Яңалыклар

«Печән базары»!

Бүген Иске Татар бистәсендә - Казанның нәкъ үзәгендә - «Печән базары» узды. «ШАЯН ТВ» каналы да тугры тамашачыларын үз мәйданчыгы астына җыйды. Нәни дусларыбыз өчен бик күп кызыклы остаханәләр, күңелле уеннар уздырылды. Хезмәткәрләребез Мәликә белән Ләйсән искиткеч җайлы кул эшләнмәләре ясарга өйрәтте. Шулай ук килгән кунаклар белән истәлеккә фотога төшү оештырылды, «ШАЯН ТВ» каналы истәлекле бүләкләр дә өләште. Гаҗәеп бәйрәм булды!

30.07.2022

«Эра талантов»

Россия халыкларының халык сәнгате һәм матди булмаган мәдәни мирас елына багышланган чараларны тормышка ашыру кысаларында Татарстанда региональ халык этномузыкаль җыр мирасын саклап калуга һәм популярлаштыруга юнәлдерелгән күп кенә чаралар үткәрелә. Мондый проектларның берсе - «Талантлар эрасы». Бәйге Халыкара балалар һәм яшүсмерләрнең халык җырлары башкару фестивале булып тора. Фестиваль 2 турда уза һәм бөтен Россиядән һәм БДБ илләреннән халык җырлары жанрында эшләүче иҗат коллективларын җыя. Беренче тур кысаларында жюри видеоязмалар буенча 60 коллективны икенче турга сайлап алачак. Әлеге катнашучылар 2022 елның 11 ноябрендә Халыклар бердәмлеге көненә багышланган чаралар кысаларында Казанда узачак фестивальнең финалына чакырылачак. Фестиваль түбәндәге номинацияләрдә үткәрелә: халык җыры, фольклор, халык стилизациясе, вокаль-инструменталь ансамбле (халык уен кораллары), халык җырына видеоклип. Фестивальдә катнашу түләүсез. 1 турда катнашу өчен гаризаны 2022 елның 1 сентябренә кадәр сайтта бирергә мөмкин. Фестивальнең нигезләмәсе һәм тулырак мәгълүмат белән eratalantov.ru сайтында танышырга була. Мондый чарадан читтә калмагыз! Катнашырга ашыгыгыз!

29.07.2022

Юлбарыслар көне!

Бүген Халыкара юлбарыслар көне билгеләп үтелә икән! Шул уңайдан, бу җәнлек белән күбрәк танышып китик! * Юлбарыс тәнендәге кара сырлар йонында гына түгел, ә тиресендә дә бар. Әгәр юлбарысның йонын алсаң, вакытлар узу белән, ул тагын шундый ук булып үсәчәк. * Юлбарысның кара сырлары уникаль булып тора, ул аларның һәрберсенә үзенә генә хас. * Аларның иң актив вакыты – иртә һәм кич белән. Көндез алар күбрәк ял итә. * Юлбарыслар судан курыкмый һәм бик яхшы йөзә. * Төнлә әлеге җәнлек начар күрә, гәрчә аларның күзләре кешенекенә караганда алты тапкыр яхшырак булса да. * Юлбарыс 6 метрга кадәр озынлыкка сикерә ала, ә биеклеккә сикерүе 5 метрга җитә. * Алар үз корбаннарына арттан һөҗүм итүне өстен күрәләр, чөнки болай иткәндә алар кача алмыйлар. * Иттән кала юлбарыс үсемлек һәм җиләк-җимеш белән дә туклана. * Аның гомер озынлыгы уртача 26 ел.

29.07.2022

«Сәләт» Мәгълүмати технологияләр Биләр Форумында!

