Яңалыклар

«Балачак җыры»на гаризалар кабул ителү тәмамлануга бик аз вакыт калды

Дуслар, «Балачак җыры» бәйгесенең бишенче сезонына гаризалар кабул итү тәмамлануга нибары 2 атна калды! Тизрәк гариза юлларга ашыгыгыз! Бүләкләр саллы: акчалата приз, җырның профессиональ аранжировкасы һәм клибы! Җырның текстын яисә көен [email protected] адресына җибәрегез. Гаризалар 30 апрельгә кадәр кабул ителә! Бәйге буенча тулырак мәгълүмат сылтама буенча.

17.04.2024

«ШАЯН ТВ»дан файдалы киңәшләр

Үзенчәлекле җиләк-җимеш авокадо – тәмле дә, файдалы да ризык. Аны әлегә кадәр кулланмаган булсагыз, рационыгызга кертми калмагыз. * Бу җимеш А, Е, F, K, В төркеме витаминнарына, калий, кальций, цинк, тимер һәм фосфор кебек минералларга бай. * Авокадо – майлы җимеш, әмма туендырылмаган ул майны организм җиңел үзләштерә. Ул тән тиресенә, чәч, тырнакларга яхшы тәэсир итә, организмның картаю процессын тоткарлый. * Моннан тыш, тән тиресен менә дигән итеп дымландыра. Изелгән авокадога бераз гына зәйтүн мае кушсаң, бит тиресе өчен бик шәп маска була. * Ул кандагы холестеринны киметә, иммунитетны арттыра. * Шулай ук организмдагы су-тоз балансын тигезли. * Ашкайнату, нерв һәм йөрәк-кан тамырлары системасы эшчәнлеген яхшырта. * Аны даими куллану күзләр өчен дә шифа. Андагы А витамины һәм каротиноидлар күзләрне картаюдан саклый. Авокадоны сайлаганда иң элек кабыгына игътибар итегез. Анда каралҗым таплар, тырналган эзләр булмаска тиеш. Бармак бите белән басканда, йомшак тоелсын. Катырагы эләксә дә борчылмагыз, банан кебек үк, авокадо да өзеп алганнан соң өлгерә. Аны фольгага төреп, целлофан капка салырга һәм караңгы урында өлгертергә мөмкин. Янына банан да салсагыз, өлгерүе тагын да тизләнә. Авокадоны ничек әзерләргә? Иң гади ысул – телемләп туралган җимешне хлебец өстенә тезеп, тоз-борыч сибәбез дә, ашыбыз әзер. Икенче вариант – салат. Бер авокадоны шакмаклап турап, кыздырылган тавык түше, черри помидоры, салат яфрагы турап кушабыз. Зәйтүн мае, тоз-борыч өстибез, лимон суы тамызабыз. Өченче ысул - иртәнге аш өчен әйбәт. Авокадоны урталай бүлеп төшен алабыз, чокырларны кашык белән чак кына тирәнәйтәбез. Һәркайсына берәр йомырка сытып, мичтә 30 минут пешерәбез. Ашларыгыз тәмле булсын!

