Яңалыклар

Татарстан Республикасы Матбугат көне белән!

Бүген – сүз, яңалыклар һәм мәгълүмат дөньясы белән бәйле һәркем өчен үзенчәлекле көн: Татарстан Республикасы Матбугат көнен билгеләп үтәбез! Бу бәйрәм безгә журналистларның, редакторларның, хәбәрчеләрнең һәм мәгълүмат таратучы башка белгечләрнең җәмгыять өчен никадәр мөһим булуын искәртә. Алар кешеләргә дөреслекне җиткерә, яңалыклар белән таныштыра һәм туган тел, мәдәният белән бәйләнешне сакларга ярдәм итә. Быел бу көн аеруча истәлекле – нәкъ 120 ел элек беренче татар газетасы «Нур» дөнья күрә. Ул чын мәгънәсендә милли матбугат үсешенә нигез сала. Шул вакыттан бирле Татарстанда дистәләрчә газета, журнал, интернет-сайтлар, һәм, әлбәттә, телеканаллар барлыкка килә – алар татар телендә иң әһәмиятле яңалыкларны җиткерә. Бүген мәгълүмат – гади генә хәбәр түгел. Ул – тәрбия, белем, халыкны берләштерү чарасы. Һәр кеше үзен зур җәмгыятьнең әһәмиятле өлеше итеп тоярга тиеш. Аерым рәхмәт сүзләребезне – «ШАЯН ТВ» телеканалы журналистларына җиткерәбез! Сезнең эшегез белән чын күңелдән горурланабыз! Балалар һәм яшүсмерләр өчен мөһим темаларны гади, аңлаешлы тел белән җиткерүегез – зур хезмәт. Киләчәктә дә сезгә яңадан-яңа уңышлар, иҗади проектлар һәм илһам телибез! Бәйрәм белән!

19.05.2025

Кызыклы фактлар

Музейлар турында

Һәр елның 18 мае Халыкара музейлар көне буларак билгеләп үтелә. Бу – яраткан музееңны яңадан карау, яисә күптән барырга теләгән, әмма һаман барып җитеп булмаган музейга юл тоту өчен менә дигән сәбәп! Менә сезгә музейлар турында берничә кызыклы һәм гаҗәп факт: Музейлар турында кызыклы фактлар: 1. Дөньяда иң күп кеше йөри торган музей – Лувр музее Ул Париж шәһәрендә урнашкан һәм елына 7 миллионнан артык кеше кабул итә. Ә аның иң мәшһүр экспонаты – Леонардо да Винчиның «Мона Лиза»сы – нибары 8 килограмм гына авырлыкта. 2. Музейлар бары тик сәнгать турында гына түгел Дөньяда шоколад, икмәк, песиләр, катоклар, хәтта начар сәнгатькә багышланган музейлар да бар. Һәр кеше үзенә кызыклы теманы таба ала. 3. Беренче музей Борынгы Грециядә барлыкка килгән Аның исеме «Мусейон» булган һәм ул сәнгать һәм фән илаһлары – музаларга багышланган. «Музей» сүзе дә шуннан килеп чыккан. 4. Кайбер музейларда экспонатларга кагылырга да мөмкин Бу – интерактив музейлар. Алар бигрәк тә балалар арасында популяр. Мисал өчен, фәнни үзәкләрдә тәҗрибәләрне үзең ясап карыйсың, модельләрне эшләтеп җибәрергә була! 5. Ачык һавадагы музейлар да бар Мондый музейларда борынгы авыллар, йортлар, көнкүреш әйберләре күрсәтелә. Анда үткән заманга чынбарлыкта кебек күчеп була. Татарстанда музейлар Безнең республикада да музейлар күп һәм алар бик төрле: -Татарстан Республикасы Милли музее – иң зур музей, 1895 елда нигез салынган. -Чәкчәк музее (Казан) – чәкчәкнең тарихы һәм рецепты белән таныштыра. Моннан тыш, этнография, тарихи-мәдәни һәйкәлләр, хәтта бер генә предметка багышланган музейлар да бар. 18 майда күп кенә музейларга керү бушлай була. Үз шәһәрегезнең афишасын карагыз – янәшәгездә үк яңа тәҗрибә көтеп торырга мөмкин. Бәйрәм белән! Музейлар – ул бары тик экспонатлар гына түгел. Алар – тарих, хәтер, мәдәният, һәм безнең кем булуыбызны аңлау ысулы.

