Яңалыклар

Республика көне уңаеннан зур бәйрәмгә чакырабыз!

Дуслар, без сезне кабат күңелле очрашуга дәшәбез! 30 август, 11:00 сәгатьтә Республика көне уңаеннан Казан Кремле янында зур бәйрәм булачак! Кызыклы уеннар, искиткеч викториналар, «ШАЯН ТВ» каналы алып баручыларыннан мавыктыргыч остаханәләр, музыкаль интерактивлар, аквагрим, истәлекле бүләкләр – барысы да бер көндә! Шулай ук «ШАЯН ТВ» каналының төп геройлары, яраткан курчакларыгыз Шаян һәм Мияу белән очрашу, җанлы аралашу һәм фотога төшү көтелә! Мондый зур бәйрәмнән читтә калмагыз! Килегез, рәхәтләнеп күңел ачыгыз! Без сезне көтәбез!

26.08.2022

«ШАЯН ТВ» белән бергәләп өйрән!

Шаяннар, ә сез «Бергәләп өйрәник» тапшыруын карыйсызмы? «ШАЯН ТВ» каналы сезгә бик күп өр-яңа чыгарылышлар әзерли! Тапшыру балалар өчен генә түгел, ә аларның әти-әниләре өчен дә бик кызыклы. Ни өчен дигәндә, тапшыруда әти-әниләр һәм аларның балалары да катнаша. Биредә ике гаилә аерым командага тупланып, алып баручыбыз Иван Остроумов тәкъдим иткән биремнәргә җавап эзли, шуның белән беррәттән татарча сүзләр дә өйрәнә. Тапшыру өч турдан тора. Һәр тур өчен җиңгән командага бер балл бирелә. Ахырда кайсы команда күбрәк балл туплый, шул җиңүче дип табыла. Һәр дүшәмбе «Бергәләп өйрәник» тапшыруын 07:35 һәм 18:30 сәгатьләрдә «ШАЯН ТВ» каналында карагыз! Шулай ук тапшыруларны безнең рәсми сайтта, RUTUBE һәм YOU TUBE каналларда карый аласыз.

25.08.2022

Клиплар төшерү дәвам итә!

Дуслар, Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «ШАЯН ТВ» каналы «Балачак җыры» халыкара балалар җыры бәйгесендә җиңгән җырларга клиплар төшерүен дәвам итә! Кичә исә «Дусларың күп булсын» җырына өр-яңа клип туды! Көтегез! Тиздән сез аларны экраннарда күрә алачаксыз!

25.08.2022

«Туган тел фест – 2022»

Бүген «Бала-Сити» мультилингваль балалар бакчасында мәктәпкәчә яшьтәге балаларга татар телендә белем бирүче тәрбиячеләр һәм укытучыларның икенче «Туган тел фест – 2022» Республикакүләм фестивале узды. Фестиваль Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе, Татарстан Мәгариф һәм фән министрлыгы ярдәмендә оештырылды. Очрашу барышында дәресләрдә татар мохитен булдыру, укытуның нәтиҗәлелеген арттыру, балаларда татарча аралашу телəге тусын өчен, дәресне ничек алып барырга кирәклеге кебек мәсьәләләр күтәрелде. Тәҗрибәле белгечләрдән мастер-класслар, кызыклы әңгәмәләр үткәрелде. Чарада «ШАЯН ТВ» каналы да катнашты. Туган телне укытуның төрле методикаларын өйрәнү барышында укытучыларны үзенең татар телендәге белем бирү проектлары белән таныштырды. Күргәзмәдә педагогларга кече яшьтәге балаларга белем бирү, үзлектән өйрәнү өчен файдалы кулланма булып торучы «Балачак җыры» Халыкара балалар җыры бәйгесе җыентыгын, «Сәйлән» телевизион җыр фестивале альбомын һәм «ШАЯН Әлифба» интерактив проектларын тәкъдим итте. Шулай итеп, фестиваль татар теле укытучылары, тәрбиячеләре өчен тәҗрибә уртаклашу һәм яңа идеяләр тудыру мәйданчыгына әверелде.

24.08.2022

«ТАТАР СҮЗЕ» өченче Халыкара нәфис сүз телевизион бәйгесе дәвам итә!

