Яңалыклар

18нче гимназиянең яңа уку корпусы ачылды!

Бүген Казанның 18нче гимназиясендә яңа уку корпусы ачылды, анда татар телендә укытачаклар. Ул 300 укучыга исәпләнгән. Зур ашханә, спорт һәм актлар залы булган заманча мәктәп «Галәм» дип атала. 10,7 мең кв. метр мәйданлы яңа корпуста урта һәм өлкән сыйныф укучылары өчен дәресләр узачак. Идеянең нигезенә модернизацияләнгән татар мотивлары салынган, алар мозаика системасына кертелгән. Актлар залында исә тамашачылар өчен балкон һәм яңа спорт залы булдырылган. Шулай ук якты атриум белән заманча ял итү зонасы да урнашкан. Гимназиядә укучыларны һәм укытучыларны лаеклы каршы алу өчен бөтен уңайлыклар да бар. Бәйрәм тантанасына балаларны котларга «ШАЯН ТВ» каналы да килде. Персонажларыбыз Шаян белән Биби нәни дусларыбызны каршы алдылар, сәламләделәр, төрле кызыклы интерактивлар үткәрделәр. «Сәйлән» телевизион җыр фестивале җиңүчеләре Кәрим Галиев һәм Әминә Әхмәтҗанова «Мин татарча сөйләшәм» җыры белән сөендерделәр.

01.09.2022

1 сентябрь - Белем көне белән!

Хөрмәтле балалар, әти-әниләр, укытучылар! Сезне бүгенге көләч бәйрәм - Белем көне белән котлыйбыз! Сез яраткан йорт бүген тагын сагынып сезне каршы ала. Сәламәтлек, яңа көчләр, тырышлык һәм түземлек белән бу уку елын әйбәт билгеләргә генә тәмамларга насыйп булсын! Укучылар, белем дигән могҗизалы ил ишекләрен сезгә киң итеп ачсын. Бу бәйрәм, яңа уку елы күңелегездә матур хатирә булып уелсын, шатлык-куанычларга, матур билгеләргә бай булсын! «Иң матур кеше – белемгә омтылган кеше», - дип юкка гына әйтмиләр. Шуңа күрә һәрчак белемле булыйк, белемгә омтылыйк! Быел беренче мәртәбә парта артына утыручылар тырышып укысын, бетмәс-төкәнмәс белем хәзинәләрен ачсын. Кайгыртучан укытучыларыбызга изге эшләрендә уңышлар һәм сабырлык юлдаш булсын. Бәйрәм белән!

01.09.2022

Җәйнең соңгы көне белән!

ҖӘЙНЕҢ СОҢГЫ КӨНЕ БЕЛӘН, ДУСЛАР! Әй, сузасы иде, озынайтасы иде шушы җәйләрне. Кышлар буе тилмереп көтәсең дә, ә ул күз ачып йомган арада үтә дә китә. Иртәгәдән без яңа ел фасылына – алтын көзгә аяк басачакбыз. Тик бу әле һич кенә дә күңелсезләнер өчен сәбәп түгел! Алда безне әбиләр чуагы, җәйнең дәвамы булып торучы – алтын яфраклы, гаҗәеп төсле көннәр көтә! Бүген исә җәйге ялларга йомгак ясарга, хис-кичерешләрне барларга, алдагы көннәргә планнар корырга – менә дигән вакыт! Шуңа күрә җәйнең соңгы көненең кадерен белеп, яңа көчләр туплап, мәктәпкә барырга, яңа белемнәр тупларга әзерләник! Августның соңгы көннәре, Хушлашабыз җәй белән, Үтте китте, сизмәдек тә, Быелгы эссе көннәр. Җәй һәм көзне тоташтыра Август ае күпердәй, Көндез эссе, ә төннәрен Салкынча була, көздәй. Мәшәкатьле, тәмле ай ул, Җиләк-җимеш өлгерә, Озыная төннәре дә, Табигатькә көз килә! Озатабыз инде җәйне, Инде көз дә башлана, Белем көне килеп җитә, Мәктәпләрдә тантана! Фәймә Зәйнуллина

31.08.2022

«ШАЯН ТВ» каналыннан зур бәйрәм!

