Яңалыклар

«АВА-центр «Новая планета» бәйрәм оештырды!

20 август көнне балаларны реабилитацияләү үзәге «АВА-центр «Новая планета» Горки-Әмәт урманында үзенең туган көне уңаеннан зур бәйрәм үткәрде. Иҗади чыгышлар, балалар рәсемнәреннән күргәзмәләр, мастер-класслар оештырылды. Әлеге чарага «ШАЯН ТВ» каналы да үз өлешен кертте. «Сәйлән» телевизион җыр фестивале җиңүчеләре «Композитор чыпчыклар» җырын башкарып, үз чыгышлары белән бәйрәмгә тагын да ямь өстәделәр.

23.08.2022

«Серле алтын шәһәрләр»!

Дуслар, ял көннәрендә өр-яңа «Серле алтын шәһәрләр» мультсериалын карарга өлгердегезме әле? Өч бала алтын шәһәрләр эзләргә юл тота. Яшь сәяхәтчеләргә бик күп сынаулар, могҗизалар һәм мәкерле кешеләр белән очрашырга туры килә. Мультсериалның төп герое – ятим-батыр малай Эстебан белән бергә дөньяның төрле почмакларына мавыктыргыч тарихи сәяхәтләр, һичшиксез, күңелегезгә хуш киләчәк! Сезне Пиратлар, куркыныч юлбасарлар, күчмә кешеләр, хәтта аҗдаһалар белән очрашу көтә! Эстебан командасы белән бергә киләсе алтын шәһәргә барып, үзенең килеп чыгышының серен ача алырмы? Моны сез һәр якшәмбе «ШАЯН ТВ» каналында, 14:00 һәм 22:00 сәгатьләрдә «Серле алтын шәһәрләр» мультсериалын карап белә аласыз!

22.08.2022

22 август – Россия Федерациясе Дәүләт флагы көне!

Бүген, 22 августта Россия Федерациясе Дәүләт флагы көне билгеләп үтелә. 1991 елның 22 августында Мәскәүнең Ак йортында беренче тапкыр өч төсле Россия флагы күтәрелә. Беренче тапкыр ак-зәңгәр-кызыл флаг Алексей Михайлович идарә иткән чорда 1668 елда Голландия инженеры Давид Бутлер төзегән «Орел» рус хәрби кораблендә күтәрелгән. Ул яңа флаг белән озак йөзмәгән, Идел буйлап Әстерханга кадәр барганда аңа ут төрткәннәр. Өч төсле флагны законлы уйлап табучы итеп, Петр I таныла. Ул 1705 елның 31 гыйнварында сәүдә судноларында ак-зәңгәр-кызыл флаг күтәрергә кирәклеге турында Указ чыгара. Ләкин аның төсләрне нәрсәдән чыгып сайлавы табышмак булып кала. Россия флагы төсләрен «Орел»ны төзегән голландияле тәкъдим иткән дигән сүзләр дә бар. Флагтагы һәр төс мәгънәгә ия. Ак төс – азатлык һәм мөстәкыйльлек, зәңгәр – ышаныч һәм рухият, ә кызыл төс исә – бөеклек һәм көч-куәт символы булып тора. Ул рәсми статуска 1896 елда гына ия була. Горур тибрәлгән ак, зәңгәр һәм кызыл төсләрдәге Россия Федерациясе Дәүләт флагы һәркемнең күңелендә Ватаныбыз өчен чиксез горурлык хисләре уятса иде!

22.08.2022

«ШАЯН Тиззарядка»!

Бүген «Калейдоскоп» балалар паркында «ШАЯН ТВ» каналы Казан Мэриясе белән берлектә «ШАЯН Тиззарядка» уздырды! Әлеге мастер-класс – «Хәрәкәттә – бәрәкәт» проектының чираттагы чарасы. «ШАЯН ТВ»ның алып баручылары белән бергә яраткан тамашачыларыбыз саф һавада, музыка астында кызыклы күнегүләр ясадылар. Күңелле флешмоблар, каналыбызның төп геройлары – Шаян һәм Мияу белән фотога төшү оештырылды. Иң актив кунакларга истәлекле бүләкләр өләштеләр. Чын җанлы аралашу хөкем сөрде. Бәйрәмгә килгән һәр кеше яхшы кәеф, көч-куәт, энергия алып кайтып китте!

