Яңалыклар

Кышкы каникулга киңәшләр!

Дуслар, ниһаять, көтеп алган кышкы каникуллар башланды! Ә сез аны күңелле һәм шул ук вакытта файдалы итеп үткәрү өчен исемлек төзедегезме әле? Без сезгә бу эштә ярдәм итәрбез! * Чыршы өчен үз кулыгыз белән уенчыклар ясагыз. * Кар бөртекләрен тотып уйнагыз. * Шәһәребезнең төрле матур урыннарына сәяхәт кылыгыз. * Күп итеп мандарин ашыгыз. * Дуслар белән бергә биек таудан “паровоз” ясап шуыгыз. * Кар өстендәге җәнлек эзләрен өйрәнегез. * Өйгә боз сөңгесен алып кереп, аның ничек эргәнен күзәтегез. * Кошлар өчен җимлек ясап элергез һәм көн дә гаҗәеп кошлар дөньясы белән танышыгыз. * Гөл төбенә төрле җиләк-җимеш орлыклары утыртыгыз һәм аларның ничек үскәнен күзәтегез. * Чаңгыда һәм тимераякта шуыгыз. * Зур итеп кардан сыннар ясагыз. * Имбирьдан төрле фигурадагы печеньелар пешерегез. * Кышкы урманда йөрегез. * Кышкы фотосессияга чыгыгыз. * Күргәзмәгә яисә музейга барыгыз. * Кайнар шоколад ясап эчегез. * Кызыклы китап укыгыз. * Күңелне җылытучы Яңа ел фильмнары карагыз. * Урманда термостан кайнар чәй эчегез. * Чыршы ылысларыннан өстегезгә кар коеп хозурланыгыз. * Туганнарыгызга кунакка барыгыз. * Компьютер артында мөмкин кадәр азрак утырырга тырышыгыз. * Җәйгә эшли эшләрегез өчен исемлек төзеп куегыз. * Ә, иң мөһиме, “ШАЯН ТВ” белән бергә булыгыз! Без сезгә каникулларны тагын да күңеллерәк итеп уздырырга булышырбыз!

29.12.2023

Яңа елда теләк теләүнең 5 ысулы

Яңа ел төне могҗизаларга бай вакыт. Сәгать телләре уникене сукканда күңел түрендә сакланган иң кадерле теләкләреңне теләсәң, алар һичшиксез кабул булачак. Ә без сезгә төрле теләк теләү ысулларын өйрәтеп китәбез. 1. 00:00дан соң 12 кечкенә кәгазьгә берешәр теләк язып чыгыгыз. Аларны бер-берсеннән аерып, мендәр астына салыгыз. Иртән, карамыйча гына, бер кәгазьне мендәр астыннан алыгыз һәм сез тартып чыгарган теләк яңа елда тормышка ашачак. 2. Яңа елга дип әзерләнгән киемегез эченә теләкләрегезне языгыз. Әйтик, акча, сәламәтлек һ.б. Курантлар сукканда кулны шул язу останә куегыз да, аларны инде кабул булган итеп күз алдыгызга китерегез. 3. Сәгать теле уникегә якынлашканда сикерә-сикерә теләк теләгез. 4. Теләкләрне алдан ясап куйган кар бөртегенә языгыз. Соңыннан аларны урамга чыгып, җилгә очырыгыз. Кар бөртекләре җиргә акрын гына төшәчәк. Шул вакытта теләгегезне инде кабул булган итеп күз алдына китерегез. 5. Яңа елда чәчәк бирү гадәте бик таралган булмаса да, чәчәкләр теләк теләгәндә бик нык ярдәм итә икән. Бүләк ителгән чәчәкләргә карап эчтән генә өч теләк әйтергә һәм аны үзең яраткан эчемлеккә салырга кирәк. Соңыннан аны чыршы астына куегыз. Сәгать унике тулганда теләкләрегезне кабат искә төшерегез һәм чәчәк таҗлары салынган эчемлекне эчегез.

29.12.2023

Марат Яруллинның эстрададагы кумиры кем?

