Яңалыклар

Матбугат очрашуы!

Тиздән тамашачы мәхәббәтен яулап алган «Сәйлән» телевизион-музыкаль проектының икенче сезоны зәңгәр экраннарга чыга. Шул уңайдан, «ШАЯН ТВ» каналы бүген массакүләм мәгълүмат чаралары вәкилләре һәм блогерлар өчен очрашу әзерләде! Очрашу кысаларында каналыбызның башкарма директоры, баш мөхәррире Рамилә Әхмәтзакир кызы Сәхабетдинова, мөхәррирләр бүлеге җитәкчесе Резеда Хәсәнова һәм «Сәйлән» телевизион-музыкаль проектының алып баручысы Рүзәл Әхмәдиев булачак премьераның серләре, «ШАЯН ТВ»да узган чаралар һәм яңа проектлар турында сөйләделәр. Чарада балалар каналы җитәкчеләре, «Сәйлән» фестивале финалистлары һәм беренче сезон җиңүчеләре катнашты. Студиябезгә килгән махсус кунаклар – әлеге очрашуның аерым бизәге булып торды. Алар арасында: Татарстан Республикасының халык шагыйре, Россиянең атказанган мәдәният хезмәткәре Разил Вәлиев; Татарстан Республикасының атказанган артисты Ландыш Нигъмәтҗанова; җырчы, «ТНВ» каналының алып баручысы Айсылу Габдинова. Әйтергә кирәк, җыелган кунаклар «Сәйлән» проектына һәм канал эшчәнлегенә югары бәя бирде! Чараның икенче өлешендә җыелган матбугат вәкилләре махсус кунаклар белән сорау-җавап форматында аралашып алды. Шуңа күрә, тиздән матбугат чараларында «ШАЯН ТВ» турында яңалыклар күп булачак! Күзәтеп барыгыз!

30.09.2020

«ШАЯН ТВ»да Фирдүс Тямаев!

Татар эстрадасының якты йолдызы, Татарстанның атказанган артисты Фирдүс Тямаев кичә «ШАЯН ТВ»га кунакка килде! Республика күләмендә аның турында белмәгән кеше юктыр, мөгаен. Ташып торучы энергиясе, үзенчәлекле сәләте һәм искиткеч концертлары белән ул миллионлаган аудиторияне үзенә җәлеп итте. Аның җырлары бүген һәркайда! Радиодулкыннарда, телевизорларда, смартфоннарда! Шаян балалар студиясенә дә ул җырлап керде! Тапшыруда Фирдүс Тямаев артист булу серләрен уртаклашты, «ШАЯН ТВ» тамашачыларына файдалы киңәшләр бирде, җырлады, биеде, хәтта яшь алып баручыбыз белән дуэт та оештырып карады! Кыскасы, УТ чыгарылыш килеп чыкты! Карамый калма!

30.09.2020

Бездән бүләк от!

«ШАЯН ТВ» инстаграмда бүләкләр УЙНАТА! Җиңүчегә "ШАЯН ТВ» каналыннан өстәл уенны! ⠀ Кагыйдәләр бик гади: ⠀ 1)@uen.tatar һәм @shaiantv аккаунтларына языл. 2) Бер комментарийда 4 дустыңны билгелә. ⠀ Җиңүчене @lizaonair сервисы ярдәмендә 2 октябрь көнне сайлап алачакбыз! Тизрәк бу сылтама аша күчегез https://www.instagram.com/p/CFtsCrPhg9k/?igshid=1oybs932grz3s

29.09.2020

Минтимер Шәймиевтән бүләк!

25 сентябрь көнне “Яңарыш” фондының 10 еллыгына багышланган тантанада "ШАЯН ТВ" каналының алып баручысы Элдар Гыйниятов чыгыш ясады. Татарстан Республикасының дәүләт киңәшчесе Минтимер Шәрип улы Шәймиев сәхнәдән яшь коллегабызга истәлекле бүләкләр тапшырды, уңышлар теләде! Әйтергә кирәк, яшь йолдыз белән Минтимер Шәрип улының бу беренче очрашуы түгел. Күптән түгел, Эльдар Актаныш районы Әнәк авылында узган Беренче Президентыбызның бюсты ачылышы тантанасында катнашып, Минтимер абыйның кечкенә чагын – Миңкәй ролен башкарды.

