Яңалыклар

«Простоквашино»!

«ШАЯН ТВ» каналы яраткан тамашачыларын премьералары белән сөендерүен дәвам итә! Күпләребез балачактан яратып өлгергән «Простоквашино» мультсериалы бүгеннән эфирда! Дүшәмбедән-җомгага кадәр 07:55 һәм 15:55 сәгатьләрдә «ШАЯН ТВ» каналында карамый калма!

12.08.2022

«Watch Car лигасы. Чемпионнар ярышы» эфирда!

Киләчәк тормышта булачак уенчык машиналар югары ставкалы ярышларда көч сынаша. Әлеге турнирда катнашучыларга кыю, батыр йөрәкле Джино да үзенең акыллы дусты BlueWill белән кушылачак. Аларны трассада беренчелек өчен генә түгел, бөтен WatchCar лигасын саклап калу өчен дә көрәш көтә. Джино җиңү турында хыялланыр иде, әмма әлегә ул барлык ярышларда да тырышып катнаша һәм гади уенчы булып кына кала. Аның белән бергә тамашачылар WatchCar турнирларында катнашу мөмкинлеге бирә торган хыялга һәм дөньякүләм популярлыкка юл нинди тырышлыклар таләп итүен беләчәкләр. Киләчәкнең югары технологияләре, көндәшлек рухы һәм гап-гади геройларның уй-хисләре турында «Watch Car лигасы. Чемпионнар ярышы» мультсериалын карап беләчәксез! Дүшәмбедән-җомгага кадәр 11:30 һәм 19:30 сәгатьләрдә «ШАЯН ТВ» каналында кара!

11.08.2022

Җилләргә ияреп!

Дуслар, бүген җил көне билгеләп үтелә икән! Көннәр бик эссе тора. Мондый көннәрдә барыгыз да: «бераз гына булса да җил исеп үтсә иде», - дип телисездер, мөгаен. Шул уңайдан, җил турында матур шигырь белән дә танышып китик! Болытларны тарата җил, Сафландыра һаваны, Шуңа микән көн билгеләп Бәйрәм итәләр аны. Бер урында явар иде Яңгырлар да, кары да, Җил тарата бит аларны Төрле-төрле якларга. Җылы йомшак җилләр иссен, Иркәләсен чәчләрдән, Күңел күтәренке булсын, Шифа алыйк җилләрдән. Җилне файдага кулланыйк, Зыянкайлар салмасын, Афәт күрергә язмасын, Аллакаем сакласын! Фәймә Зәйнуллина

10.08.2022

ИГЪТИБАР, БӘЙГЕ!

Синең үзеңне телеэкраннарда күрәсең киләме? Димәк, «Бергәләп өйрәник» бәйгесе нәкъ синең өчен! «ШАЯН ТВ» каналы үзенең ВКонтакте битендә бәйге игълан итә! Кагыйдәләре бик гади! Конкурсның шартлары белән безнең ВКонтакте сайтында таныша аласыз! Кер, катнаш, үз бәхетеңне сынап кара! Унышлар сиңа, дустым!

10.08.2022

Бүген – Бөтендөнья китап яратучылар көне!

Бүген – Бөтендөнья китап яратучылар көне! Галимнәр фикеренчә, китаплар укып, баш миен гел эшләтеп торган очракта фикерләү сәләте арта. Бүгенге көндә китап укырга вакытыбыз юк, дибез. Алдагы фикерләр сезгә аз гына булса да вакытыгызны китап укуга багышларга ярдәм итәр. * Китап уку сүзлек байлыгын арттыра. Укыганда без, яңа сүзләр очратып, аларны үз сөйләмебездә куллана башлыйбыз. * Китап уку кешеләр белән аралашырга ярдәм итә. Күп укыган кеше дөрес, матур итеп сөйләргә өйрәнә. * Китап уку үз-үзеңә ышанычны арттыра. Әңгәмә барышында күп белүен сизгәндә кешенең үз-үзенә ышанычы арта. * Уку стрессны киметә. Ул тынычландыру үзлегенә ия. * Уку хәтерне һәм уйлау сәләтен яхшырта. Китап укыганда язылган фикерне аңлар өчен без баш миен эшләтәбез. * Китап уку альцгеймер авыруыннан саклый. Галимнәр фикеренчә, күп укыган кешедә бу чир сирәгрәк очрый. * Китап уку картаймаска ярдәм итә. Баш мие картайган саен кеше организмы тизрәк картая икән. * Китап уку иҗади шәхес булырга ярдәм итә. Китаплар илһам чыганагы булып тора. * Китап уку йокыны яхшырта. Йоклар алдыннан даими рәвештә китап укысагыз, яхшы гына йоклап китәчәксез.

