Яңалыклар

Игътибарлы булыгыз!

Игътибарлы булыгыз!

Дуслар, каникулларыгыз ничек уза? Җәйге ялларда куркынычсызлык кагыйдәләрен үтәү өчен, әйдәгез әле, юл йөрү кагыйдәләрен искә төшереп китик! *Урамда бик игътибарлы булырга, машиналар йөри торган урыннарда уйнамаска кирәк! *Светофор булмаса, урам аркылы җәяүлеләр юлы аша чыгарга кирәк! *Светофорның яшел уты кабынганчы көтеп тор! *Якын-тирәдә машиналар булмаса да, юлны йөгереп чыкма, светофорның кызыл яки сары төсендә кузгалма! *Син чыгасы юлда машиналарның туктаган булуына инан! *Якында синең юлыңа борылучы машина булу-булмавын игътибар белән кара! *Җәяүлеләргә тротуар буенча, уң яктан гына йөрергә ярый! *Әгәр синең яшең ундүрттән ким икән, велосипедта ишегалдында яисә махсус площадкаларда гына йөрергә рөхсәт ителә! *Трамвайга утыру өчен юлны трамвай туктап беткәч кенә чыгарга кирәк! *Тукталышта автобус һәм троллейбусны арттан, ә трамвайны алдан урап узарга кирәк!  

28.06.2022
Чәчәкләр – тормыш бизәге!

Чәчәкләр – тормыш бизәге!

Җәй - ел фасылының иң матур, бөтен җиһан ямьгә төренгән чагы. Июнь — ул чәчәкләр ае. Шушы айда болын-кырлар чәчәккә күмелә. Әйләнә-тирәдәге матурлыкка сокланып туеп булмый. Бу айда бал кортлары да армый-талмый эшлиләр, бал җыеп калырга тырышалар. Без барыбыз да чәчәкләр яратабыз. Бакчаларыбызда ниндиләре генә үсми аларның. Җәй буе хуш исле лаләләр, розалар, кашкарыйлар, лилияләр тирә-юньгә ямь биреп утыралар. Без аларга көн дә су сибәбез, чүпләрен утыйбыз, аларга карап сокланабыз, ләззәт алабыз, чөнки чәчәкләр җанга рәхәтлек бирәләр, күңелебезне күтәрәләр. Иң гүзәл чәчәкләрнең берсе - роза чәчәге. Гөлчәчәкне роза дип йөртү борынгы римлылардан калган, диләр. Безнең көннәргә кадәр үк гөлчәчәкне «чәчәкләр патшасы» дип йөрткәннәр. Роза — тропик якларга хас булган үсемлек. Моннан 4000 еллар элек аны Вавилонда, Иранда күпләп үстергәннәр. Аннан соң гөлчәчәк башка илләргә дә тарала башлаган. Нинди генә халык һәм ил булмасын, һәркайсында гөлчәчәк — халыкның иң яраткан чәчәге. Аны Алла бүләгенә тиңләгәннәр. Ул хәзер дә үз кыйммәтен югалтмый. Ислемайлар җитештерүдә дә гөлчәчәк кадәр киң кулланылган тагын нинди үсемлек бар икән? Розаны нәзберек гөлләр рәтенә кертәләр. Ул кояш нурлары төшә торган, ачык, әмма җилсез урынны ярата, ләкин корылыкны «җене сөйми». Җәен бу гөлгә суны күп сибәргә кирәк. Шулай ук иртә-кич җылымса су бөркү яхшы. Гөлчәчәк - төрле авыруларга да дәва. Аның согын төрле мазьларга кушалар. Порошогын бал белән кушып, авыз эче бозылганда файдаланалар. Чәчәген уып, баллы су белән эчеп, тән температурасын төшерәләр. Аннан төрле майлар да ясыйлар. Әлеге хуш исле чәчәкләр белән ләззәтләнеп калырга өлгерик!

28.06.2022
«Врумиз»!

«Врумиз»!

«Врумиз» мультсериалын карап барасызмы? Зиппи Сити шәһәрендә һәрвакыт кызыклы вакыйгалар булып тора. Биредә сез җәнлек-машиналар – гепард Спиди, маймыл Банга, болан Фарра, панда ПиТи һәм жираф Джиральдина белән танышырсыз! Спиди шәһәр буйлап җилдерергә ярата һәм чемпион булырга хыяллана. Врумизның тормышлары куркыныч һәм сюрпризларга бай. Машиналар гел нидер уйлап табалар һәм беренчелек өчен ярышалар! Дүшәмбедән җомгага кадәр «Врумиз» мультсериалын 08:10, 11:00, 12:45, 16:10, 19:00 һәм 20:45 сәгатьләрдә «ШАЯН ТВ» каналында карагыз!  