17.04.2024

Йорт хайваннарын холык буенча сайлыйбыз

Тикшеренүләргә караганда, гаиләләрнең 60 проценты өендә берәр төр хайван асрый. Өстенлек, әлбәттә, мәчеләргә һәм этләргә бирелә. Кемнәрнеңдер экзотик җәнлекләре бар. Ничек кенә булмасын, без сезгә йорт хайванын холкыгызга карап сайларга киңәш итәбез. 1. Песи - ягымлы, ләкин буйсынмас холыклы җан иясе. Аны буш вакытыңны өйдә уздыру мөмкинлеге булса, төнлә тавышланып йөрүенә түзсәң, артыннан җыештырырга риза булсаң гына ал. Песи белән уйнарга вакытың булмаса, еш кына каядыр китәргә туры килсә, аның йорт җиһазларына зыян китерүеннән курыксаң, песи сиңа туры килми. 2. Эт - тугры, акыллы җанвар. Чын дус була белә. Буш вакытың күп булса, саф һавада җәяү йөрергә яратсаң, зур фатирда яшәсәң, сиңа нәкъ менә эт туры килә. Тик шуны онытма, этләр ялгызлыкны авыр кичерә. 3. Балыклар - иң тыныч җан ияләре. Башка йорт хайванын һәрвакыт карап, тәрбияләп торырга вакытың булмаса, еш кына каядыр китәргә туры килсә, бу җан ияләре сезгә ошаячак. Әгәр балыкларның ризыгына аллергия булса, аны алырга киңәш ителми. 4. Кимерүчеләр - күп урын һәм артык игътибар сорамый торган хайваннар. Әгәр йорт хайванына күп урын бүлеп бирү мөмкинлегең булмаса, зур хайваннар куркытса, кимерүчеләр синең өчен. Ләкин атнага 2-3 тапкыр читлеген чистартырга туры киләчәк. 5. Кошлар - сайрарга, тавышланырга яраталар. Кошлар сайравы күңелеңә хуш килсә, алар белән аралашырга яратсаң, сезгә канатлы дуслар туры килә. Тавыш яратмыйсың икән, кош алмавың хәерлерәк.

16.04.2024

«Туган тел-fest 2024»

13 апрель көнне «Бала-Сити» Халыкара мультилингваль балалар бакчасында татар теле укытучылары һәм тәрбиячеләре өчен «Туган тел-fest 2024» фестивале узды. Чара Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән оештырылды. Фестиваль татар теле укытучылары, тәрбиячеләре өчен тәҗрибә уртаклашу һәм яңа идеяләр тудыру мәйданчыгына әверелде. Очрашу барышында тәҗрибәле белгечләрдән мастер-класслар, кызыклы әңгәмәләр үткәрелде. Укытуның нәтиҗәлелеген арттыру, балаларда татарча аралашу телəге тусын өчен, дәресне ничек алып барырга кирәклеге кебек мәсьәләләр күтәрелде. Чарада «ШАЯН ТВ» каналы да катнашты. Укытучыларны үзенең татар телендәге белем бирү проектлары белән таныштырды. Күргәзмәдә педагогларга кече яшьтәге балаларга белем бирү, үзлектән өйрәнү өчен файдалы кулланма булып торучы «Балачак җыры» Халыкара балалар җыры бәйгесе җыентыгын, «ШАЯН Әлифба», «ШАЯН рәссам» һәм «ШАЯН саннар» интерактив проектларын тәкъдим итте. Беренче балалар каналының балалар яратып өлгергән төп персонажы – Шаян да кунакларның күңелен күреп кайтты!

15.04.2024

Яңа мультсериал: «Сиа - Бөек сугышчылар дивары сакчысы»

«ШАЯН ТВ» каналы өр-яңа «Сиа - Бөек сугышчылар дивары сакчысы» мультсериалын тәкъдим итә! Бүре Сияга бик күп сынаулар аша узарга туры килә. Кечкенә вакытында ук ул әти-әнисен югалткан, әмма сабыйны үлән белән тукланучы хайваннар коткарып кала. Сиа үсә һәм бәйсез һәм кыю холкы белән аерылып тора. Ул үзенең туган авылын мәкерле дошманнардан саклаучы чын сугышчыга әйләнергә хыяллана. Аның иптәше - куян баласы һәм кечкенә бозау. Сия исә, булачак маҗараларында дусларын да катнаштырырга тели. Әмма йомшак куян баласы аларның йортларына берни дә янамавына ышана. Тик бик тиздән яшь каһарманнарга күп сынаулар үтәргә туры киләчәк. Сия һәм аның дуслары бөтен дөньяны яулап алырга карар кылган императорның мәкерлекләренә каршы торачаклар. Мультсериалны эш көннәрендә 12:00 һәм 20:00 сәгатьләрдә карагыз.

