Яңалыклар

Бала хокук даирәсендә

Бүген, 20 ноябрь көнне, «ШАЯН ТВ» балалар каналы зур чарада катнашты. «Бала хокук даирәсендә» V Республика мәгълүмати-социаль видеороликлар бәйгесенә нәтиҗәләр ясалды. Быел бәйгегә 200 дән артык эш җибәрелгән, шуларның унысы гына җиңүче булды. Ә «ШАЯН ТВ» балаларга зур бүләк ясады. Җиңүче дип табылган видео авторлары үз эшләрен «ШАЯН ТВ» каналында күрә алачак. Ә син үз хокукларыңны беләсеңме? Һәр бала яшәүгә хокуклы. Дәүләт баланың сәламәт үсүен һәм исән- имин яшәвен булдыра алган кадәр тәэмин итәргә тиеш. * Һәр бала туганнан алып исемгә һәм гражданлык алуга хокуклы. * Тормышына куркыныч янамаса, бала әти-әнисеннән аерылырга тиеш түгел. * Башлангыч белем алу бушлай һәм мәҗбүри булырга тиеш. * Балалар ялга һәм уенга, өлкәннәр белән беррәттән иҗат эшчәнлегендә катнашырга хокуклы. * Дәүләт баланы икътисади эксплуатацияләүдән, сәламәтлеккә зыян китерердәй, белем алуга комачаулардай эштән яклап калырга тиеш. * Дәүләт баланы наркотик матдәләр кабул итүдән, бу матдәләрне җитештерү һәм сатудан сакларга тиеш. * Дәүләт балаларны урлау һәм алар белән сату-алуга каршы көрәшергә тиеш.

20.11.2018

«Ни өчен» - тешләрне чистартырга кирәк?

Сәлам, синән сорыйсым килә, сиңа да әти-әниең шулай эшләргә, болай эшләргә кирәк дип әйтәме? Ә син алар әйткәнне тыңламыйча киреләнәсеңме? Туктале, син шундый кирлемән мени? Дустым, әти-әниләр безгә һәр вакыт яхшылык кына тели. Менә мәсәлән, алар безгә иртә-кичен тешләрне чистартырга кушалар. Ә син беләсеңме ни өчен тешләрне чистартырга кирәк икәнне? Белмәсәң, белеп кал! Ашаганнан соң безнең теш араларында ризыклар качышлы уйнап калалар. Ә аларның кайберләре шундый шәп итеп качалар, хәтта күпмедер вакыт узгач онытылып шунда да калалар. Шул вакыт аларның кәефләре төшә һәм алар кайгыдан карала, чери башлыйлар. Шаян ризык кисәкчәләре явыз бактерийларга әвереләләр һәм безнең тешләрне җимереп, безнең тешләргә хуҗа булырга телиләр. Алар башта безгә начар ис белән һөҗүм итәләр. Ә аннары инде безнең тешләрне үзләренең саргылт ташлары белән буяп, басып алырга телиләр. Ә кайбер явыз бактерийлар тешнең үзәгенә үк кереп аларны эчтән дә җимерергә сәләтле. Брр, ничек итеп теш сызлаганы искә төште. Юк мин тешемнең авыртуын һәм аны явыз бактерийлар басып алуын теләмим! Әгәр синдә дә андый хәл булуын теләмәсәң, иртән йокыдан торгач һәм кич йокларга ятыр алдыннан тешләреңне чистарт! Әгәр ашаган саен авызыңны су белән чайкатсаң, кич тешләреңне чистартсаң, бактерийлар һөҗүмендә сиңа ике- өч тапкыр җиңелрәк булачак.

20.11.2018

Без шаярырга хокуклы...

Ура-а-а-а!!! Бүген бәйрәм. Ә сез беләсезме бүген нинди көн? Ел саен 20 ноябрь көне бала хокукларын яклау көне буларак билгелә үтелә. Бу көнне безнең әти-әниләр безгә карата аеруча игътибарлы. Шуңа күрә берәр бүләк сорасак та була. Ә син үзеңнең хокукларыңны беләсеңме? Берсен әйтә алам: без рәхәтләнеп шаяра, уйный алабыз. Безнең белән бергә «ШАЯН ТВ» карап шаярып яшә!

20.11.2018

Президентыбыз Шаянны бик яратты...

