Яңалыклар

«Профессор Никдияр» сезнең сорауларыгызга җавап бирә!

Барысына да билгеле булганча, балалар еш кына төрле сораулар бирергә яраталар. Ә иң еш бирелә торган сораулар һәрвакыт «ни өчен» яисә «ник» дип башлана! Ни өчен үләннәр яшел, ә күк йөзе зәңгәр төстә? Нигә көндез якты, ә төнлә караңгы? Салават күпере нидән барлыкка килә? Бу һәм миллионлаган башка сорауларга җавап бирү өлкәннәргә һәрвакыт җиңел генә бирелми. Аларга ярдәмгә профессор Никдияр килә! Ул бик кызыксынучан һәм сорауларга да җиңел һәм аңлаешлы итеп җавап бирә белә! Профессор Никдияр - чынлыкта исә бернинди дә профессор түгел, ә әтисе, әнисе һәм өч яшьлек сеңлесе Катя белән гадәти йортта яшәүче җиде яшьлек Сережа! Сережа телевизор караучыларга бик күп сораулар бирә һәм тамашачылар белән бергә аларга җавап та таба. Әгәр дә сез Сережа кебек үк, барысын да белергә телисез икән, «Профессор Никдияр» мультсериалын карарга киңәш итәбез! Эш көннәрендә 13:55 һәм 21:55 сәгатьләрдә «ШАЯН ТВ» экраннары каршына җыелыгыз!

05.06.2023

«ШАЯН ТВ» каналында яңа проект!

Милли мәдәният һәм гореф-гадәтләр елы кысаларында Татарстан Республикасында «Милләтем хәзинәләре» проекты тормышка ашырыла. Шул уңайдан, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе белән берлектә «ШАЯН ТВ» балалар каналы яңа проект тәкъдим итә! «Шаян рәссам» проектының «Милләтем хәзинәләре» циклы мәктәпкәчә яшьтәге һәм мәктәп яшендәге балалар өчен аңлаешлы һәм кызыклы рәсем ясау дәресләре форматында ясалган. Рәсем дәресләре Татарстан Республикасы территориясендә яшәүче халыкларга багышланачак. Болар - татар, рус, чуваш, удмурт, мордва, мари һәм башкорт милләтләре. Проект балаларга рәсем дәресләре аша Татарстанда яшәүче милләтләрнең мәдәнияте һәм көнкүреше, әйтик, милли ашлары, киемнәре, уен кораллары һәм башкалар белән танышырга ярдәм итә. Һәрбер роликта бер милләт турында сөйләнә. Мәсәлән, тапшыруда башкортларның кубызы, чувашларның милли баш киеме, удмуртларның милли киемнәре, татар халык ашлары кебек темалар яктыртыла. Проект ФильмФэй компаниясе белән берлектә эшләнде. Ул 30 сериядән тора, аларны июньнән башлап «ШАЯН ТВ» каналында күрергә мөмкин. Яшь чикләве юк, аны иң нәни тамашачылар да карый ала.

05.06.2023

Көтеп алган җәй җитте!

Көтеп алган җәй дә җитте! Уку елы тәмамлана, балалар каникулларга китә. Иң озын көннәр һәм иң кыска төннәр... Беренче җиләкләр өлгерә, урманда гөмбәләр барлыкка килә. Боларны әле бик күп санарга була! Нәрсә дисәң дә, табигатьнең иң матур, чәчкә чагы! Июнь аена һава торышы ниләр вәгъдә итә икән? Бергәләп танышыйк! * Июнь аеның беренче көннәрендә яңгыр ява икән, калган ай буе коры булачак. * Июньдә иртән су буйлап томан агыла икән, кояшлы яхшы һава булачак. * Әгәр сандугач төне буе сайрый икән, икенче көнне көчле җил булачак. * Июнь ае җылы булса, уңыш яхшы булачак. * Июнь аенда яңгырдан соң Салават күпере пәйда булса, һава торышы бик озак вакыт җылы булачак. * Төнлә яшен еш булса, уңыш мул булачак. * Әгәр тургай үз оясын җирдә кора икән, җәй бик коры булачак, ә агачта корса, яңгырлы була. * Әгәр миләш соң чәчәк ата икән, көз озын булачак. * Июньдә томан еш булса, гөмбәләр күп булачак. * Карлыгач җәй башлый, сандугачтан җәй тәмамлана. * Июнь аенда чәчәкләр чәчәк ата, сандугачлар җырлый, июнь аенда күңелле, ә ризык аз. * Чәчәк атучы миләшкә бал кортлары күп җыелса, икенче көнне һава торышы яхшы булачак. * Чыкның күплеге – уңдырышлылыкка, еш томан төшү – гөмбә күплеккә. * Июнь башы яңгырлар белән башланса, ахырында корылык көтегез.

02.06.2023

Бәйрәм бүген!

Кадерле ШАЯНнар! Сезне барыгызны да Халыкара балаларны яклау көне белән котлыйбыз! Бәхетле һәм сәламәт булыгыз! Әти-әниләрегез сезнең белән һәрвакыт горурлансыннар, аларның игътибарын, мәхәббәтен тоеп яшәгез! Йөзегездә һәрвакыт елмаю булсын! Сез – безнең киләчәгебез! Бәйрәм уңаеннан, «ШАЯН ТВ» каналы сезне Казан Кремле янына дәшә! Бездән шәп программа: җанлы аралашу, кызыклы остаханәләр, аниматорлар, мавыктыргыч уеннар, истәлекле бүләкләр! «ШАЯН ТВ» геройлары белән фотосессия да узачак! 13:00 сәгатьтә көтеп калабыз! Килегез, күңелле булачак!

