерак төшсә, салкыннар көтәргә кирәк. Юктан да бәхет табып, кечкенә генә шатлыклы мизгелләрне дә могҗизага тиңләп, сөенеп яшик, дуслар! Җылырак киенеп йөрергә тырышыйк, сәламәтлегебезне кайгыртыйк, якыннарыбыз белән булыйк. Фото: Яндекс

07.11.2024

Җирдә яңа мини Ай барлыкка килде

Сентябрь ахырында Җирнең тагын бер иярчене барлыкка килде. Астрономнар “2024 РТ5” астероидын “мини Ай” дип атады. Ул безнең планета орбитасында озак тормаячак. 25 ноябрьгә кадәр Җир тирәли бер тапкыр әйләнеп чыгачак һәм Кояш системасы буенча сәяхәтен дәвам итәчәк. Мини Ай чыны кебек якты түгел, аны телескош аша гына күрергә мөмкин. Җирнең моңа кадәр дә ике Айлы чаклары булды. “2020 CD3” астероиды берничә ел Җирне озатып йөрде, 2020 елда гына безнең планета орбитасыннан юкка чыкты. “2022 NX1” астероиды 1981-2022 елларда “мини Ай” исемен йөртте, аны 2051 елда кабат кунакка көтәбез. Хәзерге астероид та 2055 елда кабат әйләнеп килергә тиеш. Фото: Яндекс

05.11.2024

«Сәйлән»: ИКЕНЧЕ ЯРЫМФИНАЛ

3 ноябрь көнне 12:00 һәм 17:00 сәгатьләрдә «ШАЯН ТВ» каналында «Сәйлән» телевизион җыр фестиваленең икенче ярымфиналы эфирга чыга! Финалга якынлашып киләбез! Яшь башкаручыларны Татарстанның халык артистлары Зәйнәб Фәрхетдинов, Рөстәм Асаев һәм Татарстанның атказанган сәнгать эшлеклесе Эльмир Низамов бәяли. Якшәмбе кичен яраткан җырчыларыгыз белән бергә җырлап үткәрергә чакырабыз!

02.11.2024

1 ... 48 49 50 51 52 ... 375

Яңа сайт!