Яңалыклар

«ШАЯН ТВ»да кунаклар!

«ШАЯН ТВ»да кунаклар!

«ШАЯН ТВ» каналында «ДЕТИ ЕДИНЫ» мөмкинлекләре чикләнгән хәйрия фонды балалары һәм Алабуга шәһәренең «Ләйсән» балалар бакчасы кунакта булды. Алар зур студиябез буйлап сәяхәт иттеләр, төшерү серләренә төшенделәр, дубляж студиясендә дә кунакта булдылар. Популяр тапшырулар, аның алып баручылары, катнашучылары белән таныштылар һәм якыннан аралаштылар. «ШАЯН ТВ» каналы төрле күңелле викториналар үткәреп, балаларның күңелен күрде. Ә яраткан каналларыннан истәлекле, шәп бүләкләр һәрберсенең дә күңеленә хуш килде. Очрашуның иң күңелле ноктасы – ул да булса «ШАЯН ТВ» каналының төп персонажы – Шаянның чыгышы булды. Ул балалар белән шаярды, көлде, фотога төште, яхшы кәеф бүләк итте!

28.09.2022
Барлык тәрбиячеләрне бәйрәм белән котлыйбыз!

Барлык тәрбиячеләрне бәйрәм белән котлыйбыз!

Бүген тәрбияче һәм мәктәпкәчә яшьтәге балаларга белем бирүче укытучылар көне! Баланың якын дусты, сердәшчесе, тормышка беренче адымнарын ясарга ярдәм итүче мөгаллимнәр аерым игътибарга лаек! Бала өчен тәрбияче әти-әни, яшәгән өй шикелле якын булганда гына бала теләп бакчага бара. Хөрмәтле тәрбиячеләр! Ихлас күңелдән һөнәри бәйрәмегез белән котлыйбыз! Авыр хезмәтегездә түземлек, гаиләгездә җан тынычлыгы, тормышыгызда ак бәхетләр һәм ныклы сәламәтлек телибез! Барлык балаларыгыз да тәүфыйклы, акыллы булсыннар!

27.09.2022
«ТАТАР СҮЗЕ»нә гаризалар кабул итү тәмамлануга аз вакыт калды!

«ТАТАР СҮЗЕ»нә гаризалар кабул итү тәмамлануга аз вакыт калды!

Хөрмәтле тамашачылар, «ТАТАР СҮЗЕ» өченче Халыкара нәфис сүз телевизион бәйгесенә гаризалар кабул итү тәмамлануга бик аз вакыт калып бара! Премиаль фонд шактый гына саллы - 1000 000 сум! Катнашып калырга ашыгыгыз! Сезнең күп санлы сорауларыгыз буенча гаризалар кабул итүгә WhatsApp номеры да төзедек. Хәзер эшләрегезне 8(917)391-07-87 WhatsApp номерына да юллый аласыз. Әлеге телефон номеры сезнең барлык сорауларыгызга да җавап бирергә әзер! Чыгышлар проза һәм шигърият номинацияләрендә бәяләнә. Конкурста катнашу өчен видео форматындагы эшне һәм анкетаны ике дәүләт телендә [email protected] рәсми почтасына җибәрергә кирәк. Гаризалар 2022 елның 31 октябренә кадәр кабул ителә. Тулырак мәгълүмат shayantv.ru һәм tnv.ru сайтларында.

27.09.2022
«Машаның куркыныч хикәятләре» зәңгәр экраннарда!

«Машаның куркыныч хикәятләре» зәңгәр экраннарда!

Аюның дусты - Маша хәзер куркыныч хикәятләр дә сөйли! Ул яшь тамашачыларга үзенең зур серен ача: бөтен куркыныч нәрсәләр дә бары тик безнең күз алдыбызда гына яши. Куркыта торган вакыйгалар сөйләп, Маша нәниләрне бернәрсәдән дә курыкмаска өйрәтә. Ул балаларның куркулары каян барлыкка килүвен һәм алар белән ничек көрәшергә кирәклеген аңлата. «Машаның куркыныч хикәятләре» мультсериалы кабат зәңгәр экраннарда! Дүшәмбедән җомгага кадәр 08:10 һәм 16:10 сәгатьләрдә «ШАЯН ТВ» каналында кара!

26.09.2022
«ШАЯН ТВ» 18 гимназиядә кунакта!

«ШАЯН ТВ» 18 гимназиядә кунакта!

Бүген «ШАЯН ТВ» каналы Казанның 18 нче гимназиясендә кунакта булды. Укучыларны канал эшчәнлеге белән тагын да тулырак таныштырды, үзенең берсеннән-берсе кызыклы тапшырулары, гаҗәеп күңелле мультсериаллары, зур проектлары хакында сөйләде. Шулай ук викториналар, кызыклы уеннар да оештырды. Укучылар барысы да бик актив һәм сәләтлеләр. Яраткан каналлары белән очрашу, истәлекле бүләкләр оту – барысының да күңелләренә хуш килде!  

26.09.2022
«Сәйлән» телевизион-музыкаль фестивален төшерү дәвам итә!

