Яңалыклар

«Бәллүр каләм» – «Хрустальное перо» XXV БЕЗНЕКЕ!

Бүген Казанда, «Пирамида» күңел ачу үзәгендә «Бәллүр каләм» – «Хрустальное перо» XXV журналистика һәм масса-медиа өлкәсендәге Республика бәйгесе лауреатларын бүләкләү тантанасы узды! Бирегә иң тәҗрибәле, профессиональ һәм танылган каләм осталары җыелды. Безнең дә зур сөенечебез бар! «ШАЯН ТВ»ның чираттагы уңышы! Бәйгедә «ШАЯН ТВ» каналы «ПОПУЛЯР БЛОГЕР» номинациясендә җиңү яулады! Ихлас йөрәктән котлыйбыз һәм чиксез горурланабыз! Алга таба да яңадан-яңа иҗат уңышлары, бетмәс илһам чыганагы, бөек үрләр телибез! Каналыбыз яшь буын журналистларны үстерү, белем бирү һәм тәрбияләү мәйданы булып тора! Бу безнең уртак җиңүебез! Сез, яраткан тамашачыларыбыз булганда гына, без көчле!

05.08.2022

Светофор көне!

Шәһәр урамнарын светофордан башка күз алдына китерү дә кыен. Алар, беренче чиратта, безнең куркынычсызлыгыбыз өчен кирәк. Бүген - 5 августта Халыкара светофор көне дә билгеләп үтелә. Иң беренче светофорлар 1914 елның 5 августында Американың Кливленд шәһәрендә уйлап табылган. Ул кызыл һәм яшел төстәге яктырткычлардан торган. Утын сүндереп яндырган вакытта сигнал биргән. Бүгенге көндәге өч төстәге светофорлар 1920 елда Американың Детройт һәм Нью-Йорк шәһәрләрендә барлыкка килгән. Аны британияле Джей Найт уйлап тапкан. Әмма Россиядә светофор 1930 елда гына кулланылышка кергән. Светофорның өч күзе Урамнарны күзәтеп, Узганнарны кисәтеп, Чатта тора светофор, Сакта тора светофор. Янып тора өч күзе, Күреп тора ич безне, Әйтеп тора өч сүзне: -Кузгалма! – ди Кызыл күз. -Сабыр! – дия Сары күз. -Ярый! – дия Яшел күз. Без дә аңа карыйбыз, Күзебезне алмыйбыз, Ни әйткәнен аңлыйбыз: -Кузгалма! – ди Кызыл күз. -Сабыр! – дия Сары күз. -Ярый! – дия Яшел күз. Ш. Галиев.

05.08.2022

«ТАТАР СҮЗЕ» бәйгесендә катнашырга өлгер!

Дуслар! Сез әле катнашырга өлгерәсез! «ТАТАР СҮЗЕ» өченче Халыкара нәфис сүз телевизион бәйгесенә гаризалар кабул итү дәвам итә! Ашыгыгыз! Премиаль фонд 1000 000 сум. Бу мөмкинлекне кулыгыздан ычкындырмагыз! Чыгышлар проза һәм шигърият номинацияләрендә бәяләнә. Конкурста катнашу өчен видео форматындагы эшне һәм анкетаны ике дәүләт телендә [email protected] рәсми почтасына җибәрергә кирәк. Гаризалар 2022 елның 31 октябренә кадәр кабул ителә. Тулырак мәгълүмат shayantv.ru һәм tnv.ru сайтларында.

04.08.2022

Җиһанда җәйнең соңгы ае – август!

Җәйнең төпчек кызы – августка да аяк бастык! Юкка гына борынгылар: «Августта төшкә кадәр - җәй, төштән соң - көз», - дип әйтмиләр. Ни дисәң дә, җәйнең ахырга таба барганы үзен сиздерә башлады. Әйдәгез әле, дуслар, август аена булган сынамышларга күз салып, көзнең, кышның ничек киләсен чамалап карыйк! * Августның беренче атнасында тотрыклы һава торышы сакланса, кыш озын һәм карлы булыр. * Августта торналар төркем-төркем булып, җылы якка китсә, кыш иртә килер. * Томан озак таралмый торса - аяз көнгә. * Август яңгырсыз килсә, җылы һәм коры көзгә. * Августта бәс төшсә, иртә кышка ишарә. * Августта берничә тапкыр яшен булса, көз озак булыр. * Каенда сары яфраклар күп булса, көз иртә килер. * Җылы, яңгырлы август - гөмбә уңышына. * Имән чикләвеге күп булса, җылы кышка, мул уңышка. * Кырмыскалар күчләрен зурайтсалар- иртә һәм суык кышка. * Йолдызлар аз булса - яңгырга. * Августта су суыныр, урак кызар. * Очучы үрмәкүчләр күбәйсә, уңыш аз булыр. * Ябалак кычкырса - суыкка.

03.08.2022

Карбыз көне!