18.05.2025

Канал яңалыклары

«Иман әлифбасы»

Күңелле хәбәр! Бүген «ШАЯН ТВ» каналында яңа уникаль телепрограмма – «Иман Әлифбасы»ның 5 нче чыгарылышы чыкты! Әлеге проект балаларны аралашу һәм практик шөгыльләр аша ислам дине белән таныштыруга юнәлгән. «Иман Әлифбасы» тапшыруының яңа чыгарылышын ВКонтакте төркемендә карамый калма!

17.05.2025

Канал яңалыклары

«ШАЯН ТВ» KazanForum 2025тә булып кайтты

Татарстанда ХVI Халыкара «Россия – Ислам дөньясы: KazanForum 2025» икътисади форумы уза! Форум кысаларында «Мәдәни контекстта Россиянең анимацион индустриясе: традицияләр һәм инновацияләр синергиясе» темасына сессия узды Чарада «ШАЯН ТВ» каналының Башкарма директорының беренче урынбасары - Роза Рәшит кызы Әдиятуллина чыгыш ясады. Ул хезмәттәшләребез белән телеканалның тәҗрибәсе, казанышлары һәм эше белән уртаклашты Дуслар, тиздән безнең социаль челтәрләрдә әлеге чараг обзор чыгачак!

17.05.2025

Кызыклы фактлар

Дөньяны нурга күмгән көч

Һәр көн яктылык белән башлана. Яктылык булмаса, иртәләр дә, үсемлекләр дә, китап уку да, хәтта елмаю да булмас иде. Яктылык – ул тик гади яктылык кына түгел. Ул – тормыш нигезе, белем чыганагы, галимнәр, рәссамнар һәм шагыйрьләр өчен илһам чыганагы. Яктылык дөньяны күрергә ярдәм итә. Ул кояштан, лампалардан, учактан, шәмнәрдән һәм экраннардан килә. Яктылык булмаса, кешеләр тирә-юньне күрә алмас иде, ә үсемлекләр – кислород чыгара алмас иде. Яктылык төрле була. Кайвакыт ул җылы, кояш нуры кебек. Ә кайчагында салкын – йолдызларның нуры кебек. Әмма һәр очракта да ул дөньяны матур һәм күренерлек итә. Фәндә яктылык -Яктылык галимнәр өчен һәрвакыт сер булып торган. XVII гасырда Исаак Ньютон ак яктылыкның барлык төсләрне – кызылдан шәмәхегә кадәр – үз эченә алганын күрсәтә. -Альберт Эйнштейн яктылык ничек хәрәкәт итә икәнен өйрәнеп, кояш панельләрен эшләргә ярдәм иткән ачышлар ясаган. -Астрономнар ерак йолдызлар һәм планеталар турында нәкъ яктылык аша беләләр. Ул дулкыннар Җиргә кадәр килеп җитә. -Яктылык лазерлар, телескоплар, микроскоплар һәм башка күп кенә җайланмалар эшләүгә нигез булып тора. Сәнгатьтә яктылык -Рәссамнар гасырлар буе яктылык белән эшләргә өйрәнгән. Алар сурәттә якты нурлар, күләгәләр, кояш батышын, шәмнәрне күрсәтеп, сурәтләрне «терелтәләр». -Кино һәм театрда яктылык атмосфера тудыра: серле, әкияти яки шатлыклы. Без барыбыз яраткан мультфильмнарда да яктылык – сюжетның мөһим өлеше. Мәсәлән, фонарьлар кабына, йолдызлар яна башлый. -Фотографлар да «яктылык белән рәсем төшерәләр» – фотоның матур килеп чыгуы яктылыкка бәйле. Мәдәнияттә яктылык Күпчелек мәдәниятләрдә яктылык – яхшылык, белем һәм җылылык символы. Мисал өчен: -Борынгы Мисырда кояш – Алла булып саналган. -Һиндстанда Дивали дип аталган бәйрәм бар – яктылыкның караңгылык өстеннән җиңүе көне. -Әкиятләрдә герой еш кына якты чыганак алып бара: фонарь, факел яки күңелендәге якты нур – изгелек. Яктылык көне – безгә белем, яхшылык һәм матурлыкның нәкъ яктылык булуын искә төшерә. Бу көн дөньяга яңа, яктырак күзләр белән карарга мөмкинлек бирсә иде!

