Яңалыклар

Кара карлыган нәрсәдән файдалы?

Кара карлыган нәрсәдән файдалы?

Тәлгәш-тәлгәш булып, кара карлыган да өлгереп килә! Быел аның унышы мул булырга охшап тора. 14 июль - карлыган көне дә икән! Аның сәламәтлек өчен ничек файдалы булуын сез әле белеп тә бетермисездер! Карлыганда С витамины искиткеч күп, организмны тәүлек буена җитәрлек дәрәҗәдә тукландыру өчен 20 җиләк ашап кую да җитә. Ул йөрәк эшчәнлеген яхшырта, иммунитетны ныгыта. Анда В, Р, Е, А, С, К төркеменә караган витаминнар, фосфор кислотасы, шикәр, тимер һәм калий күпләп тупланган. Карлыганның җимеше генә түгел, яфраклары да бик файдалы. Кыш көннәрендә карлыган яфраклары салып әзерләнгән чәй тәмле, хуш исле булуы белән генә түгел, организмда витаминнар запасын тулыландыруы белән дә шифалы булачак. Шунысы сөенечле: теләсә нинди халәттә дә бу җимеш үзенең барлык файдалы үзлекләрен саклап кала. Аның белән сыйланып, үзегезгә ел буена җитәрлек витаминнар запасы җыеп калырга ашыгыгыз, дуслар!

14.07.2022
«ТАТАР СҮЗЕ» Халыкара нәфис сүз телевизион бәйгесендә катнашырга ашык!

«ТАТАР СҮЗЕ» Халыкара нәфис сүз телевизион бәйгесендә катнашырга ашык!

«ТАТАР СҮЗЕ» өченче Халыкара нәфис сүз телевизион бәйгесенә гаризалар кабул итү дәвам итә! Катнашырга ашыгыгыз! Премиаль фонд 1000 000 сум. Катнашучыларның эшләре түбәндәге яшь категорияләрендә бәяләнә: 10 яшькә кадәр булган катнашучылар, 11 яшьтән 17 яшькә кадәр, 18 һәм аннан өлкәнрәкләр. Чыгышлар проза һәм шигърият номинацияләрендә бәяләнә. Бәйгедә шулай ук профессионаллар, үз шигырен, әсәрен сөйләүчеләр, иҗади гаиләләр дә катнаша ала. Конкурста катнашу өчен видео форматындагы эшне һәм анкетаны ике дәүләт телендә [email protected] рәсми почтасына җибәрергә кирәк. Гаризалар 2022 елның 31 октябренә кадәр кабул ителә. Тулырак мәгълүмат shayantv.ru һәм tnv.ru сайтларында. Милләтебезнең йөзен билгеләүче, туган тел сагында торучы мондый чарадан читтә калмагыз!

14.07.2022
«ШАЯН ТВ»да кунакта!

«ШАЯН ТВ»да кунакта!

Бүген бездә кунакта Мәликә Нәбиева булды. Ул Финляндиядә журналистика бүлегендә укый һәм татар теле турында сюжет төшерә. Бүген ул «ШАЯН ТВ»га килеп, каналның татар телендә белем һәм тәрбия бирү, телне үстерү өлкәсендә эшләгән хезмәте белән танышты. Студиябез буйлап сәяхәт итте, төшерү серләренә төшенде, дубляж студиясендә дә кунакта булды. Популяр тапшырулар, аның алып баручылары һәм катнашучылары белән танышты, алар белән якыннан аралашты. Әлеге материаллар аның тикшеренү эшенә дә кертеләчәк.

13.07.2022
«Капитан Кракен һәм аның командасы»!

«Капитан Кракен һәм аның командасы»!