Җәйнең иң тәмле чоры – карбыз өлгергән чор, дуслар! Бүген әле карбыз көне дә билгеләп үтелә икән! Хәзерге вакытта дөньяның 96 илендә карбызның 1200дән артык төре үстерелә. Галимнәр фикеренчә, аның туган ягы булып Көньяк Африка санала. Х гасырда ул кытайлар арасында да тарала һәм бик кадерле сыйга әйләнә. Бүгенге көндә дә Кытай карбыз үстерү буенча беренче урында тора. Аннан зур аерма белән Төркия, Иран, Египет, Америка илләре, Россия һәм Үзбәкстан бара. Карбызда 90% артык су бар. Ул А, В һәм С витаминнарының чыганагы булып тора.Сусауны басуы өстенә, карбыз калориясез ризык та. Бу көнне туйганчы карбыз ашый торган көн дип кабул итәргә кирәк. Хәзер инде карбыз белән берәүне дә шаккатырып булмый. Күп кеше аны үз бакчасында да үстерә. Әлеге көнне, әлбәттә, табигать кочагында ял итеп һәм бик күп карбыз ашап үткәрик әле, дуслар! Файдалы да, тәмле дә әлеге ризыкны ашап, җәебезне тагын да ямьлерәк итик!

03.08.2022

Бөтендөнья татар конгрессының VIII съездының пленар утырышы

Бүген «Казан Экспо» Халыкара күргәзмә үзәгендә Татарстан Республикасы Президенты Рөстәм Нургали улы Миңнеханов катнашында Бөтендөнья татар конгрессының VIII съездының пленар утырышы узды. Чарада шулай ук Татарстан Республикасы Дәүләт Киңәшчесе, Татарстан Республикасының беренче Президенты Минтимер Шәрип улы Шәймиев һәм башка мөхтәрәм кунаклар катнашты. Пленар утырыш башланыр алдыннан алар Бөтендөнья татар конгрессының 30 еллыгына багышланган күргәзмә белән таныштылар. «ШАЯН ТВ» каналы бүген дә биредә Президентыбыз белән очрашуда булды, чит төбәкләрдән килгән кунаклар белән аралашты, истәлеккә фотога төште, шулай ук килгән кунакларга бүләкләр өләште.

02.08.2022

Бөтендөнья татар конгрессының VIII корылтае

30 нчы июльдән 2 нче августка кадәр Казанда Бөтендөнья татар конгрессының VIII корылтае уза. Казанга Россиянең 80 төбәгеннән һәм 37 чит илдән 1500 делегат һәм кунак чакырулы. Бүген исә «Казан Экспо» Халыкара күргәзмә үзәгендә корылтайның ачылу тантанасы, һәм Милли Шура утырышы үтте. Биредә 7 дискуссия мәйданчыгы эшләде. Делегатлар һәм мәртәбәле кунаклар съездның рәсми ачылышында катнаштылар. Шулай ук Бөтендөнья татар конгрессының 30 еллык тарихына багышланган күргәзмә дә эшләде. Күргәзмәдә оешманың тарихы, 30 ел дәвамында алып барган эшчәнлеге белән танышырга мөмкин иде. Анда төрле чорга караган фоторәсемнәр, документлар, татар халкының милли уен кораллары, киемнәре, зәркан эшләнмәләре тәкъдим ителде. Бу тарихи вакыйгада «ШАЯН ТВ» да катнашты. Чарада оештырылган түгәрәк өстәлдә массакүләм мәгълүмат чаралары үзләренең тәҗрибәләре, ирешкән уңышлары, нәтиҗәләре белән уртаклаштылар. Каналыбызның башкарма директоры - баш мөхәррире Сәхабетдинова Рамилә Әхмәтзакир кызы «ШАЯН ТВ» белән якыннанрак таныштырды, проектларыбыз, эшчәнлегебез турында тулырак сөйләп чыгыш ясады.

01.08.2022

«Сәйлән» проектының ДҮРТЕНЧЕ сезонының ярымфиналистлары билгеле!

Тамашачы мәхәббәтен яулап алган «Сәйлән» телевизион җыр фестиваленең ДҮРТЕНЧЕ сезонының ярымфиналистлары билгеле! Меңләгән гариза арасыннан профессиональ жюри 16 катнашучыны чираттагы этапка сайлап алды. Менә ул бәхетлеләр исемлеге: 1) Асылхуҗина Асылъяр Маратовна (Әлмәт) 2) Галиуллин Сәет Айратович (Казан) 3) Гатауллина Ләйлә Рафисовна (Әлмәт) 4) Гимадеева Сафира Илнуровна (Чистай) 5) Егорова Стелла Валерьевна (Биектау) 6) Ишалина Адилә Рамиловна (Яр Чаллы) 7) Камалов Самир Илнарович (Чистай) 8) Михайлов Кирилл Александрович (Казан) 9) Мортазина Әминә Тәүфиковна (Казан) 10) Пугачев Иван Емельянович (Казан) 11) Хәбибуллина Динә Ренатовна (Казан) 12) Харисов Илназ Илнурович (Яр Чаллы) 13) Хисамова Язилә Ниязовна (Яр Чаллы) 14) Хөсәенов Рөстәм Рәхимҗанович (Казан) 15) Чеботарева Элина Витальевна (Казан) 16) Шакирова Зәлинә Илгизовна (Яр Чаллы) Бу катнашучыларыбызны бүгеннән үк җиңүчеләр дип атарга мөмкин булыр иде, ләкин алар өчен әле барысы да башлана гына! Алда кабат сайлап алу этаплары, вокал, актерлык осталыгы, сәхнә образы буенча төрле кызыклы остаханәләр һәм зур телевизион сәхнәдә онытылмаслык мизгелләр көтә! Әлеге 16 финалист мәртәбәле беренче урын өчен көч сынашачак. Бик тиздән, бу көздә үк сез аларны экраннарда күрә алачаксыз!

01.08.2022

1 ... 191 192 193 194 195 ... 376

Яңа сайт!