Яңалыклар

Җәйнең тәме җиләктә!

Болыннарда, урман-аланнарда, бакчаларда кып-кызыл булып җиләкләр өлгерә. Табигать биргән әлеге байлыктан файдалана белгәннәр өчен кызу чор якынлаша. Җиләкләр искиткеч тәмле генә түгел, ә сәламәтлеккә дә яхшы тәэсир итәләр. Җир җиләге эре, кып-кызыл, авызга керәм-керәм дип тора. Болын җиләге бакча җиләгенә караганда да тәмлерәк һәм хуш ислерәк, шуңа күрә витамин чыганагын кыш буена җитәрлек итеп, күбрәк җыеп калырга тырышырга кирәк. * Хуш исле җир җиләге белән каен җиләге А, В, С, Р витаминнарына, органик кислоталарга, тимер, фосфор, кальцийга бай. Электән аны халык медицинасында төрле авыруларны дәвалау өчен файдаланганнар. * Җиләк аппетитны ача, хәтерне яхшырта, сусауны баса, матдәләр алмашын җайга сала, кан басымын көйли. * Җиләк салкын тигәндә дә файдалы, югары температураны төшерә, җимешләрне шулай ук буыннар сызлаганда да ашарга киңәш итәләр. * Бакча җиләге авитаминоз, атерасклероз кебек авырулардан менә дигән дәвалану чарасы булып тора. * Җиләк бик татлы, баллы җимеш. Шуңа да карамастан аны шикәр авыруыннан интегүчеләргә дә ашарга ярый. * Шулай ук бакча җиләген “яшьлек җимеше” дип тә атап йөртәләр. Чөнки ул кешене чын-чынлап яшәртергә сәләтле. Викториядә булган В, Е төркеменә кергән витаминнар бит тиресен алсуландыра, яшәртә. Өстәвенә, җиләк ашаганнан соң, организмда “бәхет гармоны” эшләнеп чыга һәм кешенең кәефе күтәрелә. * Кура җиләгендә исә глюкоза һәм фруктоза, А, С, В, В1 В2, РР, Е витаминнары бар. Тимер, калий тозлары, каротин антоцианнар, катехиннар, аксым, клетчатка бар. Анда холестерин ясалуга һәм склерозга каршы тора торган бета-ситостерин барлыгы билгеле. * Кура җиләгенең температура төшерү сәләте күпләргә балачактан ук билгеле.

19.06.2023

Ял көннәрен бергә файдалы итеп уздырыйк!

«Зу-му» документаль фильмы ял көннәрендә кабат эфирга чыга! Һәр серия берничә кыргый табигать вәкиле белән танышуга багышланган: көньяк диңгезләрнең гаҗәеп төрле төстәге балыкларыннан алып Япония фаунасына кадәр! Шимбә һәм якшәмбе көннәрендә 08:10 һәм 16:10 сәгатьләрдә «ШАЯН ТВ» каналында карамый калмагыз! Ял көннәрен бергә файдалы итеп уздырыйк!

16.06.2023

«Балачак җыры» концерты «Московский» мәдәният үзәгендә узды!

Бүген «ШАЯН ТВ» каналының «Балачак җыры» концерты «Московский» мәдәният үзәгендә узды! Бер көндә ике концерт куелды! Сәхнәне исә, гадәттәгечә, «Сәйлән» музыкаль фестиваленең сәләтле артистларының чыгышлары бизәде. Безнең яраткан персонажларыбыз да нәни дусларыбызны сөендерде: шаярдылар, көлделәр, фотога төштеләр, иң активларга бүләкләр өләштеләр. Концерт буена берсеннән-берсе матур клиплар, гаҗәеп эчтәлекле җырлар яңгырады, җанлы атмосфера хөкем сөрде! Тамашачыларыбыз белән бергәләшеп вакытны бик күңелле үткәрдек! Искәртеп узабыз, әлеге чаралар Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә оештырыла.

15.06.2023

Әкият илендә: «Васыять»!

Борын заманда булган икән, ди, бер карт. Аның булган, ди, өч улы. Үләр алдыннан карт иң элек үзенең олы улын чакырып алып әйткән: — Син, улым,— дигән,— хәлеңнән килсә, авыл саен йорт сал,— дигән. Шуннан соң уртанчы улын чакырып алган: — Син, улым,— дигән аңа,— гел тәмле аш кына ашап тор,— дигән. Карт кече улына әйткән: — Син,— дигән,— ешрак өйләнергә кара,— дигән. Ярар. Карт үлеп китә. Аталары үлгәч, уллары: «Әти әйткән васыятьне ничек кенә итеп үтәрбез икән?»— дип, баш ватып йөри башлыйлар. Олы улы: «Ничек кенә итеп авыл саен йорт салдырырмын икән?»— дип, баш вата, уртанчы улы дөньяда нинди тәмле ризык бар, шуны эзләргә дип чыгып китә, ә кече уллары ешрак өйләнү турында хыялланып йөри башлый. Көннәрдән бер көнне боларга бер карт килеп керә. Исәнлек-саулык сораша, тормышлары белән кызыксына бу боларның. — Тормыш бик шәптән түгел әле, бабай,— ди олы уллары. — Менә әти үлгән вакытта: «Авыл саен йорт салдыр»,— дип әйтеп киткән иде, әле әтинең васыятен үти алганым юк,— ди. Уртанчысы әйтә: — Миңа әти:«Тәмле аш кына ашап тор»,— дип әйткән иде,— ди. Иң кечеләре дә сүзгә катнашып әйтә: — Әти миңа: «Ешрак өйләнергә кара, улым»,— дип әйткән иде. Мин дә әти васыятен үтәргә тырышып карыйм да, барып чыкмый,— ди. Карт боларның сүзләрен тыңлап-тыңлап тора да болай ди: — Әй, улларым, сез атагызның васыятен ялгыш аңлагансыз икән,— ди.— Ул сезгә менә болай дип әйткән,— ди,— «авыл саен йорт сал» диюе «авыл саен дус-иш булдыр, дөньяда дуслар белән яшәве җиңелрәк була» дип әйтүе булган; «тәмле ашлар ашап кына яшә» диюе «эшләп ашасаң, кара икмәк тә бик тәмле булыр» дип әйтүе аның; «ешрак өйлән» дип әйтүе, «эш артыннан йөреп, хатыныңны сагыныбрак кайтсаң, көн дә өйләнгән кебек булыр» дип әйтүе ул,— ди.— Атагыз сезне эшләп көн итәргә өндәгән»,— ди. Шулай дип әйтә дә карт чыгып китә. Шуннан соң болар әтиләренең васыятьләрен ул кушканча үти башлыйлар. Татар халык әкияте

