Яңалыклар

Иң эссе җәй көтелә

2024 елның җәе тарихта иң эссе җәй булырга мөмкин, ди белгечләр. Фаразлар буенча, июньнән августка кадәр һаваның уртача температурасы +25, +27 градус тәшкил итәчәк (норма +22). Ә уртача максималь температура 35 градустан да югарырак булырга мөмкин. Бу нормадан 5 градуска күбрәк. Моннан тыш, синоптиклар кисәткәнчә, җәйге чорда һава массаларының хәрәкәте киң җылылык циклоннары барлыкка килүгә ярдәм итәчәк, бу үз чиратында югары дымлылыкка китерәчәк һәм көчле яңгырлар, яшен һәм давыллар ихтималлыгын арттырачак. Метеорологлар аңлатуынча, 2024 елның җәендә рекордлы югары температура фоны Эль-Ниньо кебек табигый күренеш нәтиҗәсе булачак. Эль-Ниньо яки Көньяк осцилляция - Тын океанның экваториаль өлешендә су температурасының үзгәрүе, бу климатка тәэсир итә ала. Бу күренеш бөтен планетада эсселек һәм корылык кебек җитди һава торышы аномалияләрен китереп чыгара. Шул ук вакытта Эль-Ниньо чоры 8 елга кадәр дәвам итәргә мөмкин, әмма галимнәр аның күпме дәвам итүен һәм көчен әлегә төгәл әйтә алмый.

27.02.2024

Ак аю чынлыкта кара төстә?

Ак аю – эре ерткыч җанвар, безнең якларда яшәүче көрән аюның туганы. Алар моннан якынча 130 мең ел элек барлыкка килгән. Борынгы заманнарда ак аюларның бик зур гәүдәлеләре дә булган. Ләкин алар, азык җитмәү сәбәпле, юкка чыккан. Бу хайваннарны саклау максатында Халыкара ак аюлар көне булдырылган. Ел саен ул 27 февральдә билгеләнә. * Россиядә 5-6 мең тирәсе ак аю яши. * Ак аюлар чынлыкта ак түгел, ә төссез. Аларның йоннары куш, ә тән тиресе кара төстә. * Кышын поляр аюлар материкта яки утрауларда кар көрте эченә ясалган өннәрендә көн күрә. * Әни аюлар кыска вакытлы кышкы йокыга талырга мөмкин. Ә әти аюлар алай йокламый. * Бу ерткыч бик яхшы күрә һәм ишетә, исне дә яхшы тоя. Табышын берничә километрдан сизеп алырга сәләтле. Фото: Яндекс * Ак аю 7-10 көн ризык таба алмый йөрсә, гәүдәсендәге май хисабына яши башлый. * Бу хайваннарның тән тиресе астындагы май катламы 13 сантиметрга кадәр җитә. Шунлыктан, алар өшеми. * Антарктида һәм Австралиядә ак аюлар беркайчан да яшәмәгән, алар Арктикада яши. * Тюлень, морж һ.б. диңгез хайваннары белән туклана. * Шунысы да кызык, ак аю су эчми, ул аны табышы белән тукланганда ала. * Ау вакытында кап-кара борынын яшерү өчен, ак аю аны уң кулы белән каплап тора икән.

27.02.2024

Узма, көн, үтми тор!

Белә идегезме, дуслар, бүген бәйрәм бит! Аны гамәлгә ашыруны итальяннар уйлап тапкан һәм ул 2007 елдан башлап билгеләнә. Нинди бәйрәм, дисезме? Шәп бәйрәм – Ашыкмау көне! Ул тормышның һәр мизгеле белән ашыкмыйча соклана белү, һәр көннең кадерен белеп яшәү максаты белән оештырылган. * Әлеге бәйрәмне уйлап табучы итальян халкы актив, хәрәкәтчән һәм хисле халык буларак билгеле. Нәкъ менә алар тормышның һәр мизгелен тоеп һәм аннан тәм табып яшәүне пропагандалау өчен 2007 елда беренче тапкыр ашыкмаучанлык көне үткәрәләр. * Күп кешенең көне эштә яисә укуда утырып үтә. Ә бу кешенең физик һәм эчке дөньясы өчен бик үк файдалы түгел. Бу көнне игълан итүчеләр 14 кагыйдә уйлап тапканнар. * Шулар арасында иртә белән иртәрәк тору дигәне дә бар. Бу иртәнге ашка вакыт калсын өчен, барасы җиргә ашыкмыйча гына барыр өчен, яки берәр матур китап укырга, музыка тыңларга вакыт калсын өчен кирәк. * Итальяннар бу көнне кызыклы гына чаралар да уздыра. Мәсәлән, “Әкрен марафон”. Бу 300 метр араны тукталмыйча 87 минутта үтү дигән сүз. * Ә Миланда бу көнне артык ашыгучыларга штраф сугалар. Әлбәттә символик рәвештә. * Шулай ук бу көнне бүтән вакытта өлгермәгән эшләрне башкару гадәткә кергән – концерт-музейларга бару, беркая да ашыкмыйча гына чәй эчеп әңгәмә корып утыру. * Бу кызыклы бәйрәмне Лондон, Париж, Нью-Йорк кебек башка зур шәһәрләр дә кабул иткән. Чөнки аның мәгънәсе бик гади һәм дөрес – тормыш ул кичә яки иртәгә түгел, ә нәкъ менә бүген, һәм бүген яшәп калырга кирәк. Чыннан да, безгә барысын да тиз эшләргә, аз вакыт эчендә күп өлгерергә кирәк, шулаймы? Ләкин кайчакта булса да туктап, тирә-якка күз сала белергә дә кирәк. Әйдәгез, бүген шулай итәбез! Тирә-юньгә күз салып, кыш белән хозурланып алыгыз, соңгы көннәре бит!