Дуслар, көттегезме? Күп тамашачыларның соравы буенча, “Килде-Китте ШОУ”ның яңа чыгарылышында кунакта – популяр җырчы Марат Яруллин. Җырчы “Сагынырың” һәм “Ник килмисең?” хитларын кемгә багышлавы, эстрададагы кумирлары һәм Яңа елга теләкләре турында сөйләячәк. Марат Яруллин - татар эстрадасында иң көнләшерлек кияүләрнең берсе һәм без аның өчен тапшыруга таролог чакырдык. Ул җырчының булачак хатынын тасвирлаячак һәм якын арада булачак зур сатып алулары хакында фаразлар кылачак. Сылтама буенча безнең YouTube каналда карагыз.

28.12.2023

2024 ЕЛГА ЙОЛДЫЗЛАР ФАРАЗЫ (Дәвамы)

Дуслар, алда Яңа 2024 елга елга Кытай календаре йолдызнамәсен тәкъдим иткән идек. Дәвамын укырга чакырабыз. АТ Алдагы ел Ат өчен начар булмас. Ат ел буена диярлек игътибар үзәгендә булачак. Аның үзен җәмгыятьтә күрсәтү, танылу алу, чаралар һәм бәйрәмнәр оештыру белән шөгыльләнү мөмкинлеге артачак. Быел Атның теләкләре тормышка ашачак, ләкин аңа уңышка ирешергә теләгән өлкәдә бөтен көчен тупларга кирәк булачак. КӘҖӘ Яшел Аждаһа елында Кәҗә үзен үз стихиясендә тоячак, әмма аны зур булмаган кыенлыклар көтә. 2024 елда Кәҗәнең финанс проблемалары булмаячак, әмма зур табыш алу да көтелми. Аның шәхси тормышында барысы да яхшы. Кәҗәгә карьера һәм шәхси тормыш арасындагы баланс турында кайгыртырга кирәк, икесе дә аның өчен бик мөһим. МАЙМЫЛ Маймыл хәйләкәр һәм ул Аждаһа белән бик яхшы килешә, шуңа күрә ул ел буе үзен уңайлы хис итәчәк, тыныч кына үз эшләре белән шөгыльләнәчәк. Тормышы кайнап торачак. Маймылга үз сәләтләрен ачарга һәм иң кыю уйларын тормышка ашырырга мөмкинлек туачак. Бу белем ала башлау, һөнәр сайлау һәм яңаны үзләштерү өчен уңай чор. Рәсем Яндекстан алынды ӘТӘЧ Яңа ел Әтәчкә бик күп мөмкинлекләр ача. Ләкин аннан тырышлык һәм активлык кына түгел, әйләнә-тирәдәгеләргә игътибар да таләп ителә. Эштә Әтәч хезмәт хакын күтәрүгә һәм арттыруга ирешә ала, әмма моның өчен аңа актив рәвештә эшләргә туры киләчәк. Әгәр Әтәч максатына ирешү өчен җиңел юлны сайлый икән, бөтен теләкләрен тормышка ашыра алачак. ЭТ Эт елында туган кешеләр өчен 2024 елның чагыштырмача тыныч булуы көтелә. Космик җисемнәр ел дәвамында тормышның барлык өлкәләре өчен дә уңайлы булачак. Этнең финанслары әкренләп артачак. Йолдызлар аның өчен мөһим очрашу һәм сюрприз әзерләгән. Әгәр дә Эт гармониядә һәм үзен бәхетле тоя икән, ул планлаштырганга караганда, һичшиксез, күбрәк эшләячәк. ДУҢГЫЗ Дуңгыз елында туучылар өчен 2024 ел тулысынча имин һәм хәтта юмарт булачак. Дуңгыз үзенең теләкләренен тормышка ашырачак, бик яхшы нәтиҗәләргә ирешәчәк һәм шул ук вакытта үзен гармонияле хис итәчәк. Бу елның тенденциясенә игътибар итсәк – Дуңгызның шәхси файдасына юнәлтелгән барлык эшләр дә уңай булмаска мөмкин. Кыенлыклардан куркырга кирәкми, чөнки Дуңгыз Яңа ел хуҗасының яраткан хайваны, димәк, бу аның Агач Аҗдаһадан көчле яклау алачагын аңлата.