14.06.2023

«Сәйдәш» мәдәният үзәгендә «Балачак җыры» концерты узды!

Бүген «Сәйдәш» мәдәният үзәгендә «ШАЯН ТВ» каналының «Балачак җыры» концерты узды! Тамашачыларга бер көндә ике концерт тәкъдим ителде! Бәйрәм программасында каналның яшь йолдызлары, «Сәйлән» телевизион музыкаль фестивале җиңүчеләре «Балачак җыры» бәйгесендә җиңгән шат җырлар белән тамашачыларның күңелен күтәрделәр. Шулай ук балалар белән күрешергә «ШАЯН ТВ» балалар каналының яраткан геройлары – Шаян һәм Мияу да килде. Алар кунакларны каршы алдылар, уйнадылар, көлделәр һәм бәйрәм рухы бүләк иттеләр. Моннан тыш, кызыклы викториналар да уздырылды, иң активлар истәлекле бүләкләргә ия булдылар. Искәртеп узабыз, әлеге чаралар Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә оештырыла. Концерт барлык тамашачыларга да аралашу шатлыгы һәм яхшы кәеф бүләк итте! Алар һәр чыгышны яратып карадылар, «ШАЯН ТВ»ның яшь йолдызларының һәр чыгышын алкышлар белән озаттылар!

13.06.2023

«ШАЯН ТВ» каналы өр-яңа балалар өчен сериал тәкъдим итә!

«ШАЯН ТВ» каналы тамашачыларына өр-яңа балалар өчен сериал тәкъдим итә! «Ишегалды патшабикәсе»! Һәр ишегалды - ул үз кануннары булган кечкенә генә патшалык. Ләкин ишегалдының лидеры калган балаларны куркытып, аларга мәйданчыкта тыныч кына уйнарга ирек бирмәсә нәрсә эшләргә? Аминка гаделсезлек белән килешергә теләми! Әле күптән түгел генә ул бу районга күчеп килә һәм Руслан белән очраша. Аннан «таҗ»ны салдырып алу өчен, Аминка үзен ерак ишегалды патшабикәсе булып тәкъдим итә һәм патшалык өчен ярышларда катнашырга ризалаша. Алда - күңелле уеннар, мавыктыргыч бәйгеләр һәм маҗаралар көтә! «Ишегалды патшабикәсе» сериалын эш көннәрендә 09:10 һәм 17:10 сәгатләрдә «ШАЯН ТВ» каналында карагыз!

13.06.2023

Сабантуйлар котлы булсын!

Барчагызны да, татар халкының милли бәйрәме – Сабантуй белән ихластан котлыйбыз! Сабантуй халкыбызның сагынып көтеп алган, яраткан бәйрәме! Алай гына да түгел, ул барлык халыкларны берләштерә, бергә туплый торган бәйрәм! Сабантуй һәрбер өйгә, һәрбер гаиләгә шатлык-сөенечләр алып килсен!

10.06.2023

Бер көндә 2 концерт!

Бүген «ШАЯН ТВ» каналының «Балачак җыры» концерты Казанның «Чулпан» мәдәният үзәгендә узды! Бер көндә 2 концерт гөрләде! «Сәйлән» телевизион фестивале җиңүчеләре тамашачылар күңелен яуларга өлгергән, балалар өчен уникаль җырларны яңгыраттылар. Иң актив балаларга исә «ШАЯН ТВ» каналы шәп бүләкләр өләште. Шулай ук килгән кунаклар һәм башкалабызның мәктәп-гимназия укучылары өчен «ШАЯН ТВ» беренче балалар каналының төп персонажлары – Шаян һәм Мияу белән фотога төшү дә оештырылды. Алар, гадәттәгечә, нәниләргә күтәренке рух бүләк иттеләр! Концерт җыр-биюләр, җанлы аралашу, шаяру-көлүләр белән үрелеп барды. Тамашачылар талантлы балаларның күңелле музыкаль чыгышларыннан яхшы кәеф алдылар! Искәртеп узабыз, чара Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә үткәрелә.

09.06.2023

1 ... 139 140 141 142 143 ... 378

Яңа сайт!