«Сәйлән» телевизион-музыкаль фестивален төшерү дәвам итә!

«ШАЯН ТВ» каналында грандиоз «Сәйлән» телевизион-музыкаль проекты үз эшен дәвам итә. Бүген, 25 сентябрьдә аның яңа чыгарылышлары төшерелде. Кабат сынаулар, зур сәхнә, мәртәбәле жюридан кабатланмас киңәшләр! Жюри составында танылган артистлар, композиторлар, педагоглар, шагыйрьләр, продюсерлар урын алды. Әлеге этапта балаларны Татарстанның халык артистлары, яраткан җырчыларыбыз Салават Фәтхетдинов, Римма Ибраһимова, Зәйнәп Фәрхетдинова, Филүс Каһиров, Азат Кәримов, Ильвина бәяләде. Татарстанның халык артисты, барыбызның да яраткан җырчысы Салават Фәтхетдинов: "ШАЯН ТВ", Сезгә бик зур рәхмәт! Милләт язмышы өчен, татар моңы, татар җыры өчен борчылып яшәгәнегез өчен! "Сәйлән"! Чакырыгыз, килербез!"- дип каналның хезмәтен югары бәяләде. Бөек шәхестән мондый мактау сүзләре ишетү аеруча да рәхәт. Ел саен фестиваль меңләгән баланы үзенә җәлеп итә. Бу проект катнашучыларга киң мөмкинлекләр бирә, зур сәхнәгә юл ача! Алар зур сәхнәдә танылган артистлар белән бергә чыгыш ясый, республикабызда үткәрелгән иң мөһим чараларда катнаша. Бер генә мәдәни тамаша да алар катнашыннан башка үтми. Сәләтле яшь йолдызчыклар өчен бу зур тәҗрибә һәм киләчәктә илһамланып иҗат итү өчен этәргеч булып тора. Ел дәвамында республикабызның иң талантлы балалары телевизион этапка эләгү бәхете өчен көрәштеләр. Алда кабат сайлап алу этаплары, вокал, актерлык осталыгы, сәхнә образы буенча төрле кызыклы остаханәләр һәм зур телевизион сәхнәдә онытылмаслык мизгелләр көтә! Катнашучыларның барысы да «Сәйлән» статуэткасын алу өчен көч сынашачак! Ә финалистларның кемнәр икәнен сез бик тиздән «ШАЯН ТВ» каналында күрерсез. 2 ОКТЯБРЬДӘН һәр якшәмбе зәңгәр экраннарда грандиоз «Сәйлән» проектының яңа чыгарылышларын карап, үзегезгә ошаган яшь җырчы өчен җан ата алачаксыз!          

25.09.2022
Көз сылуы - Сөмбелә!

Көз сылуы - Сөмбелә!

22-23 сентябрь - көзге көн белән төн тигезләшкән вакыт. Елның сихри фасылында, нәкъ менә көн белән төн тигезләшкән мәлдә, татар халкы Сөмбелә бәйрәмен үткәргән. Европалылар өчен бераз моңсу вакыт, чөнки көз-патшабикә хакимлек итәргә тулы хокук ала. Ел фасылы алышынганда көн кыскара, төн озая. Көн озынлыгы нәкъ ярты тәүлек - 12 сәгать булганлыктан, кояш 6 да чыга, 18 сәгатьтә бата. Мондый очрак ел әйләнәсендә ике тапкыр кабатлана. Сөмбелә - башак дигән сүз.Ул – көзге бәйрәм, уңыш бәйрәме. Җитен чәчле, зәңгәр күзле, зифа буйлы, сүзгә тапкыр, эшкә уңган кызны Сөмбелә дигәннәр. Нәүрүз бәйрәме язның башы булса, Сөмбелә көзне түгәрәкләү ае, чөнки бу вакытта урып-җыю эшләре төгәлләнә, ашлык сугылып келәт-амбарларга тутырыла. Татарларда Юлиан календаренә кадәр зодиак календарь кулланылган һәм сигезенче ай «Сөмбелә» дип йөртелгән. Бу күренеш мәкальләрдә яхшы сакланган: * Сөмбелә туса, су суыныр. * Сөмбеләдә урып ал, арышыңны чәчеп кал. Ә менә планетаның көньяк ярымшарында яшәүчеләр бу вакытта язны каршылый икән. Борынгы Русиядә элек-электән көн белән төн тигезләшкәндә төрле йолалар башкарганнар, бәйрәм иткәннәр. Келәтләр уңыш белән тулы, өстәлләр яшелчә-җимештән сыгылып торган мизгел дә бит әле бу. Шунлыктан кешеләр шатланып, күңел ачкан. Бай көзге табынны күпереп пешкән икмәк, кәбестә, мүк җиләгеннән пироглар бизәгән. Ә кызыл миләш тәлгәшләрен, чир-чордан, күз тиюдән сакласын дип, тәрәзә төбенә тезгәннәр.            

23.09.2022
Prev. 1 ... 181 182 183 184 185 ... 375 Next
Главная Программа Видео Шортс Поиск