26.02.2024

Бер көндә 2 концерт

«Балачак җыры» концертлар циклының чираттагы концерты да шау-гөр килеп узып китте! Бүген исә тамаша Казанның 181 нче күппрофильле мәктәбе укучылары өчен куелды. Бер көндә 2 концерт! Бәйрәм шаяру-көлүләр, җанлы аралашу, күңелле уен һәм викториналар һәм, әлбәттә, «ШАЯН ТВ» беренче татар балалар каналыннан истәлекле бүләкләр белән үрелеп барды. Сәхнәне «Сәйлән» музыкаль фестиваленең сәләтле артистларының чыгышлары бизәде. Чарада мәртәбәле кунаклар да катнашты. Алар арасында Казан шәһәре Вахитов районының «Күпмилләтле якшәмбе мәктәбе» мәгариф үзәге муниципаль бюджет өстәмә белем бирү учреждениесе директоры, Казан шәһәренең «Сиони» грузин милли-мәдәни мохтарияте» җирле иҗтимагый оешмасы идарәсе рәисе Маринэ Мануил кызы Хухунашвили да бар иде. Гадәттәгечә, укучылар белән очрашудан курчакларыбыз - Шаян белән Мияу да калмады! Алар кунакларны каршы алды, фотога төште һәм үзләренең шәп кәефләре белән уртаклашты! Тамашачылар талантлы балаларның күңелле музыкаль чыгышларыннан күтәренке рух алдылар һәм үзләренең рәхмәт сүзләрен җиткерделәр!

26.02.2024

Дилә Нигъмәтуллина яңалыклары белән уртаклашты

Махсус YouTube өчен эшләнгән проект - «Килде-Китте ШОУ»ның яңа чыгарылышы «ШАЯН ТВ»ның YouTube каналында! Студия кунагы - татар эстрадасының популяр артисты Дилә Нигъмәтуллина. Җырчы Лейна белән конфликты, яңа «поклонник»лары, образын алыштыруы һәм башка яңалыклары хакында сөйли. Сылтама буенча узыгыз һәм рәхәтләнеп карагыз!

26.02.2024

«ШАЯН ТВ» алып баручылары «Манзара» тапшыруында

«ШАЯН ТВ» каналы Мәскәүдә «Россия» Халыкара күргәзмә-форумында булып кайтты. Шул уңайдан иртәгә, 23 февраль көнне иртәнге 6:00 сәгатьтә «Татарстан-Яңа Гасыр» каналында «Манзара» тапшыруын карагыз! Студия кунаклары – «ШАЯН ТВ» каналының алып баручылары Мәликә Хәйрулла һәм Алимә булачак. Эфирда алар Мәскәүгә сәяхәтләре, «ШАЯН ТВ» каналының ирешкән уңышлары һәм күргәзмәдә тәкъдим ителгән проектлар хакында сөйләячәкләр. Карамый калмагыз!

22.02.2024

«ШАЯН ТВ» каналы бер капчык бүләк уйната

«ШАЯН ТВ» каналы бер капчык бүләк уйната! Бәхетеңне сынап карарга ашык! Шартлары бик гади! Кер һәм катнаш! Бәйгенең кагыйдәләре белән танышу өчен сылтама буенча «ШАЯН ТВ»ның ВКонтакте төркеменә уз. Җиңүче 1 март көнне билгеле булачак!

22.02.2024

«ШАЯН ТВ» каналы «Балачак җыры» концертлар циклына старт бирә

«ШАЯН ТВ» каналы «Балачак җыры» концертлар циклына старт бирә! Тагын да күбрәк өр-яңа балалар өчен җырлар, талантлы башкаручылар белән бергә сәфәргә чыга! Бүгенге концерт Казанның аерым фәннәрне тирәнтен өйрәнүле 171 мәктәбендә узды. Тамашачыларга бер көндә ике концерт куелды! Гадәттәгечә, тамашачыларыбыз бик җылы итеп каршы алдылар һәм кайнар алкышларга күмделәр. Концертны карарга башкаланың мәктәп-гимназия укучылары җыелды. «Сәйлән» фестивале йолдызлары исә «Балачак җыры» бәйгесенең популяр хитларын башкарып, тамашачыларның күңелен яуладылар. «ШАЯН ТВ» каналының төп геройлары да балаларны сөендерде: шаярдылар, көлделәр, фотога төштеләр, иң активларга бүләкләр өләштеләр. Бер сулышта узды әлеге бәйрәм! Күтәренке кәеф, шаяру-көлүләр белән югары үтте! Тамашачыларыбыз да канәгать калды! Исегезгә төшерәбез, әлеге чаралар Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә оештырыла.

21.02.2024

1 ... 93 94 95 96 97 ... 375

Яңа сайт!