«Сәйлән» музыкаль фестивале яңа талантлар эзли!

«Сәйлән» фестивале яшь талантлар эзли! Үзеңне сынап кара һәм «ШАЯН ТВ» йолдызы бул! Тизрәк безнең сайтка кер, җырыңны яздырып, анкета тутыр һәм [email protected] адресына юлла! Тулырак мәгълүмат сылтама буенча.

Кояш көне!

Көннәр җылытып, күктән кояшның ягымлы елмаеп карый башлавының сере ачылды. Баксаң, Кояш көне килеп җиткән икән бит, дуслар! 3 май көнне бөтен дөньяда Кояш көне билгеләп үтелә. Кояш - Җир шарына иң якын бердәнбер йолдыз. Ул үзенең тирәсендә урнашкан күк җисемнәре белән Кояш системасын барлыкка китерә. Табигатьнең иң саф, яшәреп кенә килә торган чагы бит ул май башы! Ә үләннәр үсәргә, чәчәкләр бөреләнеп атарга ягымлы кояш бик кирәк. Әле алай гына да түгел, кояш безгә дә бик тансык. Матдәләр алмашын яхшыртырга, бетчәләрдән котылырга, иммунитетны ныгытырга, стрессларга каршы торучанлыкны арттырырга дисәң, май кояшыннан да яхшысы юк, диләр белгечләр. Бәхет һәм шатлык гормоны сератонин актив эшләнеп чыксын, кешенең кәефе тиешле югарылыкта булсын өчен дә кояш нурлары алыштыргысыз! Һава торышына карамастан, сезнең күңелегездә һәрчак кояш балкып торсын, дуслар!

Актив һәм күңелле яз «ШАЯН ТВ» да!

«ШАЯН ТВ» каналы агачлар утыртуда катнашты!

Дуслар, ял көннәрегез ничек үтте? «ШАЯН ТВ» каналы исә шәһәребезне яшелләндерүгә үз өлешен кертте! Ялларда каналыбызның алып баручылары Илзия һәм Динар «Сад памяти» акциясендә катнашты һәм агачлар утыртты!

Кыю робот маҗараларына кушылыгыз!

Яшь тамашачыларны кыю робот маҗараларына кушылырга чакырабыз! «МегаМен: тулы көчкә» мультсериалы бүгеннән кабат эфирда! Мультсериалның төп герое - Аки Лайт. Карап торышка ул гадәти малай, ләкин бу бер дә алай түгел. Аки - югары технологияле робот, аны галим доктор Лайт төзегән. Тормышны яратучы инженер Аки белән кызы Сунаны бергә тәрбияли. Гадәти булмаган әлеге гаилә роботлар белән Силикон-Сити шәһәрендә яши. Әмма шәһәр халкының тынычлыгын качкын роботлар боза, һәм алар Силикон-Ситига һөҗүм итәләр. Бәхеткә, Аки Лайт үзенең системасына кертелгән махсус программалар ярдәмендә күренекле сәләтләргә ия. Гади малайдан Аки Мегаменның супергероена әверелә! Аның иң мәкерле һөҗүмнәрдән дә саклый торган саклагыч җайланмасы бар, өстәвенә, Аки башка роботларның көчләрен һәм үзенчәлекләрен дә үзләштерә ала, гәрчә кайвакыт бу көтелмәгән нәтиҗәләргә китерсә дә. Батыр Аки Лайтка дошманнар белән көрәштә аның гаиләсе һәм тугры дуслары ярдәмгә килә! «МегаМен: тулы көчкә» мультсериалын эш көннәрендә 13:45 һәм 21:45 сәгатьләрдә «ШАЯН ТВ» каналында карагыз!

"Сәйлән" җиңүчеләре беренчелекне бирми!

"Сәйлән" телевизион музыкаль фестивале җиңүчесе Рөстәм Хөсәенов "Мирас" Халыкара татар мәдәнияте фестиваль-бәйгесендә 1 урынны яулады! Жюри аның чыгышына югары бәя биреп, Рөстәм махсус бүләккә дә лаек булды! Афәрин, Рөстәм! Котлыйбыз!

Яз һәм Хезмәт бәйрәме белән!

1 май – Яз һәм Хезмәт бәйрәме белән, дуслар! Яз сулышы күңелегезгә нур өстәсен, йөрәгегездә һәрвакыт шау чәчәкле май балкысын! Ялларыгыз күңелле үтсен!  

«ШАЯН ТВ» каналы ял көннәрен бергә үткәрергә чакыра!

Дуслар, иртәгә «ШАЯН ТВ» каналында «Яраткан шигырь» теле-радиопроекты янәдән эфирга чыга! Татар язучыларының иң яхшы әсәрләре, танылган артистлар катнашында театраль куелыш, талантлы балалар – барысы да бер проектта! Һәр әсәр гаҗәеп серле шигърият дөньясына алып керә. Шуның белән бергә, туган илебезнең бөтен матурлыгы, байлыгы чагыла. «Яраткан шигырь» проектын шимбә, көн дәвамында «ШАЯН ТВ» каналында карагыз! Ял көннәрен бергә үткәрик!