Июль аена ышанулар

Җәйнең уртасы июльнең дә бер атнасы узып китте. Без ай саен табигатькә бәйле халык сынамышларын барлыйбыз. Әйдәгез, июль аеның нинди булачагын бергәләп күзәтик.  Июль эссе булса, декабрь суык килә.  Әгәр июль иртәсендә томан суга таралса, яхшы һава торышы көтегез.  Әгәр иртән чык булмаса, кичкә яңгыр явачак. Июль иртәсендә җылы яңгыр явып китсә, көндез һава торышы яхшы булыр. Әгәр июльдә билчән күп икән, салкын кыш булачак.    Карлыгачлар очканда, канатлары белән суга тиеп алса, яңгырга. Июльдә мул чык - мул кыяр уңышына. Июльдә агачларда сары яфраклар күренсә, иртә көз һәм кышка. Урманда җир җиләге һәм кара җиләк өлгерсә, тиздән ак гөмбә китәчәк.

ШАЯН рецепт: чөгендер яфрагыннан кәтлит

Тәмле марафонның да ахырына якынлаштык. Бүген тәкъдим итәчәк рецепт буенча ясалган ризык та табыныгыз күрке булыр, дип ышанабыз. Чөгендернең файдасы турында барыбыз да белә, тик менә яфрагын сирәк кеше генә ашап караганы бардыр. Бүген алардан кәтлит ясыйбыз.  Кирәк булачак: Чөгендер яфрагы - 30 данә; Йомырка - 2 данә; Тоз, борыч - тәменчә; Он - 5 аш калагы.  Яфракларны турыйбыз, йомырка, тоз, борыч салып болгатабыз. Онны өстибез. Кәтлитләр ясап, майлы табада ике яклап кыздырабыз.  Безнең туклыклы, файдалы кәтлитләр әзер. Табынга каймак белән бирәбез.  Тәмле булсын! Марафон кагыйдәләрен дә онытмагыз! Пешергәч, инстаграмда фотосын куеп, безне билгеләп, #шаянрецепт хештегын да языгыз. 

ШАЯН рецепт: "Цезарь" салаты

"Цезарь" салатын яратмаган кеше бармы икән? Җиңел генә ясала, туклыклы. Бакчада җиләкләр белән бергә яшелчәләр дә өлгереп килә. Өстәвенә бүген "Цезарь" салаты көне дә әле.  Кирәк булачак: Тавык филесы – 500 грамм; Помидор – 200 грамм; Салат – 1 зур бәйләм; Сарымсак – 1 тырнак; Батон – 150 грамм; Йомырка -  1 штука; Лимон согы – 2 аш кашыгы; Горчица – 1 чәй кашыгы; Зәйтүн мае – 2 аш кашыгы; Сыек май – тәменчә/ тавык кыздыру өчен; Тоз – тәменчә; Кара борыч – тәменчә.  Ясый башлыйбыз. Тавыкны эре итеп турап, әзер булганчы майда кыздырабыз. Батон пичтә яки табада майда кыздырып алырга була.  Соус ясау өчен, йомырканы 2-3 минут пешереп алабыз. Аннары шуңа зәйтүн мае, лимон согы, горчица кушып блендер белән болгатабыз. Тоз, борыч өстәп, тагын блендер белән болгатабыз.  Салат яфракларын эре итеп өзгәлибез дә зур тәлинкәгә салабыз. Тавык, помидор, кызган батон кисәкләрен кушабыз да, сыр уып, соус белән болгатабыз. Йомырка белән бизәргә мөмкин.  Тәмле булсын! 

