Яңалыклар

«ШАЯН ТВ»да икеләтә бәйрәм!

«ШАЯН ТВ»да икеләтә бәйрәм!

Бүген «ШАЯН ТВ»да икеләтә бәйрәм! Ни өчен? Беренче сәбәп - безнең яраткан балалар каналы ачылуга 3 ай! Әлеге көннәр сизелми дә узып китте. Икенче сәбәп – Без, шаяннарның әнисе Рәмилә апа бүген үзенең Туган көнен билгеләп үтә! Аны чын күңелдән Туган көне белән котлыйбыз һәм иң изге теләкләр телибез! Һәр яңа таң сезнең өчен Елмаеп атса иде. Һәр яңа көн туган саен Шатлыклар артса иде. Ә «ШАЯН ТВ» каналына күбәрк шаян балалар һәм озын-озак гомер телибез! Безнең белән булганыгыз өчен Сезгә зур рәхмәт!

12.02.2019
Шоколад файдалымы?

Шоколад файдалымы?

Дустым, сәлам! Синең яраткан ризыгың бармы? Ә менә мин шоколад яратам. Чөнки ул бик тәмле, җитмәсә файдалы да икән. Мин бүген шуның турында белдем. Синең дә беләсең килсә, минем язмамны укы. Шоколадның барлыкка килү тарихы күптәннән башланган. Беренчеләрдән булып индеецлар какао агачының җимешләреннән эчемлек ясаганнар. Һәм аны “чоколатль” дип атап йөрткәннәр. Бу эчемлек кешеләргә сәламәтлек, акыл һәм көч бирә дип санаганнар. Соңга таба испаниялеләр бу эчемлекне чәй һәм кәһва урынына куллана башлыйлар. Ләкин аның бәясе бик кыйммәт була. 1657 елда Лондонда беренче “Шоколад өе” ачыла. Европалылар башта шоколадны тәм-том дип ашамаганнар, ә дару урынына кулланганнар. Кайвакыт аны даруханәләрдә сатканнар, табиблар авыруларга дәвалау чарасы итеп биргәннәр. Иң мөһиме-шоколадны артыгыннан күп ашамаска!

11.02.2019
«WorldSkills2019»

«WorldSkills2019»

2019 ел чараларга бик бай булачак. Ә менә алар арасыннан иң көтелгәне «WorldSkills2019». «Яшьләр тукталышы» тапшыруы белән без яшь һөнәрчеләрнең нинди компетенцияләрдә катнашасын белгән идек. Ә хәзер сүз волонтерлар турында булыр. Волонтер - алмашка бернәрсә дә сорамыйча, түләүсез рәвештә җәмгыятькә файда китерүче кеше. «WorldSkills2019»да төрле илләрдән килгән кунакларны кем каршы алыр? Үз эшләренең осталары булган студентларга кем ярдәм итәр? Әйдәгез әле, ярдәм кулы сузарга әзер булган  бу волонтерлар турында күбрәк белик? Алар ничә кеше булачак, нинди эшләр башкарачаклар һ.б. Видео https://tatar-inform.tatar/ сайтынан алынды

11.02.2019
Сәлам белән бүләк килде...

Сәлам белән бүләк килде...

Нәбирә Минәхмәт кызы Гыйматдинова 1956 елның 20 октябрендә Татарстанның Аксубай районы Карасу авылында туа. Казан дәүләт университетының журналистика бүлеген тәмамлый. Нәбирә апа матур әдәбиятның проза һәм публицистика жанрларында иҗат итә. Аның матбугатта беренче хикәяләре («Йолдызлы кичтә», «Таңсылу») 1974 елда «Азат хатын» (хәзерге «Сөембикә») һәм «Идел» альманахы битләрендә дөнья күрә. Аннан соң республика газета-журналларында яшьләр тормышыннан алып язылган бер төркем хикәяләре аерым җыентык булып басылып чыга. Ә безнең «ШАЯН ТВ» каналына Нәбирә ападан сәлам белән бүләк килеп төште. Бүләкне ачкан вакытта тәрәз төбенә бер чыпчык килеп, Нәбирә апаның беренче әсәре «Шаян» дип аталган дип сайрап китте. Ә сез китаплар укырга яратасызмы? Без биик яратабыз. Безнең хәзер нинди китап укынанны сез инде аңлагансыздыр...

08.02.2019
Җәйне сагындым

Җәйне сагындым

Бүген тагын кар яуды. Җитмәсә, урамда салкын. Эх, тизрәк җәй җитсәме... Анда кояш, җиләк, яңгыр...Тагын әле шундый матур салават күпере дә чыкса! Ә сез беләсезме, салават күпере ничек барлыкка килә? Әйдәгез, бергәләп өйрәник. Cалават күпере - табигатьнең иң матур күренеше. Аристотель – борынгы грек философы - аның барлыкка килү сәбәпләрен ачыкларга тырышкан. Кояш нуры – бөтен төсләрнең кушылмасы. Күргәнең бардыр: кояш нуры көзгегә төшсә, аннан төрле төсләр чагыла. Без кызыл, сары, яшел, зәңгәр һәм шәмәхә төсләр күрәбез. Кояш нурын төрле төсләргә әйләндерә алучы предметны “призма” дип атыйлар. Һәм менә шушы төсләр линиясе “спектр” барлыкка китерә. Салават күпере нәкъ менә дуга формасындагы “спектр”. Ә яңгыр призма ролен үти. Салават күпере берүк вакытта яңгыр яуганда һәм кояш яктыртканда гына чыга.   Бездән сиңа лайфхак, дустым! Җәй көне кояш астында су сибешеп уйнасаң, салават күперен күрә аласың.  Ә синең игътибар иткәнең бармы? Безнең «ШАЯН ТВ» каналында салават күпере барлык ел фасылларында да бар. Безнең белән бергә бул!

07.02.2019
Prev. 1 ... 364 365 366 367 368 ... 376 Next
Главная Программа Видео Шортс Поиск