Кичә «ШАЯН ТВ» каналының башкарма директоры - баш мөхәррире Сәхабетдинова Рамилә Әхмәтзакир кызы «Сәләт» Мәгълүмати технологияләр Биләр Форумында Татарстан Республикасы Президенты Рөстәм Нургали улы Миңнеханов белән түгәрәк өстәлдә булып кайтты. «Сәләт» форумы татар телен һәм милли гореф-гадәтләрне саклауда мөһим урын алып тора. Сезгә - киләчәк буынга - халкыбызның көчен саклап калырга һәм әйдәп барырга туры киләчәк. Сез - безнең таянычыбыз, һәм без сезгә ышанабыз!», - дип ассызыклады Рөстәм Миңнеханов. Әңгәмә барышында Президентыбыз «ШАЯН ТВ» каналының яшьләр оешмалары белән хезмәттәшлеген хуплады һәм каналның югары эшчәнлеген дә исәпкә алды.

29.07.2022

«ШАЯН ТВ» каналы «Печән базары»на чакыра!

«ШАЯН ТВ» каналы сезне 30 июль көнне сәгать 15:00дән 17:00 сәгатькә кадәр Иске Татар бистәсендә узачак «Печән базары» фестиваленә чакыра! Сезне яраткан алып баручыларыгыздан бик күп кызыклы остаханәләр, күңелле уеннар көтә! Килегез, кушылыгыз, без сезне көтеп калабыз!

28.07.2022

Үзеңне тикшер!

Дуслар, берничә көн элек без сезгә яшелчә һәм җиләк-җимешләр турында табышмаклар чишәргә тәкъдим иткән идек. Бүген шуларның җаваплары белән уртаклашабыз. Белдегезме икән? Үзегезне тикшереп карагыз әле! Алсу битле кыз үсте, Кызарып җиргә төште. (Алма) *** Түгәрәк-түгәрәк шар кебек, Кызыл-кызыл кан кебек; Әчедер дә татлыдыр, Йотыйм дисәң ташлыдыр. (Чия) *** Өе яшелгә буялган, эчендә кызыл чаршау. (Карбыз) *** Иелә, бөгелә, ак мамыгы түгелә, кара күзе күренә. (Шомырт) *** Кызыл төймә таптым, Авызыма каптым. (Җир җиләге) *** Озын, яшел – түтәлдә, Сары, тозлы – кисмәктә. (Кыяр) *** Үзе йомры – ай түгел, Төсе сары – май түгел, Койрыклы тычкан түгел. (Шалкан) *** Ашка салсаң, тәм кертә, Борынга керсә, төчкертә. (Борыч)

28.07.2022

«ТАТАР СҮЗЕ» бәйгесендә катнашырга ашык!

Исегезгә төшерәбез, Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «Татарстан - Яңа Гасыр» телерадиокомпаниясе үткәрә торган «ТАТАР СҮЗЕ» өченче Халыкара нәфис сүз телевизион бәйгесенә гаризалар кабул итү дәвам итә! Ашыгыгыз! Премиаль фонд 1000 000 сум. Чыгышлар проза һәм шигърият номинацияләрендә бәяләнә. Бәйгедә шулай ук профессионаллар, үз шигырен, әсәрен сөйләүчеләр, иҗади гаиләләр дә катнаша ала. Конкурста катнашу өчен видео форматындагы эшне һәм анкетаны ике дәүләт телендә [email protected] рәсми почтасына җибәрергә кирәк. Гаризалар 2022 елның 31 октябренә кадәр кабул ителә. Тулырак мәгълүмат shayantv.ru һәм tnv.ru сайтларында. Милләтебезнең йөзен билгеләүче мондый чарадан читтә калмагыз!

27.07.2022

Уңышлы көннәр, Шаяннар!

Уңышлы көннәр, Шаяннар! Ә сез татарча нинди мактау сүзләре беләсез? Тирә-юнегезне матурлык белән тутырыгыз, ямьсезлек керер урын тапмасын! Табигатьтә хакимлек итүче ямьле җәй көннәре күңелләребезгә яктылык, җылылык, алдагы көннәргә өмет-ышаныч бүләк итсен!

27.07.2022

1 ... 192 193 194 195 196 ... 376

Яңа сайт!