16.05.2025

Кызыклы фактлар

Гаилә көне белән, дуслар!

15 май – иң җылы, иң якты бәйрәмнәрнең берсе – Халыкара Гаилә көне. Бу көнне якыннарыбызны кочаклыйсы, матур сүзләр әйтәсе, алар белән бергә рәхәтләнеп вакыт үткәрәсе килә. Чөнки гаилә – ул терәк, җылылык, күңел тынычлыгы, безне һәрчак көтеп торучы оя. Без беләбез: иң кадерле мизгелләр – бергә уздырылган мизгелләр. Бергә көлү, хыяллану, яраткан мультфильмнарны карау, тәэсирләр белән уртаклашу – болар барысы да тормышны тагын да ямьлерәк итә. Безнең «ШАЯН ТВ» телеканалы – үзе дә зур һәм тату гаилә! Һәм сез, кадерле тамашачыларыбыз, безнең гаиләнең иң кадерле өлеше! Ышанычыгыз, җылы сүзләрегез, бергә булуыгыз өчен зур рәхмәт! Бәйрәм белән! Йортларыгызда мәхәббәт, тынычлык һәм шатлык мәңге яшәсен!

15.05.2025

Канал яңалыклары

Артур Шамгунов белән ихлас әңгәмә

Дуслар! Бүген «ШАЯН ТВ»ның ВКонтакте төркемендә «Килде-Китте ШОУ»ның яңа чыгарылышы чыкты! Бу юлы бездә кунакта – танылшан блогер Артур Шамгунов. Ул уллары белән мөнәсәбәтләре, психотерапия тәҗрибәсе һәм татарча монолог турында сөйләде. Тулысынча карыйсыгыз килсә – сылтама буенча узыгыз!

15.05.2025

Популяр яңалыклар

Яңгырлар кайчанга кадәр барыр?

Соңгы көннәрдә Казанда һава торышы яңгырлы булса да, җылы температура белән шатландыра. Бүген 14 майда шәһәрдә көн буе яңгыр явып тора, җилнең тизлеге секундына 11 метрга кадәр җитә. Шулай да, һава температурасы +16 °Cка кадәр күтәрелеп, һава торышын бераз йомшарта. Синоптиклар яңгырларның әкренләп тукталачагын хәбәр итә. Иртәгә, 15 майда, аз күләмле кыска вакытлы яңгырлар көтелә. Шул ук вакытта һава температурасы +17 °Cка кадәр күтәреләчәк, бу исә көнне тагын да җылырак итәр. 16 майдан исә Казандагы һава торышы чын язгы җылы белән сөендерәчәк. Яңгырлар туктаячак, һәм һава тагын да ныграк җылыначак. Алдан фаразлар буенча, киләсе көннәрдә температура +22 °Cка кадәр җитәчәк: кояшлы, коры һәм рәхәт һава торышы көтелә. Атна ахырына казанлылар кулчатырсыз һәм юка киемнәрдән саф һавада рәхәтләнеп йөри алачак.

14.05.2025

1 ... 31 32 33 34 35 ... 387

Яңа сайт!