Яңалыклар

Бүген әби-бабайлар көне!

Бүген әби-бабайлар көне!

28 октябрь - Халыкара әби-бабайлар көне! Бүген без иң якын кешеләребезне - әбиләребезне һәм бабайларыбызны бәйрәм белән котлыйбыз! Әти-әниләр белән бергә алар балага гаҗәеп дөнья серләренә төшенергә ярдәм итәләр. Әти-әни аңламаганда да алар безне күбрәк аңлыйлар. Әйдәгез, оныклар, оныкчыклар, әти-әниләр әби-бабаларыбызны, әти-әниләребезне котлыйк әле! Аларга исәнлек-саулык, озак яшәүләрен телик! Дәү әнине, дәү әтине Әби-бабайлар диләр, Иң өлкән кешеләр белән Бәхетле гаиләләр.   Дәү әниләр, дәү әтиләр, Гаиләдә булсалар, Тәрбияле, мәрхәмәтле Булып үсә балалар.   Сөенеч ул өлкәннәргә Оныкларның булуы, Онык-оныкчыклар белән Өй эчләре тулуы.   Дәү әниле, дәү әтиле Гаиләләр күп булсын, Пар канатлы, сәламәт Балалар гына тусын!   Бик зур бәйрәм менә бүген, Әби-бабайлар көне! Дәү әниләр, дәү әтиләр, Котлыйбыз бүген СЕЗНЕ!                    Фәймә Зәйнуллина

28.10.2022
«Сәйлән» фестиваленең өченче финал чыгарылышын карарга чакырабыз!

«Сәйлән» фестиваленең өченче финал чыгарылышын карарга чакырабыз!

Бүген, 28 октябрь «ШАЯН ТВ» каналының YouTube каналында «Сәйлән» музыкаль фестиваленең өченче финал чыгарылышының премьерасы чыгачак! Эксклюзив тапшыруны карамыйча калмагыз! Без сезне гадәти булмаган җырлар дөньясына чакырабыз! Бу юлы нәни йолдызларыбыз «Үзгәреш җиле» татар җыры фестиваленә язылган аранжировкалар белән альтернатив җырлар башкарып, көч сынашачаклар! Аларга һәрвакытагыча татар эстрадасының иң шәп артистлары үз бәяләрен бирәчәкләр. Татарстанның халык артисты Венера Ганиева, танылган җырчылар Илгиз Шәйхразиев, Әмир Әхмәдишин, балаларга төпле киңәшләрен биреп, тәҗрибәләре белән уртаклашачаклар! Кызу булачак! 19:00 СӘГАТЬТӘ ҮЗЕБЕЗНЕҢ YOUTUBE КАНАЛДА КӨТӘБЕЗ!   Шулай ук якшәмбе көнне «ШАЯН ТВ» каналында 11:30 һәм 17:00 сәгатьләрдә «Сәйлән» проектының яңа чыгарылышын карагыз! Ялларны бергә уздырыйк!

28.10.2022
Тел көрмәкләндергечләрне бергәләп әйтәбез!

Тел көрмәкләндергечләрне бергәләп әйтәбез!

Тизәйткечләр, икенче төрле аларны тел көрмәкләндергечләр дип тә атыйлар. Алар авыр әйтеләләр, ләкин шуның белән сезнең сөйләмне җайларга да булышалар. Ягъни аларны халык тарафыннан иҗат ителгән, уйлап табылган тел төзәтү чаралары дип тә атарга буладыр. Балаларның телен ачтырганда, төрле авазларны дөрес әйтергә өйрәткәндә, я булмаса, җитди чыгышлар ясаганда тизәйткечләр бик булыша. Сез дә аларны әйтеп, сөйләм телегезне шомартып, күңелегезне күтәреп алыгыз әле! * Кар аттым, кар аттым, ап-ак карны каралттым. * Тукый, тукый тукыган, тугыз талны чукыган. * Сигез сыер асраганчы, симез сыер асра. * Әрәмәдәге әрем әче. * Башта башлап, баскыч башына бас. * Кара карга кардан бара, канатларын кага-кага. * Чыпчык, чыпчык, чык, чыпчык, чык-чык, кошчык, очып чык. * Тау башында таллыкта тукраннар тукылдый. * Такта какма, капка как! Капка какма, тотка как! * Таулар биек таллардан, тал бөресе балланган. * Юлга егылгаласам да, елгага егылгалаганым юк. * Җәйнең ямьле көннәрендә җиләк җыя Җәмилә.    

27.10.2022
Кояш һәм ай тотылган көннәрдә нәрсәләр эшләмәү хәерле?

Кояш һәм ай тотылган көннәрдә нәрсәләр эшләмәү хәерле?