09.08.2022

«Здравствуйте» тапшыруында кунакта!

Бүген «ШАЯН ТВ» каналының PR-бүлеге хезмәткәре Руслан Хафизов «ТНВ» каналында баручы «Здравствуйте» тапшыруында кунакта булып кайтты. Туры эфирда «Бәллүр каләм» – «Хрустальное перо» XXV журналистика һәм масса-медиа өлкәсендәге Республика бәйгесендә «ШАЯН ТВ» каналының «Популяр блогер» номинациясендә җиңүе хакында әңгәмә алыштылар.

09.08.2022

8 август - Бөтендөнья песиләр көне!

Дуслар, ә сез песиләр яратасызмы? Юкка гына сорау түгел, чөнки бүген – песиләр көне билгеләп үтелә! Хәер, кем генә яратмый икән аларны?! Йомшак кына сырпаланып, мыраулап йөргән шул дүрт тәпиле дусларга битараф калып булмый торгандыр. Песиләр гасырлар буена иң киң таралган йорт хайваннары булган. Беренче урында – песиләр, икенче урында исә этләр тора. Галимнәр фикеренчә, өйдә песи тотучы кешеләрдә йөрәк авырулары, инфаркт һәм инсульт 40%ка азрак килеп чыга икән. Песиләр, чыннан да, безнең сәламәтлек өчен бик файдалы. Алар стрессны киметергә һәм йокысызлыктан арынырга да ярдәм итә. Моннан тыш, бу җан ияләре өйне күсе һәм тычканнар саклый. Шул рәвешле, алар йорт хуҗалары өчен алыштыргысыз ярдәмче ролен дә үтиләр. Бөтендөнья песи көне, Белә идегез микән? Гаҗәпкә калып эзләндем, Чыннан да бәйрәм икән. Бөтен дөньяга таралган Бу йорт хайваны даны, Балалар да уйнатырга Бик яраталар аны. Кешеләр үз песиләрен Өйләрендә тоталар. Кимерүчеләрне тотып, Файда китерә алар. Ашаганнан соң песиләр Битен әйбәтләп сөртә. Алар шулай һәрвакытта Үзен бик чиста йөртә. Песи асраган кеше Мәрхәмәтсез булалмый, Песиләрне яратканнар Бәйрәм ясамый калмый. Менә шулай! Песиләрне Яхшы сыйлагыз бүген, Бәйрәм икәнен сизсеннәр, Шаяртып әйтү түгел! Фәймә Зайнуллина

08.08.2022

«Петя белән Бүре маҗаралары»!

«ШАЯН ТВ» каналы нәни дусларын премьералары белән сөендерүен дәвам итә! Мәктәп укучысы Петя һәм аның дусты Бүре тамашачыларны әкият дөньясына чакыра! Малай тылсымлы геройларга гадәти булмаган мәшәкатьләрен хәл итәргә ярдәм итә. Болар һәм тагын бик күп маҗаралар өр-яңа «Петя белән Бүре маҗаралары» мультсериалында! Дүшәмбедән алып җомгага кадәр 08:55 һәм 16:55 сәгатьләрдә «ШАЯН ТВ» каналында карарга ашыгыгыз! Шулай ук 09:45 һәм 17:45 сәгатьләрдә «Кыргый океан серләре» дип аталган яңа документаль фильмны да карамый калма!

08.08.2022

1 ... 190 191 192 193 194 ... 376

Яңа сайт!