01.06.2023

«ШАЯН ТВ» каналы Халыкара балаларны яклау көнен бергә үткәрергә чакыра!

1 июнь – Халыкара балаларны яклау көне уңаеннан, «ШАЯН ТВ» каналы нәни дусларына бик күп сюрпризлар әзерли һәм әлеге көнне бергә үткәрергә чакыра! Көн дәвамында онытылмаслык балачак мизгелләре һәм яхшы кәеф дулкынында безнең белән бул! Эфирда Өйдә утырырга яратучы тамашачыларны «ШАЯН ТВ» каналыннан үзенчәлекле бәйрәм тапшырулары программасы көтә. Сезне бик күп премьералар, өр-яңа мавыктыргыч мультсериаллар, кызыклы тапшырулар, бәйрәм концертлары көтә! Бары тик бәйрәм көнендә генә 09:40 сәгатьтә «ШАЯН балачак – 2022» концерты, 13:10да «ШАЯН»да «МИЛЛИ МУЛЬТFEST», 14:15тә «Апушның тылсымлы төшләре» спектакле, 10:55 сәгатьтә «Маша әкиятләре», 19:45 - «Маша җырлары», 21:10да «Юл күзәтчеләре» һ.б бик күп мультсериалларны карарга телевизор экраннары каршына җыелыгыз! Безне кайсы мәйданчыкларда табарга? Саф һавада күңелле ял итәргә теләүчеләр өчен 13:00 сәгатьтә без сезне Казан Кремле янында көтәбез! Бездән шәп программа: җанлы аралашу, кызыклы остаханәләр, аниматорлар, мавыктыргыч уеннар, истәлекле бүләкләр көтелә. «ШАЯН ТВ» геройлары белән фотосессия да узачак. Килегез! Күңелле булачак! Бүләкләр Шулай ук бәйрәм уңаеннан, «ШАЯН ТВ»ның Вконтакте төркемендә бик күп кызыклы бәйгеләр оештырылды, җиңүчеләр исә шәп бүләкләргә ия булдылар! Нәкъ менә 1 июнь көнне шундый бәйгеләрнең җиңүчесе «Вартазия» рестораны белән берлектә уздырылачак кичке ашка барачак. Кыскасы, бар яклап та бәйрәм булачак! Шулай итеп, ШАЯН ТВ» каналы барыгызны да бәйрәм белән котлый һәм 1 июнь көнен күңелле итеп уздырырга дәшә! «ШАЯН ТВ» белән бергә бул, телне саклау – менә безнең юл!

31.05.2023

«Бәллүр каләм» – «Хрустальное перо» XXVI

Бүген Казанның «Сәйдәш» мәдәният үзәгендә «Бәллүр каләм» – «Хрустальное перо» XXVI журналистика һәм массмедиа өлкәсендәге Республика бәйгесе лауреатларын бүләкләү тантанасы узды! Бирегә иң тәҗрибәле, профессиональ һәм танылган каләм осталары җыелды. «ШАЯН ТВ»ның бу чарада катнашуы очраклы гына түгел. Каналыбыз яшь буын журналистларны үстерү, белем бирү һәм тәрбияләү мәйданы булып тора. Быел каналга 5 ел тулу уңаеннан «ШАЯН ТВ» мәйданында бигрәк тә кызу булды! Каналның алып баручылары һәм төп геройлары мәртәбәле кунаклар белән бергә челлендж эшләде! Чарада «Сәйлән» телевизион музыкаль фестивале җиңүчеләре дә катнашты. Алар бәйрәм программасына ямь өстәде! Татарстанның халык артистлары белән бергә бер сәхнәдә чыгыш ясау безнең яшь йолдызларыбыз өчен зур дәрәҗә! Тантана кунаклары балаларны бик җылы кабул итте!

30.05.2023

«Бобр Добр» мультсериалы маҗараларга дәшә!

«Бобр Добр» мультсериалы сезне маҗараларга дәшә! Балаларга һәм аларның әти-әниләренә серле урман иленә сәяхәт итәргә һәм анда яшәүче дус, тату җәнлекләр белән танышырга тәкъдим итәбез! Тамашачыларны яхшы күңелле, бар эштә дә өлгер Бобр, кыю Бака, баллы яратучы Ябалак, хыялый Тукран, шат күңелле бертуган Куяннар һәм Бурсык белән очрашу көтә. Бурсык исә - урмандагы барлык борчуларның төп чыганагы. Бу герой бер минут та тик утыра алмый, төрле гадәти булмаган хәлләр булдырырга ярата. Шуңа күрә даими рәвештә күңелсез ситуацияләргә эләгә, алардан мөстәкыйль генә чыга алмый. Ярый әле Бобр һәрвакыт ярдәмгә килергә әзер. Һәрчак ул үзенең күршесен коткара, шулай ук урманда яшәүчеләргә ярдәм итә. Мультсериалны эш көннәрендә 13:35 һәм 21:35 сәгатьләрдә «ШАЯН ТВ» каналында карагыз!

29.05.2023

Премьера: «Безнең әлифба»!

Бүген «ШАЯН ТВ» каналында премьера! «Безнең әлифба» танып белү мультсериалы нәни тамашачыларны хәрефләр дөньясы белән таныштыра. Һәр хәрефне төсле анимацион рәсемнәр ярдәмендә үзләштерүе дә җиңел! Бүген 13:35 һәм 21:35 сәгатьләрдә «ШАЯН ТВ» каналында әлифба белән танышырга ашыгыгыз!

26.05.2023

1 ... 137 138 139 140 141 ... 375

Яңа сайт!