Тапкыр капитан-осьминог Кракен өч кечкенә оныгы белән тамашачыларны дөнья буенча сәяхәткә, күңелле маҗараларга һәм кызыклы ачышларга чакыра! Кап-кара диңгез төбендә коточкыч куркыныч Кракен яши. Ә чынлыкта исә ул бөтенләй дә явыз түгел, ә корабльнең хөрмәтле капитаны һәм өч кечкенә оныгы - Флип, Кря һәм Сью өчен яраткан бабалары. Капитан бабай белән берәүгә дә күңелсез түгел! Кракен җитәкчелегендә әлеге диңгез гаиләсе көн саен үзләренә онытылмаслык маҗаралар эзли һәм ниндидер яңалыкларга юлыга. Иртәгәдән нәни тамашачыларыбызны гаҗәеп су асты дөньясына юнәлергә һәм «Капитан Кракен һәм аның командасы» мультсериалын карарга чакырабыз! Дүшәмбедән җомгага кадәр 06:35, 14:35 һәм 22:35 сәгатьләрдә «ШАЯН ТВ» каналында карагыз!  

12.07.2022
Җәйнең кыл уртасы!

Җәйнең кыл уртасы!

12 июль – керәшеннәрнең җәйге бәйрәме, Питрау көне. Җәйнең кыл уртасы дигән сүз. Борынгылар питрау җитте – җәй үтте, дип тә әйтәләр. Әлеге бәйрәм җәй көненең чиге дип билгеләнгән. Халык аны печән өсте, урак өсте, көз башы дип каршылаган. Шулай ук Питраудан соң кошлар да сайравыннан туктый. Чыннан да, игътибар итеп карагыз әле, бу көнне нәкъ көндезге 12дә кошлар тынып кала. Үсемлекләр дөньясында да үзгәрешләр башлана. Питрауга кадәр җыеп киптерелгән дару үләннәре, чәчәкләр бик шифалы булып санала. Бүгеннән соң аларның шифасы бетә дигән ышану йөри. Мунча себеркесен дә бу көнгә кадәр әзерләсән, яхшы саклана. Питрауда көн аяз булса - ел яхшы килә; әгәр күке кычкыраудан туктаса, кыш иртә килә дигән сынамышлар яши. Әйдәгез тикшереп карыйк әле! Бу көнгә булган ышанулар табигатьнең алга таба торышында нинди үзгәрешләргә китерер икән?

12.07.2022
Баллы бәйрәм!

Баллы бәйрәм!

Бүген баллы яратучылар өчен менә дигән бәйрәм - Бөтендөнья шоколад көне! Бу бәйрәмгә 1995 елда французлар тарафыннан нигез салына. Шоколад күп кешенең яраткан ризыгыдыр, мөгаен. Кемдер аннан башка үзенең тормышын күз алдына да китерә алмый. Аны даими куллану гомерне озайта, ди белгечләр. Шоколад - диетада да ашарга яраклы булган тәм-томнарның берсе икән. Бер телем кара шоколад ашап кую – ашыйсы килү теләген дә озакка баса. Фән билгеләвенчә, шоколадта кешене ял иттерүче һәм психологик яктан тернәкләнергә ярдәм итүче элементлар бар. Аның кара сортлары эндорфиннар - бәхет гормоннары бүлеп чыгара, кәефне яхшырта. Шоколад яратучы балалар хәтта мәктәптә дә яхшырак укый икән! Томышларыгыз шоколад кебек татлы булсын, дуслар!

11.07.2022
Корбан гаете мөбарәк булсын!

Корбан гаете мөбарәк булсын!

Иң зур дини бәйрәмнәребезнең берсе булган Корбан гаете мөбарәк булсын! Изге Корбан бәйрәме һәрберебезнең күңеленә иман нуры өстәсен, игелекле эшләргә һәм гамәлләргә әйдәсен, һәр йортка, һәр гаиләгә иминлек, шатлык һәм якты өметләр алып килсен! Аллаһы Тәгалә безгә бәхет, сәламәтлек, илебезгә тынычлык, муллык һәм хәерле бәракәтен иңдерсен. Хәерле ниятләребез һәм изге хыял-максатларыбыз тормышка ашсын. Котлы булсын бөек бәйрәмебез Корбан гаете!

09.07.2022
Prev. 1 ... 195 196 197 198 199 ... 376 Next
Главная Программа Видео Шортс Поиск