Яңалыклар

ИГЪТИБАР, БӘЙГЕ!

Синең үзеңне телеэкраннарда күрәсең киләме? Димәк, «Бергәләп өйрәник» бәйгесе нәкъ синең өчен! «ШАЯН ТВ» каналы үзенең ВКонтакте битендә бәйге игълан итә! Кагыйдәләре бик гади! Конкурсның шартлары белән безнең ВКонтакте сайтында таныша аласыз! Кер, катнаш, үз бәхетеңне сынап кара! Унышлар сиңа, дустым!

10.08.2022

Бүген – Бөтендөнья китап яратучылар көне!

Бүген – Бөтендөнья китап яратучылар көне! Галимнәр фикеренчә, китаплар укып, баш миен гел эшләтеп торган очракта фикерләү сәләте арта. Бүгенге көндә китап укырга вакытыбыз юк, дибез. Алдагы фикерләр сезгә аз гына булса да вакытыгызны китап укуга багышларга ярдәм итәр. * Китап уку сүзлек байлыгын арттыра. Укыганда без, яңа сүзләр очратып, аларны үз сөйләмебездә куллана башлыйбыз. * Китап уку кешеләр белән аралашырга ярдәм итә. Күп укыган кеше дөрес, матур итеп сөйләргә өйрәнә. * Китап уку үз-үзеңә ышанычны арттыра. Әңгәмә барышында күп белүен сизгәндә кешенең үз-үзенә ышанычы арта. * Уку стрессны киметә. Ул тынычландыру үзлегенә ия. * Уку хәтерне һәм уйлау сәләтен яхшырта. Китап укыганда язылган фикерне аңлар өчен без баш миен эшләтәбез. * Китап уку альцгеймер авыруыннан саклый. Галимнәр фикеренчә, күп укыган кешедә бу чир сирәгрәк очрый. * Китап уку картаймаска ярдәм итә. Баш мие картайган саен кеше организмы тизрәк картая икән. * Китап уку иҗади шәхес булырга ярдәм итә. Китаплар илһам чыганагы булып тора. * Китап уку йокыны яхшырта. Йоклар алдыннан даими рәвештә китап укысагыз, яхшы гына йоклап китәчәксез.

09.08.2022

«Здравствуйте» тапшыруында кунакта!

Бүген «ШАЯН ТВ» каналының PR-бүлеге хезмәткәре Руслан Хафизов «ТНВ» каналында баручы «Здравствуйте» тапшыруында кунакта булып кайтты. Туры эфирда «Бәллүр каләм» – «Хрустальное перо» XXV журналистика һәм масса-медиа өлкәсендәге Республика бәйгесендә «ШАЯН ТВ» каналының «Популяр блогер» номинациясендә җиңүе хакында әңгәмә алыштылар.

09.08.2022

8 август - Бөтендөнья песиләр көне!

Дуслар, ә сез песиләр яратасызмы? Юкка гына сорау түгел, чөнки бүген – песиләр көне билгеләп үтелә! Хәер, кем генә яратмый икән аларны?! Йомшак кына сырпаланып, мыраулап йөргән шул дүрт тәпиле дусларга битараф калып булмый торгандыр. Песиләр гасырлар буена иң киң таралган йорт хайваннары булган. Беренче урында – песиләр, икенче урында исә этләр тора. Галимнәр фикеренчә, өйдә песи тотучы кешеләрдә йөрәк авырулары, инфаркт һәм инсульт 40%ка азрак килеп чыга икән. Песиләр, чыннан да, безнең сәламәтлек өчен бик файдалы. Алар стрессны киметергә һәм йокысызлыктан арынырга да ярдәм итә. Моннан тыш, бу җан ияләре өйне күсе һәм тычканнар саклый. Шул рәвешле, алар йорт хуҗалары өчен алыштыргысыз ярдәмче ролен дә үтиләр. Бөтендөнья песи көне, Белә идегез микән? Гаҗәпкә калып эзләндем, Чыннан да бәйрәм икән. Бөтен дөньяга таралган Бу йорт хайваны даны, Балалар да уйнатырга Бик яраталар аны. Кешеләр үз песиләрен Өйләрендә тоталар. Кимерүчеләрне тотып, Файда китерә алар. Ашаганнан соң песиләр Битен әйбәтләп сөртә. Алар шулай һәрвакытта Үзен бик чиста йөртә. Песи асраган кеше Мәрхәмәтсез булалмый, Песиләрне яратканнар Бәйрәм ясамый калмый. Менә шулай! Песиләрне Яхшы сыйлагыз бүген, Бәйрәм икәнен сизсеннәр, Шаяртып әйтү түгел! Фәймә Зайнуллина

08.08.2022

«Петя белән Бүре маҗаралары»!