28.12.2023

Яңа ел фильмнары карар вакыт

28 декабрь - Халыкара кино көне! 1895 елның 28 декабрендә Парижда бертуган Люмьерлар “Гранд-кафе”да синематографның беренче сеансын тәкъдим итәләр. Һәм бу көн бөтен дөньяда кино туган көне буларак билгеләп үтелә башлый. Ул кинематографистлар бәйрәме генә түгел. Без, кино яратучылар да аны бәйрәм итә алабыз. Бигрәк тә Яңа ел алдыннан. “Язмыш ирониясе, яки Җиңел пар белән!” фильмы... Ничә дистә еллар дәвамында елның соңгы көнендә күрсәтүләренә дә карамастан, һәр елны аны көтеп алабыз, рәхәтләнеп карыйбыз. 1. Россиядә беренче фильм 1908 елда төшерелә. Ул нибары җиде минут дәвам итә. 2. Россиядә төшерелгән беренче төсле фильм экраннарга 1925 елда чыга. Ул Сергей Эйзенштейнның танылган “Броненосец Потемкин” фильмы була. Эйзенштейн матрослар күтәргән әләмне кинопленкада үзе кызыл төскә буйый. Бу - фильмдагы бердәнбер төсле кадр була. 3. 1935 елда Беренче Халыкара Мәскәү кинофестивале уздырыла. 4. 1965-1967 елларда төшерелгән “Война и мир” фильмы - иң кыйммәтле совет фильмы булып санала. Аны барлыгы якынча 135 миллион тамашачы караган. 5. Иң озын совет сериалы - Анатолий Иванов романы буенча төшерелгән “Вечный зов” фильмы.

28.12.2023

2024 ЕЛГА ЙОЛДЫЗЛАР ФАРАЗЫ

2024 ел – кәбисә елы. Бу уңайдан борчылыргамы, юкмы? Кытай календаре йолдызнамәсе барысын да сөйләр. КҮСЕ Күсе өчен Яшел Агач Аҗдаһа елы бик уңышлы булачак, ул барлык өлкәләрдә дә җиңү алып киләчәк. Бу ел эшмәкәрләргә уңай үзгәрешләр китерәчәк һәм карьера өлкәсендә тулаем күтәрелеш алып киләчәк. Әгәр дә Күсе үз тормышында нәрсәнедер үзгәртергә планлаштырса, 2024 ел - иң туры килә торган вакыт! ҮГЕЗ Ел Үгез өчен бик бай һәм перспективалы булачак. Эшкә керешергә генә кирәк, хәл ителмәслек булып тоелган проблемалар чикләвек кебек ватылачак. Бу ел үсеш өчен уңайлы: яңа һөнәр үзләштерүче яки үзлегеңнән белем алучыларны Аҗдаһа уңышка илтәчәк. Киләсе елда Үгез һөнәри өлкәдә дә дустанә мөнәсәбәтләр һәм элемтәләр урнаштырачак. ЮЛБАРЫС Аҗдаһа Юлбарыс өчен яхшы үзгәрешләр китерәчәк: бу ел иң уңышлы елларның берсе булачак. Финанслар елга булып акмаса да, бу чор киләчәк өчен яхшы керем юнәлтү чоры булачак. Карьера һәм финанс якның иминлеге юлбарысның ныклыгына бәйле. Юлбарыска бары тик мантыйгын эшкә җигәргә генә кирәк. Йолдызлар актив Юлбарысларны яңа мөмкинлекләр белән сөендерәчәк. Рәсем Яндекстан алынды КУЯН 2024 елда Куян, ниһаять, ял итә ала: Аҗдаһа аңа тынычлык һәм бәхет китерәчәк. Бу елны яңа идеяләр тудырырга яисә эшләнеп бетмәгән эшләрне төгәлләргә мөмкин. Әлбәттә, проблемалар барысында да була, әмма Куян аларны җиңелдән җиңә, чөнки дөрес юлны сайлый белә. АҖДАҺА Аҗдаһа 2024 елда барлык йолдызлар арасында да җиңүче булачак: ул бөтен җирдә беренче һәм барлык фронтларда да - эштә дә, шәхси тормышта да уңышка ирешәчәк. Аҗдаһа кыенлыкларга юлыга, әмма проблемалар аңа үсешкә һәм алга таба хәрәкәт итү өчен ярдәм генә итәчәк. 2024 елда Аҗдаһа өчен эш алыштыру, яңа белем алу, квалификация күтәрү бик җиңел һәм нәтиҗәле булачак. ЕЛАН Елан зирәк, Аҗдаһаның ялтыравыклары аның башын әйләндерә алмый. Ул эзлекле рәвештә үз эшен дәвам итәчәк һәм котылгысыз хәлләрдән чыгу юлларын табачак. Профессиональ өлкәдә Еланны яңа мөмкинлекләр көтә, һәм ул һичшиксез болардан файдаланачак. Финанс ягы да Еланны сөендерәчәк, барысын да планлаштыру өчен аңа иркенлек бирү генә кирәк. Йолдызнамәнең дәвамын алга та урнаштырырбыз, яңалыкларны күзәтеп барыгыз.