Кояш яки Ай тотылу - астрономиядә дә һәм астрологиядә әһәмиятле вакыйга. Ул һәрвакыт сынаулар һәм үзгәрешләр белән бәйле. Өстәвенә, бу юлы аларның тотылуы бер-бер артлы бара. Ишеткәнсездер, бу вакыйга 25 октябрьдә Кояш тотылу белән башланды һәм 8 ноябрьдә, Ай тотылу белән тәмамланачак. 25 октябрь көнне Ай Кояш дискының өлешен каплап, Җир өстенә Айның ярымкүләгәсе генә төште. Бу вакыйганы күпләр күреп калырга ашыкты, чөнки киләсе зур Кояш тотылу 2030 елда гына булачак. 8 ноябрьдә исә сирәк күренеш - өлешчә Ай тотылуның шаһиты була алачакбыз. Ул 14:02 сәгатьтә максималь фазага җитәчәк. Ләкин Россиядә бу күренеш көннең якты вакытына туры килү сәбәпле, ул күренмәскә мөмкин. Астрологлар бу вакыйгага ныклап әзерләнә. Ай бу вакытта Үгезбозау йолдызлыгында, шуңа күрә Үгезбозау, Кысла, шулай ук Арыслан, Кыз, Чаян, Кәҗәмөгез, Сукояр һәм Балык йолдызлыгында туучыларга күчеш чоры тәэсир итәчәк. Әлеге вакыйгалар кешегә төрлечә йогынты ясарга мөмкин. Астрологлар әйтүенчә, бу көнне барлык йолдызлык билгеләренең кимчелекләре «уяначак». Кешеләр арасында аңлашылмаучанлыклар артачак. Ачу килүләр, дөрләп кабынып китүләр күзәтелергә мөмкин. Шуңа күрә бер-береңә карата игътибарлы булу сорала. Дулкынлануларга, хис-кичерешләргә бирелергә, сәер теләкләргә һәм омтылышларга иярергә ярамый.Шулай ук бу көнне яңа эшләр башламау хәерле, үпкәләтүчеләрне кичерегез дип тә киңәш итә астрологлар.          

27.10.2022
«ТАТАР СҮЗЕ» бәйгесенә гаризалар кабул итү тәмамлануга санаулы көннәр калды!

«ТАТАР СҮЗЕ» бәйгесенә гаризалар кабул итү тәмамлануга санаулы көннәр калды!

«ТАТАР СҮЗЕ» өченче Халыкара нәфис сүз телевизион бәйгесенә гаризалар кабул итү тәмамланырга санаулы көннәр калды! Килгән видеоларның сезгә дә тәкъдим итәбез һәм эшләрегезне көтеп калабыз! Кичекмәстән, [email protected] почтасына юллагыз! Премиаль фонд 1000 000 сум. Чыгышлар проза һәм шигърият номинацияләрендә бәяләнә. Сораулар буенча 8(917)391-07-87 WhatsApp номерына мөрәҗәгать итә аласыз. Тулырак мәгълүматshayantv.ru һәм tnv.ru сайтларында.

26.10.2022
«ШАЯН ТВ» каналында премьералар дәвам итә!

«ШАЯН ТВ» каналында премьералар дәвам итә!

Дуслар, «ШАЯН ТВ» каналы сезне үзенең берсеннән-берсе гаҗәеп премьералары белән сөендерүен дәвам итә! Иртәгә, 26 октябрь «Робот поездлар» мультсериалы зәңгәр экраннарга чыгачак! Бер тылсымлы илдә йөк машиналары сөйләшеп кенә калмыйлар, ә тулы канлы тормыш белән яшиләр, хәтта роботларга да әйләнә беләләр. Алар арасында үзенең югары тизлеге белән аерылып торучы көчле электропоезд Кей аерылып тора. Ул тумыштан лидер, үзенә карата башкаларда һәрвакыт соклану уята. Кейның тугры дуслары бик күп, ул беркайчан да дошманнарыннан качмый. Көндәше Дюк исә аның ышанычын яулый. Алар бергә бик мөһим миссия - континентларны тоташтыра торган тимер юл төзү белән мәшгуль. Җай чыгуын көтеп, хакимиятне яратучы Дюк Кейга туннельдә һөҗүм итә. Поездга исән калу бәхете елмая, ләкин ул хәтерен югалта. Алга таба нинди маҗаралар булуын беләсегез килсә, эш көннәрендә, 08:55 һәм 16:55 сәгатьләрдә «ШАЯН ТВ» каналында «Робот поездлар» мультсериалын карагыз!

25.10.2022
«Тамашачы мәхәббәте»н яулаган җиңүче билгеле!

«Тамашачы мәхәббәте»н яулаган җиңүче билгеле!

Бүген «Сәйлән» телевизион җыр фестиваленең тавыш бирү этабы тәмамланды! Ниһаять, «Тамашачы мәхәббәте»н яулаган катнашучы билгеле! Тавыш бирү буенча нәтиҗәләр түбәндәгеләр: 1. Сәид Галиуллин - 26311 (41.16%) 2. Ләйлә Гатауллина - 24459 (38.26%) 3. Асылъяр Асылхуҗина - 8452 (13.22%) 4. Самир Камалов - 1076 (1.68%) 5. Язилә Хисамова - 749 (1.17%) 6. Рөстәм Хөсәенов - 555 (0.87%) 7. Зәлинә Шакирова - 552 (0.86%) 8. Иван Пугачев - 548 (0.86%) 9. Адилә Ишалина - 441 (0.69%) 10. Илназ Харисов - 180 (0.28%) 11. Стелла Егорова - 162 (0.25%) 12. Элина Чеботарева - 158 (0.25%) 13. Сәфирә Гыймадиева - 136 (0.21%) 14. Динә Хәбибуллина - 103 (0.16%) 15. Әминә Мортазина - 35 (0.05%) 16. Кирилл Михайлов - 14 (0.02%) Иң күп тавыш җыеп, беренчелекне яулаган яшь йолдызыбыз - Сәид Галиуллин! Ул 26311 (41.16%) тавыш белән «Сәйлән» музыкаль проектының махсус номинациясе - «Тамашачы мәхәббәте»н яулау бәхетенә иреште! Чын күңелдән котлыйбыз! Иҗади уңышлар телибез!

24.10.2022
Prev. 1 ... 174 175 176 177 178 ... 375 Next
Главная Программа Видео Шортс Поиск