«ТАТАР СҮЗЕ» өченче Халыкара нәфис сүз телевизион бәйгесе дәвам итә. Әлеге бәйгене Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «Татарстан - Яңа Гасыр» телерадиокомпаниясе оештыра. Конкурсның премиаль фонды шактый гына саллы - 1000 000 сум. Татар җәмәгатьчелеген рухландырган әлеге бәйге республикабызда өченче ел үткәрелеп килә. Аның киң колачлы булуын билгеләп узасы килә. Чара дөньяның барлык тарафларына сибелеп яшәүче бөтен татар халкында зур кызыксыну уятты. Узган ел конкурска 4 меңгә якын гариза килде. Россиянең барлык төбәкләреннән тыш, конкурска эшләрен җибәрүчеләр арасында Италия, Төркия, Казахстан, Әзәрбайҗан, Беларусь татарлары вәкилләре дә булды. Татарстан Республикасының Азнакай, Актаныш, Алабуга, Арча, Саба, Балтач, Биектау, Мөслим, Сарман муниципаль районнары вәкилләре актив катнашуын билгеләп үтәбез. Бу күрсәткеч катнашучыларның халык тарафыннан татар сәнгатенә булган ихтыяҗны, аның милли әдәбиятыбызны ихлас яратуын тагын бер кат дәлилли. Катнашучылар яшь үзенчәлекләре буенча берничәгә бүленгән. Быел исә аларның эшләре түбәндәге яшь категорияләрендә бәяләнәчәк: 10 яшькә кадәр булган катнашучылар, 11 яшьтән 17 яшькә кадәр, 18 һәм аннан өлкәнрәкләр. Бәйгедә шулай ук профессионаллар, үз шигырен, әсәрен сөйләүчеләр, иҗади гаиләләр дә катнаша ала. Чыгышлар проза һәм шигърият номинацияләрендә бәяләнәчәк. Язмаларны 7 кешедән торган мәртәбәле жюри караячак. Алар арасында халкыбызның танылган язучылары шагыйрьләре, артистлары урын алды: Ркаил Зәйдулла, Разил Вәлиев, Ирек Хафизов, Луара Шакирҗан, Рамил Төхвәтуллин, Искәндәр Гыйләҗев, Гүзәл Сәгыйтова. Алар актерлык осталыгын, дикция, костюм, реквизит, музыкаль бизәлешне исәпкә алачак. Бәйге эшләрен сайлап алу шарты катнашучыларның башкару осталыгыннан, шулай ук чыгышның оригиналь булуыннан да гыйбарәт. Конкурста катнашу өчен видео форматындагы эшне һәм анкетаны ике дәүләт телендә [email protected] рәсми почтасына җибәрергә кирәк. Гаризалар 2022 елның 31 октябренә кадәр кабул ителә. Милләтебезнең йөзен билгеләүче, туган тел сагында торучы, аның бөтен ямен-тәмен, аһаңен җиткерә алучы мондый чарадан читтә калмагыз!

23.08.2022

«АВА-центр «Новая планета» бәйрәм оештырды!

20 август көнне балаларны реабилитацияләү үзәге «АВА-центр «Новая планета» Горки-Әмәт урманында үзенең туган көне уңаеннан зур бәйрәм үткәрде. Иҗади чыгышлар, балалар рәсемнәреннән күргәзмәләр, мастер-класслар оештырылды. Әлеге чарага «ШАЯН ТВ» каналы да үз өлешен кертте. «Сәйлән» телевизион җыр фестивале җиңүчеләре «Композитор чыпчыклар» җырын башкарып, үз чыгышлары белән бәйрәмгә тагын да ямь өстәделәр.

23.08.2022

«Серле алтын шәһәрләр»!

Дуслар, ял көннәрендә өр-яңа «Серле алтын шәһәрләр» мультсериалын карарга өлгердегезме әле? Өч бала алтын шәһәрләр эзләргә юл тота. Яшь сәяхәтчеләргә бик күп сынаулар, могҗизалар һәм мәкерле кешеләр белән очрашырга туры килә. Мультсериалның төп герое – ятим-батыр малай Эстебан белән бергә дөньяның төрле почмакларына мавыктыргыч тарихи сәяхәтләр, һичшиксез, күңелегезгә хуш киләчәк! Сезне Пиратлар, куркыныч юлбасарлар, күчмә кешеләр, хәтта аҗдаһалар белән очрашу көтә! Эстебан командасы белән бергә киләсе алтын шәһәргә барып, үзенең килеп чыгышының серен ача алырмы? Моны сез һәр якшәмбе «ШАЯН ТВ» каналында, 14:00 һәм 22:00 сәгатьләрдә «Серле алтын шәһәрләр» мультсериалын карап белә аласыз!

22.08.2022

22 август – Россия Федерациясе Дәүләт флагы көне!

Бүген, 22 августта Россия Федерациясе Дәүләт флагы көне билгеләп үтелә. 1991 елның 22 августында Мәскәүнең Ак йортында беренче тапкыр өч төсле Россия флагы күтәрелә. Беренче тапкыр ак-зәңгәр-кызыл флаг Алексей Михайлович идарә иткән чорда 1668 елда Голландия инженеры Давид Бутлер төзегән «Орел» рус хәрби кораблендә күтәрелгән. Ул яңа флаг белән озак йөзмәгән, Идел буйлап Әстерханга кадәр барганда аңа ут төрткәннәр. Өч төсле флагны законлы уйлап табучы итеп, Петр I таныла. Ул 1705 елның 31 гыйнварында сәүдә судноларында ак-зәңгәр-кызыл флаг күтәрергә кирәклеге турында Указ чыгара. Ләкин аның төсләрне нәрсәдән чыгып сайлавы табышмак булып кала. Россия флагы төсләрен «Орел»ны төзегән голландияле тәкъдим иткән дигән сүзләр дә бар. Флагтагы һәр төс мәгънәгә ия. Ак төс – азатлык һәм мөстәкыйльлек, зәңгәр – ышаныч һәм рухият, ә кызыл төс исә – бөеклек һәм көч-куәт символы булып тора. Ул рәсми статуска 1896 елда гына ия була. Горур тибрәлгән ак, зәңгәр һәм кызыл төсләрдәге Россия Федерациясе Дәүләт флагы һәркемнең күңелендә Ватаныбыз өчен чиксез горурлык хисләре уятса иде!

22.08.2022

1 ... 186 187 188 189 190 ... 375

Яңа сайт!