15.04.2024

Космонавтларга космоста еларга киңәш ителми

Космонавтика көне белән, дуслар! 12 апрель илебез тарихы өчен истәлекле көн! Моннан 63 ел элек Юрий Алексеевич Гагарин дөньяда беренче тапкыр космоска оча. Космонавт Байконур космодромыннан “Восток” ракетасында ача. Очыш 108 минут дәвам итә һәм ул исән-имин Җиргә әйләнеп кайта. * Космоста булган беренче хайваннар - Белка һәм Стрелка кушаматлы этләр. Алар 1960 елның августында очыш ясыйлар. Ә айда беренче тапкыр ташбакалар була. * Космоста булган беренче хатын-кыз - Валентина Терешкова. Ул 1963 елда «Восток-6» кораблендә Байконур космодромыннан оча. Очу өч тәүлек дәвам итә. * 2001 елның 28 апрелендә космоска беренче турист - Америка эшкуары Деннис Тито оча. Ул сәяхәт өчен 20 миллион доллар түли. * Космонавтларга космоста еларга киңәш ителми, чөнки күз яшьләре, авырлыклары булмау сәбәпле, биткә агып төшми, ә күзләр өстендә шарлар рәвешендә кала. * Айның кире ягындагы кратер Юрий Гагарин хөрмәтенә аталган.

12.04.2024

Җирән төлке-космонавт

Җирән исемле төлке-космонавт яшәгән. Ул үз планетасының иң яшь һәм талантлы космонавты булган. Ул йолдызга очкан беренче төлке булырга хыялланган. Космик экспедициядә катнашуга чакыру алгач, аның хыялы тормышка аша. Ул галактикалар буйлап ерак сәфәргә кузгала. Үз юлында бик күп гаҗәеп җан ияләрен очрата һәм бик күп маҗаралар кичерә. Бервакыт ул аңлы үсемлекләр яши торган планетага эләгә. Алар аңа үзләренең борынгы цивилизацияләре турында сөйлиләр һәм төлкене яңа белемнәргә өйрәтәләр. Аннан соң Җирән төлкеләргә охшаган җан ияләре яшәгән планетага эләгә. Алар дустанә һәм кунакчыл булалар. Җирәнне үз гореф-гадәтләренә өйрәтәләр. Ниһаять, төлке үзенең соңгы максатына - дөньядагы иң акыллы җан ияләре яшәгән планеталарга барып җитә. Алар белемнәре белән уртаклашалар һәм аны вакыт һәм пространство белән идарә итәргә өйрәтәләр. Үз планетасына кайткач, Җирән чын герой һәм барлык төлкеләр өчен остазга әверелә. Нейросеть ярдәмендә язылган һәм ясалган әкият

12.04.2024

Җиһанда – яз...

Яз килде! Кояш нурларын көннән-көн күбрәк чәчә. Ул бөтен табигатьне йокыдан уятырга тели. Яз айлары керүгә, табигатьтәге үзгәрешләр көннән-көн күбрәк күренә. Апрель ае − язның аеруча кайнап торган чагы. Хәзер инде кар көннән-көн кими. Кар өстеннән каралып язгы ташу акканы күренә. Ул үзенә бертөрле күңеллелек белән ага. Елгада бозлар кузгала. Зур-зур бозларның агып киткәнен карап торуы үзе күңелле! Бар халык елга буена боз киткәнен карарга бара. Беренче чәчәкләр, умырзаялар баш калкыта! Җылы яклардан, туган якларын сагынып, яз хәбәрчеләре − сыерчыклар, кыр казлары кайта. Бар дөнья аларның шат җырына күмелә! Тиздән сап-сары тузганаклар да күренә башлар. Җир йокыдан уяна. Яз инде тулы хокук белән үз көченә керешә. Өй кыекларыннан тамчылар тама. Язгы җылыдан кар эреп, гөрләвекләр ага. Урамда иртәдән кичкә кадәр балаларньң шат тавышы ишетелеп тора. Күңелле дә соң яз айлары!

11.04.2024

1 ... 83 84 85 86 87 ... 375

Яңа сайт!