Яңалыклар

«ШАЯН ТВ» каналы нәни хыялыйны кунак итте!

30 декабрь көнне, Бөтенроссия «Теләкләр чыршысы» акциясе кысаларында, «ШАЯН ТВ» каналы үзендә «Татмедиа» республика матбугат һәм массакүләм коммуникацияләр агентлыгы житәкчесе урынбасары Эдуард Фәрид улы Хәйруллин җитәкчелегендә нәни хыялый Михаил Санталовны һәм аның әбисе Татьяна Марковнаны кунак итте. Кунакларны каналның төп герое Шаян һәм «ШАЯН ТВ» алып баручылары күңелле итеп каршы алдылар, алар белән бергә фотога төштеләр һәм нәни кунакның күңелен күрделәр. Экскурсия барышында алар «ШАЯН ТВ» каналы студиясе буйлап сәяхәт иттеләр, берсеннән-берсе масштаблы проектлар, популяр тапшырулар, аның алып баручылары һәм катнашучылары белән якыннан таныштылар, аралаштылар. Шулай ук дубляж студиясендә дә кунакта булдылар. Әлеге студиядә дә эшнең иң кызган чагына туры килделәр, популяр мультсериалларны тәрҗемә итү һәм төшерү серләренә төшенделәр. Моннан тыш, кунаклар «Болгар радиосы»на да сәяхәт кылдылар, радионың эшчәнлеге белән таныштылар. Акция кысаларында тагын бер хыялыйның теләге тормышка ашты. Каналның тугры тамашачысына Татарстан Республикасы Президентыннан ноутбук, йомшак уенчык, баллы бүләкләр, һәм «ШАЯН ТВ» каналыннан истәлекле бүләкләр тапшырылды.

30.12.2022

Бәйрәм көнендә безнең белән бул!

Дуслар, 31 декабрь көнен «ШАЯН ТВ» каналы белән бергә үткәрергә чакырабыз! Иртәдән кичкә кадәр яраткан каналыбыз сезнең өчен бик күп сюрпризлар һәм күтәренке кәеф әзерләде! Иң популяр мультсериаллар, кызыклы тапшырулар, эчтәлекле сериаллар һәм гаҗәеп премьералар – боларның барысы да бәйрәм эфирында! «Тау кәрләләре» сериалының премьерасын 08:10 сәгатьтә, «Чебурашка. Бәйрәм сере» мультсериалын 10:10 һәм 15:40, «Умка чыршы бәйрәмендә» 13:25 һәм 19:00, «ШАЯН балачак – 2022» бәйрәм концертын 15:50 һәм 01:10 сәгатьләрдә карагыз! Шулай ук 12:00 һәм 00:00 сәгатьләрдә грандиоз Республика Яңа ел чыршысы да күрсәтеләчәк! Яңа елга бергә керик!

30.12.2022

Яңа ел бәйрәменә яңа мультсериал: «Умка чыршы бәйрәмендә»!

«ШАЯН ТВ» каналы тамашачыларына бик күп Яңа ел бүләкләре әзерләде! Һәм ул сезне көн дә үзенең шәп премьералары белән сөендерә! Бүгеннән «Умка чыршы бәйрәмендә» мультсериалы эфирга чыга! Аю баласы Умканың тугры дусты барлыкка килә. Олылар аны каядыр еракка алып киткәч, Умка дустын бик сагына һәм аны эзләп табарга була. Максатына ирешү өчен кыю аю баласы вертолетта оча, поляр станциягә үтеп керә һәм кешеләргә охшаган аю балалары белән таныша. Ә аларның хәзер - Яңа ел чыршысы бара! Бәйрәм вакытында бигрәк тә үзеңнең яраткан якын кешеләреңне кочаклыйсы килә. Бу урында Умка үзенең зур сәяхәтенең ахырына якынлашуын аңлый... Акыллы аю баласы Умка турында мультсериал сезгә, һичшиксез, Яңа ел кәефе бүләк итәчәк! 08:55 һәм 16:55 сәгатьләрдә телевизор экраннары каршында көтәбез!

29.12.2022

Кышкы каникулны ничек күңелле итеп үткәрергә?

Дуслар, ниһаять, көтеп алган кышкы каникуллар башланды! Ә сез аны күңелле һәм шул ук вакытта файдалы итеп үткәрү өчен исемлек төзедегезме әле? Без сезгә бу эштә ярдәм итәрбез! * Чыршы өчен үз кулыгыз белән уенчыклар ясагыз. * Кар бөртекләрен тотып уйнагыз. * Шәһәребезнең төрле матур урыннарына сәяхәт кылыгыз. * Күп итеп мандарин ашыгыз. * Дуслар белән бергә биек таудан “паровоз” ясап шуыгыз. * Кар өстендәге җәнлек эзләрен өйрәнегез. * Өйгә боз сөңгесен алып кереп, аның ничек эргәнен күзәтегез. * Кошлар өчен җимлек ясап элергез һәм көн дә гаҗәеп кошлар дөньясы белән танышыгыз. * Гөл төбенә төрле җиләк-җимеш орлыклары утыртыгыз һәм аларның ничек үскәнен күзәтегез. * Чаңгыда һәм тимераякта шуыгыз. * Зур итеп кардан сыннар ясагыз. * Имбирьдан төрле фигурадагы печеньелар пешерегез. * Кышкы урманда йөрегез. * Кышкы фотосессияга чыгыгыз. * Күргәзмәгә яисә музейга барыгыз. * Кайнар шоколад ясап эчегез. * Кызыклы китап укыгыз. * Күңелне җылытучы Яңа ел фильмнары карагыз. * Урманда термостан кайнар чәй эчегез. * Чыршы ылысларыннан өстегезгә кар коеп хозурланыгыз. * Туганнарыгызга кунакка барыгыз. * Компьютер артында мөмкин кадәр азрак утырырга тырышыгыз. * Җәйгә эшли эшләрегез өчен исемлек төзеп куегыз. * Ә, иң мөһиме, “ШАЯН ТВ” белән бергә булыгыз! Без сезгә каникулларны тагын да күңеллерәк итеп уздырырга булышырбыз!