28.09.2020

«Яшь, талантлы, өметле җырчы Салават»

«ШАЯН ТВ» каналы мәртәбәле кунаклар кабул итәргә ярата! Күптән түгел безнең студиябездә җырчы, Татарстанның һәм Башкортстанның халык, Россиянең атказанган артисты Салават Фәтхетдинов булды. «Сәйлән» проекты катнашучылары өчен бу онытылмаслык истәлек! Бәйгенең жюри әгъзасе буларак, ул яшь җырчылар белән тәҗрибә уртаклашты, катнашучыларның чыгышларын бәяләде, файдалы киңәшләр бирде! Традиция буенча мөхтәрәм кунагыбыз автограф та калдырды. Үзе турында популяр артист: «Яшь, талантлы, өметле җырчы Салават» - дип язып куйды. Салават Фәтхетдинов катнашындагы чыгарылышны безнең каналда кара!

28.09.2020

«Бәрәңге җанашым» бәйрәме яки «БӘРӘҢГЕФЕСТ»

2020 елның 26 сентябрендә, 10.00 сәгатьтә Г. Тукай әдәби музеенда икенче тапкыр «Бәрәңге җанашым» бәйрәме яки БӘРӘҢГЕФЕСТ» узды. Бәйрәм Габдулла Тукайның әсәрләре нигезендә әзерләнде. Музейдаоештырылган бәйрәм кысаларында татар әдәбиятында һәм аерым алганда Г. Тукай иҗатында бәрәңге образының чагылышына багышланган интерактив лекцияләр, уеннар, ярышлар оештырылды, җырлар яңгырады. Бәйрәмнең махсус кунаклары арасында «ШАЯН ТВ» каналының яраткан геройлары да бар иде. Оештыручыларга күңелле бәйрәм һәм шәп кәеф өчен зур рәхмәт!

27.09.2020

КӨЗнең мутур көнендә татарча ЯЗ!

Бүген бөтен дөнья буйлап "Татарча диктант" чарасы узды. Һәр теләгән кеше диктант язуда катнашып татар телен белү дәрәҗәсен тикшереп карый алды. Быел әлеге акция 5нче тапкыр үткәрелде. Аның төп максаты – татар теленә кызыксынуны арттыру, әдәби телдә дөрес сөйләм һәм дөрес язу күнекмәләрен үстерү. Шаян ТВ аналогик юнәлештә үз эшен даими рәвештә алып бара. Шуңа күрә бу масштаблы чарадан балалар каналы читтә кала Алина мады! Канал тарафыннан «Адымнар» белем бирү үзәге нигезендә диктант өчен мәйданчыклар оештырылды. Укучыларга диктант тексты буларак Нәби Дәүлинең «Яшәү белән үлем арасында» әсәреннән өзек тәкъдим ителде. Каналның алып баручылары Адилә Биктимирова һәм Иван Остроумов үзләрен укытучы ролендә сынап карадылар. Үзенчәлекле эксперимент турында тулырак безнең тапшыруларда карагыз!

26.09.2020

«ШАЯН ТВ» Лучше всех!

Бүген мәркәзебездә масштаблы кастинг старт алды! Беренче каналда зур популярлык яулаган «Лучше всех» тапшыруының иҗат төркеме сәләтле балалар эзләп Казанга килде. 3-12 яшьлек талант ияләре көчләрен сынап карар өчен "Сәйдәш" мәдәният үзәгендә жыелды. «ШАЯН ТВ» яшь йолдызлар белән һәрчак янәшәдә. Бүгенге чарада канал мәгълүмати партнер вазифасын башкарды. Каналыбызның төп геройлары кастингка барып, катнашучылар белән аралашып, җан атып кайтты! Нәтиҗәләр әлегә билгесез. Гаризалар саны күп булганга, бәйгене ике көнгә бүлеп үткәрергә туры килде, ә димәк иртәгә кастинг дәвам итәчәк! «ШАЯН ТВ» каналы катнашучыларның барысына да уңышлар тели! Тиздән федераль каналның эфирында нәни якташларыбызны күрергә насыйп булсын!

26.09.2020

1 ... 251 252 253 254 255 ... 375

Яңа сайт!