Казан - «Хезмәт батырлыгы шәһәре»

Казанга «Хезмәт батырлыгы шәһәре» дигән исем бирелде.  Мактаулы исем бирү турында Россия Президенты Владимир Путинның указы Кремль сайтында чыкты. Документта билгеләп үтелгәнчә, әлеге мактаулы исем «шәһәр халкының 1941-1945 еллардагы Бөек Ватан сугышында Җиңүгә сизелерлек өлеш керткәне, сәнәгать предприятиеләрендә хәрби һәм гражданнар продукциясе җитештерүне өзлексез тәэмин иткәне, хезмәттә батырлык һәм фидакярлек үрнәге күрсәткәне өчен» бирелә.  Татарстан башкаласына мактаулы исем бирелү уңаеннан, «Казан» гаилә үзәге янында 5 минутлык бәйрәм салюты булды.

ШАЯН рецепт: җиләкле коблер

   Тәмле ризыклар әзерләүне дәвам итәбез. Бүген сезнең белән җиләкле коблер пешерәбез. Исеменә карасаң, үзенчәлекле ризыкка охшаган. Ләкин әзерләү бик җиңел, бары тик күтәренке кәеф кенә кирәк. Кирәк булачак: · 80 гр. шикәр комы; · 80 гр. ак май; · 150 мл сөт; · 1 ч.к. ванилин; ·  200 гр. он; ·  5 гр. сода; ·  2 йомырка; ·  шикәр пудрасы; · 800 гр. үзегез яраткан җиләк-җимеш.     Шикәр комы белән майны болгатыгыз. Йомыркаларны туглап, майга кушыгыз. Сөт, ванилин һәм сода белән онны да өстәгез. Майланган табага җиләк-җимешләрне тезеп чыгыгыз һәм әзер камырны агызыгыз. 180 градуска кадәр җылытылган мичтә 35 минут пешерегез.Суытылган коблерны шикәр пудрасы белән бизәгез. Туңдырма белән тагын да тәмлерәк булачак.

ШАЯН рецепт: җиләктән мармелад

Бүген сезгә җиләкле мармелад рецепты тәкъдим итәбез. Әле җиләкләрнең иң тәмле, сусыл вакыты. Кыш көне каткан җиләктән дә ясарга була. Кирәк булачак: Җиләк – 1 кг Шикәр комы – 3 стакан Агар-агар (желатин яки пектин) – 2 а.к. Җиләкне юып, яфракларын чистартып, блендер белән изәбез. Шикәр комын өстәп, плитәгә куябыз. Болгатып, акрын утта пешерәбез. Масса куера башлагач, аз-азлап агар-агарны өсти башлыйбыз. Бер туктамый болгатып, җиләкле массадан мармелад ясыйбыз. Аннары төрле формалы савытларга салып суытабыз да, суыткычка алып куябыз. Безнең өй шартларында ясалган мармелад әзер! Чәйләрегез тәмле булсын!

ШАЯН география

ШАЯН рецепт: җиләкле ботка

Дуслар, сезне тәмле рецептлар белән "сыйлавыбызны" дәвам итәбез. Бүгенгесе манный боткасын яратмаучыларга да ошаячак.  Кирәк булачак: җиләк  — 100 грамм манный ярмасы — 4 аш калагы шикәр комы  — 2 аш калагы тоз  — тәменчә ваниль шикәре  — 2 грамм су  — 400 миллилитр Җиләкләрне юып, мискәгә салабыз, су өстәп плитәгә куябыз. Кайнап чыккач, тоз белән шикәр комын өстәп, тагын 10 минут пешерәбез. Аннары, җиләкләрен сөзеп алып, кайнап торган җиләк суына манный ярмасы салабыз. Болгата-болгата куерганчы пешерәбез. Ахырда ваниль шикәре яки ваниль өстибез. Ботканы бераз суынгач, блендер белән изәбез. Бик тәмле иртәнге аш әзер. Җиләкләр белән бизәп, табынга бирәбез!  Ботканы каткан һәм башка җиләк-җимешләрдән дә пешерергә була. Ашларыгыз тәмле булсын! Пешергәч, фотосын инстаграмга куеп, @shaiantv билгеләргә һәм #шаянрецепт дип язарга онытмагыз!