29.12.2022

28 декабрь - Халыкара кино көне!

28 декабрь - Халыкара кино көне! 1895 елның 28 декабрендә Парижда бертуган Люмьерлар “Гранд-кафе”да синематографның беренче сеансын тәкъдим итәләр. Һәм бу көн бөтен дөньяда кино туган көне буларак билгеләп үтелә башлый. Ул кинематографистлар бәйрәме генә түгел. Без, кино яратучылар аны бәйрәм итә алабыз. Бигрәк тә Яңа ел алдыннан. “Язмыш ирониясе, яки Җиңел пар белән!” фильмы... Ничә дистә еллар дәвамында елның соңгы көнендә күрсәтүләренә дә карамастан һәр елны аны көтеп алабыз, рәхәтләнеп карыйбыз. 1. Россиядә беренче фильм 1908 елда төшерелә. Ул нибары җиде минут дәвам итә. 2. Россиядә төшерелгән беренче төсле фильм экраннарга 1925 елда чыга. Ул Сергей Эйзенштейнның танылган “Броненосец Потемкин” фильмы була. Эйзенштейн матрослар күтәргән әләмне кинопленкада үзе кызыл төскә буйый. Бу - фильмдагы бердәнбер төсле кадр була. 3. 1935 елда Беренче Халыкара Мәскәү кинофестивале уздырыла. 4. 1965-1967 елларда төшерелгән “Война и мир” фильмы - иң кыйммәтле совет фильмы булып санала. Аны барлыгы якынча 135 миллион тамашачы караган. 5. Иң озын совет сериалы - Анатолий Иванов романы буенча төшерелгән “Вечный зов” фильмы.

28.12.2022

Let's play Уйныйбыз!

Let's play Уйныйбыз! Тагын да күбрәк кызыклы тапшырулар безнең YouTube каналда!

28.12.2022

Яңа елга чыршыны ничек бизәргә?

Декабрь җитте исә күңел Яңа елны көтеп яши башлый. Кыш бабай, Кар кызы, чыршы – бәйрәмнең күрке. Яңа ел чыршысын бизәү гадәте ерак тарихка барып тоташа. Беренче чыршы уенчыклары фигуралап ясалган прәннек, печенье яки конфетлар булса, аннары аларны ялтыравык сипкән чыршы күркәләре, кәгазьдән, мамыктан ясалган чәчәкләр алыштыра. Бераздан картоннан ясалган уенчыклар, челтәрләр белән бизәлгән курчаклар, клоуннар барлыкка килә. Ә чыршыны шарлар белән бизәү гадәте каян килгән соң? Риваятьләргә караганда, Германиядә чыршыны алмалар белән бизәргә яратканнар, ә бер елны алман илендә алма уңышы аз була. Һәм кешеләр пыяла алмалар ясатырга пыялачыларга мөрәҗәгать итәләр. Шуннан бирле чыршыларны шарлар белән бизәү гадәте яшәп килә. Бүгенге көндә инде уенчыкларның ниндиләре генә юк! Кибеткә чыгып җаның теләгәнен сайлыйсың да урман гүзәлен күз явын алырлык итеп бизәп тә куясың. Бу эшне никадәр иртәрәк башкарсаң, шулкадәр озаграк бәйрәм хисе тоярсың, ди белгечләр. Куян яисә Мәче елында чыршыны барлык салават күпере төсләре белән дә бизәргә мөмкин. Артык караңгы гаммаларны кертмәскә киңәш итәләр. 2023 елга чыршыны ничек һәм нәрсә белән бизәргә? 1. Чыршы бизәргә җыенгансыз икән – һәр уенчыкны, һәр шарны кулыгызда озаграк тотыгыз. Һәр яңа ел уенчыгында тылсым яшерелгән! 2. Яңа елга чыршыны матур итеп бизәр өчен, аңа дөрес урын сайларга кирәк. Купшы чыршыны кечкенә бүлмәгә куймагыз, ә кечкенәләрне зур бүлмәгә урнаштыру дөрес булмас. 3. Гирлянданы иң башта элеп куегыз. Аннан соң эленгән уенчыклар матур итеп балкып торыр. 4. Зур чыршы өчен зур уенчыклар сайлагыз. 5. Охшаш уенчыкларны бер тирәгә элү шулай ук матур булмас. 6. Чыршының иң күренә торган урынына бу елның символын – Куян фигурасын элеп куйсагыз да була. Яисә аны Кыш бабай һәм Кар кызы урынына чыршы астына да куйсагыз була. 7. Йомгаклау этабы булып, мишура һәм ялтыравыклар тора. 8. Чыршы төбенә матур итеп төрелгән бүләкләр тезеп куйсагыз да була.

27.12.2022