27.12.2023

Тагын бер нәни хыялыйның теләге чынга ашты!

Бөтенроссия «Теләкләр чыршысы» акциясе ел саен бөтен Россиядән булган балаларга иң яшерен хыялларын тормышка ашырырга мөмкинлек бирә. Шунысы шатлыклы, «ШАЯН ТВ» каналы икенче ел рәттән бу хыялларны чынга ашыру мәйданчыгы булып тора. Казаннан ун яшьлек Мәрьям бик иҗади һәм кызыксынучан кыз, җырлау, йөзү, рәсем ясау белән мавыга, мөстәкыйль рәвештә укулеледа уйнарга өйрәнгән. Аның Кыш Бабайга язган юлламасы Татарстан Республикасының җир һәм мөлкәт мөнәсәбәтләре министры Фәнил Әнвәр улы Әһлиуллин кулына барып эләкте. Кызның Яңа елга иң зур теләге - киностудиягә килү. Хыялын тормышка ашыру өчен бүген Мәрьямне «ШАЯН ТВ» балалар каналы студиясенә чакырдылар. Биредә яшь хыялый кыз телевидениенең гаҗәеп дөньясы белән таныша алды, программалар әзерләү процессын һәм фильмнарны яңгыратуны күзәтте. Моннан тыш, яшь кунак өчен «Болгар радиосы» студиясенә барып, радиостанция эшчәнлеге белән танышырга да мөмкинлек бирелде. Мәрьямне каналның алып баручысы Эльдар Гыйниятов каршы алды. Эльдар телевидениедә инде 5 ел эшли һәм үзен киноактер ролендә дә сынап карарга өлгерде. Шуңа күрә ул кунаклар өчен экскурсия генә үткәреп калмады, ә чын мастер-класс күрсәтте. «ШАЯН ТВ» каналы коллективы кечкенә хыялыйлар өчен Яңа ел могҗизасының бер өлеше булуы белән бик бәхетле һәм моның белән чиксез горурлана.

27.12.2023

Киләсе елның үзенчәлеге нәрсәдә?

Йомшак Куян белән хушлашып, Аҗдаһаны каршы алабыз. Хуҗасы Яшел Аҗдаһа булган 2024 ел - кәбисә елы. Ләкин куркырга ашыкмагыз. Яңа елга кергәндә позитив карашта булу бик мөһим. Кәбисә елы елмаеп торучы оптимистларны ярата. Ә һәрвакыт кашлары җыерылганнарны өнәп бетерми. Шулай да кайбер кисәтүләргә игътибар итәргә кирәк. Мондый елда ниндидер зур эшләргә тотынырга, үзгәрешләргә керешергә ярамый. Алдагы ел тотрыклылык ярата. Быел башланган эшләрне җайлап кына дәвам итәргә кирәк. Мифологик зат бик шәфкатьле, шуңа аның килүен алдан билгеләвегезгә һич ачуланмас. Аҗдаһа - көчле зат, ул максатчан кешеләргә уңыш алып килә. Ел хуҗасы бик зирәк тә. Ул конфликтларга кермәскә киңәш итә. Ә менә бурычлардан котылырга тырышыгыз. Ул “артык койрыклар”ны яратмый. Көнчыгыш календаренда Яңа ел һәрвакыт төрле даталарда башлана. Бу юлы Аҗдаһа патшалыкны 10 февральдә алачак. Ә алдагы елның 28 гыйнварында аның хакимлек вакыты тәмамланачак.

26.12.2023

1 ... 105 106 107 108 109 ... 376

Яңа сайт!