Безгә бәхеттән канатлар үсеп чыкты. Беләсеңме, ни өчен? Беренчедән, кичә, 12 ноябрь көнне, балалар өчен тәүлек әйләнәсе татар телендә эшләүче «ШАЯН ТВ» каналы ачылды. Туган көнебез белән котларга иң көтелгән кунак - Татарстан Республикасы Президенты Рөстәм абый Миңнеханов үзе килде. Икенчедән, кызыклы сәхифәләргә бай shayantv.ru сайты үз эшен башлап җибәрде. Сайтыбызга кереп, син тапшыруларны туры эфир аша карый аласың. Өстәвенә, кызыклы уеннар уйнау мөмкинлеге дә бар. Видеокәрәзгә кереп исә мавыктыргыч мультфильмнар, тапшырулар карый аласың. Ә хәзер бергәләп туган көн мизгелләрен барлыйк. Шаян белән Биби президентыбызны бераз дулкынланып, әмма зур түземсезлек белән көтте. Ә менә зуррак алып баручылар өчен канал ачылу кебек тарихи вакыйгада катнашу икеләтә җаваплылык өстәде. Әлеге көн алар өчен зур, бик зур мөмкинлек ача. Рөстәм абыйны студия белән таныштырдык, кызыклы тәҗрибәләр ясап күрсәттек, җырлы батл оештырдык. Президентыбыз Шаянны бик яратты, аны үзенең инстаграмына да урнаштырды. Шаяннар барлыгы 10 805 лайк җыйды. «ШАЯН ТВ» каналында сезнең өчен мавыктыргыч тапшырулар, кызыклы мультфильмнар һәм сериаллар күрсәтеләчәк. Шунысы сөендерә, бу канал тапшыруларында без үзебез дә катнаша алабыз. «ШАЯН ТВ» каналына озын гомер телибез!

13.11.2018

«Каналны ачтык!»

12 ноябрь көнне 12:00 сәгатьтә shayantv.ru сайты ачылды. Шул ук көнне Татарстан Республикасы Президенты Рөстәм Нургали улы Миңнеханов, хәер-фатихасын биреп, «ШАЯН ТВ» каналын ачты! Канал хезмәткәрләре белән аралашып, аларга уңышлар теләде.

12.11.2018

«Татар кызы-2018» титулын Татарстан быел да алырмы?

Без «ШАЯН ТВ» ачылуга сөенеп йөргән арада, Казаныбыз барлык төбәкләрдән иң сөйкемле, иң сәләтле, татар гореф-гадәтләрен һәм традицияләрен хөрмәт иткән, туган телен белгән татар кызларын бергә җыя.16 ноябрь көнне Татарстан тарихында беренче тапкыр «Татар кызы-2018» Халыкара гүзәллек бәйгесе узачак. Әзерлек эше кызу. Дистә көн дәвамында гүзәлкәйләр сәхнәдә үзен тотарга өйрәнәчәк, сәнгатьле сөйләм, вокал һәм хореография белән шөгыльләнәчәк. Шулай ук татар кызлары өчен мавыктыргыч күңел ачу программасы да әзерләнгән. Быел Татарстан данын Балтач кызы Гүзәл Габдрахманова яклый. Гүзәл сүзләренә караганда, Татарстанның җиңәргә барлык шанслары да бар. Ышанабыз сиңа, Гүзәл! Кызларның һәрберсе белән сез «Яшьләр тукталышы» тапшыруының 11 ноябрь чыгарылышыннан таныша аласыз.

11.11.2018

Синнән яңалыклар көтәбез

Алисә 5 нче сыйныфта укый. Ул бик актив кыз. Алисә яхшы билгеләргә генә укый, волейбол уйнарга ярата, рәсем һәм чигү түгәрәкләренә йөри, шигырьләр иҗат итә. Бүген ул укыган мәктәпкә фокуслар күрсәтүче абый килеп, укучыларга төрле могҗизалар күрсәткән. Алисә өй эшләрен әзерләп бетергәч, гап-гади кәгазьдән тере чәчәкләр ясаучы фокусчы абый турында безгә язып җибәрде. Әле алай гына да түгел, өстәвенә, ул безгә матур фотосурәтләр дә юллаган. Син дә Алисә кебек үк, мәктәбегездә булган яңалыкларны, үзең язган шигырь яисә әкиятләрне, безгә җибәрә аласың. Ә без синең язмаңны башка шаян дусларыбыз да күрсен өчен «Яңалыклар» бүлегенә беркетербез. Килештекме? Без синнән кызыклы язмалар көтәбез... Язмаларыңны безнең электрон почтага юллый аласың [email protected] яки шушы сылтама буенча узып форманы тутыр

10.11.2018

Безне котларга онытма!

Барыбыз зарыгып көткән көнгә озак калмады. "ШАЯН ТВ" балалар каналы 12 ноябрь старт алачак. Безне котларга онытма!!! Матбугат конференциясенә килгән апа-абыйлар "ШАЯН ТВ" тапшыруларын карап, фикерләрен ак кәгазьгә яздылар. Аларны син интернет һәм басма чыганаклардан укый аласың.

07.11.2018

1 ... 372 373 374 375 376

Яңа сайт!