25.06.2022
«Алтын каләм»

«Алтын каләм»

«ШАЯН ТВ» каналы «Алтын каләм – Золотое перо» XXVII Республика балалар, яшүсмерләр һәм яшьләр матбугаты фестивалендә 3 урын яулады! Каналның алып баручылары Зилә Хәбибуллина һәм Салават Зәйнулин исә «Ришвәткә каршы көрәш турында иң яхшы сюжет» номинациясендә җиңделәр! Бу фестиваль күп кенә яшьләргә журналист булырга мөмкинлекләр ача. Медиа өлкәсе белгечләре белән эшләү, газета, телетапшыру, блог булдыру –катнашучыларга шундый мөмкинлек бирелә. Җиңүчеләрне чын күңелдән котлыйбыз! Чиксез горурланабыз! Алга таба да яңа үрләр яулавыгызны телибез! 

24.06.2022
Кызыклы фактлар!

Кызыклы фактлар!

Сезнең игътибарыгызга хайваннар дөньясы турында гаҗәеп кызыклы фактлар тәкъдим итәбез! * Әкәм-төкәм тоташ 3 ел йоклый ала. * Казлар караҗиләк ярата. * Крокодиллар телен чыгара алмый. * Акчарлаклар тозлы су эчә ала. * Кырмыскалар беркайчан да йокламый. Алар көнгә ике тапкыр 8әр минут ял итеп ала. * Күбәләкләр азыкның тәмен аяклары белән белә. * Күселәрне кытыкласаң, алар көлә ала. * Сукыр тычкан төн эчендә 300 метр озынлыктагы тоннель казый ала. * Атларның хәтере яхшы. Алар кешеләрне, әйберләрне, шулай ук кайчандыр белгән һөнәрләрен истә калдыра. * Ак аюлар сулагай була. * Филнең теше 200 кгга кадәр була ала. * Арысланнар 2 яшь тулмыйча ырылдый алмый. * Дөя 2 атна сусыз тора ала.

23.06.2022
«Балачак җыры»ның бишенче концерты!

«Балачак җыры»ның бишенче концерты!

Бүген «Сәйдәш» мәдәният үзәгендә «Балачак җыры» концертлар циклының бишенче концерты үтте. Әлеге чара Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән һәм «Мәрхәмәт-Милосердие» Татарстан Дәүләт Советы хатын-кыз депутатлары оешмасы белән берлектә уздырылды. Монда Казанның мәктәп укучылары җыелды. Концертта «Сәйлән» фестивале җиңүчеләре «Балачак җыры» бәйгесендә җиңгән шат җырларны яңгыраттылар. Мөхтәрәм кунаклардан бәйрәмдә Россия кооперация университеты ректоры, ТР Дәүләт Советы депутаты, «Мәрхәмәт-Милосердие» Татарстан Дәүләт Советы хатын-кыз депутатлары оешмасы рәисе Алсу Рөстәм кызы Нәбиева, ТР Дәүләт Советы Президиумы әгъзасы, Татарстанның халык артисты Рамил Чыңгыз улы Төхвәтуллин, «Бердәм Россия» Партиясенең Казан җирле бүлеге башкарма секретаре, «Мәрхәмәт-Милосердие» Татарстан Дәүләт Советы хатын-кыз депутатлары оешмасы әгъзасы Ольга Михаил кызы Воронова да бар иде. Концертны карарга килгән тамашачылар «ШАЯН ТВ» балалар каналының яраткан персонажлары белән дә фотога төшә алды. Алар балалар белән уйнадылар, чын бәйрәм кәефе бүләк иттеләр! Бу юлы Казан кооперациясе университетының Татар мәдәнияте үзәге эшчәнлеге турында күргәзмә Бөек Ватан сугышында катнашкан батырларга багышланган иде. Биредә «Батырлар Аллеясы» китабы тәкъдим ителде. Басмада Татарстанның hәр районы уз каhарманын таба ала. Алар арасында сугыштагы батырлыгы өчен Советлар Союзы Герое исеменә лаек булучылар, Муса Җәлил һәм аның көрәштәшләре, язучылар, композиторлар, гомумән, фронтның алгы сызыгында көрәшкән каһарман якташларыбызның кыскача биографиясе белән танышырга мөмкин. Бәйрәм бик эчтәлекле, җанлы, искиткеч булды! Тамашачыларыбыз да канәгать калды!

21.06.2022
Казан Сабантуе!

Казан Сабантуе!

19 июнь көнне Казанда Сабантуй гөрләп узды! «ШАЯН ТВ» каналы да әлеге күркәм чарадан читтә калмады: балалар өчен күңелле уеннар, җыр-бию, остаханәләр оештырды, концерт куйды. Каналның төп геройлары да нәни дусларыбызның күңелләрен күрде! Алар балалар белән шаярдылар-көлделәр, рәхәтләнеп күңел ачтылар, фотога төштеләр. Иң актив, һәм җитезләргә «ШАЯН ТВ» каналы бүләкләр өләште! Кыскасы, чын бәйрәм булды! Барысы да канәгать калды! Барлык тамашачыларыбызга да зур рәхмәт!

20.06.2022
Prev. 1 ... 247 248 249 250 251 ... 425 Next
Главная Программа Видео Шортс Поиск