«ШАЯН ТВ» каналы нәни дусларын премьералары белән сөендерүен дәвам итә! Мәктәп укучысы Петя һәм аның дусты Бүре тамашачыларны әкият дөньясына чакыра! Малай тылсымлы геройларга гадәти булмаган мәшәкатьләрен хәл итәргә ярдәм итә. Болар һәм тагын бик күп маҗаралар өр-яңа «Петя белән Бүре маҗаралары» мультсериалында! Дүшәмбедән алып җомгага кадәр 08:55 һәм 16:55 сәгатьләрдә «ШАЯН ТВ» каналында карарга ашыгыгыз! Шулай ук 09:45 һәм 17:45 сәгатьләрдә «Кыргый океан серләре» дип аталган яңа документаль фильмны да карамый калма!

08.08.2022

«Бәллүр каләм» – «Хрустальное перо» XXV БЕЗНЕКЕ!

Бүген Казанда, «Пирамида» күңел ачу үзәгендә «Бәллүр каләм» – «Хрустальное перо» XXV журналистика һәм масса-медиа өлкәсендәге Республика бәйгесе лауреатларын бүләкләү тантанасы узды! Бирегә иң тәҗрибәле, профессиональ һәм танылган каләм осталары җыелды. Безнең дә зур сөенечебез бар! «ШАЯН ТВ»ның чираттагы уңышы! Бәйгедә «ШАЯН ТВ» каналы «ПОПУЛЯР БЛОГЕР» номинациясендә җиңү яулады! Ихлас йөрәктән котлыйбыз һәм чиксез горурланабыз! Алга таба да яңадан-яңа иҗат уңышлары, бетмәс илһам чыганагы, бөек үрләр телибез! Каналыбыз яшь буын журналистларны үстерү, белем бирү һәм тәрбияләү мәйданы булып тора! Бу безнең уртак җиңүебез! Сез, яраткан тамашачыларыбыз булганда гына, без көчле!

05.08.2022

Светофор көне!

Шәһәр урамнарын светофордан башка күз алдына китерү дә кыен. Алар, беренче чиратта, безнең куркынычсызлыгыбыз өчен кирәк. Бүген - 5 августта Халыкара светофор көне дә билгеләп үтелә. Иң беренче светофорлар 1914 елның 5 августында Американың Кливленд шәһәрендә уйлап табылган. Ул кызыл һәм яшел төстәге яктырткычлардан торган. Утын сүндереп яндырган вакытта сигнал биргән. Бүгенге көндәге өч төстәге светофорлар 1920 елда Американың Детройт һәм Нью-Йорк шәһәрләрендә барлыкка килгән. Аны британияле Джей Найт уйлап тапкан. Әмма Россиядә светофор 1930 елда гына кулланылышка кергән. Светофорның өч күзе Урамнарны күзәтеп, Узганнарны кисәтеп, Чатта тора светофор, Сакта тора светофор. Янып тора өч күзе, Күреп тора ич безне, Әйтеп тора өч сүзне: -Кузгалма! – ди Кызыл күз. -Сабыр! – дия Сары күз. -Ярый! – дия Яшел күз. Без дә аңа карыйбыз, Күзебезне алмыйбыз, Ни әйткәнен аңлыйбыз: -Кузгалма! – ди Кызыл күз. -Сабыр! – дия Сары күз. -Ярый! – дия Яшел күз. Ш. Галиев.

05.08.2022

«ТАТАР СҮЗЕ» бәйгесендә катнашырга өлгер!

Дуслар! Сез әле катнашырга өлгерәсез! «ТАТАР СҮЗЕ» өченче Халыкара нәфис сүз телевизион бәйгесенә гаризалар кабул итү дәвам итә! Ашыгыгыз! Премиаль фонд 1000 000 сум. Бу мөмкинлекне кулыгыздан ычкындырмагыз! Чыгышлар проза һәм шигърият номинацияләрендә бәяләнә. Конкурста катнашу өчен видео форматындагы эшне һәм анкетаны ике дәүләт телендә [email protected] рәсми почтасына җибәрергә кирәк. Гаризалар 2022 елның 31 октябренә кадәр кабул ителә. Тулырак мәгълүмат shayantv.ru һәм tnv.ru сайтларында.

04.08.2022

1 ... 189 190 191 192 193 ... 375

Яңа сайт!