Яңалыклар

«ШАЯН ТВ» ветераннарга бүләкләр әзерләде!

Бүген «Яңа Гасыр» телерадиокомпаниясенең генераль директоры Илшат Юныс улы Әминев җитәкчелегендә «ШАЯН ТВ» каналы хезмәткәрләре һәм алып баручылары юбиляр ветераннарга бүләкләр әзерләде. «Бик талантлы безнең «ШАЯН ТВ» балалары. Алар бу эшкә үзләре теләп, рәхәтләнеп кушылдылар. Һәрберебез кайчан да булса өлкән кеше булачак. Яшьтән үк зурларны хөрмәт итеп, аларга игътибар күрсәтеп яшәргә кирәк. Моннан башка булмый, чөнки без – бер гаилә. Ә гаиләдә бер-беребезгә булышырга, бер-беребезне хөрмәт итәргә кирәк. Шул максат белән җыелдык та. Матур итеп, 20 минутта 100 набор бүләкне җыйдык та куйдык. Безнең ихтирамны ветераннарыбыз да сизсеннәр», - дип үз фикерен җиткерде Илшат Юныс улы. Чыннан да, мондый чаралар берләштерә. Олы буынга мәрхәмәтле булып, хөрмәт һәм ихтирам күрсәтеп яшәргә өйрәтә. Беркем дә, бернәрсә дә онытылырга тиеш түгел, бу - безнең бурыч. Җыйган бүләкләр исә, бәйрәм уңаеннан, ветераннарга, Журналистлар союзындагы юбилярларга, һәм «ТНВ» ветераннарына барып ирешәчәк.

04.10.2022

«Манзара» тапшыруында!

«ТАТАР СҮЗЕ» бәйгесенең оештыру комитеты әгъзасы, «Болгар радиосы» алып баручысы Эльвира Вильданова «Татарстан-Яңа Гасыр» каналында, «Манзара» тапшыруында кунакта булып кайтты. Әңгәмә «ТАТАР СҮЗЕ» өченче Халыкара нәфис сүз телевизион бәйгесе хакында булды. «ТАТАР СҮЗЕ» бәйгесенә гаризалар кабул итү дәвам итә! Премиаль фонд бик зур! 1000 000 сум. Чыгышлар 2 номинациядә - проза һәм шигърият номинацияләрендә бәяләнә. Гаризалар 2022 елның 31 октябренә кадәр кабул ителә. Әле сез катнашырга өлгерәсез. Үзегезнең видеогызны һәм тутырылган анкетагызны tnvtatarsuze@mail.ru почтасына җибәрегез. Сораулар буенча 8(917)391-07-87 WhatsApp номерына яза аласыз. Тулырак мәгълүмат shayantv.ru һәм tnv.ru сайтларында.

04.10.2022

Горурланабыз!

2 октябрьдә Мәскәүнең мәдәни үзәк бинасында Казанның «Яшь музыкантлар десанты» концерты узды. Биредә Казаннан 120 сәләтле катнашучы чыгыш ясады. Чарада «ШАЯН ТВ» каналының алып баручылары, «Сәйлән» балалар телевизион җыр фестиваленең җиңүчеләре Мәрьям белән Кәрим дә катнашты. Аларны нәкъ тә менә «Сәйлән» фестиваленең лауреатлары дип игълан иттеләр! Бу безнең өчен зур горурлык! Афәрин, балалар!

03.10.2022

«Таяну ноктасы» тапшыруын карагыз!

Бүген 19:00 сәгатьтә «Татарстан-Яңа Гасыр» каналында «Таяну ноктасы» тапшыруын карагыз. Ул «ТАТАР СҮЗЕ» өченче Халыкара нәфис сүз телевизион бәйгесе турында булачак. Исегезгә төшерәбез, «ТАТАР СҮЗЕ» өченче Халыкара нәфис сүз телевизион бәйгесенә гаризалар кабул итү тәмамлануга бик аз вакыт вакыт калып бара! Ашыгыгыз! Премиаль фонд саллы - 1000 000 сум! Чыгышлар проза һәм шигърият номинацияләрендә бәяләнәчәк. Гаризалар 2022 елның 31 октябренә кадәр кабул ителә, димәк, әле сез дә катнашырга өлгерәсез. Үзегезнең төшерелгән видеоларыгызны һәм анкетаны ике дәүләт телендә tnvtatarsuze@mail.ru рәсми почтасына җибәрегез. Сораулар буенча 8(917)391-07-87 WhatsApp номерына да яза аласыз. Тулырак мәгълүмат shayantv.ru һәм tnv.ru сайтларында.

03.10.2022

Алдагы көннәрдә нинди һава торышы көтә?