Бүген, 30 август «ШАЯН ТВ» каналы Республика көне уңаеннан Казан Кремле янында зур бәйрәм оештырды! Кызыклы уеннар, искиткеч викториналар, алып баручыларыбыздан мавыктыргыч остаханәләр, музыкаль интерактивлар, аквагрим белән нәни дусларын сөендерде! Иң җитез кунакларга истәлекле бүләкләр өләште! Шулай ук курчакларыбыз Шаян һәм Мияу да бар иде! Алар балалар белән рәхәтләнеп уйнадылар, көлделәр, шаярдылар, фотога төштеләр! Чын бәйрәм атмосферасы ясадылар! Безнең белән булганыгыз өчен килгән һәрбер тамашачыбызга зур рәхмәт! Бәйрәм күңелегезгә хуш килгәндер дип ышанып калабыз!

30.08.2022

Бүген!

Санаулы мизгелләрдән, 11:00 сәгатьтә Республика көне уңаеннан Казан Кремле янында зур бәйрәм башланып китәчәк! Сезне «ШАЯН ТВ» каналыннан кызыклы уеннар, искиткеч викториналар, мавыктыргыч остаханәләр, музыкаль интерактивлар, аквагрим, шәп бүләкләр көтә! Яраткан геройларыгыз Шаян һәм Мияу да булачак! Күрми калма! Кил, рәхәтләнеп күңел ач!

30.08.2022

Республика көне белән!

Бүген Республика көне! Дуслар! Татарстан республикасының туган көне белән һәммәгезне чын күңелдән котлыйбыз! Тыныч булсын Татарстан таңнары, уңышлы булсын бүгенгесе, якты булсын киләчәге! Нык сәламәтлек һәм зур бәхетләр сезгә! Мәңге яшә, газиз Ватаныбыз, Халкым тели изге теләкләр! Гомерлеккә якын туган булып Яши бездә төрле милләтләр. Күп гасырлар кичкән чал тарихлы Данлы илем, үзең бер дастан! Синдә генә безнең язмышыбыз, Республикам минем, Татарстан!

30.08.2022

Иртәгә Казан Кремле янында көтәбез!

Иртәгә!!! 30 август, 11:00 сәгатьтә Республика көне уңаеннан Казан Кремле янында зур бәйрәм булачак! Кызыклы уеннар, искиткеч викториналар, «ШАЯН ТВ» каналы алып баручыларыннан мавыктыргыч остаханәләр, музыкаль интерактивлар, аквагрим, истәлекле бүләкләр – барысы да бер көндә! Шулай ук «ШАЯН ТВ» каналының төп геройлары, яраткан курчакларыгыз Шаян һәм Мияу белән очрашу, җанлы аралашу һәм фотога төшү көтелә! Мондый зур бәйрәмнән читтә калмагыз! Килегез, рәхәтләнеп күңел ачыгыз! Без сезне көтәбез!

29.08.2022

IX Милли һәм төбәк массакүләм мәгълүмат чаралары форумы

Казанда IX Милли һәм региональ массакүләм мәгълүмат чаралары форумы старт алды. Чарага Россиянең 30 төбәгеннән 300дән артык делегат җыелды. 28-30 август көннәрендә кунакларны экскурсияләр, утырышлар, журналистлык осталыгы буенча семинарлар һәм Татарстан Республикасы бәйрәмендә катнашу көтә. Бүген исә Иннополиста форумның төбәк һәм милли массакүләм мәгълүмат чаралары үсешенә багышланган пленар утырышы узды. Анда Россиянең төрле субъектларыннан төбәк, өлкә һәм район басмалары, телерадиокомпанияләр, мәгълүмат агентлыклары җитәкчеләре, шулай ук Дәүләт Думасының милләтләр эшләре буенча комитеты, «Этникара журналистика гильдиясе» төбәкара иҗтимагый оешмасы, Россия Иҗтимагый палатасы комиссиясе вәкилләре катнашты. Милли һәм төбәк массакүләм матбугатның бүгенге хәле, аның үсеш перспективалары хакында җитди сөйләшүләр булды. Катнашучылар Россиянең төрле почмакларында милли телләрдә чыгучы матбугат чаралары проблемаларын хәл итәргә тырышты. Чараның оештыручысы - «Татмедиа» Республика матбугат һәм массакүләм коммуникацияләр агентлыгы. Әлеге форумда «ШАЯН ТВ» каналы да катнашты. Каналыбызның алып баручылары, иң сәләтле балаларыбыз мөхтәрәм кунакларны сәламләделәр, каршы алдылар. «ШАЯН ТВ»ның эшчәнлеге, берсеннән-берсе яңа проектлары белән таныштырдылар. Курчакларыбыз Шаян, Мияу, Биби, Маэмай белән күңелле фотога төшү оештырылды. Очрашу җылы атмосферада, бик продуктив узды.

29.08.2022

1 ... 185 186 187 188 189 ... 375

Яңа сайт!