19.08.2022

«ШАЯН Тиззарядка»да көтәбез!

Бүген, 19 август 17.00дә «Калейдоскоп» балалар паркында «ШАЯН Тиззарядка» узачак. Чараны Казан Мэриясе «ШАЯН ТВ» каналы белән берлектә уздыра. Сезне «ШАЯН ТВ» алып баручыларыннан саф һавада кызыклы күнегүләр, флешмоблар, каналыбызның төп геройлары – Шаян һәм Мияу белән фотога төшү, «ШАЯН ТВ»дан истәлекле бүләкләр, җанлы аралашу көтә. Яхшы кәеф, энергия аласыгыз килсә, безгә кушылыгыз! Күрешкәнгә кадәр! Чарага җыелу вакыты: 16.30, бәйрәмнең төп өлеше 17.00дә башлана.

19.08.2022

Татарстан педагогларының август киңәшмәсе

Бүген Яшел Үзәннең М.В.Ломоносов исемендәге 18 нче күппрофильле лицеенда Мәгариф һәм фән хезмәткәрләренең республика август киңәшмәсенең пленар утырышы узды. Киңәшмәнең төп темасы - «Цифрлаштыру чорында тәрбия һәм укыту: традицияләрне саклап, киләчәкне булдырабыз». Утырышта ТР Президенты Рөстәм Миңнеханов, ТР Премьер-министры Алексей Песошин, ТР Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин, РФ Дәүләт Думасы һәм ТР Дәүләт Советы депутатлары, мәктәп директорлары, педагогик җәмәгатьчелек вәкилләре катнашты. Әлеге чарада «ШАЯН ТВ» каналы да катнашты. Кунакларны мәгариф өлкәсенә караган проектлары белән таныштырды. «ШАЯН Әлифба» проекты мөгаллимнәр, тәрбиячеләр һәм әти-әниләр өчен дә зур ярдәмлек ролен үти, кече яшьтәге балаларга белем бирү, үзлектән өйрәнү өчен файдалы кулланма булып тора. Аны инде укытучылар актив рәвештә кулланалар. Проект белән shayantv.ru сайтында танышырга була. «Балачак җыры» җыентыкларына исә «Балачак җыры» халыкара балалар җыры бәйгесендә җиңүче исеменә лаеклы дип табылган җырларның текстлары һәм ноталары тупланды. Балалар әлеге китапка кертелгән җырларны өйрәнеп төрле бәйрәмнәрдә, кичәләрдә чыгыш ясый алалар. Ул татар җырларына мәхәббәте булган һәрбер кеше өчен файдалы булып тора.

19.08.2022

«Калеб» тапшыруында мәртәбәле кунак!

Бүген «ШАЯН ТВ» каналында чыгып килүче «Калеб» тапшыруында кунакта Россия кооперация университеты ректоры, ТР Дәүләт Советы депутаты, «Мәрхәмәт-Милосердие» Татарстан Дәүләт Советы хатын-кыз депутатлары оешмасы рәисе Алсу Рөстәм кызы Нәбиева булды. Бик җылы әңгәмә узды. «Калеб» тапшыруын һәр якшәмбе 19:10 сәгатьтә «ШАЯН ТВ» каналында күзәтеп барыгыз!

18.08.2022

«Болгар радиосы»ның чираттагы ВЕЛОЭСТАФЕТАСЫ!

Бүген «Болгар радиосы»ның чираттагы ВЕЛОЭСТАФЕТАСЫ! Казан-Болгар маршрутын алар велосипедта узалар! Ул иртәнге сәгать 05:00дә Казан Кремле буенда Муса Җәлил һәйкәленә чәчәкләр салудан һәм «Туган тел»не җырлаудан башланып китте. Чарадан «ШАЯН ТВ» каналы да читтә калмады. «Татарстан - Яңа Гасыр» телерадиокомпаниясенең генераль директоры Илшат Әминев белән бергә мәшһүр шагыйребезгә чәчәкләр куйдылар. «ШАЯН ТВ» хезмәткәрләренә көч-куәт, хәерле юллар теләп, аларны олы юлга озатты!

18.08.2022

1 ... 188 189 190 191 192 ... 376

Яңа сайт!