Көннәр кыскара, һавада салкын исе килә. «Октябрь аенда төшкә кадәр - көз, ә төштән соң - кыш», - диләр. Октябрьдәге халык сынамышлары һава торышының нинди булачагына, кышын ни көтәргә кирәклегенә ишарә ясаячак. * Җылы октябрь - салкын кышка. * Көчле һәм дәвамлы салкыннар - кышкы салкыннарга. * Октябрь аенда күк күкрәү карсыз, кыска һәм җылы кышны ишарә. * Октябрь аенда салкыннар нинди көннәрдә башланса, киләсе елның апрелендә шундый ук көннәрдән җылыта башлаячак. * Октябрь аенда кайсы саннардан кар явачак, шул саннардан апрель аенда яз башланачак. * Беренче кар чын кышга кадәр кырык көн кала төшә. * Әгәр октябрьдә кар яуса, язын кырларда ул озак ятачак. * Яфраклар тиз коелса - кыш суык булачак, ә яфраклар яшел булып калса һәм агачларда озак сакланса - кыш кыска булачак. * Октябрьдә кошлар җиргә түбән очса - иртә һәм салкын кышка. * Әгәр кыр казлары һәм торналар туган якларыннан китәргә ашыкмасалар, суыклар тиз генә булмаячак, кыш җылы һәм кыска булачак, әгәр алар ашыкмыйча югары очсалар - матур көз көтелә. * Октябрь башында каенга карагыз - яфраклар әле коелмаган булса, кар соң ятачак. * Октябрь аенда түгәрәк ай - киләсе җәйнең коры булуына.

03.10.2022

Грандиоз «Сәйлән» фестиваленең премьерасы!

Дуслар, бүген! Барыбыз да көтеп алган мизгел! «ШАЯН ТВ» каналы дүртенче тапкыр яраткан тамашачылары өчен татар музыкасы дөньясын ача! Бүген, 2 ОКТЯБРЬДӘ, 11:30 һәм 17:00 сәгатьләрдә «ШАЯН ТВ» каналында тамашачыларның күңелен яулаган грандиоз «Сәйлән» балалар телевизион җыр фестиваленең премьерасы булачак! Ел саен фестиваль меңләгән баланы үзенә җәлеп итә. Бу проект катнашучыларга киң мөмкинлекләр бирә, зур сәхнәгә юл ача! Алар зур сәхнәдә танылган артистлар белән бергә чыгыш ясый, республикабызда үткәрелгән иң мөһим чараларда катнаша! Ел дәвамында республикабызның иң талантлы балалары телевизион этапка эләгү бәхете өчен көрәштеләр. Меңнәрчә гариза арасыннан барлыгы 16 катнашучы сайлап алынды. Аларны бүгеннән үк җиңүчеләр дип атарга мөмкин булыр иде, әмма алар өчен «Сәйлән» дип аталган серле юл әле әле башлана гына. Алда аларны кабат сайлап алу этаплары, мавыктыргыч остаханәләр һәм татар балалар эстрадасының иң зур телевизион сәхнәсендә онытылмаслык минутлар көтә! «Сәйлән» фестиваленең ярымфинал этабында катнашучыларны яраткан җырчыларыбыз Алсу Әбелханова, Илгиз Мөхетдинов һәм Илгиз Шәйхразиев бәяләячәк.Финалга исә 8 катнашучы узачак һәм «Сәйлән» статуэткасын алу өчен көч сынашачак! Финалистларның кемнәр икәнен БҮГЕН «ШАЯН ТВ» каналында күрерсез! 2 ОКТЯБРЬДӘН һәр якшәмбе зәңгәр экраннарда грандиоз «Сәйлән» проектының яңа чыгарылышларын карагыз, үзегезгә ошаган яшь җырчы өчен җан атыгыз!

02.10.2022

1 октябрь - Өлкәннәр көне!

Бүген, 1 октябрь - Өлкәннәр көне! Кадерле әби-бабаларыбыз! Бу көнне без сезгә үзебезнең хөрмәтебезне һәм рәхмәтебезне җиткерәбез. Һәммәгезгә дә ныклы сәламәтлек, иминлек, озын гомер, күңел тынычлыгы, якын кешеләрегезнең мәхәббәтен, игътибарын һәм хөрмәтен тоеп, озак яшәвегезне телибез. Урыннарыгыз һәрчак өйнең түрендә булсын. Балаларыгыз, оныкларыгыз уңышына шатланып, бәхетле яшәгез. Бәйрәмегез белән!

01.10.2022

Лунтик маҗаралары әйләнеп кайта!

Сагындыгызмы? Ай өстендә туган һәм Җиргә егылып төшкән кечкенә генә йонлач җан иясе Лунтик маҗаралары кабат эфирга әйләнеп кайта! Иртәгәдән, һәр шимбә 09:15 сәгатьтә «Лунтик һәм аның дуслары» мультсериалын «ШАЯН ТВ» каналында карагыз!

30.09.2022

1 ... 183 184 185 186 187 ... 378

Яңа сайт!